Kəmwetə 11 - The New Testament in the Babanki language

Viʼi və yenəvə və bò

¹ Və mù ku mbàŋ shəʼ ə̀fo à mò ə̀ gàʼ à mò la, “Lu ə̀ shyə̀ʼ ngə̀ŋ Nyìngòŋ ə ghoʼo nə̀ kəchiʼ kə kəku bè tàŋ viʼi a və ghoʼsə̀ Nyìngòŋ tsu,

² alì kə a shyə̀ʼ fətin fə ngə̀ŋ Nyìngòŋ ə ghoʼo byìʼe və ku li à viʼi ə tɨm la vəwenə tuʼlə̀ byɨ̀sə ntə̀ʼ ŋwoʼə a vəsàŋ njʉ̀sə̀ bò a məwum ə̀ nkàʼ.”

³ Mà ne tɨm viʼi və yenəvə mò vəbò ə vəwenə moʼ ndisə fənchì ə̀ nshə̀ʼtə̀ ntɨm ə̀ nəmwèʼè ghom a mətsi nkam nə̀ təghɨ tə bò nə̀ məwum ntʉfə.

⁴ Nkoʼ mə olìf menmə la mbo lə nə̀ fo vi a nkaʼtə nti a yi a kwi ə bo lə ə lyɨ kəshi kə viʼi venə a və njèʼè shə̀ʼtə̀ ntɨm ə Nyìngòŋ lə.

⁵ Wìʼ sətsèn ə̀ mwòmsə̀ ə lyomsə vəwenə, əzhiʼ à fʉ̀ fà vəwenə təchʉ̀ ə̀ byɨ̀sə viʼi kəbàyn ə̀ vəwenə a vyi, a ji aghèn ə zhwi no tè ndò a ghə̀ mwòmsə̀ ə lyomsə vəwenə.

⁶ Vəwenə kiʼ àdyoʼ ə ken əghʉ la kə ghə̀ shiʼi a mətsi yì a vəwenə jèʼè shə̀ʼtə̀ ntɨm ə̀ Nyìngòŋ ayì lì, kiʼ àdyoʼ ənè la mu kaʼkə a mənlyuŋ be kiʼ àdyoʼ ənè la no tè ngəʼ ko vi a nse no tè a zhʉ ə̀ kò a vəwenə koŋə.

⁷ A ne ə ndiʼ a zhʉ a vəwenə shəʼtə̀ li ntɨm ayì ə mwetə nyàm ə fànsə yì ghə̀ fʉ̀ fa nkwòŋ yì a ghə̀ shwemə shiʼi dyʉ̀ tò dyʉ̀ lì ə soyn ə zhɨ vəwenə be a zhwilə vəwenə.

⁸ Təbven tə vəwenə tə ne faŋ tò a ji ə to a ntə̀ʼ ghoʼo yì a və̀ mbantə Bobo ə̀ vəwenə tsu a kəntò. Viʼi vətsenvə toŋtə̀ ntə̀ʼ ayì nə̀ Sodòm ko nə̀ Ijìb.

⁹ Viʼi tò fa təloʼ tətsèm, bènə̀ fa ngwàʼ sətsèm bènə̀ fa təgàʼ tə mbi tətsèm, nə̀ vì nki təbven tə vəwenə a mətsi ntaʼ nə̀ kəbwəʼkə tyèn la kə wìʼ à bvɨ̀mə̀ vəwenə.

¹⁰ Viʼi vi a və̀ ntsi a nse sə saŋlə̀ be zhɨ təwen tə vəwenə byìʼì əpfʉ ə viʼi avenə. Vəwenə sə ku be shi ə̀fo fà vəlèmə byìʼàndo nshə̀ʼtə̀sə sə̀ ghoʼokə asènsə sə̀ bò sə pfʉkə li mu sə̀ nku ngəʼ ghoʼo à viʼi a nse.

¹¹ Alì à sə ndiʼ a bàm ə mətsi ayì ntaʼ nə̀ kəbyəʼkə Nyìngòŋ ku kəzhwì kì a kə nè viʼi tsi à vəwenə, kə nè vəwenə lùkə̀ ə̀ tɨ̀mə à vəwenə afwen, viʼi vyi a və̀ nyenə vəwenə sə̀ fànə̀ no nànto.

¹² Nshə̀ʼtə̀sə sə̀ ghoʼkəsə asènsə sə̀ bò bwènsə̀ lù fa pfʉ ə̀ zhʉ gɨ̀ ə to tsen a ghə̀ gàʼà fʉ̀ fa kàŋ la, “Ghə̀ŋ kuʼ ə̀ vì ashə̀!” Vəwenə kuʼ ə̀ shwe a tì mbòʼsə viʼi kəbàyn ə̀ vəwenə ti ki.

¹³ Nse shen no mwèʼè mwèʼè, tò a zhʉ ayì ə̀ bə̀ytə̀ əshyə ntə̀ʼ muʼ fa tì təshyə wum ə̀ zhwilə viʼi nkamsə sòmbo. Əfàyn ə vì a tətyɨm ə̀ viʼi vyi a və mfaŋə̀ tsu lì no nànto vəwenə mù sə ku əghoʼsə à Nyìngòŋ yì a ghə̀ diʼì a kàŋ.

¹⁴ Ghə̀ŋ zhʉtə a! kənkùmtə̀ kə ngəʼ kə cho li, ghətsen bè dìʼ a məvì tò luwèn.

Və toŋ əsoŋ à ndiʼ təsoŋ ə sòmbo

¹⁵ Ntsɨ̀ŋ ngə̀ŋ ə̀ Nyìngòŋ tsen bè tòŋ ə̀soŋ ə wen à ə̀ ndiʼ ntsɨ̀ŋsə sòmbo a sə toŋ li. Mà zhʉ gɨsə sə̀ tosə fa kàŋ sə gàʼà la, “Bobo vəghəŋ wenə̀ Klistò kìʼ kədyòʼ ə nsoʼo mbi luwèn, be diʼ ne ə nsoʼo tò soʼo no mətsi ntsèm.”

¹⁶ Vəchəʼ vi məwum əbò a njʉ̀sə̀ kàʼ a və̀ŋwʉʼ a Əfwoyn vi a shɨ ə̀ Nyìngòŋ shiʼi a nse nə̀ kəʼ ə̀ sə ghoʼsə̀ wen

¹⁷ gàʼà la, “Bobo ə Nyìngòŋ àdyoʼ ətsèm wù yì a wu diʼì luwèn, mu wù ə̀ ndìʼ yès ə ku kəzòŋ à wù ando wù ə diʼì li kədyòʼ kə ghoʼokə kì a wù ə kiʼi ə̀ nzìtə̀ sə soʼo viʼi.

¹⁸ Tinsə viʼi vyi a və ko kɨ̀ wù tə mfwi, alì əzhʉ kwʉʼ li ə wù diʼ ətoŋ fwi ghə̀ wù, əzhʉ mbè nkwʉʼ ə soʼ viʼi vəpfʉkəvə. Zhʉ be nkwʉʼ ə wù taʼ viʼi shyèʼ ə̀ wù, andiʼ nshə̀ʼtə̀sə sə̀ ghoʼokəsə wù, nə̀ viʼi vyə no vətsèm a və ghoʼsə̀ əzhiʼ ə̀ wu, vətovə nə̀ vəbwaʼvə tò ndə̀ŋndəŋ. Əzhʉ̀ be kwʉ̀ʼ ə wù byɨsə viʼi vyi a və byɨsə viʼi ə nse.”

¹⁹ Fa bàm ənyʉ̀ venə, əchʉ ngə̀ŋ ə̀ ghoʼo ə̀ Nyìngòŋ fa kàŋ ə bòʼmə̀, mà yen əkum ə məkàyn ə̀ Nyìngòŋ à wen ə ngə̀ŋ ə ghoʼo. Əghʉ sə̀ mwàntə̀ bwankə̀, fa kəshi ayì, gɨsə fʉ̀ fa tsu, nse nə̀ʼə̀, awoŋ bè shiʼi no à ghoʼo.