Joyn 5 - The New Testament in the Babanki language

Yesò ə chʉʼ wù ə kənkwaʼkə

¹ A ndiʼ to ando nyʉ̀ na venə fʉ li ə chò, Yesò ə bwenə kuʼ a Jelusalèm ə zhɨ̀ kətsi kə ghoʼo kə viʼi Jus kətsen.

² Kətsèm kə tsèn kə ndiʼ a Jelusalèm boʼsə a chʉ Mbàyn Byisə, və toŋtə la Bèsaydà a gaʼa ə Hibùlù, mu və bwòm li nkaʼsə nə̀ tətotə a yi ben, tə tàyn.

^3-4 Yesò kuʼ dyʉ̀ ali, viʼi və kwaʼkəvə no vəghoʼo nyɨŋə a təto a ghèn, vətsevə diʼ mù və fɨfkəli, vətsevə diʼ mù və kwaʼakəli.

⁵ Wùlɨm ə tsèn ndiʼ a vəwenə a ntìntìn mu ghə̀ kwaʼa li a ngwʉʼ njʉ̀sə̀ fwomə a məwumə ntaʼ.

⁶ To ando Yesò, ə yen li wen ghə̀ nyəŋ tsu, ə kɨ la ghə̀ kwaʼa li fa kəghaf kədyəkə ghə̀ bèm a wen la, “Wù kòŋ ə li to?”

⁷ Wù kwaʼa a ghèn ə gàʼ la, “Tikəbəŋ, mù na mèyn nə̀ zhusə nə̀ʼ no zhʉ̀ko, ko ma lu kiʼi wìʼ la ghə̀ we mo tsu. Ma nè sə ghàs ə dyʉ̀, to mu wìʼ ə kwen li shiʼi a mù a mò ambì.”

⁸ Yesò ə gàʼ a wen la, “lu lyɨ̀ ghamə wù, ə jèʼ.”

⁹ Ando ghə̀ gàʼa li, wìʼ aghèn ə nto li, ə lu lyɨ̀ ə ghamə ə wen ə sə jèʼè dyʉ̀. Andiʼ ali a diʼ kətsi kə chʉʼ lòʼ ə viʼi Jus.

¹⁰ Tʉtʉ viʼi Jus vətsevə ə nyen li, ə wen mu gàʼ a wen la, “Layn diʼ ə Chʉʼ lòʼ, Əsoʼ ə ko byɨmə la wù ə jèʼe chò nə̀ ghamə.”

¹¹ Ghə̀ bwensə gàʼ a vəwenə la, “A gàʼ wìʼ yi a ghə̀ chʉʼ mo la mà lyɨ̀ ghamə ghomə lù ə jèʼ.”

¹² Vəwenə bèm a wen la, “A diʼ ndò na yi a ghə̀ gàʼ la wù lyɨ̀ ghamə ə wu ə njèʼè nə̀ wenə ghə̀ a?”

¹³ Wìʼ na yi a Yesò ə chʉʼ li ə nko kɨ la Yesò ə ndiʼ te ndò lo, mu Yesò ə nyɨŋ li kwen dyʉ̀ a ntìntìn ənòyn a ghə̀ ndiʼ tsu li.

¹⁴ Yesò ə ne be yen ə wen a ngə̀ŋ Nyìngòŋ ə gàʼ a wen la, “Wù to li luwen. Kə wù bè a nè mbyɨ, a bwen ali kənyʉ̀ kə a fʉ̀ a wù, to chò kwaʼa a yi.”

¹⁵ Wìʼ ghèn mu lù a zhʉ a ghèn ə dyʉ̀ ə gàʼ a viʼi Jus a vi la, à tə chʉʼ Yesò chʉʼ wen.

¹⁶ Vəwenə zìtə̀ ə sə tenlə nə̀ Yesò byìʼì ando ghə̀ chʉʼ wìʼ a kətsi kə chʉʼ lòʼ.

¹⁷ Yesò ə gàʼ a vəwenə la, “Tìʼ ghom ənè ə shwèʼè wen no məzhʉ̀ ntsèm, nkàyntə̀ mò diʼ be ə nshwèʼè tò alì.”

¹⁸ Əgaʼa ghenə mu ne viʼi Jus mu sə kəŋ jisə ə zhwi wen byìʼì ando ghə̀ nko kwaʼa to soʼ kətsi kə tʉʼ loʼ, ali be sə toŋtə Nyìngòŋ nə̀ Tìʼ wen diʼi la ghə̀ diʼi ndə̀ŋndəŋ wenə Nyìngòŋ.

¹⁹ Yesò ə mu bwensə gàʼ a vəwenə la, “Ma gaʼa a ghə̀ŋ to no nəmwèʼè la, Wàyn zizi ko ghə̀ lu nè kənyʉ̀ fa wen a ngeŋ, ghə̀ zizi ghə̀ nè to kənyʉ̀ kì a ghə̀ yen nə̀ to ando Tìʼ ə wen ə nè. Byìʼàndo no gho a Tìʼ ə nè, Wàyn be diʼ ə nè to kəwenkə.

²⁰ Fa mbwo Tìʼ ə kòŋə wàyn wen, ghə̀ diʼ li no nyʉ̀ tsèm a ghə̀ nè a wen. Ghə̀ ə diʼi nyʉ̀ kaynəvə a wen a və chò na kenkə.

²¹ Ndə̀ŋndəŋ to ando Bobo ə lùsə viʼi fa pfʉ, be ku ə bwòŋ a vəwenə, a be diʼ ndə̀ŋndəŋ to ando wàyn ə ku ə bwoŋ a no ndò a ghə̀ koŋə.

²² Tìʼ ko soʼo tebe wìʼ no fa mpfen, ghə̀ ku li kədyòʼ no kətsèm a wàyn wen la ghə̀ nsoʼo,

²³ ndi no viʼi vətsèm ə̀ gumlə Wàyn to ndə̀ŋndəŋ ando və gumlə Tìʼ. No ndo yì a ghə̀ faŋ ke gumlə wàyn, mu ghə̀ ko gumlə Tìʼ wen a ghə̀ tɨm ə wen.

²⁴ “Ma gaʼa a ghə̀ŋ to no nəmwèʼè la no ndò yi a ghə̀ zhʉ kənyʉ̀ ki a ma gaʼa, ə byɨmə a wìʼ yi a ghə̀ tɨmə mo, ne kiʼi bwoŋ yi a ghə̀ faŋ to ghayn ə mùʼ. Və zizi ko və lu be soʼo wìʼ na ghèn. Kə diʼi la ghə̀ chò li fʉ fa pfʉ sə kiʼi ə ntsìnə̀ yi a ghə̀ ko be lu mè.

²⁵ Ma gaʼa a ghə̀ŋ tò no nəmwèʼè la kətsi kə sə boʼsə vi, ma gàʼ alì mu kə diʼ mu boʼsə li, viʼi vyi a və diʼi to nə̀ viʼi və pfʉkəvə zhʉ gɨ wàyn Nyìngòŋ, alì no ndò yi a ghə̀ ne zhʉ gɨ wen ghə̀ ne tsi.

²⁶ Nyìngòŋ diʼ wìʼ yì a ghə̀ ku ə ntsìnə̀, ndə̀ŋndəŋ a ghə̀ be ne la wàyn wen be ndiʼ wìʼ yì a ntsìnə̀ ə lu fa wen.

²⁷ Nyìngòŋ diʼ mu ghə̀ ku li kədyòʼ a wàyn wen la ghə̀ nsoʼo byìʼàndo ghə̀ diʼ Wàyn Wìʼ.

²⁸ Kə ghə̀ŋ ne ndiʼ nə̀ əkaynə ə kumə kənyʉ̀ na kèn byiʼàndo zhʉ̀ sə boʼsə vi a no viʼi və tsèm a və diʼi a təsè ne zhʉ gɨ Wàyn Wìʼ,

²⁹ ə lu fa pfʉ, viʼi a və tə nè njùŋ, kiʼi bwoŋ yi a ghə̀ ko lu mè, viʼi a və tə ne nyʉ̀ byɨvə diʼ və lu soʼ byɨbsə vəwenə.

Viʼi vi a və tɨmə nchwò nsòʼ ə Yesò

³⁰ “Kənyʉ̀ kə tsenkə ko diʼ a mà zizi a mà nè a mo kədyòʼ. Ma soʼo to ji yì a Nyìngòŋ ə gàʼ la mà ə soʼo fa tsù. Kə diʼi la ma soʼo to no fwu byìʼàndo ma ko kəŋ ə nè kənyʉ̀ kì a ma kòŋ, ali nè to kì a wìʼ yi a ghə̀ tɨmə mo kəŋ la ma nè.

³¹ “Mà sətsèn kaʼsə ə ngàʼa kumə wenə ghomə ko ghə̀ŋ lu byɨmə la kənyʉ̀ kì a ma gàʼà diʼ nəmwèʼè.

³² Ma kɨli la wù kədyàŋ diʼ a ghə̀ gàʼà to nə̀ nchwò nsòʼ ə mò, no ghò yi a ghə̀ gàʼà kumə mò, a diʼ to nəmwèʼè.

³³ Ghə̀ŋ tə ə tɨmə viʼi a Joyn, ali Joyn gàʼa to nəmwèʼè kumə mò.

³⁴ Ma ko gaʼa tebè la ma kəŋ la Wùmə̀nsòŋ ə ndiʼ nchwò nsòʼ a mò. Mà gàʼa li ndiʼ ghə̀ŋ byɨmə ə bwòŋ.

³⁵ Joyn tə ndiʼ to nə̀ baynə a ghə̀ŋ. A tə ndiʼ a mətsi mə tsen nə̀, ghə̀ŋ ku ə zhʉtə nyʉ̀ vyi a ghə̀ ngàʼà, və diʼ to nə̀ baynə, nè la ghə̀ŋ ə saŋlə.

³⁶ Ma kiʼi nchwò nsòʼ, ghə̀ chò Joyn. Nchwò nsòʼ na ghèn diʼi nyʉ̀ vyi a Tìʼ ku li la mà ə nè. A diʼ kəwenkə a kə diʼi làynsə la à tɨm Tìʼ ntɨm mo.

³⁷ Nò tèbe Tìʼ yì a ghə̀ tɨmə mo gàʼà li to nə̀ nchwò nsòʼ kumə mò. Ghə̀ŋ ko tɨmə zhʉ̀ gɨ wen, ghə̀ŋ ə ko tɨmə yèn to ando ghə̀ kə̀ʼə̀.

³⁸ Ghə̀ŋ ko ghʉ̀ no tèbe kənyʉ̀ kə wen a ghə̀ŋ a tətyɨm byìʼàndo ghə̀ŋ ə ko byɨmə wìʼ a ghə̀ tə tɨmə.

³⁹ Ghə̀ŋ ziʼi Ŋwàʼlə̀ Nyìngòŋ byìʼàndo ghə̀ŋ kwòʼtə la ghə̀ŋ na yen ji a ghə̀ŋ ne kiʼi bwoŋ yi a ghə̀ ko lu mè. A diʼ to ŋwàʼlə̀ Nyìngòŋ na ghèn a ghə̀ gaʼa kumə mò.

⁴⁰ Alì, ko ghə̀ŋ byɨmə ə vì a mò ə kiʼi ə ntsìnə̀ a ghèn.

⁴¹ “Ma ko kəŋ la viʼi ntemə təpfem a mò.

⁴² Ma kɨli tənkì tə viʼi vi a ghə̀ŋ diʼ vəwenə, kɨ la ghə̀ŋ ko kiʼi kòŋ Nyìngòŋ a ghə̀ŋ a tətyɨm.

⁴³ Mà vi à zhiʼ Tìʼ ghom, ko ghə̀ŋ lu byɨmə mo. Alì, mu wìʼ ə tsen sətsen vi no to fa wen a ngeŋ, a ghə̀ŋ a shisə wen.

⁴⁴ Ghə̀ŋ kòŋ ə ntemə təpfem a ghə̀ŋ tə wen, ko ghə̀ŋ mwomsə ə kiʼi kùʼsə yi a ghə̀ vi fa Nyìngòŋ yì a ghə̀ diʼ to əmùʼ. Ghə̀ŋ lə zi ghə̀ŋ byɨmə ale?

⁴⁵ Kə ghə̀ŋ ne kwoʼtə la a ne ghàm mò ghàm ghə̀ŋ a shɨ Tìʼ ə ghom, a ne ghàm to Mosìs yi a ghə̀ŋ ə ghʉ̀ kwòʼtə̀ ə ghəŋə a wen.

⁴⁶ Ghə̀ŋ tu tə byɨmə a Mosìs mu ghə̀ŋ ə byɨmə li a mò byìʼàndo ghə̀ nyoʼo li nyʉ̀ kumə mò.

⁴⁷ To ando ghə̀ŋ ko əbyɨmə kənyʉ̀ a Mosìs ə nyoʼo, ghə̀ŋ lə̀ zì ghə̀ŋ byɨmə kənyʉ̀ a ma gaʼa a?”