Kəmwetə 4 - The New Testament in the Babanki language

Joyn yen ando və ghoʼsə̀ Nyìngòŋ a kàŋ

¹ A ndìʼ ando ənyʉ̀ venə̀ ncho, kənyʉ̀ kə bè fʉ̀ à mò a kə̀ʼ a nə̀ jòm. Mà yen əchʉ ə ngə̀ŋ ə̀ kàŋ ə̀ boʼo. Gɨ̀ ə̀ mbì yì a mà yì zhʉ ndiʼ gɨ Yesò Klistò ghə̀ gàʼà à mò kù to nə̀ ə̀soŋ bè gàʼ a mò la, “Kuʼ ə̀ vì ashyə̀ mà diʼ kənyʉ̀ kì à wù a kə diʼ ə lyɨ̀ kəshi fa bàm ənyʉ̀ venə.”

² Tò a zhʉ ayì, kəzhwì kə ŋwoʼəkə vì à mò Joyn, mà yen kəfwoyn a kàŋ wìʼ ŋwʉʼ tsu,

³ əkə̀ʼ ə wìʼ ayì so to nə̀ ngùʼ jaspa nə̀ ngùʼ kaneyan. Kəmpfembiʼ kə ndiʼ mu kə nyɨŋ li ə̀ kaʼ kəfwoyn a kì, be so to nə̀ ngùʼ emelald.

⁴ Əfwoyn ə tsenəvə ndìʼ njʉ̀sə̀ kàʼ a məwum ə̀ mbò mu və nyɨŋ li ə̀ nkaʼ kəfwon kì, vəchəʼ njʉ̀sə̀ kàʼ a məwum ə̀ mbò ŋwʉʼ tsu mu vəwenə mòʼ vədàlə və fəfəvə nchiʼ təsòʼ mu və shɨ̀tə̀ nə̀ gul à vəwenə tʉ.

⁵ Əghʉ mwàntə̀, bwankə̀, gɨsə be fʉ vì fa kəfwoyn kə ghoʼokə kì. Ə̀ nkàʼtə̀ ə̀ mbaynə fa mbì kəfwon ayì sòmbo, andiʼ əzhwi ə Nyìngòŋ ə̀ sòmbo.

⁶ Andìʼ a lì mo be diʼ a mbì kəfwoyn akì baynə to nə̀ awoŋ. Ə̀fo zhwisəvə tsenəvə ndìʼ ə̀kàʼ ə̀kàʼ no təshyə tə kəfwon tətsèm kiʼ ashɨ à vəwenə no ghoʼo fa bàm bènə̀ fa mbì.

⁷ Mbì kəfo kə zhwisəkə nkə̀ʼə̀ to nə̀ abìkəŋ, kənkùmtə̀ kə kə̀ʼə̀ to nə̀ mbòŋmbòŋ, kətsenkə kiʼ əkə̀ʼ ə wìʼ, kə bàm kə diʼ to nə̀ bole mbʉʼ ə tàynə.

⁸ Əfo avenə no tsèm ə̀ nkìʼ təvò ə̀ ntʉ̀fəntʉ̀fə, kiʼ ashɨ tò ə̀wen ə̀ tsèm nə̀ à vəwenə tì wèn. Vəwenə nzhɨmə ndzàŋsə tò məzhʉ̀ ntsèm, zhɨmə nəntʉʼʉ nə̀ nə̀nchwì la, “Wu ŋwoʼə, wu ŋwoʼə, wu ŋwoʼə dìʼ tìʼ àdyoʼ ə̀ tsèm, Ghə̀ ə̀ ndìʼ, diʼ luwèn be diʼ ə lu vì!”

⁹ Ə̀fo zhwisəvə avenə nzhɨmə ndzàŋsə ku əghoʼsə, nə̀ gumlə bènə̀ kəzòŋ à wìʼ yì a ghə̀ ŋwʉʼ a kəfwoyn yì, ə̀wen yì a ghə̀ diʼì no məzhʉ ə̀ ntsèm.

¹⁰ Vəwenə nzhɨmə a lì no zhʉ kò, vəchəʼ vi njʉ̀sə̀ kàʼ a məwum ə̀ mbò laŋtə̀ a shɨ wìʼ yì a ghə̀ ŋwʉʼ a kəfwoyn lì ghoʼsə̀ wen yì a ghə̀ ə diʼì no məzhʉ ə̀ ntsèm. Vəwenə mbe tsuʼtə̀ təsòʼ tə təfòn ə̀ vəwenə tì mòʼò a mbì kəfwon kì zhɨmə ndzàŋ la,

¹¹ “Bobo ə Nyìngòŋ ə̀ yes, wù kwʉʼ li ə və əghoʼsə nə̀ gumlə be bwomsə̀ wù a kədyòʼ a wu kiʼì, byìʼàndo wù ə̀ nshɨtə fò tsèm ə̀ bè ə̀ nè la və ndiʼ ə̀ to.”