Joyn 17 - The New Testament in the Babanki language

Yesò ə jɨm a ndzɨ̀mtə̀sə bàm ə wensə

¹ Yesò ə gàʼ mwetə nyʉ̀ na venə ə ki kuʼsə nə̀ kaŋə ə jɨ̀m la, “Tìʼ, əzhʉ̀ kʉʼʉ li luwen. Nè viʼi yen kədyòʼ kə kaynə kə ə wàyn wù ndiʼ ghə̀ nè, viʼi yen kyəkə,

² byìʼì ando wù kù li kədyòʼ a wen a kətʉ̀ viʼi vətsèm ndiʼ ghə̀ nè, viʼi a wù kù a wen kiʼi ntsìnə̀ yi a ghə̀ ko lu mè.

³ Ə kiʼi ntsìnə̀ yì a ghə̀ ko lu mè, a diʼ la, vəwenə na kɨ wù yì a wù diʼ Nyìngòŋ mùʼ yi a ghə̀ diʼ nəmwèʼè, be kɨ Yesò Klistò yi a wù tɨmə lì.

⁴ Ma diʼi li kədyòʼ ə kyəkə a nse a ji la, ma nè li mwetə shwèʼ yì a wù tə ku la mà nè.

⁵ Lyɨ mo luwen a wù ben a Tìʼ ghom, ndi viʼi ku əkuʼsə yi a mò a yowù ə nkiʼi mibu və shɨtə mbyi.

⁶ “Ma diʼi li wù a viʼi a wù tə tsuʼtə shisə fa mbyi ə kù a mò. A tə ndiʼ viʼi vyə; wù ku a mò, vəwenə zhʉ̀ ntɨmə wù.

⁷ Luwen diʼ, vəwenə kɨ la no tèbe ghò a yì a ma kiʼi diʼ mu kə lù fa wù,

⁸ byìʼì ando mà shə̀ʼtə li ntɨm ə wù yì a wù tə ku la mà ku a vəwenə, vəwenə zhʉ̀, ə byɨmə. Vəwenə tə ə kɨ nəmwèʼè la mà lù fa wù ben, byɨmə la à tɨm wù ntɨm mo.

⁹ “Ma ko jɨ̀mə̀ tebè a viʼi mbyi. Ma jɨ̀mə̀ a vəwenə vi a wù kù a mò, a diʼ viʼi vyə.

¹⁰ Nò tèbe gho ghom diʼi kyəkə, no tèbe gho wù diʼ komə kə. Və ne li, ma sə kiʼi əkuʼsə.

¹¹ Luwen diʼ alə̀, ko ma diʼ ə faŋ a mbyi, ali vəwenə bo diʼ to mbyi. Tìʼ ghom ə laynə, tuʼmə nə̀ vəwenə a wù kədyòʼ, a yi kədyòʼ kì a wù tə kù a mò ndi vəwenə ndiʼ to a kənyʉ̀ kə mùʼ to ndə̀ŋndəŋ ando yowù diʼ to a kənyʉ̀ kə mùʼ.

¹² Ma tə ə tuʼmə nə̀ vəwenə ando yo vəwenə tə bò diʼ to muʼ, ə ghʉ̀ vəwenə akayn nə̀ kədyòʼ kì a wù kù a mò. No wù mùʼ ə ko lè, a bwen to yì a ghə̀ tə ndiʼ lù lè, ndi kənyʉ̀ ki a ŋwàʼlə̀ wù gàʼa kwʉʼ.

¹³ Luwen diʼ alə ma vi a wù, ali sə gàʼa nyʉ̀ a venə, bo diʼ to a mbyi ə nè la vəwenə kiʼi saŋlə a vəwenə a tətyɨm, ghə̀ kwʉ̀ʼ to ndə̀ŋndəŋ ando ma kiʼi.

¹⁴ Ma tə shə̀ʼtə ntɨm ə wù a vəwenə, viʼi mbyi ə sə baynə vəwenə byìʼàndo vəwenə ko diʼ to nə̀ viʼi mbyi, to ndə̀ŋndəŋ ando ma ko diʼ wù ə mbyi.

¹⁵ Ma ko jɨ̀mə̀ tebè la wù shisə vəwenə fa mbyi. Ma jɨ̀mə̀ la wù tuʼmə ə lyòmtə vəwenə fa Deblə̀.

¹⁶ Vəwenə ko diʼ viʼi mbyi, to ndə̀ŋndəŋ ando ma ko diʼ wù ə mbyi.

¹⁷ Kənyʉ̀ kyəkə gaʼa to nəmwèʼè. Lyɨ vəwenə, vəwenə ndiʼ to a wù, chò fa wù kənyʉ̀ yì a kə diʼi nəmwèʼè.

¹⁸ Ma tɨm li vəwenə a mbyi, ndə̀ŋndəŋ ando wù tə tɨmə mo la mà dyʉ̀ a mbyi.

¹⁹ Ma kù wen ghomə a wù ndiʼ vəwenə be boŋ kù təwen tə vəwenə a wù nəmwèʼè.

Yesò ə jɨm a viʼi və byɨməvə vətsenvə

²⁰ “Ma ko jɨ̀mə̀ to a vəwenə. Ma jɨ̀mə̀ tamə a viʼi a və lu zhʉ̀ ntɨm ə ghom fa vəwenə, ə byɨmə a mò.

²¹ Ma jɨ̀mə̀ a Tìʼ ghom la vəwenə tsèntə ndiʼ to a kənyʉ̀ kə mùʼ no və tsèm to ndə̀ŋndəŋ ando yowù diʼ to a kənyʉ̀ kə mùʼ. Nè vəwenə faŋ a yowù ndiʼ viʼi mbyi venə byɨmə la à tɨm wù tɨm ə mo.

²² Ma ku li əbayn ə ghoʼoghə a vəwenə, a diʼ yi a wù tə kù a mò ndi vəwenə ə ndiʼ to a kənyʉ̀ kə mùʼ, to ndə̀ŋndəŋ ando yowù diʼ to a kənyʉ̀ kə mùʼ.

²³ Ma jɨ̀mə̀ ə ndiʼ to kənyʉ̀ kə mùʼ yo vəwenə, yowù diʼ to a kənyʉ̀ kə mùʼ ndiʼ vəwenə kaʼkə ndiʼ to a kənyʉ̀ kə mùʼ no fa vəwenə ngeŋsə, ndi nè la mbyi kɨ la wù tə ə tɨm mo, ə kòŋ vəwenə to ndə̀ŋndəŋ ndo wù kòŋ mò.

²⁴ “Ma kəŋ a Tìʼ ghom la yo viʼi a wù kù a mò lu ndiʼ to akəshi kə mùʼ ndi vəwenə yen əghoʼ ə ghomə, a diʼ yi a wù kòŋ mò ə ku a mò, mibu wù shɨtə mbyi.

²⁵ Tìʼ ə jùŋ yi a wù soʼo to ji tɨmə, viʼi mbyi ko kɨ wù ali ma kɨ, venə a wù kù a mò lə̀, kɨ la à tɨm wù tɨm mo.

²⁶ Ma diʼi li wù a vəwenə, diʼ ə bo diʼi dyʉ̀ to ambì ndi vəwenə ə kiʼi kòŋ fa vəwenə a ngeŋsə byìʼì ando ma diʼ to diʼ a vəwenə a ntìntìn. Əkòŋ a ghənə diʼ to kòŋ yì a wù kiʼi a mò.”