Joyn 12 - The New Testament in the Babanki language

Mèli zùʼ Yesò a Betanì

¹ A nfàŋ to mətsi ntʉfə a ndiʼ mətsi mə məzaʼsə zìtə̀, Yesò ə dyʉ̀ a Betanì, a diʼ ntə̀ʼ və Lazalùs yi a ghə̀ lusə fa pfʉ li.

² Və na pfwo ghayn əfo ə zhɨvə a Yesò, Matà ə gə̀tə̀. Və sə zhɨ̀, Lazalùs ə be zhɨ̀.

³ Mèli lyɨ̀ ndyʉ̀ nə̀ məzhiʼ məlemtəmə mu və shɨtə nə̀ nkàyntə̀ nat, a diʼ no məzhiʼ mə jùŋə mə, mə lèmtə bòŋ no alə̀, əko yi to no nànto ə zùʼ aghʉ Yesò ə zhès nə̀ nyɨŋsə kətʉ wen. Ando ghə̀ zuʼ lì, kəlèmtə̀ kikə ə chiʼ ngə̀ŋ no tsèm.

⁴ Ndzɨ̀mtə̀ əbam Yesò ə tsen kwen a və toŋtə la Judà Iskalìyòt, a diʼ wen yi a ghə̀ ndiʼ ə na ə baʼlə Yesò, ə kəŋkə̀ ə gàʼa la,

⁵ “Və tə zizi və baʼlə məzhiʼ na mèyn a əko, to kədə̀ŋ, ə ku əko na yi a viʼi kəfem.”

⁶ Ghə̀ nko gàʼ ali byìʼàndo ghə̀ kusə shinsə a viʼi kəfem. A ndiʼ byìʼàndo ghə̀ ndi tsoŋ, a wʉ̀ wen wʉ̀ kəmbò kə ko, ghə̀ nshisə ko fa tsu gyamtə əwenə wen tsu.

⁷ Ghə̀ gaʼa ali, Yesò ə gàʼ la, “Ghə̀ŋ moʼtə wùwì na ghèn fu,” ə be gàʼ la, “Ghə̀ tə ə ghʉ̀ məzhiʼ na mèyn lə zùʼ mo a kətsi yi a və bvɨmə mo tsu.

⁸ Viʼi kəfem na ndiʼ to diʼ a ghə̀ŋ a ntìntìn, ali ma ko diʼ ə faŋ to vəghəŋ amuʼ.”

Və baʼtə̀ ə zhwi Lazalùs

⁹ Viʼi Jus ə zhʉ̀ li, to kədə̀ŋ la ghə̀ diʼ a Betanì, ə lù dyʉ̀ tsu ə yenə wen, ə be ə yen Lazalùs a ghə̀ lusə fa pfʉ li.

¹⁰ Tʉtʉ vəpfèm və ngə̀ŋ Nyìngòŋ yen ali ə sə be baʼtə̀ ə zhwi Lazalùs,

¹¹ byìʼàndo viʼi Jus no vəghoʼo ə nsə nyɨŋ dyʉ̀ to fa bàm Yesò, byɨmə a wen byìʼì kənyʉ̀ ki a ghə̀ nè a Lazalùs.

Yesò kwen a Jelusalèm to nə̀ Fòyn

¹² Əchʉʼ ə ne layn, ənòyn ə viʼi vyi a və vi ə zhɨ̀ kəzhɨ kə məzaʼsə ə zhʉ la Yesò ne vi a Jelusalèm,

¹³ ə kwaʼtə zaŋ ə fʉ̀ dyʉ̀ nə̀ wenə və a wen nə̀ ji, zɨ̀mə gàʼa dyʉ̀ la, “Òsanà! mbwaʼmə ə diʼ a wìʼ yi a ghə̀ vi a əzhiʼ Bobo. Nyìngòŋ ə bwàʼsə Fòyn viʼi Islel!”

¹⁴ Yesò ə nkəŋ wàyn jàkas kuʼ a yi a kwi ə sə vi, a diʼ to kənyʉ̀ ki a və nyòʼ a Ŋwàʼlə̀ Nyìngòŋ la:

¹⁵ “kə ghə̀ŋ fwàyn a viʼi ntə̀ʼ Zayòn. Fòyn yi a ghə̀ vi, jèʼe a kwi wàyn ə jàkas.”

¹⁶ A ndiʼ ando nyʉ̀ a venə nfʉ, ndzɨ̀mtə̀sə bàm Yesò sə yenə ko andiʼ la və kɨ. Ghə̀ lu lù fa pfʉ, ə bwenə dyʉ̀ akəshi kə kùʼsə wen, vəwenə mu kwoʼtə la à diʼi nyʉ̀ mu və ə nyoʼo kumə wen no tsèm, viʼi be nè to li a wen.

¹⁷ A ndiʼ ali, mu nòynə ə viʼi vyi a və ndiʼ wenə vəwenə faŋ li sə shə̀ʼtə̀ dyʉ̀ a viʼi la ghə̀ tə dyʉ̀ dzàŋ Lazalùs achʉ̀ əsè, ghə̀ lù fa pfʉ.

¹⁸ Viʼi və ghoʼo və fʉ̀ ə yen wen byìʼàndo vəwenə ə zhʉ̀ la à lə kənyʉ̀ kə kaynəkə kì a ghə̀ nè.

¹⁹ Viʼi Falàsi ə sə gàʼa to a vəwenə a ntìntìn la, “Kə le diʼi la kənyʉ̀ kətsen ko be diʼ vəghəŋ nè. Yen to ando mbyi ə tsèm sə dyʉ̀ to fa wen abàm a!”

Yesò ə shə̀ʼtə̀ la və a zhwi yì

²⁰ Viʼi vətsenvə vi a nko diʼ viʼi Jus mbe ku a Jelusalèm ə kuʼsə Nyìngòŋ a kəshi kə kəzhɨ ki,

²¹ vəwenə dyʉ̀ yen Filib, a diʼ wù ə ntə̀ʼ ə tsen a Galìlì və toŋtə la Bèsaydà, ə sensə wen ə gàʼ la, “Tikəbəŋ, yès əkòŋ ə yen Yesò.”

²² Filib ə dyʉ̀ shə̀ʼtə̀ a Andɨ̀lò, wenə wen ə dyʉ̀ shə̀ʼtə̀ a Yesò.

²³ Yesò ə gàʼ a vəwenə la, “Əzhʉ kʉʼʉ li luwen la Nyìngòŋ ə kuʼsə kwoŋ ə Wàyn Wìʼ akàŋ.

²⁴ Ma gaʼa a ghə̀ŋ to no nəmwèʼè la, və sətsen faŋ ke mòʼ ashɨ ə ngwaʼ a nse, a ghə̀ faŋ to a ngwaʼ. Alì, mu və mòʼ, a ghə̀ pfʉ̀ ə mu kumə ashi asaŋ nò ghoʼo.

²⁵ A kòŋ no ndo ə tsi a mbyi ashə, a ghə̀ pfʉ, a ə baynə no ndò ə ntsi a mbyi ashə, a ghə̀ lù kiʼi ə ntsìnə̀ yì a ghə̀ ko lu mè.

²⁶ No ndo sətsen ə nshyèʼ a mò, mu ghə̀ diʼ ə dzɨ̀mtə̀ ghom diʼ yowù ə shwèʼè ə mò ne diʼ to akəshi kə mùʼ. Tìʼ ghom ə na ku əmoʼtə a wìʼ yi a ghə̀ shyèʼ a mò.”

Yesò ə gàʼ kumə əpfʉ ə wen

²⁷ Yesò ə be mu gàʼ la, “Luwen diʼ alə̀ kwoʼtə ə ghomə ku ngəʼ a mò no nànto, ma ko kɨ la ma gaʼa la gho lo, la, ‘Tìʼ ghom, kə wù a byɨmə ngəʼ na ghèn vi a mò mu?’ Nò tèbe ali, mà tə vi a nse ə yenə ngəʼ na ghèn.

²⁸ Diʼi kədyòʼ ə kyəkə a viʼi a Tìʼ!” To alə, gɨ̀ ə fʉ̀ fa kàŋ ə gàʼ la, “Mà sə diʼ mù ma diʼi li, diʼ ə be a diʼ ə kwʉ̀ʼsə.”

²⁹ Tənòyn tə viʼi titə a tə ndiʼ tsu ə zhʉ̀ ghɨ ayi, vətsevə sə gàʼa la à dèmkə̀ əkaŋ, vətsevə gàʼa la à gàʼa Ntsɨŋ ngə̀ŋ Nyìngòŋ.

³⁰ Alì, Yesò ə gàʼ a vəwenə la, “Gɨ̀ ghèn ko gàʼa ə gyamtə mo, ghə̀ gàʼa ə gyamtə ghə̀ŋ.

³¹ Əzhʉ kwʉʼ li Nyìngòŋ be byɨbsə viʼi mbyi byìʼì mbyɨsə vəwenə be dzɨ̀mə̀ shisə fòyn mbi luwen.

³² A ne ndi a zhʉ a ve ne lùsə mo fa nse, mà dzàŋ no viʼi vətsèm, və vi a mò.”

³³ Ghə̀ gàʼa alə̀, əshəʼtə nki pfʉ a ghə̀ diʼ ne pfʉ.

³⁴ Viʼi na vyi ə bèm la, “Əsoʼ ə vəghəŋ ziʼi la Klistò diʼ ə tsì ə faŋ, wù jeʼ ale ə gàʼa la, və diʼ ə lùsə Wàyn Wìʼ a? Wàyn Wìʼ na ghèn diʼ no ndò?”

³⁵ Yesò ə mu gàʼ a vəwenə la, “Ghə̀ŋ na bo kiʼi əbayn to a fəshinə fə zhʉ̀ alə. Ghə̀ŋ ə jèʼè, shì ə bo baynə, kə kəbəŋ kə fenəkə na tyin ghə̀ŋ. Wìʼ ə jèʼe a kəbəŋ kə fenəkə, ko ghə̀ lu yenə la ghə̀ dyʉ̀ fè lo?

³⁶ Ghə̀ŋ byɨmə əbayn, ghə̀ bo diʼ a ghə̀ŋ a ntìntìn ndiʼ ghə̀ŋ ndiʼ vunə əbayn.” Yesò ə gàʼa nyʉ̀ venə alə ə nyɨŋ dyʉ̀ lyòmtə̀.

Vəjew tyen la və ko byɨmə Yesò

³⁷ Yesò ə nè no tèbe nyʉ̀ ə kaynəvə venə no ətsèm lə, vəwenə be tyenə to tyenə la və ko byɨmə a wen.

³⁸ Kə nfʉ alə ndiʼ ntɨm ə Nyìngòŋ yì a nshə̀ʼtə̀ Isayà nshə̀ʼtə̀ kwʉʼ: “Bobo, à byɨmə ndò ntɨm ə yes a? A yèn ndò kədyòʼ kə Bobo a?”

³⁹ Vəwenə ə faŋ kò və lə byɨmə a ji a Isayà ə ngaʼa la:

⁴⁰ “Nyìngòŋ ə nè li, vəwenə nfyɨf ə be ntosə tətyɨm tə vəwenə, ndiʼ vəwenə ki tèbe ki ko və lu yenə, kwòʼtə̀ tèbe kənyʉ̀, ko andiʼ la və kɨ; byìʼàndo vəwenə sətsen ə yenə be kɨ nyʉ̀ a və bwensə ə vi a Nyìngòŋ ghə̀ chʉʼ vəwenə.”

⁴¹ Isayà ngaʼa nyʉ̀ venə kumə Yesò byìʼàndo ghə̀ sə diʼ mù ghə̀ yenli kədyoʼkə wen.

⁴² Nò tèbe ali, viʼi vətsevə nə̀ viʼi Jus vətsevə və ə byɨmə li a Yesò, to kədə̀ŋ, ali ko və lù fʉ̀ a ndayn byìʼàndo vəwenə ə mfwàynə̀ la və fʉ, viʼi Falàsi a dzɨ̀m vəwenə fa ngə̀ŋ ntsentə.

⁴³ Vəwenə ə kòŋ la viʼi mbwomsə vəwenə chò la a mbwomsə Nyìngòŋ.

Yesò ə gàʼ la və lu soʼo viʼi chò fa wen a gàʼ

⁴⁴ Yesò be gàʼ no a gɨ to la, “A byɨmə no ndo a mò, mù ghə̀ byɨmə li a wìʼ yi a ghə̀ tɨmə mo.

⁴⁵ A yen te ndò yen mo, mu ghə̀ yen li wìʼ ə yi a ghə̀ tɨmə mo.

⁴⁶ Mà vi a mbyi to nə̀ əbayn ndiʼ wìʼ faŋ kò ghə̀ lə be ndiʼ a kəbəŋ kə fenəkə, mu ghə̀ byɨmə li a mò.

⁴⁷ A zhʉ̀ no ndo zhʉ gàʼà ə ghomə ə faŋ ke nè ando mà gàʼa, ko ma lu soʼo wen byìʼàndo ma ko vi a mbyi ə soʼo viʼi, mà boŋsə vi la və bwòŋ.

⁴⁸ A tyen te ndo tyen mo nə̀ gàʼ ə ghomə, nyʉ̀ vyi a mà gàʼa lù soʼo wen a kətsi kə ə bàm.

⁴⁹ Ma ko gaʼa nyʉ̀ fa mo ə ngə̀ŋ. A ntɨm Tìʼ ə tɨm mo la mà gàʼ, ə shə̀ʼtə̀ ji yi a zizi mà gàʼ fa tsu.

⁵⁰ Ma kɨli la kənyʉ̀ kì a Tiʼi ghom gàʼ ə nè la viʼi kiʼi ntsìnə̀ yì a ghə̀ ko lu mè. Ma gàʼa no ghò, a diʼ tò kikə a Tìʼ ghom gàʼ la mà gàʼ.”