Joyn 13 - The New Testament in the Babanki language

Yesò ə shʉ̀ aghʉ ndzɨ̀mtə̀sə bàm wen

¹ Andiʼ ando əchʉʼ ndiʼ ne layn və zhɨ̀ kətsi kə Məzaʼsə, mu Yesò sə kɨ la zhʉ̀ kʉʼʉ li la ghə̀ lu fa mbyi ashə ə dyʉ̀ a ben Tìʼ. Ghə̀ kòŋ viʼi wen vyi a və ndiʼ a mbyi, faŋ sə kòŋ vəwenə ə zàʼa ando ghə̀ moʼtə mbyi ghèn.

² Və ne sə zhɨ̀ azhʉ̀ pfwomə, a diʼ ali mu Deblə̀ ku li əkwoʼtə a Judàs Iskalìyòt, ə wàyn Simùn, la ghə̀ baʼlə Yesò.

³ Yesò nkɨ la Tìʼ əku li kədyòʼ a yi to akwi əfo ə tsèm, kɨ la ghə̀ lù fa ben Nyìngòŋ, diʼ ə bwenə ə dyʉ̀.

⁴ Ghə̀ lu fa akəshi kə kəzhɨ, ə tsuʼ kəgʉ̀nə̀ ki a ghə̀ mòʼ, ə tam tawùlə̀,

⁵ ə ŋwaʼ mu a kəkaŋ kə shʉ wèn, ə sə shʉ̀ aghʉ ndzɨ̀mtə̀sə bàm ə wen tsu, zhesə nə̀ tawùlə̀ yì a ghə̀ ntàmə li,

⁶ Ghə̀ shʉ əvi zàʼa ə Bità, ghə̀ mu bèm a wen la, “wù kəŋ shʉ aghʉ ghomə a Bobo?”

⁷ Yesò ə gàʼ a wen la, “Wù ko yenə kɨ tebè kənyʉ̀ kì a ma nè luwen, ali diʼ ə ne ə kɨ.”

⁸ Bità ə tensə ə gàʼ la, “Wù ko lu shʉ̀ aghʉ ghomə no kətsi kə kətsen.” Yesò ə gàʼ a wen la, “A zhʉ a ma ko a shʉ aghʉ wu yowù mè.”

⁹ Saymun Bità ə mu gàʼ la, “Kə ndiʼ ali a Bobo, kə wù shʉ̀ to aghʉ ghomə, wu be shʉ̀ avu ghomə nə̀ kətʉ̀ ə kòmkə!”

¹⁰ Yesò ə gàʼ la, “No ndò a ghə̀ shʉ̀ li wèn ə wen ko be dì shʉ wèn ə wen no tsèm, əchò tò aghʉ wen, byìʼàndo wèn ə wenə laynə. Ghə̀ŋ laynə ali, kò ghə̀ŋ lu nlaynə vətsèm, wu muʼ ko laynə.”

¹¹ Yesò ə gàʼa ali la vəwenə diʼ nə̀ laynə, ə chò to wìʼ ə mùʼ byìʼàndo ghə̀ nkɨ li wìʼ yi a ghə̀ ndiʼ ne baʼlə wen.

¹² Yesò ə shʉ li mwetə aghʉ vəwenə ə bwensə mòʼ kəgwʉnə kə wen ə dyʉ̀ nyʉ̀ʼmə akəshi yi a ghə̀ ə nyʉ̀ʼ tsu ə mu bèm a ndzɨ̀mtə̀sə bàm wensə la, “Ghə̀ŋ yen li kɨ kənyʉ̀ kènkə a mà nè a ghə̀ŋ a?

¹³ Ghə̀ŋ toŋtə mò la ndìʼsə̀, be toŋtə la Bobo, kə diʼ to nəmwèʼè.

¹⁴ Ma shʉ li aghʉ ghəŋə diʼ Nyìngòŋ ghə̀ŋ, be diʼ ndìʼsə̀. Kə lə diʼi la no ndò fa ghə̀ŋ a ntìntìn diʼi ə̀ shʉ aghʉ lèmə̀ wen.

¹⁵ Mà diʼi li nchwi a ghə̀ŋ ndi ghə̀ŋ nè to ando mà nè.

¹⁶ Ma gaʼa a ghə̀ŋ no nəmwèʼè la wù ə shwèʼè ko tɨmə chò tiʼi shyèʼ wen, wù ə ntɨm ko ntemə chò wìʼ yi a ghə̀ tɨmə wen.

¹⁷ Ghə̀ŋ sə kɨ nyʉ̀ venə, mu ghə̀ŋ sətsen ə nè to ali, ghə̀ŋ a kiʼi mbwaʼsə.

¹⁸ “Ma ko gàʼa tebè a ghə̀ŋ və tsèm. Ma kɨli ghə̀ŋ vyi a mà tsuʼ li. Alì, kənyʉ̀ kì a və nyoʼ a Ŋwàʼlə̀ Nyìngòŋ la, ‘Wìʼ ne zhɨ̀ to yo wen, sə diʼ mù ghə̀ bwenə li dzèm əwen a mò’.

¹⁹ Ma shə̀ʼtə̀ kənyʉ̀ kènkə a ghə̀ŋ luwen alə̀, kə ko təmə fʉ̀, ndiʼ kə na fʉ̀, ghə̀ŋ byɨmə la ‘ma diʼ wìʼ yì a ma diʼ wen.’

²⁰ Ma gaʼa a ghə̀ŋ no nəmwèʼè la, no ndo a ghə̀ à shisə wìʼ a mà tɨmə, mù ghə̀ shisə li mò, no ndo à ghə̀ shisə mo, mù ghə̀ shisə li Wìʼ a ghə̀ tɨmə mo.”

Yesò ə shə̀ʼtə̀ la və ne baʼlə wen

²¹ Yesò ə ngàʼa nyʉ̀ avenə alə kwòʼtə̀ ə wenə sə ku ngəʼ a wen no nànto. Ghə̀ mu gàʼ ə làynsə la, “Ma gaʼa a ghə̀ŋ no nəmwèʼè la wìʼ ə mùʼ fa ghə̀ŋ a ntìntìn ne ə baʼlə mo.”

²² Ndzɨ̀mtə̀sə bàm wensə sədiʼ nə̀ əkaynə ə, mu sə ki mu kaynə la ghə̀ gàʼa kumə ndò lo.

²³ A ndiʼ ali dzɨ̀mtə̀ əbàm wen yì a ghə̀ nkòŋ nəkwoŋ ə ŋwʉʼ boʼsə wen.

²⁴ Saymun Bità ə gàʼ a wen ashɨ, la ghə̀ bèm a Yesò la ghə̀ gàʼa kumə ndò lo.

²⁵ Ghə̀ zhəʼtə dyʉ̀ a ben ə Yesò ə bèm a wen la, “Wù gaʼa ndò a Bobo?”

²⁶ Yesò ə gàʼ la, “Ma chʉ̀ kəbayn kènkə a mbàsə̀ ə kù a wìʼ yi a ma gaʼa kumə wen.” Ghə̀ gàʼ ali ə chʉ ku a Judàs Iskalìyòt, ə wàyn Simùn.

²⁷ Judàs ə sə shi vi nə̀ kəbayn a kì a alə, Satan kwen a wen ə tyɨm. Yesò ə gàʼ a wen la, “Zaŋsə nè kənyʉ̀ kì a wù kəŋ ə nè.”

²⁸ Alì ko wìʼ lù ə kɨ akəshi kə kəzhɨkə a kì la ghə̀ gàʼa ali byìʼì ghò lo.

²⁹ Ghə̀ ngaʼa ali, ndzɨ̀mtə̀sə bàm ə wensə sə tsensə kwoʼtə la ghə̀ gaʼa la Judàs zen əfo vyi a chʉʼ a layn, və zhɨ̀ a kətsi kə kəzhɨ, bwen ali mu ghə̀ əgàʼa la ghə̀ ku əko a viʼi kəfem byìʼàndo a ghʉ̀ wen ghʉ̀ kəbò kə ko.

³⁰ Judàs ə shi kəbayn kì fa Yesò no zhʉ̀ko, ə fʉ̀ dyʉ̀ a kəbəŋ kə fenəkə.

Yesò ə ku əsoʼ ə fighə

³¹ A ndiʼ ando Judàs ə fʉ̀ dyʉ̀ li, Yesò ə mu gàʼ la, “Əzhʉ kʉʼʉ li a və a yen kədyòʼ kə Wàyn Wìʼ, ə be yen kədyòʼ kə Nyìngòŋ chò fa wen.

³² A na ndiʼ ando və yenə kədyòʼ kə Nyìngòŋ chò fa wen, nkàyntə̀ Nyìngòŋ be ne, və be yen kədyòʼ kə wen. Nyìngòŋ a nè, kənyʉ̀ na kènkə zaŋsə fʉ̀.

³³ Mà ko be diʼ ə ndiʼ vəghəŋ a kəghaf a vù vwomə. Ghə̀ŋ kəŋ mò nənlù, mu ma dyʉ̀ li akəshi, mu ghə̀ŋ zizi ko ghə̀ŋ lu vi tsu. Ma shə̀ʼtə̀ a ghə̀ŋ luwen, to ndə̀ŋndəŋ ando mà sə diʼ mù ma shə̀ʼtə̀ li a viʼi Jus.

³⁴ Ma ku əsoʼ ə fìghə a ghə̀ŋ luwen. Ghə̀ŋ nə̀ kòŋ təwen ə təŋtə. Ma kòŋ li ghə̀ŋ. Ghə̀ŋ ne kòŋ təwen ə təŋtə to ali.

³⁵ Nò viʼi və tsèm ə ne yenə kɨ la ghə̀ŋ diʼi ndzɨ̀mtə̀sə bàm ə mò, a ji yi a ghə̀ŋ kòŋ təwen ə təŋtə fa tsu.”

Yesò ə shə̀ʼtə̀ la Bità ə na mo wen

³⁶ Yesò əgàʼa ali, Saymun Bità ə bèm a wen la, “Wù dyʉ̀ fe a Bobo?” Ghə̀ bwensə la, “Wù zizi ko wù lu dyʉ̀ akəshi yi a ma dyʉ̀ tsù luwen, ali diʼ ə ne dzɨ̀mtə̀ ə vi.”

³⁷ Bità ə bèm a wen la, “Mà zizi ko ma lu dyʉ̀ luwen byìʼì ghò a Bobo? Ma zizi ma pfʉ̀ byìʼì wù.”

³⁸ Yesò ə bèm la, “wù le zi wu ə pfʉ̀ byìʼì mò a? Ma gaʼa a wù no nəmwèʼè la ə nkəʼ ne sə toŋ layn, mu wù mo li mò aghayn a tàʼ.”