Hibùlù 13 - The New Testament in the Babanki language

Ntsìnə̀ yì a Nyìngòŋ ə kòŋ

¹ Ghə̀ŋ nkòŋmə̀ tə wen ə təŋtə to kòŋmə a nə̀ vəlemə.

² Kə ghə̀ŋ ne lyesə ə nshɨtə shisə viʼi ghayn a ghə̀ŋ a loʼ byìʼì ando viʼi vətsevə nshɨtə li ə shisə viʼi ali, ko vəwenə kɨ la vəwenə shisə a diʼ ətsɨŋsə ngə̀ŋ Nyìngòŋ.

³ Ghə̀ŋ nkwoʼtə viʼi vyi a və diʼi a ngə̀ŋ nfɨŋ, sə vye vəwenə diʼ amuʼ tsu. Ghə̀ŋ be nkwoʼtə viʼi vyi a və yenə ngəʼ, to sə vye vəwenə yenə ngəʼ a yi amuʼ.

⁴ Ghə̀ŋ ə̀ nshɨtə ghaʼa kənyʉ̀ ki a Nyìngòŋ ə gàʼa kumə làm. Kə wìʼ ə lu əwʉ̀sə lɨmə wen kò wùwì wen ə dyʉ̀ ntsì wenə wù kədyàŋ. Ghə̀ŋ kɨli la Nyìngòŋ ə lu soʼ no ndò yi a ghə̀ tsi a ji na ghèn ə soʼo no tèbe ndò ə tsen yi a ghə̀ tsi ntsìnə̀ kənfwàʼlə̀ wenə və ki ko lʉmə.

⁵ Kə ghə̀ŋ ne mbaŋbaŋ a bàm ə ko. Ghə̀ŋ nboŋsə saŋlə to saŋlə no tèbè nə̀ ghoʼ yi a ghə̀ŋ kiʼi byìʼì ando Nyìngòŋ ə gàʼa li la, “Mà ko lu moʼtə ghə̀ŋ no faphen.”

⁶ Alə̀ kənyʉ̀ a vəghəŋ zizi vəghəŋ gàʼ ko vəghəŋ lu fwàynə̀ la: “Bobo diʼi ngyàmtə̀ ghom, mà zizi ko ma fàyn kənyʉ̀. Wùmə̀nsòŋ zizi ko ghə̀ lu nè kənyʉ̀ kətsen kə a mò.”

⁷ Ghə̀ŋ ə̀ nkwoʼtə tʉtʉ ə vəŋə, a və wenə tə nshə̀ʼtə̀ kənyʉ̀ kə Nyìngòŋ a ghə̀ŋ fa ambì. Ghə̀ŋ ə̀ nkwoʼtə ntsìnə̀ vəwenə nə̀ ji shisə a vəwenə mpfʉ̀ kə fa tsu. Ghə̀ŋ shəmə ntsìnə̀ əbyɨmə vəwenə a ghèn.

⁸ Yesò Klistò diʼ layn, to ndə̀ŋndəŋ ando ghə̀ nə̀ ndiʼ fa ambì, diʼ lu ndiʼ to ali zaʼa fa no fa ze.

⁹ Kə ghə̀ŋ a moʼtə və lobtə ghə̀ŋ no tèbe nə nki əziʼi ə kò. Kə bòŋ la a ne ətyɨm ə jùŋə Nyìngòŋ ə nè tətyɨm ə təŋtə tə totə, kə a ndiʼ byìʼì təsoʼ tyitə a ghə̀ŋ ghʉ̀ kumə nyʉ̀ ə fozhɨvə. Təsoʼ na tentə ko gyàmtə̀ tebè viʼi vi və ghʉ̀ təwen tə no fa mphen.

¹⁰ Vəghəŋ nə̀ kiʼi kəbaŋ kəku, vəpfèm vyi a shyèʼ a fəngə̀ŋ fə Nyìngòŋ, ghʉ̀ təsoʼ tə viʼi Jus, nko nkiʼi kədyòʼ ə zhɨ̀ fozhɨvə vyi a və nku tsu.

¹¹ Ghə̀ŋ kɨli pfèm ngə̀ŋ Nyìngòŋ ə ŋaŋtə nlyɨ mənlyuŋ mə nyamsə kwenə nə̀ məwenə akəshi yi a kə Laynə kwʉ̀ʼ ə ku la Nyìngòŋ ə lyèsə ku mbyɨsə viʼi, və lyɨ̀ nyam ayi ə fʉ̀ ntə̀ʼ yi a ghə̀ tsi tsu ə mibu nyʉʼ.

¹² Kə le diʼ to ndə̀ŋndəŋ ando və nlyɨ̀ ə fʉ̀ nə̀ wen fa ntə̀ʼ, ghə̀ yenə ngəʼ ə pfʉ ə shʉ̀ mbyɨsə viʼi nə̀ mənlyuŋ mə wen.

¹³ Kə le diʼi la vəghəŋ diʼ fʉ̀ fa ntə̀ʼ ando ghə̀ fʉ, ə be kiʼi ndə̀ŋndəŋ kətʉ kədiʼikə ando ghə̀ nki.

¹⁴ Vəghəŋ nkɨ la ntə̀ʼ ə tsen ko diʼ a mbyi ashə a vəghəŋ lu tsì fàŋ tsu. Vəghəŋ bo ki dyʉ̀sə nə̀ ntə̀ʼ yi a diʼ ghə̀ vəghəŋ a vəghəŋ ə bo lu kwen tsu ghə̀ bo diʼ ə na vì vi.

¹⁵ Vəghəŋ nku li kəku, kə kə kuʼsə a Nyìngòŋ to məzhʉ̀ ə tsèm chò fa Yesò, gàʼà fa vəghəŋ a chʉ la Nyìngòŋ diʼ Nyìngòŋ vəghəŋ.

¹⁶ Kə wìʼ na faŋ ke nè njùŋ a lèmə̀ wen, gətə kəfo kì a ghə̀ kiʼi ə ku wù ə tsen. Ənyʉ̀ a venə diʼ a Nyìngòŋ to nə̀ kəku, kə nè la ghə̀ nsaŋlə.

¹⁷ Ghə̀ŋ nzhʉ to fa viʼi vyi a və tisə ghə̀ŋ, kə ghə̀ŋ nə̀ to kətʉ a vəwenə. Vəwenə tuʼmə nə̀ ghə̀ŋ, diʼ lù taŋ əchʉ̀ vəwenə a Nyìngòŋ kumə shwèʼè a ghenə. Ghə̀ŋ sətsen ə̀ nzhʉ to fa vəwenə, kə a gyàmtə̀ vəwenə nè shwèʼè nə̀ saŋlə, kə be a boŋ ə gyàmtə̀ ghə̀ŋ.

¹⁸ Ghə̀ŋ ne jɨ̀mə̀ to jɨ̀mə̀ a yès. Yès ə kɨ la tətyɨm tyestə ə laynə, yès kəŋ ə ne to kənyʉ̀ kəjuŋkə to mənzhʉ̀ ntsèm.

¹⁹ Ma sensə to no sensə la ghə̀ŋ njɨ̀mə̀ a mò ndiʼ Nyìngòŋ ə nè a mà bwènsə̀ zàŋsə vi yèn ghə̀ŋ.

Əjɨ̀mə̀ kə mwetə

^20-21 Ma jɨ̀mə̀ la Nyìngòŋ ghə̀ŋ a ghə̀ kù mbwaʼmə a viʼi, ku no tèbè gho ə jùŋ a ghə̀ŋ ndiʼ ghə̀ŋ kɨ ə nè no tèbe ghò na yi a ghə̀ kəŋ. A diʼi wen a ghə̀ ə̀ nlùsə Bobo vəghəŋ Yesò fa pfʉ, Yesò ghèn diʼ ntsɨŋ byisə ə ghoʼo luwen byìʼì məkàyn mì a mə fàŋ li to ghaynə əmùʼ. Ghə̀ nchiʼ məkàyn na mèyn nə̀ mənlyuŋ mə wen. Ma jɨ̀mə̀ la Nyìngòŋ ə nè kənyʉ̀ ki a kə kwʉ̀ʼ a wen a ghə̀ŋ wèn chò fa a Yesò Klistò. Əkuʼsə ndyʉ̀ a wen to məzhʉ̀ ntsèm. Amèyn.

Ə mwetə

²² Vəlemə ə vwomə ma sensə la ghə̀ŋ shɨtə ghaʼ nyʉ̀ venə a mà gàʼa lə̀. Ma ko nyoʼ nyʉ̀ ə ghoʼo və.

²³ Ghə̀ŋ nkɨ la və shisə li lèmə̀ vəghəŋ Timotì fa nfɨŋ. Ghə̀ sətsen zàŋsə vì, yo wen a vi yen ghə̀ŋ a əmuʼ.

²⁴ Ghə̀ŋ toŋtə tʉtʉ vəŋə nə̀ viʼi Nyìngòŋ no vətsèm. Viʼi və byɨməvə vyi a və tsi alòʼ ə Italì ətɨmə ətoŋtə a ghə̀ŋ.

²⁵ Nyìngòŋ ndiʼi ətyɨm ə jùŋə ghə̀ a ghə̀ŋ no vətsèm.