Kəmwetə 18 - The New Testament in the Babanki language

Və byɨsə ntə̀ʼ ə̀ Babilòyn

¹ Andìʼ ando ənyʉ̀ venə̀ ncho, mà yen ntsɨ̀ŋ ngə̀ŋ ə̀ Nyìngòŋ tsen ghə̀ shiʼi vì fa kàŋ. Ghə̀ ə̀ nkìʼ kədyòʼ nə̀ ə̀soʼ ghoʼoghə, əbayn ə wen ə chiʼtə nse no tsèm.

² Ghə̀ zɨmə̀ gàʼ no əgɨ̀ ə to la, “Ghə̀ ə fəŋ li, Babilòyn ntə̀ʼ ə ghoʼo yì ə fəŋ li! A sə̀ diʼ kəshi a vədeblə̀ nə̀ zhwì byɨvə nə̀ mənyin mə kəmɨ̀ŋ mə mbyɨ ə tsi tsu no ntsèm.

³ Kə diʼ alə̀ byìʼàndo viʼi mbyi no vətsèm ə nyʉ li məlyʉ̀ʼ mə wen, mə ntomə̀ mì a mə nè viʼi və tsi ntsìnə̀ kəmɨ̀ŋ wenə̀ ki. Təfòyn tə mbi tə tsi li nə̀ wen tò tətsèm, viʼi mbàʼànkùm ə mbe ghoʼkə tò byìʼ ntsìnə̀ njèʼtə̀ wen aghèn.”

⁴ Mà bè zhʉ̀ əgɨ̀ tsen ghə̀ gàʼà fʉ̀ fa kàŋ la, “Viʼi vwomə, ghə̀ŋ fʉ fa tsu, a bwen a lì ghə̀ŋ à tsèntə̀ à wen ə mbyɨsə, ngəʼsə sə̀ wen sə be kwe ghə̀ŋ.

⁵ Mbyɨsə wen sə diʼ mu sə doŋmə li ə̀ nkuʼ nzaʼa a kàŋ, Nyìngòŋ kwòʼtə̀ li ənyʉ̀ avenə sə diʼ ə ku ngəʼ à wen.

⁶ Ghə̀ŋ ne to kənyʉ̀ kì à wen a ghə̀ tə̀ ne à ghə̀ŋ. Ghə̀ŋ sə mbwènsə̀ loʼo wen a ənyʉ̀ a ghə̀ ə̀ ne à ghə̀ŋ, ghə̀ŋ ə lòʼo ə̀ zòmtə Ghə̀ŋ sə nku məlyʉ̀ʼ mə ntomə̀ à wen, ghə̀ŋ ə ku mì a mə to chò məlyʉ̀ʼ a ghə̀ ə̀ nku à ghə̀ŋ.

⁷ Ando ghə̀ ə̀ nkuʼsə̀ ə̀wen ə wen be tsi a tì əghoʼ, ghə̀ŋ ku ngəʼ à wen alə̀ ghə̀ zhʉ əlɨ̀m. Ghə̀ ə̀ ngàʼà à wen ətyɨm la, ‘Mà dìʼ wì ə̀ fòyn, mà ko diʼ wùwì mpfʉ, mà ko dì əpfʉ.’

⁸ Kə lè dìʼì la ngəʼsə wen asènsə lu kwe wen tò kətsi kə mùʼ. Təkwaʼa tə byɨtə nə̀ ə kwòʼə mbi nə̀ əjɨ̀ŋ ə fànsə lu tsèntə̀ ə vì à wen tò ghayn ə̀ mùʼ. Və lu nyùʼ wen nə̀ əzhiʼ byìʼàndo Bobo Nyìngòŋ a ghə̀ ə soʼo wen kìʼ kədyòʼ no kə ghoʼo.”

⁹ Təfòyn tə mbi tì a tə̀ mbè ə̀ ntsi a tì əghoʼ be tsi ntsìnə̀ kəmɨ̀ŋ wenə̀ wen lu ndì a zhʉ a vəwenə yenə ando ghə̀ fwi fələʼ fə kuʼu.

¹⁰ Vəwenə lu tɨmə no kəghaf ando vəwenə lu mfànə̀ la kə ngəʼ wen à kwe vəwenə ngàʼà la, “Kə fànsə̀, kə fànsə̀ à Babilòyn ə ntə̀ʼ ə ghoʼo ghèn! Ghə̀ tə̀ nkiʼ kədyòʼ kə ghoʼkə alì və̀ nlyɨ tò fəshinə fəzhʉ əku ngəʼ fànsə à wen.”

¹¹ Viʼi mbàʼànkùm a nse ə ndì kwòʼə̀ mbi byìʼì wen byìʼàndo no wìʼ ə̀ nko bè ndiʼ əzen kəfo fà vəwenə.

¹² Wìʼ ko lu be zen gul nə̀ silva nə̀ təfo təko toghə nə̀ tənkì tə ndisə a vəwenə baʼlə̀ nə̀ tənkì tə nkòʼ mə nlèmtəmə̀ tò tətsèm nə̀ ə̀fo tsèm a və shɨtə̀ nə̀ asoŋ ə nshen nə̀ ə̀vi a və shɨtə̀ nə̀ nkòʼ mə̀ ə ko toghə, ə̀vi a və shɨtə nə̀ kəkas kə bàŋəkə, nə̀ ə̀vi a və shɨtə̀ nə̀ ngùʼsə sə̀ jùŋə sə fà vəwenə.

¹³ Wìʼ ko be a zen làməndà, njʉ̀sə̀, kələŋ mənzhiʼ mənlèmətə̀mə a və dzàŋə̀ nə̀ miyif bènə̀ flankincense, məlyʉ̀ʼ, məzhiʼ, kəbayn kə kukə, nyamsə mbuluʼ nə̀ byisə njɨ̀, təlyəŋ nə̀ nkansə shisə, nə̀ əkòs a diʼì Wùmə̀nsòŋ.

¹⁴ Viʼi mbàʼànkùm avenə lu gàʼ à Babilòyn la, “No ə̀fo ə juŋəvə no tsèm a wù tə̀ nkəŋ əkiʼi ə somə li əboʼsə nə̀ əghoʼ ə wu bènə̀ əbayn ə wu no tsèm ə dyʉ̀ li ko wù be lu yen!”

¹⁵ Viʼi mbàʼànkùm no vətsèm a və̀ nè mbàʼànkùm wenə̀ wen lu tɨmə no kəghaf byìʼàndo vəwenə fànə̀ la kə ngəʼ wen be à kwe vəwenə. Vəwenə lu ndì be kwòʼə̀ mbi a əgɨ̀ to la,

¹⁶ “Kə fànsə̀, kə fànsə̀ à ntə̀ʼ ə ghoʼo ghèn! Ghə̀ tə̀ nlafə a ndisə ko toghə be chiʼtə̀ ə̀wen ə wen nə̀ mfɨŋsə mu və shɨ̀tə̀ nə̀ gul nə̀ ngùʼsə sə̀ jùŋə sə bènə̀ təfo təko.

¹⁷ Əghoʼ ghenə no tsèm ə somə li tò kətemə kə zhʉ kə mùʼ.” Vətì və vənkanuʼ nə̀ viʼi a və jèʼè a vənkanuʼ avenə viʼi a və shwèʼè tsu nə̀ ə̀vi a və zhɨ tò fa ə̀mu lu nti tò kəghaf,

¹⁸ zɨmə dì ando vəwenə yenə ando Babilòyn ə bolə̀ fələʼ fi kuʼu. “No ntə̀ʼ ə ghoʼo tsen nko təmə diʼ a nə̀ ntə̀ʼ ghèn!”

¹⁹ Vəwenə lu ə mpfʉ̀ʼʉ̀ kəbìʼ à vəwenə a tʉ be dì kwòʼə̀ mbi gàʼà la, “Kə fànsə̀, kə fànsə̀ à ntə̀ʼ ghoʼo ghèn a viʼi a və shyèʼè a ə̀mu ə̀ nlù ghoʼkə tò byìʼ wen lə̀. Ə̀fo vi tsentə̀ li ə̀ le tò kətemə kə zhʉ.”

²⁰ “Ghə̀ŋ vi a ghə̀ŋ ə tsi a kàŋ, ghə̀ŋ ə nsaŋlə̀. Ghə̀ŋ ə nsaŋlə̀ a viʼi Nyìngòŋ nə̀ viʼi ə ntɨm nə̀ nshə̀ʼtə̀sə sə̀ ghoʼkəsə byìʼàndo Nyìngòŋ ə sisə li kənyʉ̀ a ghə̀ ə̀ ne à ghə̀ŋ.”

²¹ Ntsɨ̀ŋ ngə̀ŋ ə̀ Nyìngòŋ ghoʼo tsen mù lyɨ̀ ə ngùʼ ghoʼo tsen ə̀ tem a tì ə̀mu ə̀ gàʼ la, “A lè ando və lu lyɨ̀ Babilòyn ə ntə̀ʼ ə ghoʼo ghèn ə tem ə shiʼsə no nə̀ kədyoʼkə kèn la və be lu yenə wen.

²² Wìʼ ko lu be zhʉ ando və bʉʼʉ təlyuŋ ko əzhʉ ando və toŋə fəndoŋ nə̀ təsoŋ fà ntə̀ʼ ghèn. No wìʼ muʼ a ghə̀ shwèʼè ə̀fo nə̀ avu ko lu be ndiʼ wenə̀ wen. Və ko lu be zhʉ ando wìʼ ə bvʉ̀ kəbayn ashyə̀.

²³ Wìʼ ko lu be yen əbayn ə kənkàʼtə̀ ghə̀ baynə a ntə̀ʼ ghèn. Wìʼ ko lu be zhʉ gɨsə viʼi və laməvə a shyə̀. Viʼi mbàʼànkùm ə̀ ndìʼ no viʼi vəghoʼkəvə a nse, wù be lobtə̀ viʼi nə̀ əshəŋə fənyoʼ.

²⁴ “Mənlyuŋ mə nshə̀ʼtə̀sə sə̀ ghoʼkəsə nə̀ mə viʼi Nyìngòŋ nə̀ mə viʼi vyi a və̀ nzhwilə̀ byìʼì əbyɨmə vəwenə tsèntə̀ dìʼ tò à wù kəvu.”