Joyn 4 - The New Testament in the Babanki language

Yesò ə gaʼa wenə wùwì Sàmalìyà

¹ Viʼi Falàsi ə nzhʉ li la Yesò sə kiʼi ndzɨ̀mtə̀sə, ku mu a vəwenə, sə ghoʼo chò sə Joyn sə.

² Və ngaʼa alì, ko a laynsə ku tebè Yesò ku mu a mì. A ə ku ndzɨ̀mtə̀sə bàm ə wen.

³ Yesò ə zhʉ̀ li kənyʉ̀ na kèn a və ə ngaʼa kumə wen li ghə̀ ə lù fa Jùdiyà ə bwenə dyʉ̀ a Galìlì,

⁴ ghə̀ ndiʼ ə chò fa ji a Sàmalìyà.

⁵ A sə ndiʼ to ando ghə̀ chò fa Sàmalìyà, ə zàʼa a ntə̀ʼ ə tsen a və toŋtə la Sikà, ghə̀ mboʼsə a ben kəshi kə nse ki a Jàkob ə ku li a wàyn wen ə Josèf,

⁶ ə bwaʼ, ə shiʼi nyʉ̀ʼmə a ben kwoŋ yì a Jàkob ə tyùŋə və sə chʉ mu fa tsu. A ndiʼ a kəlyɨŋ kə zhʉ na ghèn, mu chwìchwì bayn li nto.

⁷ Wùwì Sàmalìyà ə tsen ə vi ə chʉ mu, Yesò ə loyn mu fa wen ə gàʼ la, “Ku mo nə̀ mu mà nyʉ.”

⁸ A ndiʼ alì mu ndzɨ̀mtə̀sə bàm ə wen sə kwen li dyʉ̀ a tyi ntə̀ʼ ə zen fozhɨvə.

⁹ Wùwì ayi ə gàʼ a Yesò la, “Wù diʼ wù ə Jus, ma diʼ wù ə Sàmalìyà? Wu jèʼ ale ə sə loynə mu fa mò a?” A ndiʼ ali, viʼi Jus wenə viʼi Sàmalìyà ə ko zhɨmə.

¹⁰ Ando ghə̀ bèmə alì, Yesò ə mu gàʼ a wen la, “Wu to kɨ fo vyi a Nyìngòŋ ə ku a viʼi be kɨ wìʼ yi a ghə̀ loynə mu mèyn fa wù, mu wù loyn li mu, a kodiʼ mu mə fwàyn, ghə̀ ku a wù.”

¹¹ Wùwì a ghèn ə mù bèm a wen la, “Wu lə lyɨ mu na mèyn fa fe ku a mò a Tikəbəŋ, ko andiʼ la wù kiʼi kəfo ə chʉ tsu, nkwòŋ a ghèn be shwemə a?

¹² A wù le kwòʼtə la wù chò tìʼ ə tìʼ yès ə Jàkob yi a ghə̀ ntyùŋə nkwòŋ a mu a ghèn a yès, a diʼ tò fa nkwòŋ a ghèn a wenə vunə wen nə̀ nyamsə wen sə ə nyʉ mu fa tsu a?”

¹³ Yesò ə bwensə gàʼ la, “no ndò a ghə̀ nyʉ mu a mèyn mu ətoŋ mu be na zɨmtə wen to zɨmtə.

¹⁴ Alì, mu à nyʉ̀ no ndò nyʉ mu mì a ma ku, mu ətoŋ mu ko lu be zɨmə wen. Wìʼ ə sətsen nyʉ mu na mèyn, ma dyʉ̀ kaʼkə ndiʼ a wen a wèn to nə̀ fədyàn fə, ə ne wen la ghə̀ kiʼi ntsìnə̀ yì a ghə̀ ko lu mè.”

¹⁵ Wùwì ə Sàmalìyà a ghèn gaʼa a Yesò la, “ku mu na mì ma nyʉ, kə ətoŋ mu be lu zɨmə mo, kò andiʼ la ma lə be ə vi chʉ mu”.

¹⁶ Yesò ə be gàʼ a wen la, “Dyʉ̀ dzàŋ lɨmə wù, ghə̀ŋ vi ə yèn mò.”

¹⁷ Wùwì ghèn ə gàʼ la ghə̀ ko kiʼi tebè lɨm. Yesò ə mu gàʼ a wen la, “wù gàʼ to no nəmwèʼè la wù ko kiʼi tebè lɨm.

¹⁸ Wù diʼ alə̀, mu wù lam li və lɨm vətàyn, be fʉ no və tsèm. Nò wìʼ yì a wù tsi a wen a ngə̀ŋ luwen ə ko diʼ lɨmə wù. Kə diʼi la wù gàʼa tò no nəmwèʼè.”

¹⁹ Wùwì ghèn gàʼ a wen la, “Ma yen li a Tikəbəŋ la wù diʼi nshə̀ʼtə̀ ə ghoʼo.

²⁰ Vətiʼi vyesə ə kuʼsə Nyìngòŋ a pfen a shèn, ali ghə̀ŋ viʼi Jus sə ghʉ̀ luwen la və diʼi ə nkuʼsə Nyìngòŋ a Jelusalèm.”

²¹ Yesò ə gàʼ a wen la, “Ma gaʼa a wù no nəmwèʼè la, byɨmə mo, əzhʉ ne vi a və ko be ne nkuʼsə Nyìngòŋ a pfèn a shèn, ko kuʼsə tebè a Jelusalèm.

²² Ghə̀ŋ viʼi Sàmalìyà ko kɨ tèbe wìʼ yì a ghə̀ŋ kùʼsə̀, alì yès viʼi Jus əkɨ li wìʼ yì a yès ə kuʼsə, byìʼì ando ə bwòŋ ə nvì ə chò fa viʼi Jus.

²³ Əzhʉ ə kuʼ vi, alì mu ghə̀ sə diʼ mu ghə̀ kuʼ li no kwʉ̀ʼ a viʼi a və kuʼsə Nyìngòŋ nəmwèʼè, diʼ kuʼsə əwen a kəzhwì bènə̀ a nəmwèʼè. A diʼ nki viʼi a venə a Nyìngòŋ ə kəŋ la və ə kuʼsə wen.

²⁴ Nyìngòŋ ə diʼ Kəzhwì, viʼi vyi a və kuʼsə wen ə diʼ ə kuʼsə tò no nəmwèʼè to a kədyòʼ kì a kəzhwì kə wen kə ku.”

²⁵ Wùwì a ghèn mu gàʼ a wen la, “Ma kɨli la wìʼ yì a və tsuʼ li, a və toŋtə wen nə̀ Klistò, ne vì, ə shə̀ʼtə̀ laynsə no nyʉ̀ ə tsèm a yès.”

²⁶ Yesò ə mu shə̀ʼtə mwètə̀ a wen la, “A diʼ mò na yì a və ntsuʼ li ə ghʉ li a ma gàʼà a wù lə̀.”

²⁷ To ando Yesò ə ngàʼà, ndzɨ̀mtə̀sə bàm ə wensə bwensə vi ə yen tò ando ghə̀ gaʼa wenə wùwì ghèn, ə sə diʼ nə̀ əkaynə, alì no wìʼ ə mùʼ fa vəwenə a ntìntìn nko bèm a wùwì ayi la, ghə̀ kəŋ gho lo, ko və lu bèm a Yesò la, byìʼì ghoʼ a wù gaʼa a ve wùwì ghèn lo.

²⁸ Wùwì ayi ə lù mòʼtə̀ ntòyn a mu ə wen tsu ə bwenə kwen dyʉ̀ a ntə̀ʼ ə gàʼ a viʼi la,

²⁹ “Ghə̀ŋ vi yèn wìʼ a ghə̀ shə̀ʼtə no nyʉ̀ ə tsèm a ma ə ne li a. Wù gaʼa a ko diʼ wen wìʼ yì a və Ntsuʼ li, li a?”

³⁰ Viʼi zhʉ̀ ali mu ə fʉ̀ dyʉ̀ ə yenə Yesò.

³¹ A ndiʼ a zhʉ na ghèn, ndzɨ̀mtə̀sə bàm ə Yesò sə sensə wen gàʼ la, “Ndìʼsə̀, zhɨ li kəfo lò.”

³² Yesò ə gàʼ a vəwenə la, “Mà kiʼi kəfo kəzhɨkə, a ghə̀ŋ ko kɨ kənyʉ̀ byìʼì kəwenkə.”

³³ Ndzɨ̀mtə̀sə bàm ə wensə sə kayntə to vəwenə ntìntìn bèm la, “A lə diʼ la wìʼ ə yì vì nə̀ kəfo kəzhɨkə a wen mu?”

³⁴ Yesò ə gàʼ vəwenə la, “ə fozhɨvə ə mò ə diʼ tò la ma ə ne shwèʼè yì a Nyìngòŋ a ghə̀ tɨmə mo ə kòŋ, ə ne ə mwètə̀ shwèʼè a ghenə.

³⁵ A kò ghə̀ŋ kiʼi ngàyn ə tsen a və mo la, ‘Və we, à chò tò və sàŋ la və kàʼ, və pfi.’ Alì, Ghə̀ŋ boʼtə ashɨ à ghəŋə ə ki ando təsɨm tə sə diʼ mu ə fozhɨvə sə diʼ mu və bi li ə sə diʼ tò mə pfi.

³⁶ Luwen wìʼ yi a ghə̀ pfi ə kiʼi əlòʼ ə jùŋ ghə̀. Ghə̀ pfi viʼi və byɨməvə vyi a zizi və kiʼi ə ntsìnə̀ yì a ghə̀ ko lu mè, ndiʼ wù we nə̀ wu pfi ə tsèntə saŋlə.

³⁷ Kə diʼi la ngàyn ghèn la, ‘Wìʼ ə we, ghətsen ə pfi’ diʼ to nəmwèʼè.

³⁸ Ma tɨm li ghə̀ŋ la Ghə̀ŋ fʉ̀ pfi ə fozhɨvə fa sɨm ko andiʼ la ghə̀ŋ tə shyèʼ. Viʼi kədyàŋ tə ə shyèʼ, ghə̀ŋ sədiʼ ə pfì.”

³⁹ Viʼi Sàmalìyà fa loʼ a yi ə mbyɨmə li to kədə̀ŋ byìʼì kənyʉ̀ ki a wùwì yì ə gàʼ a vəwenə li la, “Ghə̀ shə̀ʼtə̀ li no gho a mà ne li.”

⁴⁰ To ando Viʼi Sàmalìyà ə vi li ə yen Yesò, vəwenə sensə wen la ghə̀ faŋ wenə vəwenə. Ghə̀ tsi wenə vəwenə a mətsi ə mbò.

⁴¹ Viʼi vətsevə be zhʉ̀ əziʼi ə Yesò ə byɨmə, to kədə̀ŋ,

⁴² ə gàʼ a wùwì na yì la, “Yès ə byɨmə li luwen, a ko diʼ to byìʼì kənyʉ̀ kì a wù shə̀ʼtə̀ a yès. Yès ə zhʉ li əziʼi ə wen no fa yès a ngeŋsə nkɨ la à diʼ tò no wen Mbwòŋsə̀ mbyi.”

Yesò ə chʉʼ wàyn ə kətʉ kətsen

⁴³ Yesò ə tsì mətsi mbò ə lù dyʉ̀ alòʼ ə Galìlì.

⁴⁴ Andiʼ ali, mu ghə̀ ngaʼa li no fa wen a ngeŋ la, “Və ko təmə lu gumlə nshə̀ʼtə̀ Nyìngòŋ a wen a loʼ.”

⁴⁵ A ə ndiʼ ando ghə̀ dyʉ̀ zàʼa alòʼ ə Galìlì li, viʼi tsu ə shisə wen to akayn byìʼì ando vəwenə ndiʼ mu və ə yen li no nyʉ̀ ə tsèm vi a ghə̀ nè a Jelusalèm a mətsi yi a və ə zhɨ kəzhɨ kə məzaʼsə tsu li.

⁴⁶ Yesò ə be bwenə dyʉ̀ a ntə̀ʼ Kanà, alòʼ ə Galìlì, akəshi yi a ghə̀ nkaʼsə mu a məlyʉ̀ʼ tsu li ə dyʉ̀ yen wù to ə tsen tsu, a ghə̀ shyèʼ a fòyn. Ghə̀ nkiʼi wàyn wen a ghə̀ nkwaʼa no nànto a ntə̀ʼ Kàbanùm.

⁴⁷ Wù ə shwèʼè na ghèn ə vi ali ando ghə̀ zhʉ la Yesò vi li a Galìlì mu ghə̀ lù fa Jùdiyà ə sə sensə Yesò la ghə̀ vì chʉʼ wàyn wùlɨm ə wen a ghə̀ kwaʼa diʼi la ghə̀ pfʉ.

⁴⁸ Yesò ə gàʼ a wen la, “wìʼ fa ghə̀ŋ zizi ko ghə̀ lu byɨmə no fa mphen, a bwen la ghə̀ yen nchwi nyʉ̀ ə kaynəvə a mà nè.”

⁴⁹ Wù ə shwèʼè ayì be gàʼ la, “Tikəbəŋ, zaŋsə vi yowù dyʉ̀, bwen ali wàyn ghom a pfʉ.”

⁵⁰ Yesò ə mu gàʼ a wen la, “Ə ndyʉ̀. Wàyn wù ə tò li.” Wìʼ ayi ə zhʉ̀ to ali ə lù.

⁵¹ To ando ghə̀ bwenə sə dyʉ̀ ə bùmtə viʼi shyèʼ ə wen vəwenə gàʼ a wen la, “Wàyn wù to li.”

⁵² Ghə̀ bèm a vəwenə la, kwaʼa na ghenə ə yi bwaʼmə a zhʉ ko? Vəwenə gàʼ la, “ghə̀ tə bwaʼmə zòyn nə̀nchwì.”

⁵³ Tìʼ wàyn a ghèn ə kɨ la kətaʼ na kì kə tə bwaʼmə to zhʉ̀ yi a Yesò tə gàʼ a wen li la, “Wàyn wù ə tò li” no zhʉ̀ko wenə ngwaʼ ə ngə̀ŋ ə wen ə byɨmə to vətsèm.

⁵⁴ Nakènkə ndiʼ kənkùmtə̀ kə kənyʉ̀ kə kaynəkə kì a Yesò ə nè a Galìlì ando ghə̀ bwenə vi fa Jùdiyà.