Kəmwetə 15 - The New Testament in the Babanki language

Ngəʼsə sə̀ myetəsə sòmbo

¹ Mà bè yèn kəchwitə kə ghoʼokə kə fànsəkə kətsenkə a kàŋ. Mà ə̀ nyen li ntsɨ̀ŋsə ngə̀ŋ ə̀ Nyìngòŋ la sòmbo, sə kiʼ ngəʼsə sòmbo, andiʼ ngəʼsə shì a sə dìʼì kəmyètə̀ kə tin ə fwi ə̀ Nyìngòŋ.

² Mà mbe ə̀ nyèn kəfo kə kə̀ʼə̀ to nə̀ ə̀mu mə ghoʼomə̀, baynə lyəŋsə̀ to nə̀ kənki kə ashɨ a və fə̀ŋə̀ nə̀ əzhiʼ. Mà mbe yèn viʼi a və soyn ə̀ nzhɨ nyàm ətoʼ yì a ghə̀ fʉ̀ ə̀ kuʼ ə̀ vì fa ə̀mu lì wenə̀ kənshyə̀ʼsə̀ kə wen əboʼsə nə̀ ətaŋ ə zhiʼ wen, və ti a mbyɨ̀ ə̀mu mə ghoʼomə̀ mì kiʼ təlyuŋ tə Nyìngòŋ à vəwenə avu.

³ Vəwenə nzhɨmə ndzàŋ ə̀ Mosìs ə wù shyèʼ ə̀ Nyìngòŋ nə̀ ndzàŋ wàyn bi ənjɨ̀ a ghə̀ ə̀ ngàʼà la: “Bobo Nyìngòŋ, Tìʼ àdyoʼ ə̀ tsèm. Wù nè ənyʉ̀ ghoʼkəvə kanəvə! Wù dìʼ fòyn a təloʼ tò tətsèm. Jisə shyə̀sə diʼ jisə sə̀ tɨməsə be diʼ jisə nəmwèʼè!

⁴ Tìʼ, a lè à faŋ ndo ke mfànə̀ be ghoʼsə̀ əzhiʼ ə̀ wu a? Adìʼ tò wunyɨŋ diʼ wu ŋwòʼə. Viʼi təloʼ tə tsèm ə lù vi ghoʼsə̀ wù byìʼàndo viʼi vətsèm ə yen li a ndayn la əshyèʼ wu diʼ əshwèʼ ə tɨməghə.”

⁵ Fà yi ə bàm mà sə ki ə̀ yèn mu və bòʼò li kəshi kə ŋwoʼəkə a tì fəngə̀ŋ ati ngə̀ŋ ə̀ Nyìngòŋ ə ghoʼo a kàŋ.

⁶ Mà yen ntsɨ̀ŋsə ngə̀ŋ ə̀ Nyìngòŋ shì sòmbo fʉ̀ ə̀ vì fa ngə̀ŋ Nyìngòŋ ghoʼo yì nə̀ ngəʼsə shì sòmbo. Ntsɨ̀ŋsə ashì ə̀ mòʼo ndisə sə̀ baynə la wəŋ, ə̀ kwiʼ ə̀pfʉ̀sə à vəwenə a dyʉ̀ʼ mu və shɨ̀tə̀ nə̀ gul.

⁷ Kəfo kə mùʼ fa tì ə̀fo zhwisəvə vi ə̀ kàʼ ku əkaŋ sòmbo mu və shɨ̀tə̀ nə̀ gul à ntsɨ̀ŋsə ngə̀ŋ ə̀ Nyìngòŋ shì. Əkaŋ a vyi ə̀ ndìʼ mu və lwin li nə̀ ənyʉ̀ vyi a və dìʼì tin ə fwi ə̀ Nyìngòŋ yì a ghə̀ ə faŋə̀ to tò əghayn əmùʼ.

⁸ Ngə̀ŋ Nyìngòŋ ə ghoʼo yì lwin nə̀ fələʼ mu fə fʉ̀ fa əbayn yì a Nyìngòŋ ə̀ nkìʼ ə̀ bè fʉ̀ fà wen kədyòʼ kò a ndiʼ la wìʼ zì ghə̀ kwen a tì ngə̀ŋ Nyìngòŋ ə ghoʼo ayì əchò la ngəʼsə shì a ntsɨ̀ŋsə ngə̀ŋ Nyìngòŋ shìsə sòmbo ə vì nə̀ səwensə me li.