Kəmwetə 19 - The New Testament in the Babanki language

Əsaŋlə a ghə̀ ndìʼ a kàŋ

¹ Fa bàm ənyʉ̀ venə, mà zhʉ gɨsə sə̀ tosə sətsensə sə̀ kù fʉ̀ fa kàŋ sə à gàʼà ənòyn ə viʼi la, “Vəghəŋ ghoʼsə Nyìngòŋ! Ghə̀ bwòŋsə̀, ŋwòʼə̀ be kiʼ kədyòʼ.

² Ghə̀ soʼo tò nəmwèʼè be soʼo tò a ji ə tɨmə. Nyìngòŋ ə soʼo li ə̀ njèʼtə̀sə a ghə̀ ə̀ lobtə viʼi nse və tsi nə̀ wen lì. Ghə̀ bwensə̀ li ə̀ nloʼ wen ando ghə̀ tə̀ nzhwilə̀ viʼi shwèʼ ə wen.”

³ Vəwenə bè zɨ̀mə̀ gàʼ la, “Vəghəŋ ghoʼsə Nyìngòŋ! Fələʼ a fə fʉ̀ ando ghə̀ fwi a faŋ ə dʉsə kuʼu tò kuʼu.”

⁴ Vəchəʼ vi njʉ̀sə̀ kàʼ a məwum ə̀ nkàʼ wenə̀ ə̀fo zhwisəvə vi ə̀ kàʼ shiʼi a nse ə̀ ghoʼsə Nyìngòŋ a ghə̀ ə̀ ŋwʉʼ a kəfwoyn ə̀ gàʼ la, “Kə diʼ tò a lì, vəghəŋ ghoʼsə Nyìngòŋ.”

Əlam ə wàyn bi ənjɨ̀

⁵ Fà yi bàm, mà zhʉ əgɨ̀ ghə̀ gàʼ fʉ̀ ə̀ vì fa kəshi kə kəfwoyn kì la, “Vəghəŋ ghoʼsə Nyìngòŋ vəghəŋ! vəghəŋ vətsèm a və diʼì viʼi shyèʼ ə wen, vəghəŋ vətsèm a və fàynə̀ wen ko wù dìʼ wuto ko wù dìʼ wubwaʼ.”

⁶ Mà bè zhʉ ando kəfo kə kù tò sə à kù ə gɨsə nòyn ə viʼi, kù to nə̀ təfwan tə a mù, ko to sə à bwankə̀ əghʉ ghoʼghə gàʼà la, “Vəghəŋ ghoʼsə Nyìngòŋ vəghəŋ! Ghə̀ dìʼ Bobo Nyìngòŋ a ghə̀ ə kìʼ àdyoʼ ətsèm soʼo vəghəŋ.

⁷ Vəghəŋ ə nsaŋlə̀, kuʼsə̀ Klistò be ghoʼsə̀ wen byìʼàndo əzhʉ kwʉʼ li ə wàyn bi ənjɨ̀ lam. Wì wen a diʼ ntsèntə̀sə diʼ mu ghə̀ shɨtə̀ li ə̀wen ə wen.

⁸ Və̀ nku li kədyòʼ la ghə̀ moʼ ndisə bòŋ sə, laynə be ŋwòʼə̀” Ndisə asènsə ndìʼ ənyʉ̀ tɨməvə vi a viʼi Nyìngòŋ ə̀ nè.

⁹ Ntsɨ̀ŋ ngə̀ŋ Nyìngòŋ mù gàʼ à mò la, “Nyoʼo kənyʉ̀ kènkə la, ‘Njùŋ dìʼ à viʼi vyi a və laʼà la vəwenə vi ə̀ zhɨ əlam ə wàyn bi ənjɨ̀.’” Ghə̀ bè gàʼ à mò la, “əgàʼ ghenə lù fà Nyìngòŋ, diʼ nəmwèʼè.”

¹⁰ Mo Joyn shiʼi a nse la ma kəŋə ghoʼsə wen alì ghə̀ gàʼ à mò la, “Kə a mwòm! mà bè dìʼ wù shyèʼ ə̀ Nyìngòŋ to nə̀ wù əboʼsə nə̀ vəlèmə̀ vyə vi a və̀ nshɨ̀tə̀ ghàʼ nəmwèʼè yì a Yesò ə̀ ndiʼì. Ghoʼsə Nyìngòŋ.” Nəmwèʼè ayì a Yesò ə̀ nlù dìʼ a ndayn dìʼ kənyʉ̀ a kə gyàmtə̀ nshə̀ʼtə̀sə sə̀ghoʼkəsə la sə̀ nshə̀ʼtə̀ kənyʉ̀ kə Nyìngòŋ.

Wìʼ a ghə̀ ə̀ nyɨŋ a kwi əlyəŋ ə fəfəghə

¹¹ Mà sə kɨ̀blə̀ yen ando əkaŋ ə boʼmə̀, əlyəŋ ə fəfə ghə̀ tsenghə tɨmə à mò a shɨ. Əzhiʼ wìʼ a ghə̀ ə̀ ŋwʉʼ à yi kwì ə̀ ndìʼ, “Wu jùŋ yì a diʼì nəmwèʼè a ndiʼ Yesò Klistò.” Ghə̀ soʼo to ji tɨmə soynə viʼi kəbàyn ə wen.

¹² Ashɨ ə wen ə̀ mbàŋə̀ to nə̀ əlwàŋ əzhiʼ, mu ghə̀ chiʼi təsòʼ tə təfòyn à wen ə kətʉ no təghoʼo. Ghə̀ ə̀ nkì əzhiʼ a və nyòʼò à wen ə̀wen kènla no wìʼ zì ghə̀ kwòʼtə̀ kɨ̀ kənyʉ̀ a ghə̀ gàʼà əchò tò wen.

¹³ Ghə̀ ə̀ ndìʼ mu ghə̀ mòʼ ndisə mu və chʉ li a mənlyuŋ. Əzhiʼ a və ndzàŋə̀ wen tsu ə̀ ndìʼ la, “Əgàʼ ə Nyìngòŋ.”

¹⁴ Vəsugyèʼ və kàŋ ə mòʼ ndisə sə̀ fəfə be ŋwòʼə̀, ə̀ kùʼ a kwi təlyəŋ tə fəfətə sə̀ dzɨ̀mtə̀ dyʉ̀ nə̀ wen.

¹⁵ Ə nyì ngwələŋ tsen fʉ̀ fa wen əchʉ̀, lyɨmə no nànto, ghə̀ diʼ ə soyn ə zhɨ təloʼ tətsèm nə̀ wen. Ghə̀ ne ə̀ nsoʼo vəwenə kədyoʼkə, ghə̀ ne jèʼ ə tùʼlə vəwenə dìʼ tin ə fwi ə̀ Nyìngòŋ ə Tìʼ àdyoʼ ətsèm.

¹⁶ Ndisə shìsə a ghə̀ ə̀ moʼò lì ə̀ ndìʼ mu və nyòʼò li əzhiʼ tsenghə tsu ə̀ bè shiʼi ə̀ nyòʼ à wen əkəbì la, “Fòyn ə̀ təfòyn, nə̀ Bobo ə̀ vəbobo.”

¹⁷ Fà yi bàm mà mù yen ntsɨ̀ŋ ngə̀ŋ ə̀ Nyìngòŋ tsen ghə̀ ti a chʉzhʉ. Ghə̀ zɨmə̀ dzàŋ mənyin mì a mə̀ ntàynə̀ chò fa kàŋ no əgɨ̀ to la, “Ghə̀ŋ vi ə̀ tsèntə̀ ə̀ zhɨ̀ kətsi kə ghoʼo kə Nyìngòŋ.”

¹⁸ Ghə̀ŋ vi ə̀ tsèntə̀ ə̀ pfìʼ njòsə wèn ə̀ təfòyntə, njòsə̀wèn ə̀ tʉtʉ vəsugyèʼ, njòsə̀wèn ə̀ viʼi a və kiʼ kədyòʼ nə̀ njòsə̀wèn ə̀ təlyəŋ wenə̀ viʼi a və nyɨŋə à yi ətʉ nə̀ njòsə̀wèn ə̀ viʼi no vətsèm; ə̀vi a və diʼì fa ngə̀ŋ nə̀ ə̀vi a və diʼì əkòs. Ghə̀ŋ vi ə̀ pfiʼ njòsə̀wèn ə̀ viʼi vətokəvə wenə̀ viʼi vəbwaʼvə.

¹⁹ Mà mù yèn mu nyàm ətoʼ yì wenə̀ təfòyn tə mbi tə zhùŋtə̀ li nə̀ vəsugyèʼ və vəwenə soyn wìʼ yì a ghə̀ ə̀ ŋwʉʼ a kwi əlyəŋ yi wenə̀ vəsugyèʼ və wen.

²⁰ Və ghaʼ nyàm ətoʼ yì wenə̀ nshə̀ʼtə̀ kənlobtə yì a ghə̀ ə̀ ndìʼì əchwitə ndzɨ̀ŋsə lobtə̀ viʼi vyi a və̀ nku əchwitə à vəwenə bènə̀ ə̀vi a və̀ nghoʼsə̀ kənshyə̀ʼsə̀ kə wen à wen ə shɨ lì. Və mòʼ ə̀ shìʼsə vəwenə venə vəbò a nkwòŋ ə̀ zhìʼ mu və we li məkàyn tsu, vəwenə bu diʼ tò vəto.

²¹ Wìʼ yì a ghə̀ ə̀ ŋwʉʼ a kwi əlyəŋ yì shyələ̀ zhwilə viʼi a və̀ mfaŋə̀ nə̀ nyì ngwələŋ yì a ghə̀ mfʉ fà wen əchʉ̀ lì. Mənyin no ntsèm ə pfiʼ njòsə̀wèn ə̀ vəwenə kwʉ̀ʼ tò ando mə̀ nkòŋə̀.