Hibùlù 11 - The New Testament in the Babanki language

Ə nkiʼ əbyɨmə

¹ Ə kiʼ əbyɨmə a Nyìngòŋ diʼ ə nkɨ nəmwèʼè la wù lu kiʼi kəfo kì a wù ki kəʼtə kəwenkə, kɨ la wu ne kiʼi no tèbe ando wù ko tɨmə ə yen kəfo a kì nə̀ əshɨ.

² Viʼi tʉʼ ə mughə əbyɨmə Nyìngòŋ to a ji a ghèn, Nyìngòŋ bwomsə və wenə.

³ A nè əbyɨmə la vəghəŋ nkɨ nəmwèʼè la Nyìngòŋ ə nshɨtə mbyi to nə̀ ghɨ chʉ̀. Kə lə diʼi la no tèbe ghò a vəghəŋ ə yenə diʼ ko və nshɨtə nə̀ kəfokə a və yenə.

⁴ Abèl ə nku kəku a Nyìngòŋ, kə kuʼmə chò kə ə Kèn kə byìʼì ando ghə̀ ə nkiʼi əbyɨmə. Nyìngòŋ ə nlyɨ̀ li wen a wù kənyʉ̀ kətɨməkə byìʼì əbyɨmə ə wen. Nyìngòŋ ə ndiʼi li a Abèl la ghə̀ saŋlə byìʼì ando ghə̀ shisə li kəku kə wen. Luwen diʼ mu Abèl ə mpfʉ̀ li ali kənyʉ̀ ki a ghə̀ nè ə li bo gàʼà a vəghəŋ.

⁵ Inòk ə mbyɨmə a Nyìngòŋ, kənyʉ̀ a kì ə nè, Nyìngòŋ ə lyɨ̀ wen la ghə̀ kuʼ akàŋ, ko ndiʼ la ghə̀ pfʉ li. Wìʼ ə nko ə be yen la ghə̀ dyʉ̀ fè lo byìʼì ando Nyìngòŋ ə nsə diʼ mu ghə̀ lyɨ̀ li wen. Ŋwàʼlə̀ Nyìngòŋ gàʼ la Nyìngòŋ ə nsə lyɨ̀ Inòk mu Inòk ə nè li ghə̀ sə saŋlə.

⁶ Wìʼ faŋ ke nkiʼi əbyɨmə ko ghə̀ a ne kənyʉ̀ kə ne Nyìngòŋ saŋlə. No ndò a ghə̀ kəŋ ə nkuʼsə Nyìngòŋ, diʼ ə byɨmə la ghə̀ diʼ, bwaʼsə viʼi vyi a və kəŋ kɨ Nyìngòŋ.

⁷ Nuwà ə mbyɨmə a Nyìngòŋ ə zhʉ kətyiftə kì a ghə̀ kù kumə nyʉ̀, və mbo ndiʼ ə lu fʉ. Ghə̀ zhʉ li Nyìngòŋ ə bayntə kəbaŋ la kə bwoŋsə wen wenə ngwaʼ ə ngə̀ŋ ə wen. Ghə̀ mbyɨmə li a Nyìngòŋ, ə diʼ làynsə la viʼi mbyi vətsenvə ə̀ diʼ viʼi və byɨvə ali ghə̀ fʉ̀ a wù kənyʉ̀ kətɨməkə.

⁸ Ablaham ə mbyɨmə a Nyìngòŋ ando ghə̀ dzàŋ wen, ghə̀ lu dyʉ̀ alòʼ yi a ghə̀ ne ku a wen. Ghə̀ ə ndyʉ̀ ali ko ghə̀ ntɨmə kɨ lòʼ a yi.

⁹ A nè əbyɨmə la ghə̀ dyʉ̀ tsi a nə̀ wù kətɨm a lòʼ a ghèn a Nyìngòŋ ə ghʉ̀ ə ku a wen. Ghə̀ ntsi a təto ndə̀ŋndəŋ ando Izìk nə̀ Jàkob a Nyìngòŋ kəghʉ kənyʉ̀ kə wen kenkə a vəwenə.

¹⁰ Ablaham ə̀ nki dyʉ̀sə nə̀ ntə̀ʼ yi a Nyìngòŋ ə nlyɨ̀ əzhʉ̀ ə bwòm ə kuʼsə, ghə̀ diʼ mù ghə̀ zizi ko ghə̀ lu fəŋ.

¹¹ A ndiʼ byìʼì əbyɨmə a Sèla nkiʼi wàyn no tebe ando ghə̀ nsə diʼ mu ghə̀ dwinə li be ə kiʼi wàyn. Ghə̀ choʼsə li Nyìngòŋ kɨ la Nyìngòŋ ə̀ ghʉ tèbe la ghò, ghə̀ nè to li.

¹² A le kənyʉ̀ kì a kə nè, Ablaham kiʼi vunə, və ghoʼo chò mədzɨ̀ŋ mì a mə diʼi akàŋ, be ghoʼo chò kəsese kì a kə diʼi a fwàyn a wìʼ ko zizi ghə̀ taŋ no tèbe ando ghə̀ ndiʼ mu ghə̀ dwinə li ə sə laynsə diʼ sə ghə̀ pfʉ li.

¹³ Viʼi na venə no vətsèm nki li əbyɨmə a Nyìngòŋ ə lu kaʼ əpfʉ to nə̀ wenə ghə̀. Vəwenə ə nsə pfʉ ko a vəwenə kiʼi li kənyʉ̀ kì a Nyìngòŋ nghʉ̀ ali, vəwenə sə saŋlə to saŋlə, ki dyʉ̀sə nə̀ kənyʉ̀ ki a Nyìngòŋ ə ndiʼ lù nè. Vəwenə ngaʼa li to no nə̀ əchʉ vəwenə la vəwenə diʼ a nse ashə to nə̀ viʼi ghayn.

¹⁴ Viʼi a və nə̀ ngàʼà a ji na ghèn, ə diʼi a ndayn la vəwenə ə̀ kəŋ to no əloʼ ə ngə̀ŋ ə vəwenə ntsi tsu.

¹⁵ A ntu ndiʼ la vəwenə ngàʼa alə̀ kwoʼtə əloʼ yì a vəwenə nfʉ fa tsù mu vəwenə nkɨ ji ə bwenə ə dyʉ̀ tsu.

¹⁶ Vəwenə boŋsə kəŋ əloʼ a ghə̀ boŋ chò ə loʼ a yi, à diʼ lòʼ əkaŋ. Vəwenə toŋtə Nyìngòŋ la Nyìngòŋ ə vəwenə, ko Nyìngòŋ ə be diʼsə̀ kətʉ. Vəghəŋ ə kɨ alə̀ byìʼì ando ghə̀ sə diʼ mù ghə̀ shɨtə li ntə̀ʼ a vəwenə akàŋ.

^17-18 Ablaham əbyɨmə li Nyìngòŋ ə sə kəŋ ə ku wàyn ə wen ə mùʼ yi a ghə̀ ə nkiʼi a kəku a Nyìngòŋ ando Nyìngòŋ ə mwomsə wen, no tèbe ando ghə̀ ghʉ̀ a wen la ngwaʼ ə ngə̀ŋ ə wen lu fʉ̀ fa Izìk ə wàyn wen a ghèn.

¹⁹ Ablaham ə nyen li la Nyìngòŋ ə nkiʼi kədyòʼ ə lùsə viʼi fa pfʉ. Kə diʼ to no nəmwèʼè byìʼì ando kə ə nkə̀ʼə̀ to sə və bwensə lùsə Izìk fa pfʉ ə bwensə kù a tiʼi wen.

²⁰ Izìk ə mbyɨmə a Nyìngòŋ. A le kənyʉ̀ kì a ghə̀ ə mbwaʼsə Jàkob wenə Esò ə shə̀ʼtə nyʉ̀ vyi a və ndiʼ lù fʉ̀ a vəwenə.

²¹ Jàkob ə mbyɨmə a Nyìngòŋ ə sə pfʉ ə dyʉ̀ mu ghə̀ tomsə li wèn ə wen nə̀ mbàŋ ə kuʼsə Nyìngòŋ ə bwàʼsə vunə Josèf.

²² Josèf mbe kiʼi əbyɨmə a Nyìngòŋ ə sə pfʉ̀ ə gàʼ a viʼi Islel kumə ando vəwenə diʼ ə fʉ̀ fa lòʼ ə Ijìb. Ghə̀ ngaʼa li la vəwenə lù sə mpfwo, vəwenə lyɨ̀ ə kwoŋ ə wen.

²³ Tìʼ Mosìs wenə lì wen ə mbyɨmə li a Nyìngòŋ ə bwi wen ə lyomtə a və sàŋ və tàʼ. Vəwenə yen li la wàyn ayi mbòŋ ko vəwenə fwàynə̀ li ə kwaʼ əsoʼ ə fòyn yì a ghə̀ ə ngaʼa la wù Islel bwi wàyn wulɨm, və zhwì.

²⁴ Mosìs ə mbyɨmə li a Nyìngòŋ. A lə kənyʉ̀ ki a ghə̀ nkwi kuʼ ə tensə la kə və ne ntoŋtə yì la wàyn fòyn.

²⁵ Ghə̀ ə mboŋsə kòŋ ə yenə ngəʼ wenə viʼi Nyìngòŋ vətsenvə, chò ando ghə̀ ndiʼ nzhɨ̀ njùŋ wenə viʼi nyʉ̀ ə byɨvə, ko njùŋ a yi diʼ faŋ.

²⁶ Mosìs ə nyen li la kə boŋsə boŋ no nànto ə və ntelə wen byìʼì Yesò chò əghoʼ yi ghə̀ nkiʼi alòʼ ə Ijìb. Ghə̀ mboŋsə ki dyʉ̀sə nə̀ əmoʼtə yi a Nyìngòŋ ə ndiʼ lù ku a wen.

²⁷ A nè əbyɨmə la Mosìs lù fa lòʼ ə Ijìb, ko ghə̀ fwàynə̀ tebè la fòyn ne fwisətin. Fòyn ə nfwisə li tin a vəwenə ali kò ghə̀ lə fàyn ə sə dyʉ̀ to dyʉ̀, diʼ sə ghə̀ nyenə Nyìngòŋ no tèbe ando viʼi ə nko yenə.

²⁸ A ne əbyɨmə la Mosìs gàʼ la viʼi Islel zìtə̀ ə̀ nzhɨ̀ kəzhɨ kə məzaʼsə. Ghə̀ ngàʼà a viʼi Islel la vəwenə zuʼ mənlyuŋ mə byi a vəwenə təchʉ̀ tə ngə̀ŋ ndiʼ ntsɨŋ ngə̀ŋ Nyìngòŋ yì a ghə̀ nə̀ jèʼè zhwilə mbìsə vunə ə lyʉmə viʼi ne vi əzaʼa ngəŋsə vəwenə.

²⁹ Viʼi Islel ə nkiʼi əbyɨmə a Nyìngòŋ ghə̀ nè, vəwenə tɨm fa ntìntìn mù mə mbaŋ mə, vəwenə tɨm a nse ə zɨm ali viʼi Ijìb ə vi ə sə ntɨmə ə pfʉkə.

³⁰ A nè əbyɨmə la viʼi Islel jèʼè aghayn sòmbo ə kaʼ ə bùm mbàyn yì a və ə̀ kwiʼ ə bùmə̀ ntə̀ʼ Jèlikò tsu no zhʉ̀ko, mbàyn a yi fəŋ.

³¹ Wùwì njèʼtə̀ yì a və ntoŋtə la Lahàb ə nko mpfʉ wenə viʼi vyi a və pfʉkə ando və tyènə zhʉ Nyìngòŋ byìʼì ando ghə̀ mbyɨmə li a Nyìngòŋ. Ghə̀ ə mboŋsə shwèʼè a viʼi Islel vyi a və vi ə nyotə ə ki ntə̀ʼ yi a ghə̀ ə tsi tsu.

³² Mà zizi a mà ə̀ be gàʼa dyʉ̀ no la gho? Əzhʉ ko diʼ ə gàʼ ə kum Gidyòyn nə̀ Belàk nə̀ Samsòn nə̀ Jeftà nə̀ Devìt nə̀ Samwèl boʼsə nə̀ nshə̀ʼtə̀ sə ghoʼkəsə.

³³ Viʼi a venə əbyɨmə li a Nyìngòŋ, vətsevə temə zhɨ̀ təloʼ a ghòŋ, vətsevə sə be tsi ntsìnə̀ kənyʉ̀ kətɨməkə ashɨ Nyìngòŋ, vətsevə nkiʼi əfo vi a Nyìngòŋ ə nghʉ̀. Vəwenə vətsenəvə nchiʼ tə li təchʉ̀ tə nyamsə kəbo la kə sə phiʼ vəwenə.

³⁴ Vəwenə vətsenvə nkwen li tɨmə a tyi kəlwàŋ kəzhiʼ ghə̀ lɨmə. Vəwenə vətsevə be nyɨŋ la kə və zhwi vəwenə aghòŋ. Vəwenə nko kiʼ tebè kədyòʼ ali ə to kuʼ ə sə kɨ ə sòyn əghoŋ ə zhɨ̀ viʼi təloʼ tə tsentə.

³⁵ Ki vətsenvə əbyɨmə li a Nyìngòŋ, və lùsə viʼi vəwenə fa pfʉ ə bwensə ku a vəwenə. Və kù li ngəʼ a viʼi vətsenvə no nànto ali vəwenə tyen la və ko tyen Nyìngòŋ ə boŋsə kòŋ ə yenə ngəʼ ə pfʉ, Nyìngòŋ ə lu bwensə lùsə vəwenə fa pfʉ, vəwenə nshɨtə tsì.

³⁶ Və nghaʼa vətsevə, ə we a nfɨŋ, ghòmə vətsevə, kwiʼi vətsevə nə̀ məkwinkwinə.

³⁷ Və temlə li zhwilə vətsevə nə̀ nguʼsə ə shyə tintə vətsevə, to kə ntìntìn ə zhwilə vətsevə nə̀ nyì ə ngwoləŋ. Vətsenəvə nko kiʼ tebè kəshi ə tsì, jèʼè chò ati ati, a gwʉsə byisə, ko andiʼ la və kiʼi əko, və tsuʼ kəghʉ kə vəwenə, nyàblə̀ nə̀ vəwenə.

³⁸ Mbyi ghèn nko bòŋ kwʉʼʉ vəwenə ə ntsi tsu. Vəwenə sə jèʼè chò fa nse zɨm, kuʼu phènsə, tsì a təfyə̀ be tsi a bʉʼ a nse.

³⁹ No tèbe ando Nyìngòŋ nsaŋlə̀ a viʼi a venə no vətsèm byìʼì ando vəwenə əbyɨmə a wen, vəwenə sə pfʉ ko ndiʼ la və kiʼi kəfo kì a Nyìngòŋ ə nghʉ̀ a vəwenə.

⁴⁰ Kə ndiʼ alə̀ byìʼì ando Nyìngòŋ ə ndiʼ mu ghə̀ baʼtə̀ li kənyʉ̀ a vəghəŋ, kə bòŋ chò kənyʉ̀ kì a kə ndiʼ a məkàyn mə mumə̀ nə̀ ji yi a vəwenə ə̀ nkuʼsə Nyìngòŋ fa tsù. Ghə̀ ndiʼ mu ghə̀ baʼtə̀ li la ghə̀ lu tsèntə lyɨ vəghəŋ nə̀ vəwenə to kətsi kə mùʼ ə nè vəghəŋ ndiʼ viʼi kənyʉ̀ kətɨməkə a wen a shɨ.