Kəmwetə 13 - The New Testament in the Babanki language

Nyamsə sə̀ fànsəsə sə̀ bò

¹ Fà yì a bàm, mà yen nyàm ghə̀ fʉ̀ ə̀ kuʼ ə̀ vì fa tì ə̀mu mə nghoʼomə̀, kiʼ ətʉ sòmbo. Nə̀ ndoŋsə la əwùm. No ə̀ ndoŋ kò ə̀ nkìʼ ə̀sòʼ ə təfòyn, no kətʉ kə kò kə kiʼ əzhiʼ a ghə̀ telə̀ Nyìngòŋ.

² Nyàm ətoʼ ayì a mà ə̀ nyenə lì ə̀ mfʉsə̀ nyàm ə̀ kəbo, aghʉ ə wen diʼ to nə̀ aghʉ ə bi toʼ, əchʉ wen diʼ to nə̀ əchʉ abìkəŋ. Zhù ə byɨ yì ku kəfwon nə̀ kədyòʼ ə ghoʼoghə à wen.

³ Kətʉ kə nyàm akì kətsenkə nkə̀ʼə̀ tò sə kənkiʼi li əlyom ə fansəghə alì mu və nchʉʼ li, viʼi vətsèm a nse sə̀ diʼ nə̀ kaynə mù sə̀ dzɨ̀mtə̀ dyʉ̀ tò nə̀ nyàm ayì.

⁴ Viʼi vətsèm ə sə̀ ghoʼsə̀ zhù ə byɨ yì fambwo ghə̀ ə nku li àdyoʼ ə wen à nyàm ətoʼ yì la ghə̀ ə nsoʼo. Vəwenə mbe ghoʼsə̀ nyàm ətoʼ yì gàʼà la, “A lè dìʼ ndo a nə̀ nyàm ghèn a? A lè zì à soyn ndo əsoyn ə wen a?”

⁵ Və ku vəsàŋ njʉ̀sə̀ bò a məwum ə̀ nkàʼ la nyàm ə̀ toʼ ayì ə nsoʼo, gàʼà ənyʉ̀ ə ghaŋsə̀ wèn a və̀ ntelə Nyìngòŋ.

⁶ Ghə̀ zìtə̀ sə̀ telə̀ Nyìngòŋ, telə̀ əzhiʼ ə wen be telə̀ viʼi a və̀ntsi a kàŋ.

⁷ Və nku li àdyoʼ à wen la ghə̀ soyn ə̀ zhɨ̀ viʼi Nyìngòŋ ə̀ bè ku àdyoʼ la ghə̀ soʼ viʼi ngwàʼsə sə̀tsèm, nə̀ viʼi təloʼ tə tsèm, bènə̀ viʼi a və gàʼà no əgàʼ kò ayi.

⁸ No viʼi vətsèm vi a və̀ntsi a nse ə̀ ndiʼi nghoʼsə̀ wen, andiʼ viʼi vyi a və nko ə̀ nyòʼ təzhiʼ tə vəwenə mibu mbi sə zìtə̀, a ŋwàʼlə̀ ə̀bwòŋ ə̀ wàyn bi ənjɨ̀ yì a və̀ nshyə lì.

⁹ No wu byɨmə ko a ghə̀ tofə ghə̀ tùʼù zhʉ̀tə:

¹⁰ Və sətsèn ə̀ ndiʼ ə ghaʼ no tè ndò a ghòŋ və à ghàʼ tò ghaʼa, No ndò a ghə̀ ə shyə nə̀ nyì ngwoləŋ, və lù bè shyə wen tò nə̀ nyì ə ngwoləŋ. Nakènkə dìʼì la viʼi Nyìngòŋ ə diʼi ə nwensə̀ be shɨ̀tə̀ ghaʼa əbyɨmə vəwenə.

¹¹ Mà bè yèn nyàm ə toʼ ə tsen ghə̀ fʉ̀ kuʼ ə̀ vì fa nse, kiʼ əndoŋsə sə bò to nə̀ wàyn bi ənjɨ̀. Ghə̀ ə̀ ngàʼà tò nə̀ əzhù ə byɨ.

¹² Ghə̀ shi àdyoʼ ə ghoʼoghə yi a nyàm ətoʼ ə̀ mbì yì nkiʼ lì sə̀ soʼo tò wen a shɨ. Ghə̀ nè la nse nə̀ viʼi a və tsi ə ngumlə̀ nyàm ətoʼ ə̀ mbì yì, a ghə̀ ə̀ nkìʼ əlyom ə toghə mu və chʉʼ li lì.

¹³ Kənkùmtə̀ kə nyàm ətoʼ aghèn ə̀ nè ənyʉ̀ kaynəvə, ə̀ nè tè əzhiʼ ə lù fa kàŋ ə̀ shiʼi vì a nse viʼi vətsèm ə yenə.

¹⁴ Byìʼì ənyʉ̀ kanəvə avenə a Nyìngòŋ ə nghʉsə nyàm ətoʼ aghèn sə̀ nè a shɨ nyàm ətoʼ ə̀ mbì yì lì lobtə viʼi vətsèm a və̀ ntsi a nse ə̀ gàʼ la vəwenə shɨtə kənshyə̀ʼsə̀ kə nyàm ətoʼ kì a ghə̀ ə̀ nkìʼ əlyom ə toghə mu və bvàʼ nə̀ nyì ə ngwoləŋ alì ghə̀ bu sə diʼ tò to lì.

¹⁵ Və ku kədyòʼ à kənkùmtə̀ kə nyàm ətoʼ kì la ghə̀ fwof kəzhwì a əchʉ̀ kənshyə̀ʼsə̀ kə nyàm ətoʼ ə lyomə yì ndi kənshyə̀ʼsə̀ kə nyàm akì gàʼ ə̀ nè və shyə no ndò yì a ghə̀ ə tyenə ghoʼsə kəwenkə.

¹⁶ Nyàm ətoʼ yì a ghə̀ mfʉ fa nse lì bè kàyn la və ghʉ kəchwitə a əkwoŋ ə toghə ko a chʉ kətʉ no ndò; wuto ko wàyndyə, wu ə ko, ko wù kənfem, kəkòs ko wìʼ a ghə̀ diʼì fà wen ə ngə̀ŋ.

¹⁷ Wìʼ ə nko diʼ ə baʼlə ko ə zen kəfo a bwen la ghə̀ kìʼ kəchwitə kə diʼì əzhiʼ ko ətaŋ əzhiʼ ə wen.

¹⁸ Kènkə diʼ ə wù ə nkiʼ ətof kwòʼtə̀ ə kɨ. No ndò a ghə̀ ə kiʼ ətof ghə̀ shwèʼ əkɨ ətaŋ ə nyàm aghenə byìʼàndo ətaŋ ayi diʼ əzhiʼ wìʼ. Ətaŋ ayi ə̀ ndìʼ əghɨ ntʉfə nə̀ njʉ̀sə̀ ntʉfə a məwum ə̀ ntʉfə.