Kəmwetə 7 - The New Testament in the Babanki language

Viʼi Islel vi nkamsə̀ ghɨ nə̀ njʉ̀sə̀ kàʼ a məwum ə̀ nkàʼ

¹ Kənyʉ̀ kə tsen a mà ə̀ mbè yen ə̀ ndìʼ ntsɨ̀ŋsə ngə̀ŋ Nyìngòŋ sə̀ kàʼ sə ti a təshyə tə mbi tèn tə kàʼ. Vəwenə nti a lì ghaʼa fwof fa təshyə tèn tə kàʼ ndi kə ghə̀ à chò fa nse, ko fa mù, ko ə nə̀ʼ fəkòʼ.

² Mà bè yèn ntsɨ̀ŋ ngə̀ŋ ə̀ Nyìngòŋ ə tsen, ghə̀ kuʼ ə̀ vì fa shyə a chʉzhʉ ə saʼa fa tsu, kiʼ kəfo a Nyìngòŋ a ghə̀ ko lu pfʉ ə chwìtə̀ viʼi tsu. Ntɨ̀ŋ ayì zɨmə̀ dzàŋ ntsɨ̀ŋsə ngə̀ŋ ə̀ Nyìngòŋ shì sə̀ kàʼ a Nyìngòŋ ə̀ nku li àdyoʼ à vəwenə la vəwenə byɨsə nse bènə̀ mu no a gɨ to

³ Gàʼà la “Kə ghə̀ŋ à byɨ̀sə nse, ko mu, ko ə̀ nkòʼ, ə zaʼa fa zhʉ a yès a ku ə chwitə a təchʉ̀, ə viʼi shyèʼ ə̀ Nyìngòŋ vəghəŋ ə myetə.”

⁴ Mà zhʉ və shə̀ʼtə̀ əwen ə wìʼ yi à mò a və̀ nkiʼi əchwitə, vəwenə ndìʼ ə̀ nkamsə̀ ghɨ nə̀ njʉ̀sə̀ kàʼ a məwum ə̀ nkàʼ mu və chwìtə̀ fa ntə̀ʼsə ngwàʼa ngə̀ŋ viʼi ə̀ njʉ̀sə̀ bò.

⁵ Və̀ nchwìtə viʼi nkamsə njʉ̀sə̀ bò fa ngwàʼa ngə̀ŋ ə Judà, nə̀ viʼi nkamsə njʉ̀sə̀ bò ngwàʼ ə ngə̀ŋ ə̀ Luben, nə̀ viʼi nkamsə njʉ̀sə̀ bò fa ngwàʼ ə ngə̀ŋ Gad.

⁶ Viʼi nkamsə njʉ̀sə̀ bò ə̀ mfʉ fa ngwàʼ ə ngə̀ŋ Ashel, viʼi nkamsə njʉ̀sə̀ bò fʉ̀ fa ngwàʼ ə ngə̀ŋ ə̀ Naftalì, viʼi nkamsə njʉ̀sə̀ bò fʉ̀ fa ngwàʼ ə ngə̀ŋ ə̀ Manasè,

⁷ viʼi nkamsə njʉ̀sə̀ bò və fʉ̀ fa ngwàʼ ə ngə̀ŋ ə̀ Simìyòn, viʼi nkamsə njʉ̀sə̀ bò və fʉ̀ fa ngwàʼ ə ngə̀ŋ ə̀ Levì, viʼi nkamsə njʉ̀sə̀ bò və fʉ̀ fa ngwàʼ ə ngə̀ŋ ə̀ Isaka.

⁸ Viʼi ə̀ mfʉ nkamsə njʉ̀sə̀ bò fa ngwàʼ ə ngə̀ŋ ə̀ Zebulùn, ə̀ fʉ̀ nkamsə njʉ̀sə̀ bò fa ngwàʼ ə ngə̀ŋ ə̀ Josèf bènə̀ viʼi nkamsə njʉ̀sə̀ bò fa ngwàʼ ə ngə̀ŋ ə̀ Benjamìn.

⁹ Fà yì a bàm, mà kɨ̀blə̀ ə̀ yen ənòyn ə viʼi və tsenə və taŋə lè mu vəwenə mòʼ vədàlə və fəfəvə nə̀ əzaŋ à vəwenə avu və ti a shɨ ə̀ kəfwoyn kì bènə̀ wàyn bi njɨ̀ yì. Viʼi a vyi ə̀ ndìʼ tənkì tə viʼi no tətsèm, mu və fʉ̀ fa təshyə tə loʼ tətsèm, be gàʼà tò təgàʼ tətsèm.

¹⁰ Vəwenə nzɨmə̀ gàʼà no a gɨ̀ ə to la, “Adìʼ Nyìngòŋ vəghəŋ a ghə̀ ŋwʉʼ a kəfwoyn wenə̀ wàyn bi njɨ̀ ghèn a və bwoŋsə̀ vəghəŋ!”

¹¹ Ntsɨ̀ŋsə ngə̀ŋ Nyìngòŋ no sə̀ tsèm sə tɨmə̀ kàʼ kəfwon kì wenə̀ vəchəʼ vi bènə̀ ə̀fo ə zhwisəvə vi sə̀ ŋàŋlə dyʉ̀ nə̀ təkə̀ʼ tə vəwenə a nse ghoʼsə̀ Nyìngòŋ,

¹² gàʼà la, “Kə diʼ to a lì, mbwaʼmə̀, nə̀ əbayn, nə̀ ətof, nə̀ əku kəzòŋ, nə̀ ə gumlə, nə̀ àdyoʼ diʼ ghə̀ wenə no məzhʉ̀ ntsèm! kə ndiʼ to a lì.”

¹³ Chəʼ tsen fuʼtə̀ bèm à mò Joyn la, “Venə diʼ və ndò a və moʼò vədàlə və fəfəvə a? Vəwenə lù fa fe?”

¹⁴ Mà bwènsə̀ à wen la, “Ba, à kɨ̀ tò wù.” Ghə̀ mù gàʼ à mò la, “Venə diʼ viʼi a və cho li fa tì ngəʼsə sə̀ fàynsə sə̀. Vəwenə nshʉ li vədàlə və vəwenə ne mənlyuŋ mə wàyn bi ənjɨ̀ və sə fəfə fəfə.

¹⁵ A lə̀ kənyʉ̀ a vəwenə ti a shɨ kəfwoyn kə Nyìngòŋ, shyèʼè à wen nə̀nchwì bènə̀ nəntʉʼʉ à wen ə tì ngə̀ŋ. Wìʼ yì a ghə̀ ŋwʉʼ a kəfwoyn ne ndiʼ wenə̀ vəwenə, kɨ̀ŋtə̀ vəwenə.

¹⁶ Jɨ̀ŋ ə ko be lu zaf vəwenə, kènla ətoŋ ə mù be lu zɨm vəwenə. Chwìchwì kò əshi lɨməvə ko lu be nyùʼ vəwenə,

¹⁷ byìʼàndo wàyn bi njɨ̀ yì a ghə̀ ŋwʉʼ a tì kəshi kə kəfwoyn ne ndiʼ ntsɨ̀ŋ ə̀ vəwenə. Ghə̀ ne lyɨ̀ vəwenə dyʉ̀ nə̀ vəwenə ashi a mu mi a ku əbwòŋ ko mə lu nzɨmə. Nyìngòŋ be tì məshɨ mə vəwenə no ntsèm fà vəwenə ashɨ.”