Joyn 7 - The New Testament in the Babanki language

Vəlemə və Yesò ə be boŋ tyen la və ko byɨmə a wen

¹ A sə ndiʼ fa abàm nyʉ̀ venə, Yesò mu sə jèʼe kaʼkə to fa Galìlì, ko ghə̀ be kòŋ ə dyʉ̀ a Jùdiyà byìʼàndo viʼi Jus ndiʼ tsu, kəŋə ə zhwi wen.

² A ndiʼ ali mu à faŋ to mətsi ə nshəʼ alə̀ ə kətsi kə kəzhɨ ə viʼi Jus a vəwenə ə zhɨ tò nsàŋ kə nvì,

³ vəlemə və Yesò ə gàʼ a wen la, “Wù yi ndiʼ ə lù ə shiʼi ə dyʉ̀ a Jùdiyà ndiʼ ndzɨ̀mtə̀sə bàm ə wù yen ə nyʉ̀ ə kaynəvə vi a wù nè.

⁴ Wìʼ ə mù sətsèn ə kòŋ la və nə̀ kɨ wen, ko ghə̀ lù ə nyòʼò ə nyòʼò nè ənyʉ̀. Ando wù sə nè nyʉ̀ venə lə, kə bòŋ la wù nè, mbyi ə tsèm ə kɨ wù.”

⁵ Vəwenə ə gàʼa alì ko andiʼ la no tèbe vəwenə byɨmə li a wen.

⁶ Yesò ə mu gàʼ a vəwenə la, “Əzhʉ ghomə ko təmə kwʉ̀ʼ. A diʼ a ghə̀ŋ, mu ghə̀ŋ zizi ghə̀ŋ dyʉ̀ a Jelusalèm no zhʉ ə kò.

⁷ Viʼi mbyi ko bàynə̀ ghə̀ŋ, ali bàynə̀ mò byìʼàndo ma diʼi làynsə jisə nyʉ̀ ə byɨvə ə vəwenə.

⁸ Ghə̀ŋ dyʉ̀ a kəshi kə kəzhɨ na ken, Ma ko dyʉ̀ luwen byìʼàndo zhʉ ghomə ko təmə kwʉ̀ʼ.”

⁹ Ghə̀ gaʼa ali ə mu nyʉ̀ʼmə to a Galìlì.

Yesò ə dyʉ̀ a kəshi kə kəzhɨ kə nsàŋ

¹⁰ Ghə̀ gaʼa tèbè ali, vəlemə vəwenə ə na lù dyʉ̀ a kəshi kə kəzhɨ na kì, ghə̀ be boŋ dyʉ̀, ali ə sə dyʉ̀ ə dyʉ̀ a kənyoʼtə̀.

¹¹ Viʼi Jus dyʉ̀ ə sə kəŋ wen fa tsu bèmə la, “ghə̀ ye lo?”

¹² Andiʼ ali, viʼi diʼ tsu no to kədə̀ŋ, nyoʼtə nyoʼtə gàʼa kumə wen. Vətsevə gàʼ la, “Ghə̀ diʼ no wù ə jùŋ.” Vətsevə tensə gaʼa la, “ghə̀ jèʼè lobtə viʼi to kədyàŋ.”

¹³ Və ngàʼa tèbè ali, wìʼ ko ndiʼ ə gàʼ kənyʉ̀ a ndayn byìʼàndo vəwenə ə fwàynə̀ tʉtʉ viʼi Jus.

¹⁴ To ando mə ntsi mə kəzhɨ na kenkə ə ngə̀li a kə ntìntìn, Yesò kuʼ dyʉ̀ a kəbəŋ kə ngə̀ŋ Nyìngòŋ ə ghoʼo, ə sə ziʼi viʼi tsu.

¹⁵ Viʼi vətsenvə nə̀ viʼi Jus zhʉ ziʼi ə wen ə sə diʼ nə̀ əkaynə ə sə bèmə la, “Wìʼ ghèn jèʼ ale ə kɨ nyʉ̀ venə ko andiʼ la ghə̀ təmə dyʉ̀ a ngə̀ŋ ŋwàʼlə̀ a?”

¹⁶ Yesò ə gàʼ la, “Ma ko ziʼi ghə̀ŋ nə̀ nyʉ̀ ə vwomə. A diʼ nyʉ̀ ə Nyìngòŋ yi a ghə̀ tɨmə mo.

¹⁷ No ndò a ghə̀ kòŋ ə ne kənyʉ̀ a Nyìngòŋ ə kəŋ, mu ghə̀ na yen əkɨ la ziʼi ə ghomə lù fa Nyìngòŋ mu ma ziʼi to kənyʉ̀ ə komkə lò.

¹⁸ No ndò yi a ghə̀ kəŋ ə ziʼi əziʼi ngə̀ŋ ə wen, ghə̀ ə kəŋ ə kiʼi kuʼsə ngeŋ wen. Alì wìʼ yi a ghə̀ shwèʼè ə ghoʼsə wìʼ ə yi a ghə̀ tɨmə wen ə gaʼa to nəmwèʼè ko ghə̀ lu nzhò ndzɨŋ.

¹⁹ A Mosìs ə ku li Əsoʼ a ghə̀ŋ ali no wìʼ ə mùʼ fa ghə̀ŋ a ntìntìn ə ko ghʉ tebè Əsoʼ a yi. Ghə̀ŋ kəŋ ə zhwi mo a gho?”

²⁰ Tənòyn a titə ə bwensə la, “Wù diʼ alə̀ kiʼi kəzhwì kə kəbɨkə! A kəŋ ə zhwi ndò ə zhwi wù a?”

²¹ Yesò ə gàʼ a vəwenə la, “Mà tə nè kənyʉ̀ kə kaynəkə to kə mùʼ, kə sə fwàynsə a ghə̀ŋ no nànto.

²² Alì mu Mosìs ə nku li əsoʼ la və ə bwi wàyn wùlɨm, ghə̀ŋ shətə ə wen, no tèbe ando à ko ndiʼ Əsoʼ ə Mosìs. A ndiʼ əsoʼ ə vətìʼ və vətìʼ vəghəŋ. Ghə̀ŋ sə shətə kwetə tèbe kətsi kə tʉʼ lòʼ, shətə to shətə.

²³ Və sətsen ə ndiʼ mu və zizi və shətə wàyn a tʉʼ lòʼ ndi lwinsə Əsoʼ ə Mosìs, ghə̀ŋ sə be fwisə tyin tò ando mà chʉ wìʼ a kətsi kə chʉʼ lòʼ byìʼì ghò?

²⁴ Kə ghə̀ŋ ə̀ nsoʼo viʼi to byìʼì nyʉ̀ vyi a ghə̀ŋ ə ki dyʉ̀ sə li. Ghə̀ŋ ə nsoʼo to no nəmwèʼè.”

Viʼi bèm la Yesò lə diʼ Wìʼ yi a və Ntsuʼ Li mu?

²⁵ Ando ghə̀ gàʼ ali no zhʉ ko, viʼi Jelusalèm vətsenvə sə bèmə̀ la, “a bwen wìʼ yi a ghə̀ŋ kəŋ ə zhwi lì.

²⁶ Wìʼ ghèn sə gaʼa to no ashɨ ə viʼi, wìʼ ə ko gàʼ kənyʉ̀ a wen! wù gaʼa tʉtʉ mu lutə sù kɨ luwen la à diʼ to no wen yì a və Ntsuʼ li a?

²⁷ Vəghəŋ ə kɨ kəshi kì a wìʼ ghèn lu fa tsu, ali Klistò diʼ lə vi ko wìʼ ə lu kɨ la ghə̀ lu fa fe lo.”

²⁸ Və ə ngàʼa ali, Yesò ə bo ziʼi to viʼi a kəbəŋ kə ngə̀ŋ Nyìngòŋ. Ghə̀ be gàʼ a gɨ to la, “Ghə̀ŋ kwòʼtə̀ la ghə̀ŋ kɨli mò, kɨ kəshi kì a mà lù fa tsù a? Ma ko vi ashə fa mo ngeŋ. A tɨm wìʼ tɨm mo, ko ghə̀ŋ kɨ wen, ghə̀ gaʼa tò nəmwèʼè,

²⁹ ali ma kɨ wen byìʼàndo mà lù fa wen a ben mu à tɨm əwen ətɨm mo.”

³⁰ Ghə̀ gaʼa ali, və sə kəŋ ə ghaʼ wen, ali wìʼ ko ə mwomsə byìʼàndo zhʉ yi a Nyìngòŋ ə nghʉ la və lu ghaʼa wen ə ko təmə kwʉʼ.

³¹ Nò tèbe ali, ngwaʼ viʼi fa tyi nòyn a yi mbyɨmə li a wen, byìʼàndo vəwenə ə ko yenə la wìʼ ə tsen lu be vì a və Ntsuʼ Li ə ne nchwisə nyʉ̀ ə kaynəvə ə tsenəvə, və chò vyi a wìʼ na ghèn ə nè li.

Və tɨm vesugyèʼè la və dyʉ̀ ghaʼa Yesò

³² Viʼi Falàsi ə zhʉ li to ando viʼi ə nyoʼtə gàʼa nyʉ̀ a venə kumə Yesò. Ali vəwenə nə̀ tʉtʉ vəpfèm və ngə̀ŋ Nyìngòŋ mù tɨm vesugyèʼè la və dyʉ̀ ghaʼa wen.

³³ Sə dyʉ̀, Yesò ə gàʼ a vəwenə la, “Mà ndiʼ vəghəŋ to fəshinə fə zhʉ̀ alə̀ ə be bwenə dyʉ̀ a wìʼ yì a ghə̀ tɨmə mò.

³⁴ Ghə̀ŋ na sə kəŋ mò, ko ghə̀ be yen byìʼàndo ma ne ndiʼ akəshi, mu ghə̀ŋ zizi ko ghə̀ŋ lu dyʉ̀ tsu.”

³⁵ Tʉtʉ viʼi Jus vətsenvə sə kayntə to fa vəwenə ngeŋsə bèmə̀ la, “Wìʼ ghèn le kəŋ ə dyʉ̀ fe a vəghəŋ zi kò və lə be yenə wen a? Ghə̀ be kəŋ ə dyʉ̀ a ntə̀ʼ sə tɨm shì a viʼi vəghəŋ tə nyɨŋkə dyʉ̀ tsu, ə nziʼi viʼi tɨm a vyi mu?

³⁶ Ghə̀ sə gàʼa la vəghəŋ ne kəŋ wen, ko və lu yen byìʼàndo ghə̀ dyʉ̀ akəshi mu vəghəŋ zizi ko və lu dyʉ̀ tsu. Ghə̀ le gàʼa alə̀, kə diʼ la gho?”

Yesò ə gàʼ la ghə̀ ku mu, mə ku ə ntsìnə̀ a viʼi

³⁷ A sə ndiʼ a kətsi kəzhɨ kə mwetə kə, andiʼ no kətsi kə kəzhɨ kə ghoʼo kə, Yesò ə lu tɨmə ə dzàŋ a gɨ̀ to ə gàʼ la, “Ətoŋ à mu ə zɨmə no ndo ghə̀ vi a mò a mà ku mu ghə̀ nyʉ̀.

³⁸ A byɨmə no ndo a mò, ‘fwaynə a mù a ghə̀ ku Ntsìnə̀ a nfʉ̀ fa wen a wen,’ ndə̀ŋndəŋ to ando Ŋwàʼlə̀ Nyìngòŋ ə ngàʼa li.”

³⁹ Yesò ə ngàʼa lə kumə Kəzhwì kì a və ndiʼ ə ku a viʼi vyi a və byɨmə a wen. A ndiʼ ali, Nyìngòŋ ko təmə ku kəzhwì kə wen na kì byìʼàndo ghə̀ ko təmə lùsə kùʼsə Yesò akàŋ ə ku kədyòʼ a wen.

Kəngəsə kə lu byìʼì Yesò

⁴⁰ Viʼi vətsenvə a ntìntìn ənòyn a yi ə zhʉ li kənyʉ̀ ki a Yesò ə gàʼ, ə sə gàʼa la, “nəmwèʼè wìʼ ghèn ə diʼ to no Nshə̀ʼtə̀ Nyìngòŋ ə ghoʼo.”

⁴¹ Vətsevə be gàʼa la, “Ghə̀ diʼ Wìʼ yi a və Ntsuʼ li.” Vətsevə be bèm tamə la, “Mu Klistò jèʼ ale ə fʉ̀ fa Galìlì a?

⁴² A Ŋwàʼlə̀ Nyìngòŋ gàʼ la Klistò lu fʉ̀ fa ngwaʼ ngə̀ŋ ə Fòyn Devìt, la və lu bwi wen a Betə̀lèhem a ntə̀ʼ nə̀ Devìt?”

⁴³ Ando və gàʼa tsu li, kəngəsə kə fʉ̀ kumə Yesò.

⁴⁴ Viʼi vətsenvə sə kəŋ ə ghaʼ Yesò ali ko wìʼ ə lù kùm kəvu a wen a wèn.

Tʉtʉ və Jus ə tyen la və ko byɨmə Yesò

⁴⁵ Vəsugyèʼ vyi na bwenə dyʉ̀, vəpfèm və ngə̀ŋ Nyìngòŋ nə̀ viʼi Falàsi ə bèm a vəwenə la, “Ghə̀ŋ faŋ ke ghaʼ wen ə vì nə̀ wen byìʼì gho?”

⁴⁶ Vəsugyèʼ a vyi ə gàʼ la, “Wìʼ ko ntɨmə ə gaʼa a ji ghèn a wìʼ na ghèn ə gaʼa fa tsu!”

⁴⁷ Viʼi Falàsi ə bèm la, “ghə̀ be lobtə nkàyntə̀ ghə̀ŋ?

⁴⁸ Ghə̀ŋ tɨmə zhʉ la no wìʼ fa tʉtʉ və Jus kò wù ə Falàsi ə tsèn byɨmə li a wen?

⁴⁹ Alì, nju Nyìngòŋ ə ku nòyn viʼi venə a və ko kɨ Əsoʼ ə Mosìs lə.”

⁵⁰ Alì Nìkòdemùs, to wù Falàsi ə tsen, a ghə̀ ndyʉ̀ yen Yesò ambì, ə gàʼ a vəwenə la,

⁵¹ “Əsoʼ ə vəghəŋ ə gàʼa la və zizi ko və lu gàʼ la wìʼ fəŋ li nsòʼ ko andiʼ la və zhʉtə li gaʼa ə wen.”

⁵² Vəwenə gàʼ a wen la, “nkàyntə̀ wù lu fa Galìlì mu? Wù tuʼ ə ki a Ŋwàʼlə̀ Nyìngòŋ, a zizi wù yen la nshə̀ʼtə̀ ə ghoʼo ko lu fʉ fa Galìlì a?.”

Və ghaʼ əvi nə̀ wùwì ə njèʼtə̀ a Yesò

⁵³ Viʼi ə gə̀sə̀ ə pfwo.