Joyn 1 - The New Testament in the Babanki language

Ntɨm yi a ghə̀ ku ə bwòŋ

¹ Andiʼ no mibu mbyi zìtə̀, mu Ntɨm ə Nyìngòŋ sə diʼ. Ghə̀ ndiʼ wenə Nyìngòŋ, ghə̀ diʼ nkàyntə Nyìngòŋ.

² Ghə̀ ndiʼ wen nə̀ Nyìngòŋ no fa kənzìtə.

³ Nyìngòŋ ə shɨtə ə fo ə tsèm ə chò fa wen, mu à mbwen fa wen mu və ko nshɨtə no tèbe ghò yi a və ndiʼ mù və shɨtə li.

⁴ Ghə̀ ə nkiʼi ntsìnə̀, ntsìnə̀ ayi ku əbayn a viʼi.

⁵ Ə bayn na ghèn ə baynə a ntìntìn kəbəŋ kə fenəkə, ali kəbəŋ kə fenəkə na kènkə nzizi ko kə lu lemsə.

⁶ Nyìngòŋ ə ntɨm li wìʼ, a və toŋtə nə̀ Joyn,

⁷ la ghə̀ nvi ə ndiʼ nchwò nsòʼ kumə əbayn na ghèn nə̀ ndi viʼi zhʉ̀ nyʉ̀ vyi a ghə̀ gaʼa ə byɨmə.

⁸ Joyn ə nko ə ndiʼ əbayn na ghenə no fa wen a ngeŋ. Ghə̀ ə vi to nə̀ nchwò nsòʼ kumə əbayn na ghenə.

⁹ Əbayn na ghenə ndiʼ əbayn nəmwèʼè a ghə̀ ə vi a mbi ə nku əbayn a viʼi və tsèm.

¹⁰ Ntɨm ə Nyìngòŋ ə nvi li a mbi, ali viʼi mbyi mo wen no tèbe ando mbi ayi ndiʼ mu à shɨtə wen.

¹¹ Ghə̀ nvi li ə zàʼa to no a vəwenə a loʼ, viʼi wen tyen la və ko a shisə ə wen.

¹² Alì, viʼi vətsenvə shisə wen ə byɨmə a wen, ghə̀ kù kədyòʼ la vəwenə ndiʼ vunə Nyìngòŋ.

¹³ Vəwenə ko ə kaʼkə a vunə Nyìngòŋ a ji yi a wìʼ nə̀ kòŋ ə bwi vunə fa tsu, a ndiʼ to əghʉ̀nə̀ Nyìngòŋ la vəwenə ndiʼ vunə wen.

¹⁴ Ntɨm Nyìngòŋ na ghèn ə kaʼkə li sə diʼ wìʼ, ə vi tsitə a vəghəŋ a ntìntìn. Yès ə yen li kədyòʼ kə kaynəkə ə wen, kədyòʼ a ghə̀ kiʼi to nə̀ wàyn Nyìngòŋ a ghə̀ diʼ to əmùʼ li. Ghə̀ nlù fa ben ə Bobo ə vi kiʼi kusə nshinsə no mwènmwèn nə̀ no tèbe a ghò yi a ghə̀ diʼ nəmwèʼè kumə Nyìngòŋ.

¹⁵ A diʼi wen yi a Joyn ə gaʼa kumə a ghə̀ ə dzàŋ gàʼ la, “Ghèn diʼi wen yi a ma ə gaʼa a ghə̀ŋ la, ‘Ghə̀ vi fa mo abàm, chò mò byìʼì ando və ə sə bwi mo, mu ghə̀ ə sə diʼ.’”

¹⁶ A diʼ fa kusə shinsə wen a ghə̀ diʼ no ghoʼ ə ghoʼ, a ghə̀ ne la vəghəŋ sə kiʼi ə mbwaʼməsə to ghayn a ghayn.

¹⁷ Nyìngòŋ bè ə ku Əsoʼ, ghə̀ chò fa kəvu ə Mosìs. Ə kusə shinsə tə sə vi, no tèbe nə̀ ghoʼ yi a ghə̀ diʼi nəmwèʼè, chò ji fa kəvu ə Yesò Klistò.

¹⁸ Wìʼ ə ko tɨmə yen Nyìngòŋ. A diʼ to wàyn Nyìngòŋ yì əmùʼ a ghə̀ diʼi nkàyntə̀ Nyìngòŋ, mu nyʉ̀ʼ to a ben nə̀ Bobo, a ghə̀ diʼi li to ando Nyìngòŋ diʼ a viʼi.

Joyn wù ku a Mù tensə la à ko diʼ wen diʼ Mbwòŋsə̀

¹⁹ Viʼi Jus vyi a və ndiʼ a Jelusalèm ə ntɨm li vəpfèm və ngə̀ŋ Nyìngòŋ nə̀ viʼi ngwaʼ ə ngə̀ŋ ə Levì la və dyʉ̀ ə bèm a Joyn ə ku a Mù la, ghə̀ diʼ ndò lo.

²⁰ Vəwenə dyʉ̀ ə sə bèmə, Joyn ə shə̀ʼtə̀ mwetə to mwetə la, “A ko diʼ mo a və Ntsuʼ li.”

²¹ Vəwenə be bèm kwʉ̀ʼsə a wen la, “Wù ə diʼ no ndò? A diʼ wu Ilajà mu?” Joyn gàʼ la ghə̀ ko diʼ Ilajà. Vəwenə be mù bèm la ghə̀ diʼ Nshə̀ʼtə̀ ə ghoʼo yì a və ə kəʼtə li mu? Joyn ə bè tensə tò tensə.

²² Vəwenə gàʼ a wen la, “shə̀ʼtə̀ li a yès la wù diʼ ndò lo. Yès ə kəŋ ə zhʉ fa wù a chʉ̀ ndi yès bwenə dyʉ̀ ə shə̀ʼtə̀ a viʼi vyi a və ə tɨmə yès.”

²³ Joyn ə bwensə gaʼa to ando nshə̀ʼtə̀ Isayà ə gàʼ la, “Ma diʼ wìʼ yi a ghə̀ dzàŋ gàʼ a nse zɨm la, ‘Ghə̀ŋ shɨtə jì Bobo ghə̀ nayn, ghə̀ sə vi ə chò fa tsu.’”

²⁴ A ndiʼ ali mu a ntɨm viʼi Falàsi ətɨm viʼi a venə a Joyn.

²⁵ Vəwenə ə bèm mwètə̀ a wen la, “Wu ə ko diʼ wìʼ a və tsuʼ li, ko ndiʼ la wu diʼ Ilajà, ko Nshə̀ʼtə̀ ə ghoʼo yì a və ə kə̀ʼtə̀, ə sə kù mu mə ghò?”

^26-27 Joyn gàʼ la, “Ma ku mu a ghə̀ŋ to no nə̀ mu mə fwàyn, ali wìʼ diʼ a ghə̀ ti to no a ghə̀ŋ a ntìntìn luwen, ko ghə̀ŋ kɨ wen, no tèbe mò ə ko kwʉ̀ʼ ə shwèʼ to ne kəkòs kə a kə zatə mpfʉ̀sə gwʉsə a ghʉ ə wen.”

²⁸ Nò nyʉ̀ a venə no ə tsèm ə fʉ̀ a ntə̀ʼ Betanì, a dzen mu mə Jodàn yi a Joyn ə kù mu tsu.

Joyn ə diʼ Yesò a viʼi

²⁹ Ətʉ̀ʼ ə nlayn li, Joyn yen Yesò ando ghə̀ ə vi, ghə̀ diʼi wen a viʼi ə gàʼ la, “Ghèn diʼ wàyn BYI Njɨ̀ Nyìngòŋ yi a ghə̀ ne shi mbyɨsə viʼi mbyi!

³⁰ A diʼi wen yi a ma tə̀ shə̀ʼtə̀ a ghə̀ŋ li la, ‘Wìʼ ə vi fa mò a bàm, chò mò, byìʼì ando və ə sə bwi mo, mu ghə̀ se diʼ.’

³¹ Ma nko tə kɨ wen, ali tə vi sə ku mu nə̀ mu mə fwàyn baʼtə̀ tətyɨm ə təŋtə ndi ghə̀ sə vi, viʼi Islel yenə kɨ wen.”

³² Joyn mu gaʼa la, “Ma tə yen to ando kəzhwì kə Ŋwoʼkə shiʼi vi fa kàŋ to nə̀ kəlàto kə, ə vi nyʉ̀ʼmə faŋ a wen a kətʉ.

³³ Ma ko tə ndiʼ kɨ wen. Ma tə sə kɨ wen mu ma kɨ to byìʼì kənyʉ̀ ki a Nyìngòŋ tə sə tɨm mo la ma vi əku mu nə̀ mu mə fwàyn ə gàʼ la, ‘Wù lù yen no ndò to ando kəzhwì kə Ŋwoʼkə shiʼi vi nyʉ̀ʼmə faŋ a wen a kətʉ, wù mu kɨ la à diʼ wen yi a ghə̀ vi ə ku mu nə̀ Kəzhwì kə Ŋwoʼkə a viʼi.’

³⁴ Ma diʼ mu ma yen li kənyʉ̀ na kènkə ando kə fʉ, ə sə shə̀ʼtə̀ a ghə̀ŋ la wìʼ na ghèn diʼ wàyn Nyìngòŋ.”

Yesò ə lyɨ̀ mbìsə ndzɨ̀mtə̀sə bàm ə wen

³⁵ Ətʉʼ ə be layn, Joyn wenə ndzɨ̀mtə̀sə bàm nə̀ wen sə bò ə be dyʉ̀ ə tɨmə akəshi yi a vəwenə tə zhʉsə tsu li,

³⁶ ghə̀ nyen li Yesò ando ghə̀ chò ə gàʼ a vəwenə la, “A chò wàyn BYI Njɨ̀ Nyìngòŋ le!”

³⁷ Ndzɨ̀mtə̀sə bàm ə wen na shìsə zhʉ̀ ali ə lu ə sə dyʉ̀ fa bàm ə Yesò.

³⁸ Yesò ə kaʼsə ki, ə yen vəwenə to ando və vi fa a wen abàm ə bèm a vəwenə la, “Ghə̀ŋ kəŋ ghoʼ?” Vəwenə bèm la, “Wù tsi fe a Labày?” Labày na ghèn diʼi gàʼ lòʼ la “Ndìʼsə̀”.

³⁹ Ghə̀ gàʼ a vəwenə la, “Ghə̀ŋ vi li yen a.” Vəwenə dyʉ̀ yen kəshi kì a ghə̀ ntsi tsu, a ndiʼ ali mu à sə diʼ a bwaʼa kəbəŋ. Vəwenə ŋwʉʼmə to tsu zaʼa fa mpfwòmə.

⁴⁰ Wìʼ ə mùʼ fa ntìntìn ə viʼi na vi və bò a və zhʉ̀ to ando Joyn ə gàʼa ə lu dyʉ̀ wenə Yesò li, ndiʼ Andɨ̀lò, ə lèmə̀ Simon Bità.

⁴¹ To a zhʉ a yi ghə̀ kəŋ li dyʉ̀ to nə̀ lèmə̀ wen ə Simon ə gàʼ a wen la, “yès ə yen li wìʼ yi a və tsuʼ li a diʼ ‘Klistò.’”

⁴² Ghə̀ gàʼ ali ə lyɨ̀ Simon ə dyʉ̀ nə̀ wen a Yesò. Yesò ə yenə wen ə gaʼa a wen la “A diʼ wù Simon ə wàyn Joyn, ali və a toŋtə wù luwen la Sefàs.” Sefàs nə̀ Bità diʼ to zhiʼ ə mùʼ, ghə̀ diʼ la, “əghu.”

Yesò lyɨ̀ Filib wenə Nàtanyèl a ndzɨ̀mtə̀sə bàm ə wen

⁴³ A sə diʼ a kənkùmtə̀ kə kətsi, Yesò ə lù ə sə dyʉ̀ a Galìlì ə yen Filib ə gàʼ a wen la ghə̀ dzɨ̀mtə̀ wen.

⁴⁴ A ndiʼ ali, mu Filib fʉ vi to fa ntə̀ʼ Bèsaydà tanə Andɨ̀lò wenə Bità.

⁴⁵ Filib ə kəŋ dyʉ̀ nə̀ Nàtanyèl ə gàʼ a wen la, “Yes yen li wìʼ yi a Mosìs ə nyoʼo kumə wen a ŋwàʼlə̀ Əsoʼ li, nshə̀ʼtə̀ sə ghoʼsə ə be boŋ nyòʼ. Ghə̀ diʼ Yesò ə wu Nazalèt, ə wàyn Josèf”.

⁴⁶ Nàtanyèl mu bèm la, “A jùŋ zizi ghə̀ fʉ fa Nazalèt a?” Filib ə bwensə la, ghə̀ vi to vi ə yen.

⁴⁷ Yesò yen to ando Nàtanyèl ə vi ə gàʼ la, “A diʼ to no nkàyntə mbwìnə̀ Islel a ghə̀ vi lə. Ghə̀ gàʼa to nəmwèʼè.”

⁴⁸ Nàtanyèl ə bèm a wen la, “Wù jèʼ ale mu kɨ mo a?” Yesò ə gàʼ la, “Mà yi yen wù azhʉ̀ yi a wù yi nyʉ̀ʼ a tsi ə fəkoʼ fə fig mibu Filib ə vi ə ndzàŋ wù.”

⁴⁹ Nàtanyèl ə mu gàʼ la, “ndìʼsə̀ wu diʼ wàyn Nyìngòŋ, wù diʼ Fòyn a viʼi Islel!”

⁵⁰ Yesò mu bè gàʼ la, “Wù byɨmə to byìʼì ando mà gàʼ la ma yi yen wù azhʉ̀ yi a wù yi ŋwʉʼ a tsi ə fəkoʼ fə fig li mu? Alì, wu be ne yen nyʉ̀ ə tsenəvə, və chò na ki.”

⁵¹ Ghə̀ gàʼ ali ə be gàʼ kwʉ̀ʼsə la, “Ma gaʼa a ghə̀ŋ to no nəmwèʼè la, Ghə̀ŋ lu yen to ando əkaŋ ə boʼmə̀, ətsɨŋsə ngə̀ŋ Nyìngòŋ sə chwòmə̀ kuʼ be shiʼi, jèʼè to a ntɨm ə Wàyn Wìʼ”