Kəmwetə 10 - The New Testament in the Babanki language

Ntsɨ̀ŋ ngə̀ŋ ə̀ Nyìngòŋ vì nə̀ fəndeʼ fəbʉʼ ə ŋwàʼlə̀ a və kablə̀

¹ Kənyʉ̀ kə bè fʉ̀ à mò a əkə̀ʼ a nə̀ jòm, mà yen ntsɨ̀ŋ ngə̀ŋ ə̀ Nyìngòŋ ghoʼo ə tsen ghə̀ shiʼi vì fa kàŋ mu mbòʼsə lem li wen, kəmpfembiʼ kə diʼ à wen kətʉ, əkə̀ʼ ə we baynə tò nə̀ chʉzhʉ, afwen ə wen be diʼ tò nə̀ əlwàŋ əzhiʼ.

² Ghə̀ ə̀ nkìʼ fəbʉʼ fə ŋwàʼlə̀ ə lemtə à wen kəvu mu və bòʼò li. Ghə̀ tom kəghʉ kəkwoŋ ə toghə wen a ə̀mu mə nghoʼomə̀ ə̀ tòm kəghʉ kəkwoŋ ə nənkwè a nse.

³ Ntsɨ̀ŋ ngə̀ŋ ə̀ Nyìngòŋ ayì dzàŋ no əgɨ̀ ə to ghə̀ kù tò nə̀ gɨ̀ abìkəŋ a zhʉ a ghə̀ dì. Ghə̀ ə̀ ndzàŋə̀ no əzhʉ ə̀ kò, əghʉ bwènsə̀ bwankə̀ aghayn sòmbo.

⁴ A ndìʼ ando əghʉ aghenə mbwankə, mà sə̀ kəŋ ənyòʼ kənyʉ̀ a ghə̀ ngaʼà alì ə̀ zhʉ̀ gɨ̀ ghə̀ gàʼà shiʼi fa kàŋ la, “Lyòmtə̀ nyʉ̀ vyi a əghʉ bwankəghə ghenə gaʼà aghayn ə sòmbo lə̀, kə a nyòʼ.”

⁵ Fà yi bàm, mà yen ando ntsɨ̀ŋ ngə̀ŋ ə̀ Nyìngòŋ yì a mà yì yen ghə̀ ti a mu be ti a nse ə kuʼsə̀ kəvu kəkwoŋ ə toghə wen a kàŋ

⁶ ə̀ kàyn a əzhiʼ ə̀ Nyìngòŋ yì a ghə̀ diʼì no məzhʉ ntsèm, à diʼ wen a ghə̀ ə̀ nshɨ̀tə̀ kaŋ, nə̀ nse bènə̀ ə̀mu mə nghoʼomə̀ bè shɨ̀tə̀ no ə̀fo ətsèm a və diʼì a shi avenə la kə və be à zhwi əzhʉ,

⁷ byìʼì a ne ndiʼ a mətsi a yì a ntsɨ̀ŋ ngə̀ŋ ə̀ Nyìngòŋ kəmwetə fa tì ntsɨ̀ŋsə shì sòmbo ə toŋ əsoŋ wen ə Nyìngòŋ ne kənyʉ̀ kə lyomtəkə wen kì a ghə̀ ə̀ nghʉ ando ghə̀ ə̀ nshə̀ʼtə̀ à viʼi ə shyèʼ ə wen a ə̀ ndìʼ nshə̀ʼtə̀sə sə̀ghoʼkəsə.

⁸ Fà yi bàm, mà zhʉ̀ gɨ̀ yì a ghə̀ yì gàʼ à mò fa kàŋ lì ghə̀ bè gàʼ à mò la, “Dyʉ̀ ə̀ shì ŋwàʼlə̀ yì a ghə̀ diʼì a kəvu ntsɨ̀ŋ ngə̀ŋ ə̀ Nyìngòŋ a ghə̀ ti a mu be ti a nse mu və bòʼò li lì.”

⁹ Mà mù dyʉ̀ à ntsɨ̀ŋ ngə̀ŋ ə̀ Nyìngòŋ yì ə̀ gàʼ à wen la ghə̀ ku fəŋwàʼlə̀ fə lemtəfə fì à mò. Ghə̀ gàʼ à mò la, “Ghaʼ ə̀ pfiʼ, ghə̀ a nlyɨ̀mə̀ tò nə̀ əlyʉ̀ à wù a əchʉ̀ alì ə sə shiʼi à wù a bèm ə nlwìlwi.”

¹⁰ Mà shi fəŋwàʼlə̀ afì fa kəvu ntsɨ̀ŋ ngə̀ŋ ə̀ Nyìngòŋ ayì ə̀ tsam ghə̀ lyɨ̀mlyɨmə à mò a əchʉ̀ alì sə shiʼi à mò ə bèm ə̀ kaʼsə sə̀ lwilwi.

¹¹ Ntsɨ̀ŋ ngə̀ŋ ə̀ Nyìngòŋ bè gàʼ à mò la mà diʼi ə shə̀ʼtə̀ ətɨm ə̀ Nyìngòŋ à viʼi no vəghoʼo, nə̀ a təloʼ no tə ghoʼo, nə̀ à viʼi a və gàʼà təgàʼ no təghoʼo bènə̀ à təfòyn no tə ghoʼo.