Kəmwetə 3 - The New Testament in the Babanki language

Ntɨm à ntsèntə̀ viʼi və byɨməvə a Saldìs

¹ Nyòʼo à ntsɨ̀ŋ ə̀ ngə̀ŋ Nyìngòŋ a ghə̀ diʼì a ntsèntə̀ viʼi və byɨməvə a Saldìs la: Wìʼ yì a ghə̀ kiʼì əzhwi ə Nyìngòŋ vi sòmbo be kiʼ mədzɨ̀ŋ mì sòmbo gàʼ la, Mà kɨ əshwèʼ ghəŋə. Viʼi ə yenə ghə̀ŋ la ghə̀ŋ dìʼ vəto, alì mu ghə̀ŋ ə pfʉkə li kəzhwì.

² Ghə̀ŋ lukə lì fa mbəynsə ntùʼmə̀ nə̀ əbyɨmə tyetə yi a ghə̀ŋ bù kiʼi, a bwen a lì mu ghə̀ŋ a myètə pfʉkə byìʼàndo mà yen li la əshwèʼ ghəŋə ko kwʉ̀ʼ a shɨ Nyìngòŋ ghom.

³ Ghə̀ŋ bwensə̀ kwòʼtə̀ ənyʉ̀ vyi a və ndìʼsə̀ ghə̀ŋ tsu bènə̀ ə̀vi a ghə̀ŋ ə̀ nzhʉ. Ghə̀ŋ kwitə tətyɨm ə təŋtə fà ghə̀ŋ ə mbyɨsə nè ənyʉ̀ a vyi. Ghə̀ŋ sətsèn ə̀ fàŋ ke lùkə̀, mà bvʉ̀tə̀ vì à ghə̀ŋ tò nə̀ tsòŋ kèn la ghə̀ŋ a kɨ zhʉ a mà vì.

⁴ Alì viʼi vətsenvə bù dìʼ tò və tyetə a Saldìs a vəwenə ghʉ ə̀ ndisə vəwenə sə̀ laynə. Vəwenə lu mòʼ ə ndisə fəfəsə yo vəwenə njèʼè a muʼu byìʼàndo vəwenə layn li ə nkwʉʼ.

⁵ Və lu lafsə no ndò yì a ghə̀ lu soyn ə̀ zhɨ mbyɨ nə̀ ndisə fəfəsə, ko ndiʼ la mà lu tsəʼsə̀ zhiʼ ə wen fa ŋwàʼlə̀ ə̀bwòŋ. Mà lu tɨmə gàʼ to ndayn la mà kɨ wen a shɨ Tìʼ ə ghom wenə̀ ntsɨ̀ŋsə wen.

⁶ “A nkiʼ tè ndò kiʼ ətiʼitiʼi, ghə̀ tùʼù zhʉ̀tə kənyʉ̀ kì a kəzhwì kə ŋwoʼəkə gàʼà à ntsèntə̀sə viʼi və byɨməvə.”

Ntɨm à ntsentə̀ viʼi və byɨməvə a Fìlàdefìyà

⁷ “Nyòʼo à ntsɨ̀ŋ ə̀ ngə̀ŋ Nyìngòŋ yì a ghə̀ diʼì a Fìlàdefìyà la: ənyʉ̀ venə gàʼ wìʼ yì a ghə̀ ŋwòʼə̀, diʼ nəmwèʼè be kiʼ kənzàs kə ngə̀ŋ fòyn Devìt a ghə̀ sətsen ə bòʼò kò ndiʼ la wìʼ zi ghə̀ shwìnə̀, be shwìnə̀ ko ndiʼ la zi ghə̀ bòʼò.

⁸ Mà kɨ təshyèʼ ə təŋtə. Ghə̀ŋ yen a! mà bòʼò li əchʉ ngə̀ŋ ə nghʉsə à ghə̀ŋ a wìʼ ko zì ghə̀ shwin. Mà kɨ la ghə̀ŋ ə ko tùʼù kiʼ kədyòʼ alì ə nghʉ ə̀soʼ ə ghomə kèn la ghə̀ŋ ə tyen li mò.

⁹ Ghə̀ŋ zhʉtə a! mà a nè viʼi ntsèntə̀ Satan vi a və jèʼè lobtə̀ gàʼà la vəwenə diʼ vəjew lì, ə vəwenə vi ə̀ làŋtə à ghə̀ŋ a shɨ ə̀ yèn la mà kòŋə̀ ghə̀ŋ.

¹⁰ Mà ne bwòŋsə ghə̀ŋ fa zhʉ ə ngəʼ yì a ghə̀ vì à mbi ə̀ tsèm ə mwòmsə viʼi vyi a və tsi a kwi nse byìʼàndo ghə̀ŋ ə zhʉ li kənyʉ̀ kì a mà ə gàʼà la, ghə̀ŋ ə wensə.

¹¹ Mà sə̀ laʼtə̀ ə bwènə̀ vì, ghə̀ŋ tuʼù ə̀ ghàʼ tò əziʼi yi a ghə̀ŋ sə̀ kiʼ ndi kə wìʼ lù sòʼ əmoʼtə ghəŋə.

¹² A lù soyn ə̀ zhɨ̀ tè ndò ə̀ zhɨ ə mbyɨ, mà lù nè ghə̀ ə ndiʼ a nə̀ ntom a ngə̀ŋ ə̀ Nyìngòŋ ghom ko ndiʼ la ghə̀ be a fʉ̀ fa tsu. Mà lu nyòʼ əzhiʼ ə Nyìngòŋ ghom à wen ə wèn ə be nyòʼ əzhiʼ ə ntə̀ʼ ə ghoʼo ə̀ Nyìngòŋ ə̀ ghom à diʼ kəshi a viʼi və byɨmə və no vətsèm ə lu ntsi a kə shiʼi vì fà Nyìngòŋ ə̀ ghom a kàŋ. Mà be lu nyòʼ əzhiʼ ghomə fighə à wen ə wèn.

¹³ A nkiʼ tè ndò kiʼ ətiʼitiʼi, ghə̀ tùʼù zhʉ̀tə kənyʉ̀ kì a kəzhwì kə ŋwoʼəkə gàʼà à ntsèntə̀sə viʼi və byɨməvə.”

Ntɨm à ntsèntə̀ viʼi və byɨməvə a Ladesiyà

¹⁴ Ghə̀ bè gàʼ à mò la, “Nyòʼo à ntsɨ̀ŋ ə̀ ngə̀ŋ ə̀ Nyìngòŋ yì a ghə̀ ə diʼì a ntsèntə̀ viʼi və byɨməvə a Ladesiyà la: Ghèn diʼ ə ntɨm a ghə̀ lu fà wìʼ yì a dzàŋə̀ nə̀ Amèyn, à diʼ ə̀ wen diʼ wu jùŋ yì a diʼì wu yen nəmwèʼè byìʼì Nyìngòŋ. Nyìngòŋ ə̀ nshɨ̀tə no ghò a mbi ə chò fà wen.

¹⁵ Mà kɨ təshyèʼ ə̀ təŋtə. Mà kɨ la ghə̀ŋ ə ko lɨ̀mə̀ kò ndiʼ la ghə̀ŋ ə zhʉ̀ à ghə̀ŋ ə byɨmə. Kə yì bòŋ la ghə̀ŋ ə nlɨ̀mə̀ ko ə nzhʉ̀.

¹⁶ Ando ghə̀ŋ diʼ to nə̀ mù a mə ko lɨmə ko mə zhʉ̀ lì, mà a chʉ ghə̀ŋ fà mò əchʉ̀.

¹⁷ Ghə̀ŋ ə gàʼà la ghə̀ŋ kiʼi ə ko be diʼ mu ghə̀ŋ ə ghoʼ li ə̀ nkwʉʼ kèn la ghə̀ŋ ə bè gho kəfo. Ghə̀ŋ alì kò ghə̀ŋ lu kɨ la nəmwèʼè dìʼ la ghə̀ŋ dìʼ nji əfo, diʼ tò a nshinsə a nshinsə, femə, diʼ ənfyɨf, be diʼ tò ənàʼ à ntsuʼ.

¹⁸ Mà mù sə tyɨftə ghə̀ŋ la ghə̀ŋ zen ə nkàyntə̀ gul fà mò ndi ə ndiʼ viʼi ə ko ə̀ bè zèn vədàlə və fəfəvə mòʼ chiʼtə təwen ə təŋtə tsu ndi ə lyòmtə̀ kətʉ kə diʼikə kì a ghə̀ŋ kiʼi byìʼì ənàʼ ntsuʼ ə vəŋə. Ghə̀ŋ be zèn kəfʉ ə̀ wè à ghə̀ŋ əshɨ ndi ə be ə nyenə əshi

¹⁹ Mà kəŋkə̀ be ku ngəʼ à viʼi vi a mà ə kòŋə̀. Ghə̀ŋ ə nlɨ̀mtə̀ ə̀ bè kwitə tətyɨm ə təŋtə fà ghə̀ŋ ə mbyɨsə.

²⁰ Ghə̀ŋ zhʉtə a! Mà ti a chʉ ə ngə̀ŋ kùmtə̀, mu à zhʉ̀ tè ndò ə̀ zhʉ̀ gɨ̀ ghom ə̀ bòʼ, mà à kwen ə̀ vì yo wen ə ndiʼ a kənyʉ̀ kə mùʼ be zhɨ a muʼu.

²¹ No ndò a ghə̀ nè soyn ə̀ zhɨ mbyɨ, ma nè ghə̀ ŋwʉʼʉ ə̀ boʼsə kəfwoyn ə komkə ando nkàyntə̀ mò sə̀ diʼ mu mà ə nsoyn li ə̀ zhɨ mù sə̀ ŋwʉʼ boʼsə kəfwoyn kə Tìʼ ə ghom.

²² No ndò a ghə̀ kiʼì ətiʼitiʼi, ghə̀ tùʼù zhʉ̀tə kənyʉ̀ kì a kəzhwì kə ŋwoʼəkə gàʼà à ntsèntə̀ viʼi və byɨməvə.”