Kəmwetə 21 - The New Testament in the Babanki language

Əkaŋə ə fìghə nə̀ nse ə fi

¹ Fa əbàm nyʉ̀ na ghèn, ma yenə əkaŋ ə fìghə nə̀ nse ə fi mu əkaŋ ə mbì nə̀ nse ə mbì sə diʼ mù ghə̀ tə mè, boʼsə no nə̀ fwaynə ə ghoʼo ghə̀.

² Ma mu yen ndo Nyìngòŋ ə tensə Ntə̀ʼ ə laynə andiʼ Jelusalèm ə fi, ghə̀ sə shiʼi vi fa kàŋ mu və shɨtə li làbsɨ wen sə və làbsɨ wùwì la ghə̀ dyʉ̀ yèyn lɨmə wen.

³ Ma be zhʉ ghɨ ə to ə tsen ando ghə̀ fʉ̀ vi fa kəkɨ təfòyn ayi, ghə̀ gàʼ a mò la, “Yen a, Nyìngòŋ ə na ntsi wenə viʼi luwen. Ghə̀ na diʼ wenə vəwenə, vəwenə diʼ viʼi wen. Nyìngòŋ no fa wen a ngeŋ na diʼ wenə vəwenə.

⁴ Ghə̀ lu chì məshɨ no ə tsèm fa ashɨ nə̀ vəwenə ko pfʉ ə na be ndiʼ. Wìʼ ko bè diʼ lu kusə tebè shɨnsə, ko ghə̀ di, ko kəfòkə ə be zàfə tebè wìʼ byìʼì ando nyʉ̀ ə muvə chò li.”

⁵ Wìʼ yi a ghə̀ nyʉ̀ʼ a kəkɨ ə fòyn na yi ə mu gàʼ la, “Ghə̀ŋ yen a! Ma na nè ə nyʉ̀ ə tsèm ə bwensə ndiʼ to a fi.” Ghə̀ gàʼa a mò Joyn la, “Nyoʼo nyʉ̀ na venə. Və diʼ to no nəmwèʼè, kwʉ̀ʼʉ̀ ndiʼ no ndo byɨmə.”

⁶ Ghə̀ ngaʼa li mbe gaʼa a mò la, “Ənyʉ̀ ə tsèm ə kuʼu li! Ma diʼ Alfà be diʼ Omegà, mu à lə kəzìtə̀ nə̀ kəmwètə kə nyʉ̀ ə tsèm. Ma na ku mu no tèbè a ndò yi a ətoŋ mu nə̀ zɨmtə wen, a ghə̀ nyʉ ə faŋ kò ghə̀ lə lòʼ kəfo. Mu na mèyn ə na fʉ̀ fa, ə ghoʼomə yi a ghə̀ nè viʼi tsi.

⁷ A sòyn zhɨ no ndo mbyɨ a mà ku mu na mèyn a wen ə ndiʼ Nyìngòŋ ə wen, ghə̀ diʼ wàyn a mò.

⁸ A viʼi vyi a və əfwanə nə̀ viʼi vyi a və ko byɨmə a mò, nə̀ viʼi vyi a və nè nyʉ̀ vyi a və ko diʼ nə̀ laynə ə, nə̀ viʼi a və zhwilə viʼi nə̀ viʼi a və tsi nə̀ ki kò wenə lʉ̀mə, a kokiʼ vəwenə, nə̀ viʼi fənyoʼ nə̀ viʼi a və gumlə nshəʼsə nə̀ viʼi ə zho dzɨŋ no və tsèm, vəwenə nə̀ kiʼ kəshi kə ə vəwenə a nkwòŋ yi a əzhiʼ nə̀ bole tsu li mu və mòʼo li mɨ̀kayn tsu. Kəshi na kènkə le diʼ kənkùmtə̀ kə pfʉ.”

Jelusalèm ə fi

⁹ Ntsɨŋ Nyìngòŋ ə tsen fa ti ətsɨŋsə Nyìngòŋ shì sòmbo a sə nkiʼi əkaŋ vi sòmbo mu və lwinsə li nə̀ ngəʼ sə kəmwetə sisə tsu sòmbo li ə vi gàʼ a mò la “Vi, mà diʼ wùwì We Njɨ̀ a wù a diʼ ntsèntə̀sə viʼi vəbyɨmə və”

¹⁰ Kəzhwì kə Ŋwoʼkə be ghaʼ kwoʼtə ə ghomə, Ntsɨŋ Nyìngòŋ na yì ə lyɨ̀ kuʼ nə̀ mò akwi phèn ə tsen, ghə̀ dyef to alə, ə diʼ Jelusalèm a mò, mu à le Ntə̀ʼ ə laynə a ghə̀ lù fa kàŋ ə sə shiʼi vi.

¹¹ Ntə̀ʼ na ghèn nə̀ kiʼi əbayn ə ghoʼoghə Nyìngòŋ. Ntə̀ʼ na yi nə̀ baynə baynə boŋ to nə̀ ngùʼ ə nyemə ə tsen və toŋtə la jasɨbà be baynə chò tèbè kənkàʼtə̀.

¹² Ghə̀ ə kiʼi to mə mbàyn ə dyefə ə tsèn a və kwiʼ kaʼa, ghə̀ kiʼ təchʉ̀ njʉ̀sə̀ bò, no tèbe əchʉ̀ ə kò ə kiʼ Ntsɨ̀ŋ Nyìngòŋ tsu. A ndiʼ no tèbe achʉ̀ ə kò mu və nyòʼò li zhiʼ ngwaʼngə̀ŋ ə ngə̀ŋ nə̀ viʼi Islel ə mùʼ tsu.

¹³ Mbàyn na yi nə̀ kiʼi təchʉ̀ tə tàʼ ashə yi a əchʉ zhʉ̀ nə̀ saʼ fa tsù, kiʼ à tàʼ ashə yi a əchʉ zhʉ̀ nə̀ shwe fa tsù, kiʼ à tàʼ ashə gə̀kwì, kiʼ à tàʼ ashə ten.

¹⁴ Ghə̀ ndiʼ mu və bwòm a kwi əkɨ ə ngə̀ŋ njʉ̀sə̀ bò, a diʼ no kəchɨ kə ngə̀ŋ kə kò mu və nyòʼò li zhiʼ ə wù ə ntɨm tsu, a diʼ viʼi vyi a və shyèʼ a We Njɨ̀.

¹⁵ Ntsɨŋ Nyìngòŋ yì a ghə̀ nə̀ gaʼa a mò nə̀ kiʼi fɨ̀mbàŋ fifə və shəʼə əfo tsu mu və shɨtə nə̀ gul. Ghə̀ nə̀ diʼ ə shəʼ ə ntə̀ʼ ayi nə̀ əchʉ yi ə nə̀ mbàyn ntə̀ʼ na yì nə̀ fɨ̀mbàŋ a fenfə.

¹⁶ Ntə̀ʼ na yì ndiʼ təshyə titə tə tsèm diʼ to ndə̀ŋndəŋ. Məghoʼ yi ə ndiʼ to nə̀ mə̀dyefə yi. Ntsɨŋ Nyìngòŋ na yì ə shəʼ ntə̀ʼ na yi nə̀ mbàŋ wen na yì, ghə̀ sə dyefə dyʉ̀ ə misɨ̀ nkam nə̀ misɨ̀ əghɨ ə tayn, dyə̀fə kuʼu to mə ali.

¹⁷ Ntsɨŋ na yi shəʼə li təwen tə mbàyn na yi, tə sədiʼ ntàmsə məwumə ntʉfə njʉ̀sə̀ ntʉfə ə kwuʼ a kwì wi. Ghə̀ nə̀ shəʼə mbàyn ayi to nə̀ wìʼ.

¹⁸ Ə wèn mbàyn na yì ə ndiʼ mu və kwiʼ nə̀ jasɨbà, no tèbe ghò a ntə̀ʼ ayì diʼ mu və shɨtə nə̀ nkàyntə̀ gol, ghə̀ baynə chò to nə̀ ə kənkàʼtə̀.

¹⁹ Ətsi ə mbàyn ayi ə ndiʼ mu və lafsə li nə̀ tənki tə ngùʼ sə jùŋ tə to tə tsèm. Ngùʼ ə mbì ndiʼ jasɨbà, kəkumtəkə ə diʼ sàfayà, ghətsen diʼ agàt, ghətsen diʼ emelà.

²⁰ A nə̀ kumtə onìs, ntʉfə diʼ kànelìyà, sòmbo diʼ kɨ̀lisolìt, fwomə diʼ belil, abʉ̀muʼ diʼ topàs, əwùm diʼ kɨ̀lisofàs, njù ə mùʼ diʼ jasìn, njʉ̀sə̀ bò diʼ ametìs.

²¹ Təchʉ̀ tə mbàyn na ti nkiʼi ənchiʼ mu və nyùʼtə nə̀ tɨ̀fwo tə, no tèbe kəchiʼ kə kò diʼ ashɨ ə tɨfwo, ghə̀ boŋ. Ji ə to yì a ghə̀ ndiʼ a ntə̀ʼ ayì ndiʼ mu və chisə nə̀ nkàyntə̀ gul, ghə̀ baynə chò to nə̀ ə kənkàʼtə̀.

²² Ma ko yen ngə̀ŋ Nyìngòŋ a ntə̀ʼ na yi byìʼì ando ngə̀ŋ Nyìngòŋ tsu ndiʼ to no Bobo Nyìngòŋ, ə Tiʼi ədyoʼ ə tsèm no nə̀ ngə̀ŋ wen wenə We Njɨ̀.

²³ Ntə̀ʼ na yì ko kəŋ tebè la chwìchwì kò sàŋ nə̀ baynə tsu byìʼì ando əbayn ə Nyìngòŋ nə̀ diʼ tsu, We Njɨ̀ ə be diʼ làm tsu.

²⁴ Viʼi təloʼ tə tsèm lu nə̀ jèʼe əbayn na ghenə, tə təfòyn tə mbi tə tsen əghoʼ ə vəwenə ə vi nə̀ kəwenkə tsu.

²⁵ Və ko nə̀ chiʼi tebè təchʉ̀ tə mbàyn na titə byìʼì ando chʉʼ ko lù be jɨ.

²⁶ Təloʼ tə tsèm tə lu lyɨ əghoʼ ə vəwenə ə vi nə̀ wenə ghə̀ a ntə̀ʼ na ghèn.

²⁷ Kəfo kə ko lu kwen tebè ati ntə̀ʼ na ghèn, ko kə laynə. Wìʼ la ghə̀ nè nyʉ̀ kəməŋ kò wìʼ dzɨŋ lu kwen tebè tsu. A lu nə̀ kwen to viʼi vyi a və nyoʼo li təzhiʼ tə vəwenə a ŋwàʼlə̀ əbwòŋ nə̀ We Njɨ̀.