Biblia Todo Logo
Bìoball air-loidhne

- Sanasan -

Hibùlù 7 - The New Testament in the Babanki language


Mèlìkisedèk ndiʼ pfèm ngə̀ŋ Nyìngòŋ

1 Mèlìkisedèk a ghèn ə ndiʼ fòyn ntə̀ʼ ghoʼo a Salèm be diʼ pfèm ngə̀ŋ Nyìngòŋ ghoʼo. Andìʼ to ando Ablaham dyʉ̀ ə temə ghòŋ wenə viʼi wen ə zhɨ̀ təfòyn to kədə̀ŋ ə bwènə̀ sə pfwo, Mèlìkisedèk ə yenə li wen a ji ə bwàʼsə wen.

2 Ablaham ə ntsentə li əfo vyi a ghə̀ kiʼi fa ghòŋ ə gə̀tə̀ əshi əwùm ə ku kəshi kə mùʼ fa tyi shi ə wù na vyi a Mèlìkisedèk. Əzhiʼ ə wen ghenə la Mèlìkisedèk ndiʼ a gàʼà Hibùlù la, “Fòyn Kənyʉ̀ kətɨməkə.” Ghə̀ ndiʼ fòyn Salèm, Salèm diʼ a gaʼa Hibùlù la, “mbwaʼmə.” To ando ghə̀ ndiʼ fòyn nə̀ Salèm kə lə diʼi la ghə̀ ndiʼ Fòyn mbwaʼmə.

3 A diʼ a Ŋwàʼlə̀ Nyìngòŋ ko ndiʼ la və shə̀ʼtə̀ la tiʼi wen ndiʼ ndò lo, lì wen diʼ ndò lo. Və ko gàʼ tèbe kənyʉ̀ kumə vətiʼi vəwenə, ko və lù ə gàʼ kənyʉ̀ kumə ə tʉʼ yi a və mbwi wen nə̀ ə tʉ a ghə̀ mpfʉ. Kə le diʼi la ghə̀ faŋ li a pfèm ngə̀ŋ Nyìngòŋ to ə ghayn ə mùʼ to ando Wàyn Nyìngòŋ nfaŋ li to ghàyn ə mùʼ.

4 Wù zi wù yèn la Mèlìkisedèk ndiʼ no kəshi kətokə. Nò tiʼi əloʼ ə Islel, Ablaham ə ngə̀tə̀ li əfo vyi a ghə̀ kiʼi atoʼ ghòŋ əshi əwùm ə ku kəshi kə mùʼ fa tyi shi ə wum a venə a wen.

5 Əsoʼ ə Mosìs ngàʼà la vəpfèm və ngə̀ŋ Nyìngòŋ vyi a və nfʉ fa ngwaʼ ə ngə̀ŋ ə Levì ə diʼ ə nshi kəfo kə mùʼ fa ntìntìn əfo əwùm fa viʼi Islel. Kə le diʼi la vəwenə mbwenə shi to mə əfo a venə to fa vəlemə və vəwenə byìʼì ando vəwenə ndiʼ to vunə ngwàʼ ngə̀ŋ Ablaham.

6 Mèlìkisedèk ə ko ndiʼ wù ngwaʼ ə ngəŋ ə Levì ali ə shi kəfo kə mùʼ fa tyi əfo wum fa Ablaham ə be bwàʼsə Ablaham, a diʼ wen yi a Nyìngòŋ ə nghʉ̀ la ghə̀ ne nyʉ̀ a wen.

7 Kə diʼ to no nəmwèʼè la Mèlìkisedèk ə kuʼmə chò Ablaham byìʼì ando à nə̀ lu to wìʼ yi a ghə̀ kuʼmə, ə bwaʼsə ghətsen a ghə̀ ko kuʼmə zaʼa a nə̀ wen.

8 Vəpfèm və ngə̀ŋ Nyìngòŋ vi andiʼ viʼi ngwaʼ Levì nshi kəfo kə mùʼ fa ntìntìn əfo əwùm li, vəwenə ə diʼ viʼi a və diʼ lu pfʉkə, ali a Mèlìkisedèk ando Ablaham ə ngə̀tə̀ əfo əshi əwùm ə ku kəmùʼ a wen, ghə̀ chò vəwenə byìʼì ando ghə̀ bo tsi, to ndə̀ŋndəŋ ando və nyoʼo li a Ŋwàʼlə̀ Nyìngòŋ.

9 Vəghəŋ zizi və gàʼ la Levì no nə̀ ngə̀ŋ wen nshi kə ku kəfo kə mùʼ fa ntìntìn əfo əwùm, ando Ablaham ə nku.

10 Kə diʼ to no alə̀ byìʼì ando Mèlìkisedèk sə nyen Ablaham, ko və təmə ə bwi Levì.

11 Nyìngòŋ ə nku Əsoʼ a viʼi Islel a tʉ a viʼi ngwaʼa ngə̀ŋ ndiʼ vəpfèm və ngə̀ŋ Nyìngòŋ. A tə ndiʼ la shyèʼ ə vəwenə ə nkʉʼʉ ə nè la viʼi ndiʼ viʼi kənyʉ̀ kətɨməkə mu Nyìngòŋ nko be ntɨm pfèm ngə̀ŋ Nyìngòŋ ə tsen ghə̀ diʼ to ji yi a Mèlìkisedèk ə ndiʼ andiʼ wu ngwaʼ ngə̀ŋ Alòyn.

12 Kə diʼ nəmwèʼè la və yi nkwitə ntuʼ vəpfèm və ngə̀ŋ Nyìngòŋ fa ngwaʼ ngə̀ŋ tsen, və be a kwitə əsoʼ.

13 Wìʼ yi a vəghəŋ gaʼa kumə wen ə nfʉ fa ngwaʼ ngə̀ŋ ə kədyàŋ ko andiʼ la wìʼ tɨmə fʉ̀ fa tsu a nə̀ pfèm ngə̀ŋ Nyìngòŋ.

14 Vəghəŋ ə kɨ li mwetə to no la Bobo vəghəŋ ə nfʉ fa ngwaʼ ngə̀ŋ ə Judà, ali Mosìs nko gàʼ kum la vəpfèm və ngə̀ŋ Nyìngòŋ lu fʉ̀ fa ngwaʼa ə ngə̀ŋ ə Judà.


Yesò diʼ to nə̀ Mèlìkisedèk

15 kənyʉ̀ na kì ə be ə tuʼ nkəʼ a nkayn byìʼì ando pfèm ngə̀ŋ Nyìngòŋ ə tsen nvi li, diʼ to nə̀ Mèlìkisedèk.

16 Və ko ghʉ̀ wen a pfèm ngə̀ŋ Nyìngòŋ byìʼì təsoʼ tə ngwaʼ ngə̀ŋ ə wen. Ali Və nghʉ̀ pfèm byìʼì ghə̀ nkiʼi kədyòʼ ntsi to ghayn əmùʼ

17 Və nyoʼo kumə wen a Ŋwàʼlə̀ Nyìngòŋ la: “Wù faŋ li to pfèm ngə̀ŋ Nyìngòŋ to məzhʉ̀ ə tsèm, to ji yi a Mèlìkisedèk ndiʼ fa tsù.”

18 Kə le diʼi la Nyìngòŋ ə maʼa li əsoʼ ə mughə byìʼì ando ghə̀ ko kiʼi kədyòʼ a ghə̀ zizi ghə̀ lu gyàmtə̀ wìʼ.

19 Əsoʼ ə Mosìs nko kiʼi tebè kədyòʼ ə nè la wìʼ diʼ wù kənyʉ̀ kətɨməkə ashɨ Nyìngòŋ. Alì luwen, kənyʉ̀ kə kədyàŋ a və kɨ kə kuʼmə chò əsoʼ, a kə diʼi ji la vəghəŋ nkwèntə boʼsə dyʉ̀ a Nyìngòŋ.

20 Kənyʉ̀ kətsen a vəghəŋ be diʼ kɨ diʼ la Nyìngòŋ nkàyntə̀ li la Klistò lu faŋ a pfèm ngə̀ŋ Nyìngòŋ to ghayn ə mùʼ. Ali ghə̀ kò sə ghʉ̀ viʼi vətsenvə a vəpfèm və ngə̀ŋ Nyìngòŋ ə kàyn kənyʉ̀,

21 Ali ando Nyìngòŋ sə ntuʼ Yesò kayntə gàʼ la: “Bobo kaynə li ko ndiʼ la ghə̀ be lu kwitə kənyʉ̀ ki a ghə̀ gàʼa la ‘wù faŋ li a pfèm ngə̀ŋ Nyìngòŋ to məzhʉ̀ ə tsèm.’ Ko ndiʼ la ghə̀ be lu kwitə kənyʉ̀ ki a ghə̀ gàʼa.”

22 Ando Nyìngòŋ ə kàyn li, kə lə diʼi la Yesò diʼ wìʼ a ghə̀ ti ne la kənyʉ̀ məkàyn mì a ghə̀ zhɨ vəghəŋ vəwenə luwen əboŋ chò myimə a mə ndiʼ ambì.

23 Vəpfèm və ngə̀ŋ Nyìngòŋ nghoʼo a tʉʼ məkàyn mə mumə̀ byìʼì ando və nghʉ̀ wìʼ a pfèm ə ngə̀ŋ Nyìngòŋ, ghə̀ nə̀ pfʉ ə əwʉ̀sə shyèʼ wen, wù kədyàŋ ə lyɨ̀ kəshi kəwen na kì.

24 Alì ando Yesò tsi li faŋ to ghayn əmùʼ, ghə̀ diʼ mù ghə̀ be faŋ a pfèm ngə̀ŋ Nyìngòŋ to məzhʉ̀ ə tsèm.

25 A lə kənyʉ̀ ki a Yesò diʼ no zhʉ̀ko mu ghə̀ zizi a ghə̀ bwoŋsə viʼi vyi a və vì a Nyìngòŋ chò fa wen a kəvu byìʼì ando ghə̀ tsi, jɨ̀mə̀ to jɨ̀mə̀, sensə Nyìngòŋ a vəwenə kəshi.

26 A diʼ to Yesò ə pfèm Nyìngòŋ ə ŋanŋtə yì a ghə̀ kwʉ̀ʼ li ə gyàmtə̀ vəghəŋ. Ghə̀ laynə kwʉ̀ʼ, ko ndiʼ la ghə̀ kiʼi kənyʉ̀ a və zizi və gham ə wen tsu, ko ndiʼ la ghə̀ kiʼi mbyɨ, mu Nyìngòŋ ə shisə li wen fa ntìntìn viʼi nyʉ̀ ə byɨvə ə kuʼsə ghʉ̀ wen akàŋ a kəkɨ kə ghoʼo kə.

27 Ghə̀ ko diʼ to nə̀ vəpfèm və ngə̀ŋ Nyìngòŋ sətsen shisə a sə ndiʼ ku kəku kumə mbyɨsə vəwenə to mətsi ə tsèm, mibu sə be ku kumə mbyɨsə viʼi. Ghə̀ diʼ mu ghə̀ nku wenə wen a kəku byìʼì mbyɨsə viʼi to ghaynə əmùʼ kə be mè to ali.

28 Viʼi vi a Əsoʼ ə Mosìs mbyɨmə la və wʉ̀ vəwenə a vəpfèm və ngə̀ŋ Nyìngòŋ sə ngaŋtəsə ndiʼ to viʼi to nə̀ viʼi vətsenvə, ne mbyɨ. Alì fa yi a bàm ando ghə̀ nku li əsoʼ, Nyìngòŋ ntsuʼ li Wàyn wen a ghə̀ nsə diʼ mu ghə̀ ku li mu kàyn ə ghʉ wen a pfèm ə ngə̀ŋ Nyìngòŋ ə ŋaŋtə to ghaynə mùʼ.

© 2017 CABTAL

Lean sinn:



Sanasan