Kəmwetə 17 - The New Testament in the Babanki language

Fòyn ə̀ njèʼtə̀sə

¹ Fa tsu, ntsɨ̀ŋ ngə̀ŋ ə̀ Nyìngòŋ tsen fa tì ntsɨ̀ŋsə ngə̀ŋ Nyìngòŋ shì sòmbo sə nkiʼ əkaŋ vi sòmbo vì ə̀ gàʼ à mò la, “Vi mà diʼ jì à wù a və ne ku ngəʼ à fòyn njèʼtə̀sə yì a diʼì loʼ yi a və bwomə̀ a mbyɨ̀ təfwan tə a mù no tə ghoʼo.

² Təfòyn tə tsi li nə̀ wen fa mbi tò tətsèm. Viʼi a və tsi a nse ə nyʉ li məlyʉ̀ʼ mə kəmɨ̀ŋ ə wen mə̀ nghaʼ vəwenə.”

³ Kəzhwì kə Nyìngòŋ kə shi əkwoʼtə ghomə, ntsɨ̀ŋ ngə̀ŋ ə̀ Nyìngòŋ yì lyɨ̀ mò ə̀ dyʉ̀ nə̀ mò a nse zɨm, mà yen wùwì ə tsen tsu ghə̀ ŋwʉʼ a kwi nyàm ə bàŋə̀ tsen mu və nyòʼò li təzhiʼ à wen əwen. Təzhiʼ atì tə diʼ mbàʼsə a sə telə̀ Nyìngòŋ. Nyàm ayì ə̀ nkìʼ ətʉ sòmbo nə̀ əndoŋsə tsu əwùm.

⁴ Wùwì ayì ə̀ ndìʼ mu ghə̀ mòʼ ndisə sə̀ bàŋə̀baŋə. Əwen ə wen nə̀ ndisə wen sə ndìʼ mu və shɨ̀tə̀ nə̀ ə̀fo a və shɨtə̀ nə̀ gul nə̀ ngùʼsə̀ ko toghə bènə̀ təfo tətotə. Ghə̀ ə̀ nkiʼ ə̀ ndoŋ à wen kəvu mu və shɨ̀tə̀ nə̀ gul ghə̀ diʼ mu ghə̀ ə lwin li tò nə̀ ənyʉ̀ byɨvə fansəvə nə̀ kəmɨ̀ŋ kə. Ənyʉ̀ avenə ndìʼ mbàʼsə a sə dìʼì tò ntsìnə̀ kəmɨ̀ŋ ə wen wenə̀ lʉmə.

⁵ Və̀ nyòʼò li əzhiʼ ə̀ kanəghə tsenghə à wen əchʉ kətʉ la, “Babilòyn, ntə̀ʼ ə ghoʼo. Wù dìʼ əmpfì njèʼtə̀sə sə̀tsèm be diʼ əmpfì ənyʉ̀ byɨvə fansəvə a nse.”

⁶ Mà yen mu wùwì ayì ə nyʉ li mənlyuŋ mə viʼi ə Nyìngòŋ nə̀ mənlyuŋ mə̀ viʼi a və̀ nzhwilə̀ byìʼàndo vəwenə ntɨmə viʼi vəyenəvə a ənyʉ̀ ə Yesò. Mà ə̀ nyenə wen ə̀ sə̀ diʼ nə̀ kanə ghoʼoghə,

⁷ alì ntsɨ̀ŋ ngə̀ŋ ə̀ Nyìngòŋ yì bèm à mò la, “Wù dìʼ nə̀ əkaynə byìʼì ghò? Mà a shə̀ʼtə̀ kənyʉ̀ kə kanəkə à wù byìʼì wùwì ghèn nə̀ nyàm yì a ghə̀ ŋwʉʼ à yi kətʉ, ghə̀ kiʼ ətʉ sòmbo nə̀ ə ndoŋsə wum lə̀.

⁸ Nyàm ghèn a wù ə yenə lə̀ ə̀ ndìʼ to alì ghə̀ sə̀ diʼ mu ghə̀ pfʉ li. Ghə̀ diʼ ne fʉ̀ ə kuʼ fa nkwòŋ yì a ghə̀ ə shwemə shiʼi dyʉ̀ tò dyʉ̀ lì ə dyʉ̀ ə və byɨsə wen. Viʼi vi a və nko nyòʼ təzhiʼ tə vəwenə a ŋwàʼlə̀ ə̀bwòŋ mibu və sə shɨ̀tə mbi ne yen nyàm aghèn ə ndiʼ nə̀ əkaynə byìʼàndo ghə̀ tə̀ ndiʼ, ə̀ pfʉ ə be sə diʼ lu bwènə̀ vì.”

⁹ “Kènkə diʼ mu wù yi ə ntofə wù à kwòʼtə̀ ə̀ kɨ: Ətʉ venə sòmbo dìʼ pfensə sòmbo, à diʼ səwensə a wùwì ghèn ə ŋwʉʼ à yi ətʉ.

¹⁰ Ətʉ a vyi diʼ a lì à diʼ təfòyn sòmbo, təfòyn fa tsu ə pfʉkə li tə tàyn. Əmùʼ sə bò soʼo, ghətsen ko təmə̀ vì. Ghə̀ diʼ ne vì no zhʉ̀ kò ə nkiʼ tò kətemə kə zhʉ əsoʼ.

¹¹ Nyàm yì a ghə̀ ə̀ ndìʼ alì ə sə diʼ mu ghə̀ pfʉ li lə̀ bè dìʼ tò fòyn ə təfòyn tə ndiʼ fwomə diʼ be ne dyʉ̀ ə və byɨsə wen.

¹² “Ndoŋsə shìsə̀ wum a wù yì yen lì dìʼ təfòyn əwùm alì tə ko təmə̀ ə nkiʼ kədyòʼ ə nsoʼo. Və ne ku kədyòʼ ə tə soʼ to kətemə kə zhʉ kə̀ mùʼ, ə sə nsoʼo, ə nyàm yì be nsoʼo tò a zhʉ ayì.

¹³ Vəwenə vi əwùm tsèntə̀ kìʼ tò əkwòʼtə̀ mùʼ diʼ ne ku kədyòʼ kə vəwenə à nyàm yì ə ghə̀ ə nsoʼo.

¹⁴ Vəwenə ne tsèntə̀ ə sə̀ʼ əsoyn a əwen wàyn bi ənjɨ̀ yì alì wàyn bi ənjɨ̀ soyn ə̀ zhɨ̀ vəwenə byìʼàndo ghə̀ dìʼ Bobo ə̀ vəbobo, be diʼ fòyn ə̀ təfòyn tətsèm, kiʼ viʼi wen a ghə̀ ə̀ ndzàŋə̀ li ə̀ bè tsuʼ vəwenə la və nzhʉmə̀ wen.”

¹⁵ Ntsɨ̀ŋ ngə̀ŋ ə̀ Nyìngòŋ bè gàʼ à mò la ə̀mu mì a mà ə yenə njèʼtə̀ yì ŋwʉʼ tsu lì dìʼ viʼi təloʼ tətsèm, a və kə̀ʼə̀ tò təkə̀ʼ tətsèm, be gàʼà tò təgàʼ tətsèm.

¹⁶ Ntsɨ̀ŋ ngə̀ŋ ə̀ Nyìngòŋ ə be gàʼ la ndoŋsə shì əwùm a mà yì yen lì ne tsèntə̀ wenə̀ nyàm yì ə mbàynə̀ njèʼtə̀ yì. Vəwenə ne shi no ghò a ghə̀ kiʼì ə ghʉsə wen tò kənàʼ ntsuʼ, vəwenə ne pfiʼ njò əwen ə wen ə nyùʼ kəbyəʼ ki nə̀ əzhiʼ.

¹⁷ Kə diʼ alə̀ byìʼàndo Nyìngòŋ ə ghʉ li à vəwenə tətyɨm la vəwenə tsentə̀ nè tò kənyʉ̀ a ghə̀ kəŋə. Vəwenə ku kədyòʼ à nyàm yì la ghə̀ ə nsoʼo əzaʼa fa zhʉ a ənyʉ̀ no tsèm a Nyìngòŋ ə̀ ngaʼà ə kwʉʼ li.

¹⁸ Ghə̀ mbe gàʼ la wùwì yì a mà yen lì dìʼ ntə̀ʼ ghoʼo yì a ghə̀ soʼo təfòyn tə mbi.