Joyn 11 - The New Testament in the Babanki language

Lazalùs ə pfʉ̀

¹ Wìʼ ə tsen nkwaʼa, əzhiʼ ə wenə ndiʼ Lazalùs, ghə̀ ntsì a Betanì, a diʼ to a ntə̀ʼ yi a Mèli wenə lèmə̀ wen Matà ntsi tsu.

² Lazalùs na ghèn a ghə̀ kwaʼa ndiʼ lèmə̀ Mèli, ndə̀ŋndəŋ Mèli yi a ghə̀ buʼtə məzhiʼ mì a ghʉ Yesò ə zhès nə̀ nyɨŋsə kətʉ wensə li.

³ Vəlemə na venə mu tɨmə ntɨm a Yesò ə gàʼ la, “Bobo, wìʼ yi a wù kòŋ li ə kwaʼa.”

⁴ Yesò zhʉ̀ ntɨm na yi ə gàʼ la, “Ghə̀ kwaʼa tèbe ali, ko ndiʼ la ghə̀ a pfʉ̀. Əkwaʼa na yi ə vi ndi Nyìngòŋ ə diʼ kədyòʼ kə wen. Wàyn Nyìngòŋ na diʼ kədyòʼ ki a ghə̀ kù a wen chò fa kwaʼa na ghèn.”

⁵ Yesò nkòŋ Matà wenə lèmə̀ wen Mèli nə̀ Lazalùs,

⁶ ali ə zhʉ̀ la Lazalùs əkwaʼa faŋ to akəshi yi a ghə̀ ndiʼ tsu, mətsi ə bò ə chò,

⁷ ghə̀ mu gàʼ a ndzɨ̀mtə̀sə bàm ə wensə la, “vəghəŋ bwenə dyʉ̀ a Jùdiyà.”

⁸ Ndzɨ̀mtə̀sə bàm wensə toŋtə wen ə gàʼ la, “Ndìʼsə̀, à tə ndiʼ to fəkuʼ alə̀ viʼi Jus sə kəŋ ə tèmlə wù nə̀ nguʼsə, wù sə be kəŋ ə dyʉ̀ ə nè gho tsu a?”

⁹ Yesò ə bèm a vəwenə la, “A kətsi kə ə kiʼi təzhʉ njʉ̀sə̀ bò? Wìʼ ə zizi ko ghə̀ lu kòyntə, jèʼ nə̀nchwì byìʼàndo ghə̀ nyenə wìʼ yi a ghə̀ kù əbayn a mbyi.

¹⁰ Ghə̀ zizi a ghə̀ kòyntə to a zhʉ a ghə̀ jèʼè netʉʼ byìʼàndo ghə̀ kokiʼ ə bayn, ko ghə̀ lu yenə.”

¹¹ Yesò ə gàʼa ali ə mu gàʼ la, “wùndoŋ ə vəghəŋ Lazalùs bʉnə li, ali ma diʼ ə dyʉ̀ ə zhòmə wen.”

¹² Ndzɨ̀mtə̀sə bàm wensə ə toŋtə wen ə gàʼ la, “Bobo, ghə̀ sətsen ə ndiʼ mu ghə̀ bʉnə li, mu a diʼ mù ghə̀ sə to.”

¹³ Yesò ə gàʼa ali, gàʼa la Lazalùs pfʉ li, ndzɨ̀mtə̀sə bàm wensə zhʉ la ghə̀ gaʼa to no nkàyntə̀ mbinsə.

¹⁴ Ghə̀ mu shə̀ʼtə̀ ə mwetə a vəwenə la, “Lazalùs pfʉli,

¹⁵ ma saŋlə kumə kənyʉ̀ a kì la ma ko ə ndiʼ tsu. Ghə̀ŋ le zìtə̀ li byɨmə luwen. Vəghəŋ dyʉ̀ yenə wen.”

¹⁶ Nò zhʉ̀ko, Tòmos yi a və mbe toŋtə wen la Didimùs ə gàʼ a ndzɨ̀mtə̀sə bàm Yesò sə tsensə la, “vəghəŋ boŋ dyʉ̀ fa bàm ndìʼsə̀, ghə̀ sə pfʉ, vəghəŋ boŋ pfʉkə dyʉ̀.”

Yesò dyʉ̀ chɨmsə vəlemə və Lazalùs

¹⁷ Yesò ə dyʉ̀ zàʼa a Betanì ə yen mu Lazalùs sə diʼ mù ghə̀ tsi li a sè a mətsi ə nkàʼ.

¹⁸ A ndiʼ ali, Betanì ə ko zàʼa tebè vəmille və bò ə lu fa a Jelusalèm,

¹⁹ viʼi Jus diʼ tsu, to kədə̀ŋ a və nvi ə chɨmsə Matà wenə Mèli a pfʉ̀ lèmə̀ vəwenə.

²⁰ Matà ə zhʉ la Yesò əvi ə fʉ̀ dyʉ̀ ə lyɨ̀ wen fa ji, Mèli faŋ to a ngə̀ŋ.

²¹ A sə ndiʼ ando Matà dyʉ̀ yèn Yesò ə gàʼ la, “Bobo, wù te ndiʼ ashə mu lèmə̀ ghom ko tə pfʉ.

²² Nò tèbe ali, ma kɨli la wù bèm no tèbe ghoʼ a Nyìngòŋ, ghə̀ a nè a wù to luwen.”

²³ Yesò ə gàʼ a wen la, “Lèmə̀ wù a bwènsə̀ to be ntsi.”

²⁴ Matà ə gàʼ a wen la, “Ma kɨli la ghə̀ lə bwensə̀ lu fa pfʉ a kətsi kə bàm.”

²⁵ Yesò ə gàʼ a wen la, “A lusə mò lusə viʼi fa pfʉ̀, ku kədyòʼ la və tsi. A byɨmə no ndò a mò, pfʉ tèbe pfʉ, ghə̀ ne bwensə lù ntsi.

²⁶ A tsi no ndò ə byɨmə a mò, ko ghə̀ lu be pfʉ no fa mphen.” Yesò ə gàʼ ali ə bèm a Matà la, “Wù byɨmə nakèn kə a?”

²⁷ Matà byɨmə ə gàʼ la, “Ma byɨmə a Bobo la wù diʼ wìʼ yì a və tsuʼli ghʉ, à diʼ wù Wàyn Nyìngòŋ yi a ghə̀ ndiʼ lə vi a mbyi.”

Yesò dì

²⁸ Matà gàʼ ali ə bwenə dyʉ̀ nyoʼtə dzàŋ lèmə̀ wen Mèli ə gàʼ a wen la, “Ndìʼsə̀ vi li sə bèmə wù.”

²⁹ Mèli zhʉ ali ə zaŋsə fʉ̀ dyʉ̀ ə yen Yesò.

³⁰ A ndiʼ ali, Yesò ə bo diʼ to akəshi yi a Matà bùmtə̀ wenə wen tsu a ji lì, ko ghə̀ təmə kwen a tyi ntə̀ʼ.

³¹ Mèli sə fʉ̀ ə dyʉ̀, viʼi vyi a və nyʉ̀ʼ chɨmsə wen a ngə̀ŋ ə fʉ̀ fa wen abàm, kwoʼtə la ghə̀ dyʉ̀ achʉ̀ əsè ə dì lèmə̀ wen.

³² Ghə̀ dyʉ̀ zàʼa akəshi yi a Yesò ndiʼ tsu ə yenə vi nə̀ wen alə̀ ə fəŋ to a wen ashɨ ə gàʼ la, “Bobo, wù to ndiʼ ashə, mu lèmə̀ ghom ko tə pfʉ̀.”

³³ Yesò ə yen to ando ghə̀ dì nə̀ viʼi vyi a wenə vəwenə vi amuʼ ə be dì, kənyʉ̀ na kì kə sə ku ngəʼ a wen, zafə wen no nànto.

³⁴ Ghə̀ bèm a vəwenə la, “Ghə̀ŋ tə bvɨmə wen fe?” Vəwenə gàʼ a wen la, “Vi dyʉ̀ yen a Bobo.”

³⁵ Yesò dì.

³⁶ Viʼi yen ando ghə̀ dì ə gàʼ la, “Yen ando ghə̀ nkòŋ wen no nànto.!”

³⁷ Alì viʼi vətsenvə sə gàʼa la, “A tə nè wen, wù kənfyɨf yì sə yenə shi, tə ə faŋ kò ghə̀ nè lì la kə Lazalùs pfʉ byìʼì ghò?”

Yesò lùsə Lazalùs fa pfʉ

³⁸ Yesò ə ne dyʉ̀ zàʼa achʉ̀ əsè Lazalùs, kənyʉ̀ na kì ə bo ku to ngəʼ a wen. Əsè na yi ə ndiʼ chiʼi, mu və chiʼ nə̀ ngùʼ.

³⁹ Yesò ə gàʼ la, “Ghə̀ŋ lyisə ngùʼ ayi.” Alì Matà, lèmə̀ wù ə pfʉ̀ Lazalùs, gàʼ la, “Məntsi chòli luwen ə nkàʼ a Bobo ando və bvɨmə wen, mu və sətsen lyisə ngùʼ ayi luwen, kətyùm kə a fʉ, byifə no nànto.”

⁴⁰ Yesò ə gàʼ a wen la, “A ma ə gàʼ a li a wù la wù byɨmə, a wù yen kədyòʼ kə Nyìngòŋ?”

⁴¹ Ghə̀ gàʼ ali, və mu lyisə ngùʼ ayì. Ghə̀ ki kuʼsə nə̀ kaŋə ə gàʼ la, “Ma ku kəzòŋ à wu a Tìʼ byìʼàndo wù nə̀ zhʉtə mò,

⁴² ma kɨ no alə̀ la mà nə̀ gàʼa, wù zhʉ̀. Alì ma gàʼa luwen a jùŋ ə viʼi venə a və ti ashə, ndiʼ vəwenə zhʉ̀ ə byɨmə la a tɨm wù tɨmə mo.”

⁴³ Ghə̀ gaʼa ali ə dzàŋ gàʼ no nə̀ ghɨ ə to la, “Lazalùs, fʉ̀ vì!”

⁴⁴ Ghə̀ fʉ̀ mu və lemtə li avù wen nə̀ aghʉ nə̀ basə ndisə, be kwiʼ əkə̀ʼ ə wen nə̀ ndisə ə tsensə. Yesò ə gàʼ la, “Ghə̀ŋ zaytə kəbvèm kèn fa wenə wen, ghə̀ ndyʉ̀.”

Və baʼtə̀ ə zhwi Yesò

⁴⁵ Viʼi Jus no vəghoʼo a və vi ə yen Mèli ə nyenli kənyʉ̀ kì a Yesò nè ə byɨmə a wen.

⁴⁶ Alì, vətsevə bwenə dyʉ̀ ə yen viʼi Falàsi ə shə̀ʼtə̀ kənyʉ̀ kì a Yesò nè a vəwenə.

⁴⁷ Vəwenə ghaʼ ntsèntə̀ wenə tʉtʉ vəpfèm və ngə̀ŋ Nyìngòŋ sə ghoʼkəsə nə̀ viʼi və soʼ nsoʼsə ə bèm la, “vəghəŋ a nè ale? Yen nyʉ̀ ə kaynəvə vyi a wìʼ ə ghèn mwomə a.

⁴⁸ Vəghəŋ sətsen moʼtə ghə̀ nè to alə̀, a viʼi na zhʉ̀ nyʉ̀ byɨmə a wen, to vətsèm. Fa yi abàm, viʼi Lum a vì byɨbsə ngə̀ŋ Nyìngòŋ ə ghoʼo vəghəŋ be byɨbsə viʼi lòʼ vəghəŋ.”

⁴⁹ Wìʼ ə tsen a vəwenə a ntìntìn, a və ntoŋtə la Kàyafàs, a ndiʼ wen diʼ kətʉ kə tʉtʉ vəpfèm və ngə̀ŋ Nyìngòŋ a ngwʉ̀ʼ a yì ə gàʼ la, “Ghə̀ŋ ko kɨ kənyʉ̀ no fa mphen!

⁵⁰ Ghə̀ŋ ko yenə la kə boŋsə bù la wìʼ ə mùʼ pfʉ akəshi viʼi vətsèm chò ando və byɨbsə lòʼ ə tsèm mu?”

⁵¹ Ghə̀ nko gàʼa tebè a wen ətof ali shə̀ʼtə̀ ntɨmə Nyìngòŋ to nə̀ pfem ngə̀ŋ Nyìngòŋ ə ŋanŋtə a ngwʉ̀ʼ na yi la, Yesò ə na pfʉ akəshi viʼi Jus.

⁵² Ghə̀ ko pfʉ to a vəwenə. Ghə̀ ə̀ pfʉ tamə a kətʉ vunə Nyìngòŋ vyi a və ghəsə li ndiʼ vəwenə bwènsə̀ zhùŋtə̀ vi ndiʼ to kənyʉ̀ kə mùʼ.

⁵³ Ə zìtə̀ fa kətsi na yi, vəwenə sə baʼtə̀ ə zhwi Yesò.

⁵⁴ Yesò ə yen ali ko ghə̀ be kwen tebè kəshi a zizi viʼi Jus yenə wen tsu, ə boŋsə nyɨŋ dyʉ̀ a ntə̀ʼ tsen, və toŋtə la Efèlèm, ashə lòʼ ə lo tseghə, boʼsə a nse zɨm, ə sə tsi tsu wenə ndzɨ̀mtə̀sə bàm wensə.

⁵⁵ A ndiʼ a zhʉ a ghèn mu kətsi kə kəzhɨ kə məzaʼsə viʼi Jus nsə boʼsə, viʼi pfwo kuʼ a Jelusalèm, to kədə̀ŋ, ə shʉ təwen tə vəwenə a ji ntsìnə̀ əloʼ mibu kətsi kə məzaʼsə kə vi.

⁵⁶ Vəwenə vi ali ə faŋ sə bèmə to Yesò, vi tɨmə a kəbəŋ kə ngə̀ŋ Nyìngòŋ, ə sə bèmə to a vəwenə ntìntìn la, “Wù yèn ale? A ghə̀ lə vì akəshi kəzhɨ ashə a?”

⁵⁷ A ndiʼ ali, mu tʉtʉ vəpfèm və ngə̀ŋ Nyìngòŋ sə ghoʼsə wenə viʼi Falàsi nchosə li əsoʼ la, no ndò a ghə kɨ kəshi kì a Yesò diʼ tsu, ghə̀ shə̀ʼtə ndiʼ və ghaʼa wen.