Kəmwetə 16 - The New Testament in the Babanki language

¹ Mà mù bè zhʉ̀ gɨ̀ to ghə̀ gàʼà fʉ̀ fa tì ngə̀ŋ Nyìngòŋ ə ghoʼo yì à ntsɨ̀ŋsə ngə̀ŋ Nyìngòŋ shì sòmbo la, “Ghə̀ŋ dyʉ̀ ə̀ shʉ̀ʼ ə̀ shìʼsə ngəʼsə shì fa əkaŋ vi sòmbo a nse a sə dìʼì tin ə fwi ə̀ Nyìngòŋ.”

² Ntsɨ̀ŋ ngə̀ŋ ə̀ Nyìngòŋ mbì dyʉ̀ shʉ̀ʼ shìʼsə kəkaŋ kə wen a nse, tətsaʼa tə fànsətə ku viʼi vyi a və nkìʼ kəchwitə kə nyàm ətoʼ be ghoʼsə̀ kənshyə̀ʼsə̀ kə wen.

³ Kənkùmtə̀ kə ntsɨ̀ŋ ngə̀ŋ ə̀ Nyìngòŋ kə shʉ̀ʼ ə̀ shìʼsə kəkaŋ kə wen a ə̀mu məghoʼomə̀, ə̀mu a mì kaʼkə̀ sə̀ diʼ tò nə̀ mənlyuŋ mə wu pfʉ. No kəfo kə zhwisəkə kə kò a kə̀ ndìʼ a tì ə̀mu a mì pfʉ.

⁴ Kənkùmtə̀ kə ntsɨ̀ŋ ngə̀ŋ ə̀ Nyìngòŋ ə sə ndiʼ sətaʼ shʉ̀ʼ shìʼsə kəkaŋ kə wen a təfwàn tə a mù nə̀ a ashɨ lèmə̀lèmə̀, ə̀mu mi kaʼkə a mənlyuŋ.

⁵ Mà zhʉ ntsɨ̀ŋ ngə̀ŋ ə̀ Nyìngòŋ a ghə̀ kiʼì kədyòʼ a ə̀mu gàʼ la, “Wù soʼ li nsoʼsə shyə̀sə ntinə a ji tɨmə, A dìʼ wù yì a wu diʼì, mu wù tə ndiʼ à be diʼ tò wù a wù ə diʼì wu ŋwoʼə.

⁶ Viʼi ə nzhwilə̀ li viʼi vyə̀ zhwilə nshə̀ʼtə̀sə sə̀ ghoʼkəsə, Wu ə̀ nku mənlyuŋ luwèn la vəwenə nyʉ. Vəwenə kiʼì tò kəfo a vəwenə yi ndiʼ ə kiʼi.”

⁷ Mà bè zhʉ ando gɨ̀ ə dì fʉ vì fa əshyə kəchiʼ kə kəku la, “No nəmwèʼè, a Bobo Nyìngòŋ ə̀ Tìʼ àdyoʼ ə̀ tsèm, wù soʼo nsoʼsə shyə̀sə tò nəmwèʼè, be soʼo tò a ji ə tɨmə!”

⁸ Fà yi bàm, mà yen ntsɨ̀ŋ ngə̀ŋ ə̀ Nyìngòŋ sə ndiʼ səkàʼ shʉ̀ʼ ə̀ shìʼsə nə̀ kəkaŋ kə wen a kətʉ əchʉzhʉ, ghə̀ kiʼi kədyòʼ ənyùʼ viʼi to nə̀ əzhiʼ.

⁹ Əlɨ̀m əchʉzhʉ a ghə̀ nyùʼù vəwenə mfànsə̀, vəwenə mù sə telə̀ Nyìngòŋ yì a ghə̀ ə kiʼì kədyòʼ əku ngəʼsə asènsə, kènla vəwenə kwitə li tətyɨm tə vəwenə fà vəwenə a mbyɨsə nghoʼsə̀ Nyìngòŋ.

¹⁰ Ntsɨ̀ŋ ngə̀ŋ ə̀ Nyìngòŋ tsen ə sə ndiʼ sətàyn shʉ̀ʼ ə̀ shìʼsə kəkaŋ kə wen a kwi kəfwoyn ə̀ nyàm ətoʼ yì, kəshi kì a ghə̀ ə̀ nsoʼo tsu lì fen no kətsèm. Viʼi vi a və̀ ndìʼ à wen ə̀soʼ fòyn ayì sə lèmə̀ lɨmə vəwenə a əlɨ̀m yi a vəwenə nzhʉ.

¹¹ Vəwenə mù sə telə̀ Nyìngòŋ ə̀ kàŋ byìʼì əlɨ̀m a vəwenə nzhʉ à vəwenə tətsaʼa alì kènla vəwenə kwitə li tətyɨm tə vəwenə fà vəwenə a mbyɨsə.

¹² Ntsɨ̀ŋ ngə̀ŋ ə̀ Nyìngòŋ ə sə ndiʼ ə ntʉfə, bè shʉ̀ʼ ə̀ shìʼsə kəkaŋ kə wen a əfwan ə̀mu məghoʼomə̀ a və ndzàŋə̀ nə̀ Yuphlates, ə̀mu mi zɨm no ə̀ ntsèm shɨ̀tə ji à təfòyn tì a təmfʉ fa shyə a əchʉzhʉ ə saʼa fa tsu ə̀ sə̀ ti ədyàŋ.

¹³ Mà yen əzhwi byɨvə tsenəvə taʼ a və kə̀ʼə̀ to nə̀ təsenətə fʉ̀ ə̀ vì fa əchʉ ə̀ əzhù ə byɨ nə̀ fa əchʉ ə nyàm ətoʼ bènə̀ fa əchʉ nshə̀ʼtə̀ kənlobtə.

¹⁴ Əzhwi byɨvə avenə ndìʼ vədeblə̀ a və̀ njèʼè dìʼì əchwitə kanəvə. Əzhwi a vyi ə̀ njèʼè dyʉ̀ no à təfòyn tə tsèm a mbi ə tsèntə vəwenə a kəshi kə mùʼ ə vəwenə baʼtə̀ soyn a kətsi kə ghoʼokə Nyìngòŋ ə Tìʼ àdyoʼ ə̀ tsèm.

¹⁵ Mà zhʉ ando wìʼ ə gàʼà la, “Ghə̀ŋ zhʉtə a! mà vì a nə̀ tsòŋ. Əsaŋlə ne ə ndiʼ à wìʼ a ghə̀ ŋwʉʼ no a əzhʉ ə̀ kò bvʉ̀tə̀ nə̀ ndisə à wen a wen ndi kə ghə̀ ne jèʼ kənàʼ ntsuʼ a ntìntìn ə̀ viʼi.”

¹⁶ Əzhwi byɨvə avenə ntsèntə̀ təfòyn a tèntə a kəshi kətsenkə a və dzàŋə̀ a əgàʼ Hibùlù nə̀ Almagedòn.

¹⁷ Ntsɨ̀ŋ ngə̀ŋ ə̀ Nyìngòŋ tsen ə sə ndiʼ sòmbo, bè fʉ̀ ə̀ chès kəkaŋ kə wen a kàŋ, mà zhʉ əgɨ̀ to gàʼ ə̀ fʉ̀ fa kəfwoyn a tì ngə̀ŋ ə̀ Nyìngòŋ ə ghoʼo la, “Ənyʉ̀ tsèm ə me li!”

¹⁸ Əghʉ sə mwàntə̀ be bwankə̀ fa kəshi ayì, gɨsə be fʉ̀ vì fa tsu. Nse bè nə̀ʼ ə̀ bə̀ykə̀ a ji tsen a ghə̀ nko təmə̀ nə̀ʼ fa ətʉʼ a Nyìngòŋ ə̀ nshɨ̀tə wìʼ. Mənə̀ʼ nse ayì ə̀ mfànsə̀.

¹⁹ Və gə̀tə̀ ntə̀ʼ Babilòyn məshyə̀ ntaʼ, ə̀ byɨ̀sə ntə̀ʼsə sə̀ ghoʼkəsə no sətsèm a sə ndìʼ tsu. A le ji a Nyìngòŋ ə̀ nkwòʼtə̀ viʼi Babilòyn fa tsu ə̀ nè vəwenə nyʉ məlyʉ̀ʼ fa ndoŋ yì a ghə̀ dìʼì tin ə fwi wen.

²⁰ Təloʼ a tə̀ ndìʼ mu ə̀mu nyɨŋ li ə̀ nkaʼ somə, pfensə bè somə tò sətsèm.

²¹ Awoŋ sə shiʼì a kətʉ ə viʼi fa kàŋ, əshɨ ə̀ mùʼ ə dìʼì fànsə̀ no nànto. Viʼi mù sə̀ telə̀ Nyìngòŋ byìʼì ngəʼ awoŋ aghenə byìʼàndo à ə̀ ndìʼ no ngəʼ fànsə.