Kəmwetə 6 - The New Testament in the Babanki language

Vəmɨ̀ŋ vi sòmbo

¹ A ə̀ ndìʼ tò a zhʉ aghèn, mà yen ando wàyn bi ənjɨ̀ ə bɨtə̀ mbì mɨ̀ŋ fa tì vəmɨ̀ŋ vi sòmbo. Mà zhʉ ando kəfo kə zhwisəkə kətsenkə fa tì ə̀fo zhwisəvə vi ə̀ kàʼ ə bwankə̀ to nə̀ ghʉ ə̀ gàʼ la, “fʉ̀ ə̀ vì!”

² Mà sə ki ə̀ yèn əlyəŋ ə fəfəghə tsenghə, wìʼ diʼ à yi kətʉ kiʼ fənchyə. Və ku ə̀sòʼ ə təfòyn à wen, ghə̀ nyɨŋ ə̀ fʉ̀ to nə̀ wìʼ a ghə̀ lu ə ntemə ghoŋ zhɨ tò zhɨ be diʼ ə tem ə zhɨ.

³ Wàyn bi ənjɨ̀ yì bè bə̀ytə̀ mɨ̀ŋ ə tsen no ə zhʉ kò mà bè zhʉ ando kənkùmtə̀ kəfo zhwisəvə vi ə gaʼà la, “fʉ ə̀ vì!”

⁴ əlyəŋ ə tsenghə bè fʉ̀ bàŋə̀ la bùŋ. Və ku kədyòʼ bènə̀ nyì ə̀ ngwələŋ ə dyèfə à wìʼ a ghə̀ ə̀ ŋwʉʼ à yi kətʉ la ghə̀ ə nsə̀ʼə̀ əghoŋ a mbi ndi viʼi ə nzhwilə̀ vəlèmə̀ və vəwenə.

⁵ A ə̀ ndìʼ ando ghə̀ bè ə̀ mbə̀ytə̀ mɨ̀ŋ tsen ə və ndiʼ vətaʼ, mà bè zhʉ ando kəfo kə zhwisəkə kətsenkə gaʼà la, “fʉ̀ ə̀ vì!” Mà sə ki ə̀ yèn əlyəŋ ə fenəghə mu wìʼ a ghə̀ ə̀ nyɨŋə à yi kətʉ ghaʼ li vəkilò və bò à wen ə kəvu.

⁶ Mà zhʉ gɨ̀, ghə̀ gàʼa to nə̀ gɨ̀ wìʼ fa ntìntìn ə̀fo vi ə̀ kàʼ la, “Əko shyèʼ ə kətsi kə mpfen ne kwʉ̀ʼ əzen tò kilò to kəbayn a və bvu fa wit muʼ ko əzen vəkilò və kəbayn a və bvu fa balley vətaʼ, alì kə a kùm məzhiʼ nə̀ məlyʉ̀ʼ.”

⁷ Wàyn bi ənjɨ̀ yì bè bə̀ytə̀ mɨ̀ŋ ə tsen ə və ndiʼ vəkàʼ. Mà zhʉ kəmwètə̀ kə kəfo kə zhwisəkə kə gàʼ la, “Fʉ̀ ə̀ vì!”

⁸ Mà sə ki ə̀ yèn əlyəŋ tsenghə ghə̀ lyìʼlə̀ kə̀ʼə̀, əzhiʼ wìʼ a ghə̀ ə̀ ndìʼ à yi kətʉ ə̀ ndìʼ Əpfʉ. A ə̀ ndìʼ a lì, əloʼ vəmpfʉvə nse dzɨ̀mtə̀ vì fa bàm. Və ku kədyòʼ la ə̀fo avenə gətə nse məshyə̀ ə̀ nkàʼ, ə̀ lyɨ̀ əshyə̀ mùʼ zhwilə viʼi vyi a və diʼ tsu nə̀ nyì ngwələŋ, nə̀ jɨ̀ŋ ə byɨ, nə̀ təkwaʼa tə fansətə. Nyamsə tətoʼ be zhwilə̀ vətsenvə.

⁹ Wàyn bi ənjɨ̀ bè bə̀ytə̀ mɨ̀ŋ tsen ə və ndiʼ vətàyn, mà yen ə̀ zhwì ə viʼi vyi a və̀ nzhwilə̀ byìʼàndo vəwenə nshə̀ʼtə̀ kənyʉ̀ kə Nyìngòŋ be ti a nə̀ viʼi və yenəvə a kənyʉ̀ ə̀ Nyìngòŋ. Vəwenə ndìʼ ati kəchiʼ kə kəku.

¹⁰ Əzhwi a vyi zɨmə̀ gàʼà no a gɨ to la, “Bobo a ghə̀ kiʼi àdyoʼ ə̀ tsèm, ŋwòʼə̀ be diʼ nəmwèʼè, kə a lyɨ̀ ə zhʉ ale ə wù soʼ viʼi venə a nse ə ku ngəʼ à vəwenə ando vəwenə tə zhwì yes a?”

¹¹ Və mù kù vədàlə və fəfəvə à vəwenə no vətsèm ə̀ gàʼ à vəwenə la vəwenə be zhʉ̀tə̀ fəshitə̀ ə zaʼa a zhʉ a viʼi a vyi ne be zhwilə vəlèmə̀ vəŋə vi a wenə̀ vəwenə tə̀ ndiʼ ghə̀ŋ və wenə mu kuʼ a muʼu kuʼ ə̀ kwʉ̀ʼ.

¹² A ə̀ ndìʼ ando ghə̀ ə̀ mbə̀ytə̀ mɨ̀ŋ ə tsen ə və ndiʼ ə̀ ntʉfə, mà sə ki ə̀ yèn ando pfèn ə fànsə shenə ə̀ bè yèn ando chʉzhʉ ə kaʼkə̀ sə fenə to nə̀ fənchì fə di əpfʉ, sàŋ bè kaʼkə sə bàŋə̀ to nə̀ mənlyuŋ,

¹³ mədzɨ̀ŋ mə̀ kàŋ fəŋkə̀ a nse to nə̀ ə fəkoʼ a zhʉ fə zàʼà ashɨ ə chʉ ə lɨ̀m wen benə ando əfwof ə chò nə̀ʼə̀,

¹⁴ əkaŋ ə somə to nə̀ ŋwàʼlə̀ a və lèmə̀, pfensə no sətsèm nə̀ əshi nsesə a və diʼì a tì àmù somə fà yi əshi.

¹⁵ Təfòn tə mbi, nə̀ viʼi vəghoʼkəvə, nə̀ ə tʉtʉ vəsugyèʼ, nə̀ viʼi ə ko, nə̀ viʼi kədyòʼ, no viʼi vətsèm, əkòs nə̀ viʼi vyi a və ko diʼ əkòs ə nyɨŋkə lyòmtə̀ a təfyə̀ nə̀ a ti təghu a pfensə,

¹⁶ ə̀ sə zɨmə̀ dzàŋə̀ pfensə nə̀ təghu gàʼà la, “Ghə̀ŋ fəŋkə à yès ə kətʉ ə̀ lyòmtə̀ yès fà wìʼ ghèn a ghə̀ ŋwʉʼ a kəfwon lə̀ bènə̀ fa ngəʼ a wàyn bi ənjɨ̀ diʼ ə ku à yès byìʼ tin ə fwi ə wen.

¹⁷ Kə diʼ a lə̀ byìʼe kətsi kə ghoʼkə vəwenə diʼ tin ə fwi ə̀ vəwenə vi li a no wìʼ muʼ ko zì ghə̀ nyɨŋ.”