Hibùlù 6 - The New Testament in the Babanki language

¹ Kə lə diʼi la vəghəŋ ə diʼ ko di faŋ to a ziʼi ə mbì yì a və ziʼi vəghəŋ kumə Yesò ə kwen ə dyʉ̀ a ntìntìn əziʼi ə laynə ghə̀. Kə vəghəŋ na faŋ to nyʉ̀ ə mbì nziʼi to la viʼi bwensə tətyɨm tə vəwenə fa nyʉ̀ ə əbyɨvə a və vì nə̀ əpfʉ̀ əbyɨmə a Nyìngòŋ,

² la viʼi diʼ ə shi mu, və diʼ ə ghʉ̀ avu a viʼi a tʉ̀ bwaʼsə vəwenə, la viʼi lu lù fa pfʉ, la Nyìngòŋ ə lù soʼ viʼi a kəmwetə kə mbyi.

³ Nyìngòŋ sətsèn ə tomsə kəvu, vəghəŋ a fʉ̀ fa nyʉ̀ na ghèn ə kwi.

⁴ Wìʼ sətsèn màʼ əbyɨmə wen ə moʼtə Nyìngòŋ mu ghə̀ zì ghə̀ be bwenə vi a Nyìngòŋ a le? Wìʼ sətsen yen əbayn ə Nyìngòŋ ə be yenə jùŋ yì a ghə̀ kù ə kiʼi Kəzhwì kə Ŋwoʼkə,

⁵ be yenə njùŋ a kənyʉ̀ kə Nyìngòŋ nə̀ kədyòʼ kì a kə lu ndiʼ a mbyi ə fi,

⁶ ali be bwensə maʼa əbyɨmə ə wen, wìʼ zizi ko ghə̀ lu be gyàmtə̀ wen la ghə̀ kwitə ətyɨm ə wen byìʼì ando kə sə diʼ to la ghə̀ be ə bàyntə wàyn Nyìngòŋ ə diʼsə kətʉ kə wen ashɨ viʼi to a nfi.

⁷ Ghə̀ŋ kɨli la əsɨm yì a əwʉ̀ nə̀ vì tsu, əfo kwi tsu mu və zizi və gyamtə wìʼ yi a ghə̀ shyèʼ diʼ mu Nyìngòŋ ə bwàʼsə li.

⁸ Alì mu à sətsèn a kwi to kəzòyn a sɨm nə̀ kəfʉkə byɨkə, ko kəfo kə be kù a əsɨm ayi. Nyìngòŋ ə zizi ghə̀ telə və lù be nyùʼ byɨbsə nə̀ zhiʼ.

⁹ Yès ə gàʼà no tèbe alə̀ a doŋ shomsə, kɨ la à diʼ a ghə̀ŋ, nyʉ̀ ə bòŋ chò fa lə byìʼì əbwoŋə yì a ghə̀ŋ kiʼi.

¹⁰ Nyìngòŋ ə nə̀ nè no tèbe ghò to ji tɨmə. Ghə̀ zizi ko ghə̀ lu lyesə kòŋ yì a ghə̀ diʼi a viʼi wen nə̀ shwèʼ yì a ghə̀ŋ nè ə gyamtə vəwenə. A diʼ no tèbe luwen, ghə̀ŋ bo shwèʼè to ali.

¹¹ Yès ə kòŋ la no ghə̀ŋ vətsèm ghʉ̀ kətʉ shyèʼ a ghèn alə̀ ə zàʼa fa kəmwètə ndiʼ ghə̀ŋ nshɨtə kɨ mwetə kəfo kì a ghə̀ŋ ki dyʉ̀sə nə̀ kəwenkə.

¹² Yès ko kòŋ tebè la ghə̀ŋ ə bwaʼa. Yès ə boŋsə kəŋ to la ghə̀ŋ nshəmə viʼi vyi a və byɨmə li a Nyìngòŋ ə sə wensə, diʼ lù kiʼi kəfo kì a Nyìngòŋ ə ghʉ̀ li.

Kənyʉ̀ la a ghʉ̀ Nyìngòŋ kə ko nə̀ fəŋə

¹³ A ndiʼ to ando Nyìngòŋ ə ghʉ̀ kənyʉ̀ a Ablaham, ghə̀ bwensə kàyn to əzhiʼ wen la ghə̀ lu ne kənyʉ̀ a kì byìʼì ando wìʼ ətsen nko be ndiʼ a ghə̀ chò wenə Nyìngòŋ.

¹⁴ Ghə̀ ngàʼa la, “Ma bwaʼsə wù ne, ngwaʼ ngə̀ŋ ə wù lù ə ndiʼ to kədə̀ŋ.”

¹⁵ Ablaham ə nghaʼ li ətyɨm, Nyìngòŋ mù ne kənyʉ̀ a ken kə a ghə̀ nghʉ lə̀.

¹⁶ Wìʼ nə̀ zhʉsə kàyn kənyʉ̀, ghə̀ toŋtə zhiʼ ə wìʼ ghə̀ to chò wen. Ghə̀ kàyn alə̀ no zhʉ̀ko, kəngùmə̀ akwi kənyʉ̀ a yi kə mù mè.

¹⁷ Nyìngòŋ ə kəŋ ə diʼ ə làynsə a viʼi vi a ghə̀ ghʉ̀ kənyʉ̀ a kenkə a vəwenə la ghə̀ baʼtə̀ kənyʉ̀ ko ghə̀ be kwitə ə mu bwensə ə kàyn to əzhiʼ wen ə Nyìngòŋ,

¹⁸ ndiʼ vəghəŋ yen nyʉ̀ na venə la bò a ghə̀ zizi ko ghə̀ lu zhò ndzɨŋ kumə əwenə və lə, a və lɨ̀msə̀ vəghəŋ vi a və nyɨŋ dyʉ̀ lyomtə a ben Nyìngòŋ ə ne vəghəŋ ə ntùʼtə̀, kɨ nəmwèʼè la və lu kiʼi kəfo kì a və ki dyʉ̀sə nə̀ kəwenkə.

¹⁹ Kəfo kì a vəghəŋ ə ki dyʉ̀sə nə̀ kəwenkə nə̀ ne la vəghəŋ ə nti bvɨtə, be tuʼtə, ne la vəghəŋ ə ntinə chò kəbàs kə ndisə kì a kə ghəsə ngə̀ŋ Nyìngòŋ, kwen zàʼa akəshi kə ŋwoʼkə yi a Nyìngòŋ ə diʼ tsu.

²⁰ Yesò kwen li akəshi na ghèn a ambì byìʼì vəghəŋ. Ghə̀ diʼi pfèm ə ngə̀ŋ Nyìngòŋ ə ŋaŋtə to məzhʉ̀ ə tsèm to a ji yi a Mèlìkisedèk ndiʼ fa tsù.