Hibùlù 2 - The New Testament in the Babanki language

Viʼi ə diʼ ə ghaʼ kənyʉ̀ kə Nyìngòŋ no nə̀ kədyòʼ kə

¹ Ənyʉ̀ na venə ə diʼi la vəghəŋ ə diʼ ə be ə tuʼtə̀ ə ghaʼ kənyʉ̀ na kènkə a vəghəŋ zhʉ̀ lə ndi vəghəŋ na faŋ kò və lə ə ndì.

² Vəghəŋ ə kɨ la ntɨm yì a ntsɨŋsə Nyìngòŋ sə ə nvi nə̀ wen ndiʼ nəmwèʼè. Nyìngòŋ ə ku ngəʼ yì a ghə̀ nə̀ kwʉ̀ʼ no tèbè a ndò yi a ghə̀ faŋ ke zhʉtə ntɨm na yì ə ne kənyʉ̀ a ghə̀ gaʼà.

³ Kə lə diʼi la, ando vəghəŋ sə diʼ mù və zhʉ li kənyʉ̀ kumə əbwoŋə ə kaynə ghə̀ yì a Nyìngòŋ ə ku lə, vəghəŋ sətsen faŋ ke zhʉtə, ko vəghəŋ lu ə nyɨŋ ngəʼ yì a Nyìngòŋ ə diʼ lù ku. Ntɨm a ghèn diʼ mu à nshə̀ʼtə̀ to no Bobo a ambì, viʼi vyi a və nzhʉ ə ndiʼ li làynsə a yès la ghə̀ diʼ to no nəmwèʼè.

⁴ Nyìngòŋ ə nè li tamə nchwisə nyʉ̀ ə kaynəvə, to a tənkì a tənkì, ə be ku kəku a viʼi ando ghə̀ kòŋ chò fa kəzhwì kə Ŋwoʼkə ə diʼ la ntɨm a ghèn ne diʼ to no nəmwèʼè.

Yesò ndiʼi ji yi a zizi vəghəŋ bwòŋ fa tsù

⁵ Nyìngòŋ ə ko ə ghʉ̀ la à lu ə nsoʼo ntsɨŋsə wen soʼo mbyi ə fi yì a ghə̀ diʼ lu vì, à yi yì a yès ə gaʼa kumə wen.

⁶ Və boŋsə nyoʼ akəshi kə tsenkə a Ŋwàʼlə̀ Nyìngòŋ la: “Wìʼ lə diʼ no ghò a Nyìngòŋ diʼ kwoʼtə byìʼì wen a? A diʼ kənyʉ̀ kə kaynəkə ə yen la wù kwòʼtə Wùmə̀nsòŋ.

⁷ Wu ə shɨtə wen ə ghʉ̀ wen a fəshinə fə zhʉ̀ alə, wìʼ sə ngaŋtə ko ghə̀ kwʉʼʉ no to nə̀ ntsɨŋ shəsə, fa yi bàm wù ne la ghə̀ kiʼ əbayn ə ghoʼo ghə̀ ə be ne la və nə̀ gumlə wen to nə̀ fòyn.

⁸ Wù nè li ghə̀ sə soʼo to əfo ə tsèm.” Ə gàʼ la Nyìngòŋ ə nè li la wìʼ ə soʼo to əfo ə tsèm ndiʼi la ghə̀ ko əwʉsə kəfo kə tsenkə ali, luwen vəghəŋ ko yenə la wìʼ sə soʼo to əfo ə tsèm.

⁹ Alì vəghəŋ ə yenə Yesò yì a Nyìngòŋ ə nè to fəshyinə alə̀, ghə̀ kaʼkə a wìʼ ko ghə̀ be ə ngaŋtə kwʉʼʉ tèbe a ətsɨŋsə wen. Ghə̀ nè ali ndi ghə̀ diʼ ətyɨm ə jùŋə ghə̀ a viʼi, ə nè ghə̀ pfʉ ə bwoŋsə̀ vəwenə və tsèm. A ndiʼ byìʼì ngəʼ yì a ghə̀ nyenə nə̀ əpfʉ̀ ə wenə na ghenə a ghə̀ ne la Nyìngòŋ ə ku əbayn ə ghoʼo ghə̀ a wen be ne la no tèbe ghò ə ngumlə̀ wen.

¹⁰ A nshɨtə Nyìngòŋ ə shɨtə no əfo ə tsèm, à sə ghaʼa to wen ghaʼa əfo na vènə luwen. Kə ndiʼ to no kə nyʉ̀ kə tɨmə kə la ghə̀ moʼtə Yesò yenə ngəʼ ə kwʉʼʉ to nə̀ wi, a yi wù mbì ndi ghə̀ nè viʼi bwòŋ ə kwen vi a ntìntìn əbaynə ghoʼo ghə̀ Nyìngòŋ, to kədə̀ŋ.

¹¹ Yesò, a ghə̀ ne la viʼi ndiʼ nə̀ laynə ashɨ Nyìngòŋ wenə viʼi na venə ə tsèntə ndiʼ to vunə Nyìngòŋ. A le kənyʉ̀ ki a Yesò toŋtə vəwenə la vəlemə, ko kətʉ̀ kə wen kə lu ndiʼi.

¹² Və nyoʼ la ghə̀ ə ngàʼa a Nyìngòŋ ə la: “Ma kəŋ ə shə̀ʼtə̀ kənyʉ̀ a viʼi vwomə a wù ne li, viʼi vyə ə na zhʉ̀ŋtə, mà tɨmə a və wenə a ntìntìn ə kùʼsə wù.”

¹³ Ghə̀ be ə gàʼa tamə la, “Mà na zhəʼtə to wen Nyìngòŋ,” ə be gàʼ la, “A diʼ mò lə, yo vunə vyi a Nyìngòŋ ə kù a mò.”

¹⁴ Vunə a venə a ghə̀ ngaʼa ə ndiʼ to no viʼi a və kiʼi njòsə wen. A le kənyʉ̀ ki a kə nè, Yesò ə bwensə ə sə diʼ wìʼ to nə̀ vəwenə ndi ghə̀ pfʉ ə byɨbsə wèn yi a ghə̀ ne la viʼi mpfʉ, à ji Deblə̀.

¹⁵ Ghə̀ pfʉ alə ndi kə viʼi be a fwàynə̀ tebè pfʉ byìʼì ando viʼi ŋwʉ̀ʼ məzhʉ̀ ə tsèm, diʼ to nə̀ ə kòsə, fwàynə̀ to əpfʉ.

¹⁶ Kə kə̀ʼə̀ to no a ndayn la ghə̀ ko vi ə gyamtə ntsɨŋsə Nyìngòŋ. Ghə̀ boŋsə vi ə gyamtə viʼi ngwaʼ ngə̀ŋ ə Ablaham.

¹⁷ A lə kənyʉ̀ ki a kə ne ghə̀ kaʼkə sə diʼ to wìʼ to nə̀ vəghəŋ vəlemə və wen, ndi ghə̀ shɨtə kɨ ə shyèʼ to nə̀ pfèm ngə̀ŋ Nyìngòŋ ə ŋaŋtə be kusə shinsə a viʼi, shyèʼ a Nyìngòŋ ə nè la ghə̀ lyesə ku mbyɨsə viʼi.

¹⁸ Luwen diʼ mu ghə̀ zizi ghə̀ gyamtə viʼi vyi a mwòmsə ə vi a vəwenə byìʼì ando mwòmsə mbe nvi a wen, ghə̀ yenə ngəʼ.