Joyn 6 - The New Testament in the Babanki language

Yesò zhis viʼi zaʼa nkamsə tàyn

¹ To ando Yesò ə mwetə li nyʉ̀ venə, ghə̀ dyàŋə̀ li dyʉ̀ a dzen Mo ə Galìlì a və be toŋtə la Mo Taybelyas,

² ghə̀ sə ndyàŋə̀, ə nòynə ə viʼi və tsenəvə ə dyàŋ fa wen abàm, to kədə̀ŋ byìʼàndo vəwenə ndiʼ mu və yen li nchwisə nyʉ̀ ə kaynə və vyi a ghə̀ nè viʼi və kwaʼkəvə, və to.

³ Yesò ə ndyàŋə̀ ali ə dyʉ̀ kuʼ nyʉ̀ʼmə a kwi pfen wenə ndzɨ̀mtə̀sə bàm ə wen.

⁴ A ndiʼ alì mu ə mətsi mə kəzhɨ kə məzaʼsə̀ ə viʼi Jus kə sə boʼsə̀ vì.

⁵ To ando ghə̀ tsoʼsə li kətʉ kə wen mù yen ənòyn ə viʼi ando ghə̀ vì, ghə̀ mù bèm a Filib la, “vəghəŋ lə zizi vəghəŋ zen ə fozhɨvə fa fe a və tu və kwʉ̀ʼ vəghəŋ zhis viʼi venə tsu a?”

⁶ Ghə̀ ə bèmə ali, kəŋ ə mwomsə to Filib, byìʼe ghə̀ nkɨ kənyʉ̀ a ghə̀ a ne.

⁷ Filib bwensə ə gàʼ la, “mimbu no ndò sə mwòm kəfo to mwòmə̀ vəghəŋ diʼ ə kiʼ ə ko a ghə̀ cho ə ko a wìʼ diʼ shwèʼè a və və sàŋ ə fwomə.”

⁸ Ndzɨ̀mtə̀ əbàm ə wen ə tsen, a və toŋtə la Andɨ̀lò, a diʼ lèmə̀ Saymun Bità ə mu gàʼ la,

⁹ “Wàyn wùlɨm ə tsen diʼ ashə, a ghə̀ kiʼi tɨ̀ghef tə kəbayn tə, tàyn nə̀ shʉsə bò sə. Alì, fozhɨvə a venə ə ko kwʉ̀ʼ no fa mphen a ənòyn ə viʼi venə.”

¹⁰ Yesò ə gàʼ a ndzɨ̀mtə̀sə bàm ə wensə la, “Ghə̀ŋ ne, viʼi a venə nyʉ̀ʼmə a nse.” A ndiʼ ali kəfʉ̀ʼ kə diʼ to kədə̀ŋ akəshi a ghèn. Viʼi a venə ə shiʼi nyʉ̀ʼmə a nse, lʉmə diʼ a ntìntìn ə vəwenə zàʼa dyʉ̀ a nkam sə tàyn.

¹¹ Yesò ə mu shi kəbayn a kì ə ku kəzòŋ a Nyìngòŋ, mu ku la və gətə a viʼi a venə. Ghə̀ be shi shʉ̀ shisə ə ku to kəzòŋ a Nyìngòŋ ə gə̀tə̀ a viʼi, no ndò ə zhɨ kwiʼ to ando ghə̀ kòŋə.

¹² Andiʼ to ando vəwenə ə zhɨ li ə kwiʼ, Yesò ə gàʼ a ndzɨ̀mtə̀sə bàm ə wensə la, “Ghə̀ŋ boŋtə əbyeʼ ə vyi a və faŋ, kə to kəfo kə ə lè to kədyàŋ.”

¹³ Vəwenə boŋtə əbyeʼ əbayn vyi a viʼi ə zhɨ ə ghʉ̀sə, və lwinkə a nkyèsə njʉ̀sə̀ bò.

¹⁴ Viʼi na vi ə yen li kənyʉ̀ kə kaynəkə na kènkə a Yesò nè ə sə gàʼ la, “A diʼ to no Nshə̀ʼtə̀ ə ghoʼo yì a ghə̀ ndiʼ lu vì a mbyi.”

¹⁵ Yesò ə kɨ li la və a ghaʼa, ghʉ̀ wen a fòyn to kədyòʼ ghə̀ be nyɨŋ kuʼ dyʉ̀ no a kwi pfen, to wen ə nyɨŋ.

Yesò ə jèʼ a kwi a mù

¹⁶ A sə diʼ a zhʉ mpfwomə, ndzɨ̀mtə̀sə bàm ə wen bwenə shiʼi dyʉ̀ a benə mo,

¹⁷ kwen a kəbaŋ ə sə bwenə dyàŋə̀ dyʉ̀ a Kàbanùm, ətʉʼ ə ne sə njɨ vì, ko Yesò təmə kwetə vəwenə.

¹⁸ A diʼ alì təfwof tə to tə tsentə chò, nə̀ʼə̀ mu no nànto.

¹⁹ Ndzɨ̀mtə̀sə bàm ə wensə jèʼ ə sə zàʼa dyʉ̀ kəghaf ə sə ki ə yèn Yesò, ghə̀ jèʼè boʼsə vì nə̀ vəwenə a kwi a mù. Vəwenə sə fwaynə no nànto.

²⁰ Alì, Yesò gàʼ a vəwenə la, “kə ghə̀ŋ fwàyn. A diʼ mò.”

²¹ Vəwenə sə saŋlə ə lyɨ̀ wen a kəbaŋ, ə sə tsèn to mu vəwenə dyàŋə̀ li mwetə a ndzèn a vəwenə ə ndyʉ̀ tsu.

Viʼi sə kəŋ Yesò

²² Ətʉʼ ə layn, ənòyn ə viʼi vyi ə kwoʼtə la, a tə ndiʼ to kəbaŋ kə mùʼ a ndzèn a mu, a diʼ kəwenkə a ndzɨ̀mtə̀sə bàm ə Yesò sə tə dyàŋ tsu, ə sə ndyàŋə̀ ali, Yesò faŋ kò ghə̀ lə dyʉ̀ wenə vəwenə.

²³ Məbaŋ mə tsenə mə lù fa Tàybelìyàs ə vì tɨmə a ben kəshi yi a Yesò ə bwaʼsə fozhɨvə vyi ə ku a viʼi tsu li la vəwenə zhɨ.

²⁴ Tənòyn tə viʼi a tì ə nyen li mwetə no zhʉ̀ko la Yesò ko diʼ tsu, tebe ndzɨ̀mtə̀sə bàm ə wensə ko diʼ, vəwenə kwen a kəbaŋ ə sə kəŋ dyʉ̀ nə̀ wen fa Kàbanùm.

Yesò ə gàʼ la yi diʼ kəbayn kə bwòŋ

²⁵ Viʼi na vyi mù ə yen Yesò ə bèm a wen la, “Ndìʼsə̀, wù vì a shèn a zhʉ ko?”

²⁶ Yesò ə bwensə gàʼ a vəwenə la, “Ma gaʼa a ghə̀ŋ to no nəmwèʼè la, ghə̀ŋ ə kəŋ mò to byìʼàndo mà tə ku fozhɨvə, ghə̀ŋ zhɨ kwiʼ, a ko diʼ byìʼàndo ghə̀ŋ tə yen nyʉ̀ ə kaynə və vyi a ma tə nè.

²⁷ Kə ghə̀ŋ ne nyɨŋə fa abàm fozhɨvə, a və diʼ ə byɨf. Ghə̀ŋ ə boŋsə nyɨŋə fa abàm fozhɨvə vyi a və kù bwoŋ yi a ghə̀ ko lu mè, a diʼ Wàyn Wìʼ a ghə̀ zizi ghə̀ ku fozhɨvə a venə a ghə̀ŋ byìʼàndo Tìʼ ghom, Nyìngòŋ sə diʼ mù ghə̀ diʼi li a ndayn la ma kiʼi kədyòʼ a kènkə.”

²⁸ Vəwenə bèm a wen la, “Yès zizi yès ne ale ə nè nyʉ̀ vyi a Nyìngòŋ ə kəŋ a?”

²⁹ Yesò ə bwensə la, “əshyèʼ ə Nyìngòŋ ə diʼ la ghə̀ŋ byɨmə a wen yì a ghə̀ tɨmə a mbyi.”

³⁰ Vəwenə be bèm a wen la, “Wu le zizi wu nè no nchwi kənyʉ̀ kə kaynəkə kə kò ə diʼ la à tɨm Nyìngòŋ ə tɨm wù mibu yès yen, ə byɨmə a? Wù lə nè no ghò?

³¹ Vətìʼ və vətìʼ vyesə ə nzhɨ fozhɨvə vyi a və toŋtə la manà lì a nse zɨm, to ndə̀ŋndəŋ ando və diʼ mù və nyòʼò li a Ŋwàʼlə̀ Nyìngòŋ la, ‘Ghə̀ nku li fozhɨvə mu və lu fa kaŋ, vəwenə zhɨ.’”

³² Yesò ə gàʼ a vəwenə la, “Ma gaʼa a ghə̀ŋ tò no nəmwèʼè la, a ko nku Mosìs əku fozhɨvə vyi a və lù kaŋ a ghə̀ŋ. A boŋsə ku Tìʼ ghom ə ku nkàyntə̀ ə fozhɨvə vyi a və lù fa kàŋ.

³³ Nkàyntə̀ ə fozhɨvə Nyìngòŋ ə diʼ wìʼ yì a ghə̀ lu fa kàŋ, əvì sə ku ntsìnə̀ a mbyi.”

³⁴ Vəwenə toŋtə wen ə gàʼ la, “Tikəbəŋ, nku ə fozhɨvə a venə a yès to məzhʉ̀ ə tsèm.”

³⁵ Yesò ə gàʼ a vəwenə la, “Ma diʼ kəfo kə zhɨkə kì a kə ku ntsìnə̀ a viʼi. A vi no ndò a mò, ko jɨŋ be lu zaf ə wen, mu à byɨmə no ndò a mò, ko ətoŋ a mu lu be zɨmə wen.

³⁶ Mà sə diʼ mù ma tə ə gàʼ a ghə̀ŋ la ghə̀ŋ yen li mò, alì ko ghə̀ŋ lu byɨmə.

³⁷ Viʼi vyi a Tìʼ ə ghom əku li a mò ne vì a mò. Mà ko lu dzɨ̀m wìʼ a ghə̀ vi a mò,

³⁸ byìʼàndo mà lu fa kàŋ ə shiʼi vi a nse ə nè kənyʉ̀ kì a wìʼ yì a ghə̀ tɨmə mo ə kəŋ, a ko diʼ kənyʉ̀ ki a ma kəŋ fa mò a ngeŋ.

³⁹ Wìʼ yi a ghə̀ tɨmə mo ko kəŋ la no wìʼ ə mùʼ a ghə̀ ku li a mò le. Ghə̀ kəŋ la mà lu bwensə lùsə vəwenə fa pfʉ a kətsi kə bàm.

⁴⁰ Tìʼ ə ghom ə kəŋ la no viʼi vətsèm a və yen li mo ə byɨmə a mò lu kiʼi bwoŋ yi a ghə̀ ko lu mè. Mà lu bwènsə̀ lùsə vəwenə fa pfʉ a kətsi kə bàm.”

⁴¹ Ghə̀ ngàʼà alì, viʼi Jus zhʉ ə sə dèmkə̀ byìʼì kənyʉ̀ ki a ghə̀ ə ngàʼà la ghə̀ diʼ ə fozhɨvə vyi a və lu fa kàŋ.

⁴² Vəwenə sə bèmə la, “a ko ghə̀ŋ diʼ Yesò to wàyn Josèf vəghəŋ kɨ tìʼ ə wen nə̀ liwen? Ghə̀ jèʼ ale ə sə gàʼà la ghə̀ shiʼi nvi fa kàŋ a?”

⁴³ Yesò ə gàʼ a vəwenə la, “kə ghə̀ŋ be dèmkə̀ a ghə̀ŋ a ntìntìn.

⁴⁴ Tìʼ yì a ghə̀ tɨmə mo faŋ ke ne wìʼ la ghə̀ vì a mò, ko ghə̀ a vì. Ghə̀ sətsen ə vì, mu ma lu bwensə lùsə wen fa pfʉ a kətsi kə ə bàm.

⁴⁵ Nshə̀ʼtə̀ sə ghoʼkəsə ə nyòʼo li la, ‘Nyìngòŋ lu ziʼi viʼi və tsèm.’ Nò viʼi və tsèm vyi a və zhʉ kənyʉ̀ kì a Tìʼ ə gàʼ ne vì a mò.

⁴⁶ Wìʼ ko tɨmə yen Tìʼ a bwen to mò a ma lu fa benə Nyìngòŋ. A diʼ to mò a ma yen li Tìʼ.

⁴⁷ Ma gàʼà a ghə̀ŋ to no nəmwèʼè la, à byɨmə no ndò mu ghə̀ lu kiʼi bwòŋ yi a ghə̀ ko lu mè.

⁴⁸ Ma diʼ ə fozhɨvə vyi a və ku ntsìnə̀ a viʼi.

⁴⁹ Vətìʼ və vətìʼ və vəŋə ə nzhɨ fozhɨvə vyi a və ə toŋtə la manà a nse zɨm, ali ə be pfʉkə to pfʉkə.

⁵⁰ Ə fozhɨvə venə a ma gàʼà luwen diʼ ə fozhɨvə mu və shiʼi nvi fa kàŋ, mu wìʼ ə zhɨ, ko ghə̀ lu be pfʉ.

⁵¹ A diʼ to no mò diʼ fozhɨvə na venə a və shiʼi ə vi fa kàŋ. A zhɨ no ndo zhɨ fozhɨvə na venə, mu ghə̀ ko lu be pfʉ. Ə fozhɨvə na venə diʼ wen ə ghomə yi a ma ne kù ndiʼ viʼi mbyi ə kiʼi ntsìnə̀ yi a ghə̀ faŋ to ghayn ə mùʼ.”

⁵² Yesò ə gàʼa alì, kənyʉ̀ a kì kə zaf viʼi Jus na vi, vəwenə kəŋkə̀ no nànto ə bèm la, “Wìʼ ghèn ə gàʼ la ghə̀ zizi ghə̀ ku wen ə wen a ale la vəghəŋ zhɨ a nə̀ fozhɨvə a?”

⁵³ Yesò ə mu gàʼ a vəwenə la, “Ma gàʼà a ghə̀ŋ to no nəmwèʼè la, ghə̀ŋ sətsen faŋ ke zhɨ əwen ə Wàyn Wìʼ be ə nyʉ̀ mənlyuŋ mə wen, mu ghə̀ŋ ko ne kiʼi ə ntsìnə̀.

⁵⁴ A zhɨ no ndò zhɨ əwenə ghomə be nyʉ mənlyuŋ mwomə, mu ghə̀ lu kiʼi bwoŋ yi a ghə̀ ko lu mè, a li ma be lùsə wen fa pfʉ a kətsi kə bàm,

⁵⁵ byiʼàndo əwenə ghomə diʼ to no nkàyntə̀ kəfo kə zhɨkə, mənlyuŋ ə mwomə diʼ no nkàyntə̀ kəfo kə nyʉ̀ kə.

⁵⁶ A zhɨ no ndò zhɨ əwenə ghomə be nyʉ̀ mənlyuŋ mwomə, mu yo wen diʼ a kənyʉ̀ kə muʼ.

⁵⁷ A zhɨ no ndo zhɨ əwenə ghomə, ghə̀ nə̀ tsi byìʼì mò, to ndə̀ŋndəŋ ando ma tsi byìʼì Tìʼ a ghə̀ tɨmə mo.

⁵⁸ Mà le diʼ kəfo kə zhɨkə kì a kə shiʼi vi fa kàŋ. Vətìʼ və vətìʼ və vəŋə ə zhɨ kəfo kə zhɨkə kì a və ə̀ toŋtə la manà li ə pfʉkə, ali mu à zhɨ no ndò zhɨ əwenə ghomə a ghenə mu ghə̀ lu tsi faŋ.”

⁵⁹ Yesò ə ngàʼa ali, ando ghə̀ nziʼi viʼi a ngə̀ŋ ntsèntə̀ ə viʼi Jus a Kàbanùm.

Ə ziʼi Yesò ə ghoʼo ndzɨ̀mtə̀sə bàm ə wen se tsensə

⁶⁰ Ndzɨ̀mtə̀sə bàm ə Yesò ə zhʉ ziʼi na ghenə ə sə gàʼ la, “Əziʼi a ghenə to no nànto. A zizi à byɨmə no ndò byɨmə kənyʉ̀ a kèn a?”

⁶¹ Yesò ə kɨ kənyʉ̀ a vəwenə dèmkə̀ byìʼì kəwenkə to fa wen a ngeŋ ə bèm a vəwenə la, “Əziʼi na ghənə be ku ngəʼ a ghə̀ŋ no nànto?

⁶² Ghə̀ŋ sətsen yen, Wàyn Wìʼ ghə̀ bwenə lù dyʉ̀ akàŋ, akəshi yi a ghə̀ tə ndiʼ tsu fa ambì, ghə̀ŋ a nè ghò?

⁶³ A ku to kəzhwì kə Nyìngòŋ ku ə ntsìnə̀ a viʼi. Wìʼ ə ko kiʼi kənyʉ̀ kə tsenkə ə nè fa wen a ngeŋ. Mà sə diʼ mù ma shə̀ʼtə̀ li kənyʉ̀ ki a ghə̀ŋ diʼi ə nè, ndi kiʼi Kəzhwì a kəku ntsìnə̀. Gàʼ ghenə a ma tə ngàʼà a ghə̀ŋ lə a ne la ghə̀ŋ kiʼi kəzhwì kə Nyìngòŋ, be kiʼi bwoŋ yi a ghə̀ŋ a ghə̀ ko lu mè.

⁶⁴ Ma shə̀ʼtə̀ no tèbe alə̀, ghə̀ŋ vətsenvə ko byɨmə.” Yesò ə ngàʼa ali byìʼàndo ghə̀ ə kɨ li viʼi a və ko lu byɨmə wen no fa mbì, be kɨ wìʼ yi a ghə̀ ndiʼ lu baʼlə wen.

⁶⁵ Yesò ə be gàʼ a vəwenə la, à lə kənyʉ̀ kì a ghə̀ tə gàʼa a vəwenə la wìʼ ə zizi ko ghə̀ lu vì a yì, a bwen la à ku Tìʼ wen ku kədyòʼ a wen, la ghə̀ vi.

⁶⁶ A lə tò kətsi a kì a ndzɨ̀mtə̀sə bàm ə wensə sətsèn to kədə̀ŋ ə nyɨŋ li ə bwenə ko və be dzɨ̀mtə̀ wen.

⁶⁷ Ando sə bwenə ali, ghə̀ mu bèm a shisə njʉ̀sə̀ bò la, “Ghə̀ŋ be sə kə bwenə mu?”

⁶⁸ Saymun Bità ə bwensə a wen la, “Ə be ə dyʉ̀ ando a Bobo? A zizi a be shə̀ʼtə̀ ndò shə̀ʼtə̀ kənyʉ̀ ki a kə ku bwòŋ yi a ghə̀ ko lu mè a yes a?

⁶⁹ Luwen yes ə byɨmə, be kɨ la, wù diʼ Wù Laynə Nyìngòŋ a wu vi fa kaŋ.”

⁷⁰ Yesò ə gàʼ a vəwenə la, “A ghə̀ŋ kɨli la, a tə tsuʼ to no mò tsuʼ ghə̀ŋ venə njʉ̀sə̀ bò, ali wìʼ ə mùʼ diʼ a ghə̀ŋ a ntìntìn, a diʼ Deblə̀.”

⁷¹ Ghə̀ ə ngaʼa ali, gàʼ Judàs ə wàyn Iskalìyòt yì a ghə̀ ndiʼ a ntìntìn ə̀ ndzɨ̀mtə̀sə bàm ə̀ wen njʉ̀sə̀ bò, ali diʼ lu baʼlə wen.