Kəmwetə 12 - The New Testament in the Babanki language

Kənyʉ̀ byìʼì wùwì nə̀ nyàm ə fànsə

¹ Kəchwitə kə kaynəkə kətsenkə fʉ̀ a kàŋ, mà yen wùwì mu ghə̀ mòʼ ndisə à diʼ əchʉzhʉ, aghʉ ə wen ti a kwi əsàŋ, ə̀sòʼ ə təfòyn ə diʼ à wen kətʉ kiʼ mədzɨ̀ŋ njʉ̀sə̀ bò.

² Ghə̀ ngùfə̀, diʼ mu ghə̀ sə temsə̀ a məbwi, ə̀ sə̀ zhʉ əlɨ̀m dì ando wàyn ayì ə̀ nzafə wen.

³ Kəchwitə kə kanəkə kətsenkə bè fʉ̀ a kàŋ, nyàm ə fàynsə ghoʼo tsen fʉ̀ kə̀ʼə̀ bàŋə̀baŋə, kiʼ ətʉ sòmbo nə̀ ndoŋsə wum. No kətʉ kə kò kə kiʼ ə̀sòʼ ə təfòyn.

⁴ Əkwen ə wen ə zhès əshyə mədzɨ̀ŋ ə̀ mùʼ fa tì təshyə tə taʼ ə̀ mòʼ shìsə a nse. Nyàm ə fànsə ayì tɨmə a shɨ ə̀ wùwì yì a ghə̀ sə̀ diʼ a məbwi lì sə̀ bvʉ̀tə̀ ə pfiʼ wàyn ayì a ghə̀ a bwi lì.

⁵ Wùwì ayì bwi wàyn ə wulɨm, à diʼ wen a ghə̀ diʼ lu soʼ təloʼ tə tsèm alì və sòʼ wen ə̀ kùʼ nə̀ wen à Nyìngòŋ a kàŋ nə̀ ə̀soʼ ə fòyn ə̀ wen

⁶ Wùwì ayì nyɨŋ ə̀ dyʉ̀ a nse zɨm a kəshi a Nyìngòŋ ə̀ nshɨ̀tə̀ ə̀ ghʉ la və ntùʼmə̀ nə̀ wen tsu a mətsi nkam nə̀ təghɨ tə̀ bò nə̀ məwum ə̀ ntʉfə.

⁷ Fà yì a bàm, əghoŋ ə fʉ̀ a kàŋ, Kətʉ kə ntsɨŋsə a və toŋtə nə̀ Mayikel wenə̀ ntsɨ̀ŋsə wen soyn nyàm ə fànsə yì, nyàm ə fànsə ayì wenə̀ wenə tsɨŋ sə wensə bè bwensə soyn vəwenə,

⁸ alì Mayikel wenə̀ ntsɨ̀ŋsə wen sə soyn ə̀ zhɨ nyàmə fànsə ayì kènla vəwenə mbè kìʼ kəshi a kàŋ

⁹ Və mòʼ shìʼsə nyàm ə fànsə ayì a nse, zhù ə mu yì a və ndzàŋə̀ nə̀ Deblə̀ bènə̀ Satan. Adiʼ wen yì a ghə̀ lobtə̀ viʼi mbyi no vətsèm. Və mòʼ shìʼsə wen a nse wenə̀ ntsɨ̀ŋsə wen tò sətsèm.

¹⁰ Fà yì a bàm, mà zhʉ gɨ̀ ə to ghə̀ gàʼ ə̀ vì fa kàŋ la, “Ə̀bwòŋ nə̀ kədyòʼ nə̀ ə̀soʼ ə fòyn ə Nyìngòŋ ə̀ vəghəŋ bènə̀ àdyoʼ Klistò ə vi li luwèn byìʼàndo və moʼ li ə̀ shiʼsə̀ wen yì a ghə̀ tə nti a shɨ ə̀ Nyìngòŋ vəghəŋ ghàmə̀ vəlèmə̀ və vəghəŋ nə̀nchwì nə̀ nəntʉʼʉ lì.

¹¹ Vəlèmə̀ avenə soyn li ə̀ nzhɨ wen byìʼ mənlyuŋ mə wàyn bi njɨ̀ nəmwèʼè yì a vəwenə tə̀ nshə̀ʼtə̀ bè kòŋə̀ əku təwen tə vəwenə pfʉ byìʼ wen.

¹² No ghə̀ŋ vətsèm a ghə̀ŋ ə tsi a kàŋ, ghə̀ŋ ə nsaŋlə̀! Kə ne mfàynsə̀ à ghə̀ŋ vi a ghə̀ŋ ə tsi a nse nə̀ a mù məghoʼomə̀ byìʼàndo Deblə̀ shiʼi li ə̀ mvi à ghə̀ŋ, tin ə̀ wen ə fwi byìʼàndo ghə̀ kɨ la əzhʉ temsə̀ li ə shwèʼ ə wen ə me.”

¹³ A ə̀ ndìʼ a zhʉ a nyàm ə fànsə yenə la və moʼ li yì a nse, ghə̀ sə̀ nyɨŋ fa bàm wùwì yì a ghə̀ ə̀ mbwì wàyn wulɨm yì lì.

¹⁴ Alì və ku təvò tə bolə ghoʼo à wen ndi ghə̀ tayn ə̀ nyɨ̀ŋ fà zhù ayì ə̀ dyʉ̀ a nse zɨm a kəshi yì və ndiʼ tuʼmə nə̀ wen tsu a ngʉ̀ʼsə sə̀ taʼ nə̀ kəbwəʼkə.

¹⁵ Zhù ayì chʉ mu fà wen əchʉ̀ to nə̀ nfwayn ə̀mu a bàm wùwì ayì ndi mə lyɨ wen ə̀ chò nə̀ wen.

¹⁶ Alì nse gyàmtə̀ wùwì ayì ə̀ koʼmə̀ mì mu a nyàm ə fànsə̀ nchʉ̀ fà wen əchʉ̀ lì.

¹⁷ Nyàm ə fànsə ayì fwisə tin à wùwì yì ə̀ lù ə̀ dyʉ̀ əzìtə̀ əghoŋ à viʼi ngwàʼa ngə̀ŋ wùwì ayì, andiʼ viʼi vətsèm vi a və ghʉ təsoʼ tə Nyìngòŋ be shə̀ʼtə̀ ənyʉ̀ a Yesò ə̀ ndiʼi a ndayn.

¹⁸ Nyàm ə fànsə ayì tɨmə tò a mbyɨ̀ ə̀mu məghoʼomə̀.