Kəmwetə 5 - The New Testament in the Babanki language

Wàyn njɨ̀ nə̀ ŋwàʼlə̀ ə lemtə

¹ Mà bè yèn əbʉʼ ŋwàʼlə̀ a və lèmə̀ a kəvu kə kwoŋ ə toghə wìʼ yì a ghə̀ ə̀ ŋwʉʼ a kəfwon lì mu və nyòʼò li tsu no məshyə̀ ə̀ ntsèm. Əbʉʼ ŋwàʼlə̀ ayi ə̀ ndìʼ mu və shwinə̀ li nə̀ mɨ̀ŋ ə̀ shi sòmbo fà yi təchʉ̀.

² Mà yen ə ntsɨ̀ŋ ə̀ ngə̀ŋ Nyìngòŋ ə ghoʼo tsen ghə̀ kiʼ àdyoʼ no ghoʼo, ghə̀ zɨmə̀ gàʼà la, “A kwʉ̀ʼ ndò ə me əbə̀ytə mɨ̀ŋ ghèn ə bòʼ ŋwàʼlə̀ ghèn a?”

³ Alì wìʼ ə̀ nko diʼ a kàŋ ko a nse ko a loʼ ə vəmpfʉ və nse a ghə̀ nzì ghə̀ boʼ ŋwàʼlə̀ ayì ə̀ lye tin ə̀ yi.

⁴ Mo Joyn dì no mwèʼè mwèʼè, byìʼàndo və nko yèn wìʼ a ghə̀ ə kwʉʼ mè əbòʼ ŋwàʼlə̀ ayì ko ə lye tin ə̀ yi.

⁵ Chəʼ tsen gàʼ à mò la, “kə be dì byìʼàndo abìkəŋ ə̀ ngwaʼa ngə̀ŋ ə Judà a diʼì wàyn Devìt ə soyn li ə̀ zhɨ mbyɨ sə diʼ ə bə̀ytə mɨ̀ŋ ghèn ə̀ shi sòmbo lə̀ əbòʼ əbʉʼ ŋwàʼlə̀ ghenə.”

⁶ Mà yen Bobo Yesò Klistò a ghə̀ ndi to wàyn bi ənjɨ̀, ghə̀ ti a kəshi yì a kəfwon kì ə̀ nti tsu lì mu ə̀fo zhwisəvə vi nə̀ vəchəʼ vi ə nyɨŋ li ə nkaʼ wen. Wàyn bi ənjɨ̀ ayì ə̀ nkìʼ ə ndoŋsə sòmbo bènə̀ ashɨ sòmbo andiʼ əzhwi ə Nyìngòŋ sòmbo a ghə̀ ə̀ ntɨmə̀ a mbi ə̀ tsèm. Wàyn ə̀ bi njɨ̀ ayì ə̀ nkə̀ʼə̀ tò sə və shyə li.

⁷ Wàyn bi njɨ̀ ayì dyʉ̀ ə̀ shì əbʉʼ ŋwàʼlə̀ yi fa kəvu kə kwoŋ toghə wìʼ yì a ghə̀ ə̀ ŋwʉʼ a kəfwon lì.

⁸ A ə̀ ndìʼ ando ghə̀ ə̀ nshi əbʉʼ ə ŋwàʼlə̀ ayi, ə̀fo zhwisəvə vi ə̀ kàʼ nə̀ vəchəʼ vi njʉ̀sə̀ kàʼ a məwum ə̀ mbò fəŋkə à wen ə shɨ. No ndò ə̀ nkìʼ əlyuŋ nə̀ kəkaŋ kə a və shɨtə̀ nə̀ gul mu kələŋ kə lwin li tsu à diʼ təjɨ̀m tə viʼi və byɨməvə.

⁹ Vəwenə sə̀ zhɨmə ndzàŋ ə fi la, “Wàyn njɨ̀, wù ə kwʉʼ li ə̀ me əshi əbʉʼ ə ŋwàʼlə̀ ghenə ə bə̀ytə mɨ̀ŋ yi ə bòʼ byìʼe və nzhwi li wù, wù pfʉ ə̀ zèn kətʉ kə viʼi ə ngwàʼsə̀ tsèm nə̀ viʼi təgàʼ tə tsèm bènə̀ viʼi təloʼ tə tsèm a mbi. Wù ə̀ nzèn kətʉ kə vəwenə ne mənlyuŋ ə̀ bwènsə̀ ku à Nyìngòŋ.

¹⁰ Wù ə ne li vəwenə sə diʼ vunə ngwàʼ ə̀ vəchəʼ və ngə̀ŋ ə̀ Nyìngòŋ a və shyèʼè à Nyìngòŋ ə̀ vəghəŋ. Vəwenə lu soʼ ə mbi ghèn.”

¹¹ Mà bè sə ki ə̀ yèn ə ntsɨ̀ŋsə ngə̀ŋ ə̀ Nyìngòŋ və taŋə lè, ando sə tɨmə̀ ə̀ kaʼ kəfwon kì əboʼsə nə̀ ə̀fo zhwisəvə vi bènə̀ vəchəʼ vi.

¹² Vəwenə nzhɨmə ndzàŋ no a gɨ to la, “Wàyn bi ənjɨ̀ a və̀ nzhwi ə kwʉʼ li ə̀ me əkiʼi kədyòʼ nə̀ əghoʼ, nə̀ ətof, nə̀ gumlə, nə̀ əghoʼsə bènə̀ ə mbwaʼmə̀.”

¹³ Mà zhʉ no tè ghò a ghə̀ diʼì a kàŋ nə̀ a nse nə̀ a loʼ ə̀ vəmpfʉ və nse nə̀ a mù mə nghoʼomə̀ bènə̀ a mbi ə̀ tsèm zhɨmə la, “Ə wen yì a ghə̀ ŋwʉʼ a kəfwon bènə̀ wàyn bi ənjɨ̀, və diʼ əbwaʼsə̀ ghə̀ŋ, gumlə̀ ghə̀ŋ, ghoʼsə̀ ghə̀ŋ nə̀ kədyòʼ no məzhʉ ə̀ ntsèm.”

¹⁴ Ə̀fo zhwisəvə vi ə̀ kàʼ gàʼ la, “Amèyn” Vəchəʼ vi fəŋkə a nse ə̀ ghoʼsə Nyìngòŋ wenə̀ wàyn bi ənjɨ̀ a ndiʼ Yesò Klistò lì.