Joyn 18 - The New Testament in the Babanki language

Və ghaʼ Yesò

¹ Yesò ə jɨ̀mə̀ li mwetə wenə ndzɨ̀mtə̀sə bàm ə wensə lù ə dyàŋ kəbuʼlə a Kidɨ̀lòyn, ə dyʉ̀ kwen a ə sɨm ə Olìf tsenə ghə̀.

² A ndiʼ ali, Judàs yi a ghə̀ baʼlə Yesò ə kɨ kəshi na kì byìʼì ando Yesò wenə ndzɨ̀mtə̀sə bàm wensə ə zaŋsə dyʉ̀ tsu.

³ Judàs mu lyɨ ə nòyn vəsugyèʼ benə viʼi vətsenvə a və nshyèʼè a ngə̀ŋ Nyìngòŋ, mu à tɨm tʉtʉ vəpfèm və̀ ngə̀ŋ Nyìngòŋ nə̀ viʼi Falàsi. Vəwenə ə vi ali, kiʼi əfo ghòŋ nə̀ nkàʼtə̀ nə̀ vəlamə.

⁴ A ndiʼ ali, Yesò ə nkɨ no tèbe ghò a ghə̀ ndiʼ ə fʉ̀ a wen. Ghə̀ fʉ̀tə̀ vi ə bèm a vəwenə la, vəwenə kəŋ ndò lo.

⁵ Vəwenə bwensə la, “Yès ə kəŋ wàyn wù Nazalèt ghèn a və toŋtə la Yesò lə.” Yesò ə gàʼ la, “A diʼ mò lə.” Ghə̀ gàʼa ali, Judàs yi a ghə̀ baʼlə wen ə ti to ə tsu wenə viʼi a vyi.

⁶ A ndiʼ ando Yesò gàʼa li la, “A diʼi mò lə,” vəwenə bwensə kòtə̀ dyʉ̀ nə bamə ə fəŋkə a nse.

⁷ Ghə̀ be bèm a vəwenə la, “Ghə̀ŋ kəŋ ndò lo?” Vəwenə be bwensə la, “Yès ə kəŋ wàyn ə wù Nazalèt ghèn a və toŋtə la Yesò lə.”

⁸ Yesò ə be gàʼ la, “Ma gaʼa li a ghə̀ŋ la à diʼ mò lə̀. Ghə̀ŋ kəŋ mò, ghə̀ŋ moʼtə dzɨ̀mtə̀ shom sensə lù.”

⁹ Ghə̀ ngaʼa alə ndi kənyʉ̀ kì a ghə̀ ngàʼa a Tìʼ wen kwʉʼ la, “Nò wìʼ ko lè fa ntìntìn viʼi vyi a wù kù a mò.”

¹⁰ A ndiʼ ali Saymun Bità ə kiʼi nyì, ghə̀ ntsuʼ ə koʼ tyin kətiʼitiʼi kə kwoŋ ə toghə wù ə shwèʼè ngə̀ŋ Nyìngòŋ ə ŋaŋtə, a əzhiʼ ə wù ə shwèʼè ayi ə diʼ Malikùs.

¹¹ Yesò ə gàʼ a Bità la, “Bwensə wè nyì ə wù a yi kwʉ. Wù kwòʼə la ma ko kòŋ ə yenə ngəʼ a ji yi a Tìʼ ghom ghʉ̀ la mà yen fa tsù mu?”

Və ghaʼ dyʉ̀ nə̀ Yesò a Anàs

¹² Vəsugyèʼ nə̀ kətʉ kə vəwenə, boʼsə nə̀ viʼi Jus vyi a və ntsɨŋ ngə̀ŋ Nyìngòŋ ə ghoʼo ə ghaʼ Yesò ə kwiʼ wen,

¹³ ə lyɨ̀ dyʉ̀ nə̀ wen a Anàs ambì, a diʼ tìʼ wì Kàyafàs a ghə̀ ndiʼ pfèm ngə̀ŋ Nyìngòŋ ə ŋaŋtə a ngwʉ̀ʼ na yi.

¹⁴ Kàyafàs na ghèn ndiʼ wen yi a ghə̀ tyɨftə viʼi Jus la kə bòŋ la wìʼ ə mùʼ pfʉ akəshi viʼi və tsèm.

Bità ə mo Yesò

¹⁵ Və ghaʼ Yesò ali, ə sə dyʉ̀, Saymun Bità ə sə dyʉ̀ fa wen abàm wenə dzɨ̀mtə̀ bàm ə Yesò ə tsen. Ndzɨ̀mtə̀ əbàm ə Yesò na yì ə dyʉ̀ li kwen wenə Yesò a kəbəŋ kə ngə̀ŋ Nyìngòŋ ə ŋaŋtə byìʼàndo pfèm ayi ə kɨli wen,

¹⁶ ali Bità ə tɨmə to kəbəŋ. Ndzɨ̀mtə̀ əbam Yesò yì a pfèm ngə̀ŋ Nyìngòŋ ə kɨ lì ə bwenə fʉ ə dyʉ̀ achʉ̀ kəbəŋ, ə sensə wàyn wùwì yi a ghə̀ shwèʼè tsu azhʉ̀ na yi, ə lyɨ̀ Bità kwen nə̀ wen.

¹⁷ Və sə kwen ali, wàyn wùwì na yì ə bèm a Bità la, “A wù diʼ alə̀ diʼ ə dzɨ̀mtə̀ əbam wìʼ na ghèn ə tsen?” Bità ə tensə ə gàʼ la, “Ma ko diʼ dzɨ̀mtə̀ əbàm wen.”

¹⁸ A ndiʼ ali, mu viʼi və nshyèʼ pfem ngə̀ŋ Nyìngòŋ ə ŋaŋtə, boʼsə nə̀ vəsugyèʼ ə shɨtə zhiʼ ando shi nzhʉ̀, Bità ə be boŋ dyʉ̀ tɨmə wenə vəwenə, ə sə zostə̀.

Pfèm ngə̀ŋ Nyìngòŋ ə ŋaŋtə ə bèmtə̀ nyʉ̀ a Yesò

¹⁹ A ndiʼ ali mu pfèm ngə̀ŋ Nyìngòŋ ə ŋaŋtə sə bèmtə̀ nyʉ̀ a Yesò kumə ndzɨ̀mtə̀sə bàm wen, nə̀ əziʼi ə wenə.

²⁰ Yesò ə bwensə gàʼ la, “Mà tə gaʼa fa kəghaf no a viʼi və tsèm, ziʼi a loʼ ntsèntə̀ tèbè a ngə̀ŋ Nyìngòŋ ə ghoʼo, a diʼ shi, a viʼi Jus vi tsèntə̀ tsu. Ma ko tɨmə nyoʼtə nyoʼtə gàʼa kənyʉ̀.

²¹ Wù bèmtə̀ no nyʉ̀ venə a mò byìʼì ghò? Wu bèmtə̀ a viʼi vyi a və tə ə zhʉtə gàʼà ə ghomə. Vəwenə ə kɨ nyʉ̀ vyi a mà tə ngàʼà.”

²² Ando Yesò ə ngàʼa vì alə, sugyèʼ tsen ghòm kəvu a wen a kə̀ʼ ə bèm a wen la, “Wù dìʼ ale ə gaʼa a pfem ngə̀ŋ Nyìngòŋ ə ŋaŋtə alə a?”

²³ Yesò ə bwensə gàʼ la, “Ma ndiʼ mù ma gaʼa li nshwè, wù shə̀ʼtə̀ kənyʉ̀ kəbyɨkə kì a mà gàʼa, a ndiʼ la mà gàʼa kənyʉ̀ kə nəmwèʼè, wù shə̀ʼtə̀ la wù ghòm mo a gho lo?”

²⁴ Anàs ə tɨm Yesò azhʉ̀ na ghèn a Kàyafàs, ə pfèm ngə̀ŋ Nyìngòŋ ə ŋaŋtə, Yesò ə bo diʼ to a mpfʉ̀sə.

Bità ə be mo Yesò

²⁵ Bità bo ti zostə̀ zhiʼ, və be bèm a wen la, “A wù diʼ alə̀ diʼ ndzɨ̀mtə̀ əbam ə wìʼ na ghèn ə tsen?” Bità ə tensə ə gàʼ la, “Ma ko diʼ ndzɨ̀mtə̀ əbam ə wen.”

²⁶ Wu ə shwèʼè ə pfèm ngə̀ŋ Nyìngòŋ ə ŋaŋtə ə tsen, a diʼ wìʼ fa viʼi vyi a Bità nkoʼ tyin kətiʼitiʼi kə wen li ə bèm a wen la, “Ma ko tə yen wù vye wen a sɨm ə Olìf?”

²⁷ Bità ə be tensə to tensə. To alə, nkə̀ʼ toŋ.

Və dyʉ̀ nə̀ Yesò a Balèt

²⁸ Və ə bviʼkə̀ ə lyɨ̀ Yesò fa kəbəŋ ə Kàyafàs, ə dyʉ̀ nə̀ wen a ntuʼ ə wìʼ yi a fòyn Lum ə ntsuʼ ə ghʉ la ghə̀ nsoʼo ashə loʼ na yi. Viʼi Jus dyʉ̀ zàʼa tsu, ə nyɨŋ la vəwenə ko kwen a ntuʼ byìʼàndo vəwenə ə kəŋ ə ndiʼ nə̀ laynə fa a ji a ntsìnə̀ əloʼ vəwenə ndi vəwenə kɨ ə zhɨ̀ kəzhɨkə məzaʼsə.

²⁹ Balèt ə fʉ vi ə bèm a vəwenə la, “Ghə̀ŋ gàʼa la wìʼ ghèn byɨbsə gho a?”

³⁰ Vəwenə bwensə to la, “Ghə̀ tə̀ faŋ kə byɨbsə kənyʉ̀ mu yès ko ə lyɨ̀ vi nə̀ wen a wù.”

³¹ Balèt ə gàʼ a vəwenə la, “Ghə̀ŋ lyɨ̀ li wen ə soʼ to ghə̀ŋ ando əsoʼ loʼ ghə̀ŋ diʼi.” Viʼi Jus na vi ə tensə ə gàʼ a wen la, “Yesə ko kiʼi kədyòʼ ə zhwi wìʼ.”

³² Vəwenə ə gàʼ alə ə lwinsə kənyʉ̀ ki a Yesò ngàʼa kumə nki pfʉ yì a ghə̀ ndiʼ lù pfʉ̀.

³³ Balèt ə bwensə kwen a ntuʼ ə dzàŋ Yesò ə bèm a wen la, “Wù diʼ fòyn a viʼi Jus?”

³⁴ Yesò ə bwensə ə bèm a wen la, “Wù bèmə to no fa wù ngeŋ mu, wù bèmə to ando viʼi shə̀ʼtə̀ nyʉ̀ a wù kumə mò lo?”

³⁵ Balèt ə bèm a wen la, “Wù kwòʼə la ma diʼ to wù ə Jus mu. A vi nə̀ viʼi vyə nə̀ vəpfèm və ngə̀ŋ Nyìngòŋ ə vi nə̀ wù a mò. Wù ə byɨbsə ghò?”

³⁶ Yesò ə gàʼ la, “Ma ko soʼo ə fòyn ə ghomə a mbyi ashə̀. Abwen ali, viʼi shyèʼ ə mò soynə ə tàmtə la kə viʼi Jus ə ghaʼ mo. Ma soʼo fòyn ə ghomə fa akəshi kə kədyàŋ.”

³⁷ Balèt ə bèm a wen la, “wù mu diʼ fòyn?” Yesò ə bwensə ə gàʼ la, “Wù gàʼa to no nəmwèʼè la ma diʼ fòyn. Və mbwi mo a fòyn, ma vi a mbyi a fòyn ə shə̀ʼtə̀ kənyʉ̀ ki a kə diʼ nəmwèʼè. Nò ndo yi a ghə̀ gàʼà nəmwèʼè ə zhʉ gɨ ghom.”

³⁸ Balèt ə bèm a wen la, “Nəmwèʼè ghèn diʼ la gho?” Ando ghə̀ bèm li, ə be bwenə fʉ dyʉ̀ a kəbəŋ ə gàʼ a viʼi Jus vyi la, “Ma ko yen to kənyʉ̀ kə tsen a və zizi və ghaʼ wen fa tsu,

Balèt ə ku ji la və zhwi Yesò

³⁹ ali kɨ la, à vi zàʼa azhʉ̀ məzaʼsə alə̀, ghə̀ŋ shə̀ʼtə̀ wìʼ, ma shisə fa nfɨŋ. Mà wʉ̀sə fòyn viʼi Jus a ghə̀ŋ luwen?”

⁴⁰ Vəwenə zɨmə gàʼ to la, “Jòʼ, kə wù a shisə wen! boŋsə shisə Bàlabàs a yes!” A ndiʼ ali Bàlabàs diʼ tsòŋ.