Kəmwetə 14 - The New Testament in the Babanki language

Wàyn bi ənjɨ̀ wenə̀ viʼi ə wen

¹ Mo Joyn sə ki ə̀ kɨ̀blə̀ yèn wàyn bi njɨ̀ ghə̀ ti a pfèn Zayòn wenə viʼi wen nkam nə̀ sə ghɨ nə̀ njʉ̀sə̀ kàʼ a məwum ə̀ nkàʼ. Vəwenə ndìʼ mu vəwenə nyòʼò li əzhiʼ wen nə̀ əzhiʼ Tìʼ wen à vəwenə təchʉ̀ tətʉ.

² Mà zhʉ gɨ̀ ghə̀ kù fʉ vì fa kàŋ tò sə à kù ə̀fəŋ ə ghoʼoghə, bwankə̀ to nə̀ əghʉ. Gɨ̀ ayì ə̀ nkù to nə̀ təlyuŋ a viʼi vi ə bʉʼʉ.

³ Viʼi a vyi nkamsə ghɨ nə̀ njʉ̀sə̀ kàʼ a məwum ə̀ nkàʼ ə̀ nzɨmə̀ ndzàŋ ə fi kènla wìʼ zì ghə̀ ziʼi əzhɨm əchò tò vəwenə vi a və sə̀ diʼ mu və zen li kətʉ kə vəwenə fa mbi. Vəwenə nzhɨmə ndzàŋ ayì a shɨ kəfwoyn nə̀ ə̀fo zhwisəvə vi ə̀kàʼ bènə̀ vəchəʼ.

⁴ Viʼi avenə ndìʼ vi a vəwenə nko byɨsə təwen tə vəwenə wenə̀ və ki; à dìʼ vəwenə a vəwenə dzɨ̀mtə̀ wàyn bi ənjɨ̀ no fe a ghə̀ dyʉ̀; à dìʼ vəwenə a və̀ ndìʼ mu və zen li kətʉ kə vəwenə fà Wùmə̀nsòŋ vəwenə sə diʼ mbì ashɨ nkòʼ à Nyìngòŋ wenə̀ wàyn bi ənjɨ̀.

⁵ Vəwenə nko təmə̀ zhò ndzɨ̀ŋ byìʼe vəwenə nko kiʼ kənyʉ̀ kə shwekə.

Ntsɨ̀ŋsə ngə̀ŋ ə̀ Nyìngòŋ sə̀ taʼ

⁶ Fà yì a bàm, mà bè yèn ətsɨ̀ŋ ngə̀ŋ ə̀ Nyìngòŋ tsen ghə̀ tàynə̀ chò no fa kàŋ kiʼ ətɨm ə jùŋ a ghə̀ ə diʼì tò nəmwèʼè no mətsi ntsèm əshə̀ʼtə̀ à viʼi vyi a və diʼì a nse. Ghə̀ dìʼ əshə̀ʼtə̀ ntɨm ayì à viʼi təloʼ tətsèm nə̀ à ngwàʼsə sə̀tsèm, nə̀ à viʼi təgàʼ tətsèm bènə̀ à no ndò a ghə̀ tsi a nse.

⁷ Ntsɨ̀ŋ ngə̀ŋ ə̀ Nyìngòŋ ayì ə̀ nzɨmə̀ gàʼà no a gɨ̀ to la, “Ghə̀ŋ ə̀ nghoʼsə̀ Nyìngòŋ byìʼe əzhʉ kwʉʼ li ə ghə̀ soʼ viʼi. Ghə̀ŋ ghoʼsə̀ wen yì a ghə̀ ə̀ nshɨ̀tə̀ kaŋ nə̀ nse nə̀ ə̀mu mə ghoʼomə̀ bènə̀ ashɨ a mu nfʉ fa tsu.”

⁸ Kənkùmtə̀ kə ntsɨ̀ŋ ngə̀ŋ ə̀ Nyìngòŋ ə tsen bè dzɨ̀mtə̀ ə̀ fʉ̀ sə̀ gàʼà la, “Babilòyn ə ntə̀ʼ ə ghoʼo yì ə fəŋ li, ghə̀ ə fəŋ li. Andiʼ wen a ghə̀ nè la təloʼ tətsèm tə nyʉ məlyʉ̀ʼ mì a mə nè la vəwenə nkòŋə̀ əntsi ntsìnə̀sə kəmɨ̀ŋ.”

⁹ Ntsɨ̀ŋ ngə̀ŋ ə̀ Nyìngòŋ tsen bè dzɨ̀mtə̀ fʉ̀ nə̀ və mbì vi ə və ndiʼ vətaʼ, ə̀ bè sə̀ zɨmə̀ gàʼà a gɨ̀ ə to la, “No ndò a ghə̀ ə ghoʼsə̀ nyàm ə̀ toʼ yì nə̀ kənshyə̀ʼsə̀ kə wen kì, və nku kəchwitə à wen əchʉ kətʉ ko à wen əkwoŋ,

¹⁰ ne be nyʉ məlyʉ̀ʼ mə ntomə̀ a və ko ə̀ fɨ̀ŋ a diʼ tin ə fwi ə̀ Nyìngòŋ. No ndò fa vəwenə ne yen ə ngəʼ a zhìʼ nə̀ məkàyn mə nyʉ̀ʼlə mə a shɨ ntsɨ̀ŋsə ngə̀ŋ ə̀ Nyìngòŋ sə ŋwoʼəsə wenə̀ wàyn bi ənjɨ̀.

¹¹ Fələʼ fəzhiʼ fì a vəwenə a yen ə ngəʼ tsu ə kuʼu tò kuʼu a kàŋ əzaʼa no fa ze. Viʼi avenə a və ghoʼsə̀ nyàm ə̀ toʼ yì nə̀ kənshyə̀ʼsə̀ kə wen mu və ku li kəchwitə kəzhiʼ wen ko lu kiʼi ənzhʉ̀tə tè nə̀nchwì ko nəntʉʼʉ.”

¹² Kənyʉ̀ a kènkə dìʼì la viʼi ə Nyìngòŋ ə diʼi. Adìʼ vəwenə a və ghʉ təsoʼ tə Nyìngòŋ be byɨmə à Yesò.

¹³ Mà bè zhʉ̀ gɨ̀ ghə̀ fʉ vì fa kàŋ gàʼà la, “Nyoʼo kènkə: Əzìtə̀ fa luwèn ə dyʉ̀ nə̀ mbì, əsaŋlə diʼ à no ndò a ghə̀ pfʉ shyèʼè əshwèʼ ə Bobo.” Kəzhwì kəŋwoʼəkə bwènsə̀ gàʼ la, “Nəmwèʼè, əsaŋlə a lutə̀ diʼ à vəwenə. Vəwenə ne zhʉ̀tə̀ fà vəwenə ngəʼsə byìʼàndo əshyèʼ jùŋə ghə̀ vəwenə ne dzɨ̀mtə vəwenə gàʼ à vəwenə.”

Ə̀fo a və diʼ ne pfì fa nse

¹⁴ Mà sə ki ə̀ kɨ̀blə̀ yèn mbòʼ ə fəfə, wìʼ ŋwʉʼ a kwi mbòʼ, ayì diʼ to nə̀ Wàyn ə̀ Wìʼ. A ndiʼ wìʼ yi a və ntsuʼli ghʉ, mu ghə̀ chiʼ ə̀sòʼ ə təfòyn à wen kətʉ mu və shɨ̀tə̀ nə̀ gul. Ghə̀ ə nkiʼ fənyì fə sɨm fə lyɨməfə à wen kəvu.

¹⁵ Ntsɨ̀ŋ ngə̀ŋ ə̀ Nyìngòŋ tsen bè fʉ̀ vì fa tì ngə̀ŋ ə̀ Nyìngòŋ ə ghoʼo, dzàŋə̀ no a gɨ̀ ə to gàʼà à wìʼ yì a ghə̀ ə̀ ŋwʉʼ a kwi mbòʼ yì la, “Lyɨ fənyì fə sɨm ə̀ wu ə mpfì ə̀fo tsu byìʼàndo əzhʉ məpfì ə kwʉʼ li, ə̀fo ə nse to li ə nkwʉʼ a məpfì.”

¹⁶ Wìʼ yì a ghə̀ ə̀ ŋwʉʼ a kwi mbòʼ mù zìtə̀ əvə̀ŋ fənyì fə wen ə̀ pfì ə̀fo fa nse.

¹⁷ Ntsɨ̀ŋ ngə̀ŋ ə̀ Nyìngòŋ tsen bè fʉ̀ ə̀ vì fa ngə̀ŋ ə̀ Nyìngòŋ ə ghoʼo a kàŋ be kiʼ fənyì fə sɨm fə lyɨməfə.

¹⁸ Ntsɨ̀ŋ ngə̀ŋ ə̀ Nyìngòŋ tsen a ghə̀ kìʼ kədyòʼ a kətʉ əzhiʼ bè fʉ̀ ə̀ vì fa kəchiʼ kə kəku. Ghə̀ dzàŋ ə̀ gàʼ à no a gɨ̀ to à ntsɨ̀ŋ ngə̀ŋ ə̀ Nyìngòŋ yì a ghə̀ ə̀ nkìʼ fənyì fə sɨm fə lyɨməfə fì la, “Lyɨ fənyì fə sɨm ə̀ wù kwòŋ əchuŋsə lamsə̀ ə lwi fa əsɨm ə nse byìʼàndo lamsə̀ yi ə bàŋə̀ li.”

¹⁹ Ntsɨ̀ŋ ngə̀ŋ ə̀ Nyìngòŋ ayì mù və̀ŋ ə̀ kaʼsə nə̀ fənyì fə sɨm ə wen a nse ə̀ kwòŋ ashɨ lamsə̀ lwi nə̀ fəwenfə we shìʼsə a nkwòŋ yì ndi və tùʼlə to a ji a Nyìngòŋ dìʼ tin ə fwi wen à viʼi.

²⁰ Və lù ə̀ fʉ̀ fa ntə̀ʼ mibu ŋwìʼ lamsə̀ lwi ayì. Mənlyuŋ fʉ̀ lamsə̀ lwi a və̀ ŋwìʼì lì sə ti a nse ə ghoʼo əzaʼa vəmal əghɨ bò be shwemə əzaʼa akwoŋ ə̀ tàyn.