Hibùlù 12 - The New Testament in the Babanki language

Nyìngòŋ diʼ Tìʼ vəghəŋ

¹ Ando vəghəŋ sə diʼ mù və yen li ənòyn ə nchwò nsòʼ kumə əbyɨmə mu və kaʼ li mbum vəghəŋ to kədə̀ŋ lə, vəghəŋ maʼa li no tèbe kəbyèʼè kə kò ki a kə taʼsə vəghəŋ be maʼa no mbyɨ ə kò yi a ghə̀ kwiʼi vəghəŋ ə wensə nyɨŋə kənyɨŋ ki a Nyìngòŋ ə ghʉ̀ la vəghəŋ nyɨŋə.

² Vəghəŋ tom a shɨ ə vəghəŋ to wen Yesò. A diʼi wen a ghə̀ bʉ̀ʼ ji əbyɨmə ə vəghəŋ, a be diʼ to wen a ghə̀ tisə əbyɨmə na yi dyʉ̀ zàʼa a kəmwètə. Ghə̀ mbyɨmə li ə pfʉ a kəntò kò kətʉ kə wen ndiʼi byìʼì nki pfʉ na ghèn byìʼì ando ghə̀ nkɨ li la à na diʼ fa yi bàm, a ghə̀ nsaŋlə̀. Ghə̀ diʼ luwen, nyʉ̀ʼ a kwoŋ ə toghə a benə kəkɨ kə təfòyn yi a Nyìngòŋ ə nyʉ̀ʼ tsu.

³ Ghə̀ŋ nkwoʼtə ji yì a Yesò nyenə ngəʼ fa tsù avù ə viʼi nyʉ̀ ə byɨvə ali ə sə wensə to wensə. Ghə̀ŋ nkwoʼtə ndiʼ kə kənyʉ̀ kə be a gubtə̀ ghə̀ŋ la ghə̀ŋ bwaʼ.

⁴ Kə diʼ nəmwèʼè la ghə̀ŋ soynə mbyɨ fa ghə̀ŋ a ntsìnə̀sə ali wìʼ ə ko tɨmə ə pfʉ fa ghə̀ŋ a ntìntìn byìʼì ngəʼ na ghèn.

⁵ Kə ghə̀ŋ lyesə gaʼa yì a Nyìngòŋ ə ngàʼa ə lɨ̀msə̀ ghə̀ŋ. Ghə̀ toŋtə ghə̀ŋ la vunə wen ə gàʼ la: “Wàyn ghom, Bobo sə ku ngəʼ a wù, tisə wù tisə, wù ntuʼtə̀ zhʉ̀tə. Ghə̀ zhʉsə nghòmə wù to nə̀ Tiʼi wù, kə wù bwaʼ.

⁶ Wu kɨ la Bobo nə̀ kòŋ wìʼ, ghə̀ sə tisə wen, lyɨ̀ no ndò a wen a nə̀ wàyn, ghə̀ sə ziʼi wen nə̀ ngwàyn.”

⁷ Ghə̀ŋ ə̀ wensə to wensə a ngəʼ yì a ghə̀ŋ nyenə byìʼì ando ghə̀ gyàmtə̀ ghə̀ŋ la ghə̀ŋ ziʼi ə nyʉ̀. Ghə̀ŋ kɨli la Nyìngòŋ ə diʼ Bobo a ghə̀ŋ, no tèbe Tiʼi wàyn kò ə diʼ ə ziʼi wàyn nə̀ ngwàyn.

⁸ Ghə̀ŋ sətsen ə faŋ ke yenə ngəʼ a ji na ghèn a vunə Nyìngòŋ no və tsèm sə diʼ mù və yen li fa tsù, a kə ne diʼi la ghə̀ŋ ko diʼ nkàyntə̀sə vunə a wen.

⁹ Nò tèbe fa mpfen, no tèbe vətiʼi və vəghəŋ vyi a vəghəŋ kwi nse ashə nə̀ ghòmə vəghəŋ ali vəghəŋ zhʉ to zhʉ fa vəwenə. Kə le diʼi la vəghəŋ diʼ ə nzhʉ Tiʼi vəghəŋ akàŋ chò no fa li. Vəghəŋ sətsen ə nè ali, a vəghəŋ lù kiʼi ntsìnə̀ yì a ghə̀ ko lu mè.

¹⁰ Və tiʼi və vəghəŋ a nse nə̀ ghòmə vəghəŋ to fəshinə fə zhʉ̀ alə, to fa ji yi a ətof ə vəwenə kwoʼtə, ali a Tiʼi vəghəŋ akàŋ, ghə̀ ghòmə vəghəŋ a ji ə gyamtə vəghəŋ gyamtə ndiʼ vəghəŋ ə nlaynə a nə̀ wen.

¹¹ A zhʉ və tisə wìʼ nə̀ ngwàyn, ghə̀ sə zhʉ kəzaf, ko ghə̀ lə saŋlə, və tisə sə mwetə, ghə̀ ziʼi kənyʉ̀, kə nè la ghə̀ tsi ntsìnə̀ kənyʉ̀ kətɨməkə, be kiʼ ətyɨm ə zhʉ̀tə ghə̀.

Vəghəŋ ə nzhʉtə fa Nyìngòŋ

¹² Ando ghə̀ŋ ə kɨli lə, kə bòŋ la ghə̀ŋ bwensə tosə tətyɨm ə nki dyʉ̀sə to nə̀ mbì. Kə wìʼ na zhwesə akwoŋ.

¹³ Ghə̀ŋ njèʼè to a ji ə naynə ndiʼ viʼi vyi a ghə̀ŋ a ntìntìn a və laʼ laʼ na mwetə kwaʼkə ə fəŋkə, kwaʼkə ali ndiʼ vəwenə ə boŋsə ə tò to a vəwenə a byɨmə.

¹⁴ Ghə̀ŋ mwomsə no nə̀ kədyòʼ kə ə ntsi nə̀ mbwaʼmə to vye viʼi vətsèm be mwomsə no nə̀ kədyòʼ kə ntsi ntsìnə̀ əlaynə a shɨ Nyìngòŋ byìʼì ando wìʼ sətsen ə faŋ ke nlaynə a wen a ntsìnə̀, ko ghə̀ lu ə yen Nyìngòŋ.

¹⁵ Ghə̀ŋ tuʼmə, kə wìʼ na faŋ ke yen ətyɨm ə jùŋə ghə̀ yi a Nyìngòŋ ə diʼi a wen. Ghə̀ŋ be tuʼmə, kə wìʼ ə demə fʉ̀ a ghə̀ŋ a ntìntìn, kiʼ ətyɨm ə byɨghə ə byɨbsə təkwòʼtə̀ tə viʼi.

¹⁶ Ghə̀ŋ ntuʼmə, kə wìʼ na fʉ̀ fa ghə̀ŋ a ntìntìn a ghə̀ to tò kənyʉ̀ kə ki kò kənyʉ̀ kə lʉ̀mə, ko ghə̀ ghʉ̀ tebè kətʉ a nyʉ̀ Nyìngòŋ, boŋsə ghʉ kətʉ a əfo nse to nə̀ Esò a ghə̀ baʼlə li əto ə wen a lèmə̀ wen ə tyetə a kəfo kə zhɨkə, a kə nkwʉʼ to ə zhɨ̀ ghaynə mùʼ.

¹⁷ A ghə̀ŋ kɨli la à ndiʼ fa yi abàm ando ghə̀ ku to ə wen na yì a lèmə̀ wen ə tyetə, ghə̀ bwensə sə kəŋ no nə̀ məshɨ a wen a shɨ la tiʼi wen bwàʼsə wen ali ghə̀ tyen byìʼì ando ji nko be diʼ la ghə̀ bwensə tensə kənyʉ̀ ki a ghə̀ nsə diʼ mu ghə̀ nè li.

¹⁸ Ghə̀ŋ diʼ alə̀ ko andiʼ la ghə̀ŋ fʉ̀ tɨmə ashɨ Nyìngòŋ ando vunə Islel ə ntɨmə. Vəwenə ə̀ fʉ̀ li tɨmə ə sə ki dyʉ̀sə, yen phèn Sinày, ghə̀ diʼ mù və zizi və kum, zhiʼi ə bole kuʼu ayi kətʉ̀. Vəwenə nyen li shi, və fenə to la lèm, təfwof tə totə ə be chò,

¹⁹ ə zhʉ̀ ando və toŋ ə soŋ ə be zhʉ̀ ghɨ Nyìngòŋ ando ghə̀ ngaʼa. Ənyʉ̀ na venə nfʉ̀ alə, vəwenə sə fwàynə̀, sensə la kə Nyìngòŋ be a gàʼ kənyʉ̀ a vəwenə.

²⁰ Vəwenə nfaynə byìʼì ando gɨ̀ ayi ngàʼa kənyʉ̀, kə to ghoʼo vəwenə ə nè. Ghə̀ ngàʼa la, “kə wìʼ be na kum phèn ghèn. Sətsèn a kum no tèbe nyam, ghə̀ŋ tèmlə zhwi nə̀ nguʼsə.”

²¹ Kənyʉ̀ ki a vəwenə nyenə ə mfàynsə̀ no nànto, no tebe Mosìs gàʼ la, “Ma tsɨŋtə̀ fwàynə̀.”

²² Ghə̀ŋ kɨ li la ghə̀ŋ boŋsə li ə nvi ntɨmə a ben phèn ə Zayòn, a ntə̀ʼ Nyìngòŋ yi a ghə̀ tsi. Ntə̀ʼ na ghèn ndiʼ ntə̀ʼ Jelusalèm yì a ghə̀ diʼ akàŋ, ətsɨŋsə Nyìngòŋ sə diʼ tsu, və taŋ le.

²³ Ghə̀ŋ boŋ li vi akəshikə kəzhɨ ə tsèntə vye vəlemə və tovə vətsenvə ashɨ Nyìngòŋ. A diʼi ntsentə viʼi və byɨməvə a Nyìngòŋ ə nyoʼ li təzhiʼ tə vəwenə a ŋwàʼlə̀ akàŋ. Ghə̀ŋ vi li ashɨ Nyìngòŋ yi a ghə̀ soʼo viʼi vətsèm. Ghə̀ŋ vi li ashɨ ə viʼi və juŋəvə vi a Nyìngòŋ ə nè li la vəwenə nlaynə kwʉ̀ʼ.

²⁴ Ghə̀ŋ vi li a Yesò. A diʼi wen a ghə̀ lyɨ̀ vi nə̀ viʼi a Nyìngòŋ, ə bàyntə məkàyn mə mfimə̀ wenə vəwenə. Ghə̀ŋ kwen li a mənlyuŋ ə̀ Yesò yi a ghə̀ mesə laynsə ghə̀ŋ tsu. Mənlyuŋ na mèyn ndiʼi kənyʉ̀, kə kuʼmə chò ki a mənlyuŋ mə Abèl diʼ.

²⁵ Ghə̀ŋ tuʼmə li kə wìʼ fa ghə̀ŋ a tyen la ghə̀ ko diʼ nzhʉ fa Yesò. Vunə Islel ə tyen li ə zhʉ fa wìʼ yi a ghə̀ nshə̀ʼtə̀ əsoʼ ə Nyìngòŋ a vəwenə a nse ə kwen a ngəʼ. Kə lə diʼi la vəghəŋ sətsen tyen ə zhʉtə gɨ Yesò mu ghə̀ lu fa kàŋ, ko vəghəŋ lu faŋ ke kwen a ngəʼ.

²⁶ Ghə̀ ngaʼa a tʉʼ a yi, gɨ̀ wen ə nə̀ʼə̀ mbyi, ghə̀ sə ə diʼ luwen mu ghə̀ kwitə li la ghə̀ be na nə̀ʼə̀ kaŋ nə̀ nse.

²⁷ Ə gàʼ la ghə̀ be na nə̀ʼə̀ kuʼsə no tèbe nə ghò a ghə̀ shɨtə və fəŋ kə kù ji a əfo vi a və zizi ko və lu nə̀ʼkə̀.

²⁸ Vəghəŋ nku li kəzòŋ a Nyìngòŋ ando ghə̀ kù li lòʼ a vəghəŋ a ghə̀ ko zizi lu nə̀ʼkə̀. Vəghəŋ ə̀ nkuʼsə Nyìngòŋ a ji yi a ghə̀ kəŋ fa tsù, gumlə Nyìngòŋ no nànto.

²⁹ Kə diʼ to no nəmwèʼè la Nyìngòŋ ə vəghəŋ diʼ to nə̀ zhiʼ a ghə̀ nyʉ̀ʼ ə byɨbsə.