Hibùlù 10 - The New Testament in the Babanki language

Yesò nku wèn ə wen a nə̀ kəku kə to ghaynə əmùʼ

¹ Təsoʼ tə Mosìs tə ndiʼ to ne kədèmdèm kə ə jùŋ yi a ghə̀ ndiʼ lù vì. A ko ndiʼ jùŋ a yi. Viʼi ə nkù zomtə kəku a Nyìngòŋ nə̀ ngwʉ̀ʼ nə̀ ngwʉ̀ʼ, a li ko kəku a kenkə diʼ mù kə zizi kə lu ne la vəwenə viʼi a və kəŋ nkuʼsə Nyìngòŋ ə ndiʼ viʼi kənyʉ̀ kətɨməkə ashɨ Nyìngòŋ.

² A ntu ndiʼ la kəku a kenkə ndiʼ mù kə zizi kə nè wìʼ la ghə̀ ndiʼ wu kənyʉ̀ kətɨmə kə a shɨ Nyìngòŋ mu vəwenə nku li to ghaynə əmùʼ kə kwʉʼʉ, ko tə kwoʼtə tə vəwenə be ə ku ngəʼ a vəwenə kumə mbyɨsə və wenə.

³ Alì vəwenə ku kəku a kikə to ngwʉ̀ʼ sətsèm, kə nè to la vəwenə boŋsə kwoʼtə mbyɨsə vəwenə.

⁴ Kə diʼ alə̀ byìʼì ando mənlyuŋ mə byisə nə̀ mənlyuŋ mə nyamsə zizi ko mə lu ə shʉ mbyɨsə wìʼ.

⁵ A le kənyʉ̀ ki a andiʼ ando Yesò ə nvi a mbyi ghə̀ gàʼ a Nyìngòŋ ə la: “Wù ko kəŋ tebè la və nə̀ shyə nyamsə a wù, ko wu kəŋ la və nku kəku a wù. Wù boŋsə shɨtə wèn ghomə la mà lyɨ̀ kù a wù.

⁶ A ko diʼ nyam shìsə a və nyʉʼ a kwi kəbaŋ kəku kò kəku kikə a və kù ə loyn məlyesə ku.

⁷ A lə kənyʉ̀ kì a ma ə ngàʼa a wù la, ‘Mà ghèn ashə a Nyìngòŋ. Mà vi a nse ə ne kənyʉ̀ ki a wù kəŋ la mà nè to ndə̀ŋndəŋ ando və nyoʼo kumə mò a wù ŋwàʼlə̀.’”

⁸ Yesò ə ngàʼa la Nyìngòŋ ə ko kəŋ la və nə̀ shyə nyamsə a wen, ko la və ku kəku, ko tebè la və nə̀ nyʉʼ nyamsə a kwi kəbaŋ a kəku a wen kò ku kəku ə loyn məlyesə ku, la ghə̀ ko saŋlə tebè ə əfo a venə no tèbe ando əsoʼ ngaʼa la və ne ali.

⁹ Ghə̀ gaʼa ali ə be kùmtə gàʼ la, “Mà ghèn, a Nyìngòŋ. Mà vi a nse ə nè kənyʉ̀ kì a wù kəŋ.” Ghə̀ ngàʼà ali ə diʼ la Nyìngòŋ ə tensə li kəku kə mukə a kenkə ə ghʉ̀ kəku kə fikə.

¹⁰ Ando Yesò Klistò nsə diʼ mu ghə̀ ku li ə wèn ə wen to ghaynə əmùʼ ə ne kənyʉ̀ ki a Nyìngòŋ ə nkəŋ la ghə̀ nè, kə nè la vəghəŋ ə nlaynə kwʉ̀ʼ ashɨ Nyìngòŋ.

¹¹ Nò tèbe pfèm ngə̀ŋ Nyìngòŋ ə kò ə nè shwèʼè ə wen ku kəku a Nyìngòŋ to mə ntʉʼ ntsèm, ali ko kəku kə vəwenə a kenkə zi kə lu ne la ghə̀ tsəʼsə mbyɨsə wìʼ.

¹² Alì mu Yesò Klistò ə nku li ə wèn ə wen a kəku a Nyìngòŋ to ghaynə ə mùʼ ə shʉ̀ mbyɨsə viʼi to əghayn əmùʼ. Ghə̀ nkù ali ə dyʉ̀ nyʉ̀ʼmə ashə kwoŋ ətoghə Nyìngòŋ.

¹³ Ə zìtə̀ fa achʉʼ a yi, ghə̀ sə ŋwʉʼ kəʼtə la Nyìngòŋ ə nè, viʼi kəbàyn ə wen ə ndiʼ a wen to nə̀ ə fo tomtə aghʉ ə wen.

¹⁴ Ghə̀ nku ə wèn ə wen to ghàyn ə mùʼ a kəku ə shʉ laynsə viʼi, la vəwenə faŋ a viʼi Nyìngòŋ to ghaynə əmùʼ.

¹⁵ Kəzhwì kə ə ŋwoʼkə kə diʼ mu kə diʼi laynsə a vəghəŋ la kənyʉ̀ a kenkə ə diʼ to no nəmwèʼè. Kə ncho li mbì ə gàʼ la,

¹⁶ Bobo vəghəŋ gàʼ la, “ali Məkàyn mì a mà ne zhɨ̀ yo viʼi vwomə a mətsi yi a mə kuʼu vì ə diʼ la: Ma a ghʉ̀ təsoʼ ə tyomtə a vəwenə tətyɨm ə be nyoʼ təsoʼ a tyitə a vəwenə təkwòʼtə̀.”

¹⁷ Ghə̀ mbe ngaʼa kwʉ̀ʼsə la Nyìngòŋ ə gàʼ la, “Mà ko lu be kwoʼtə mbyɨsə vəwenə nə̀ nyʉ̀ əbyɨvə vi a vəwenə ne.”

¹⁸ Nyìngòŋ ə nə̀ lyesə ku wìʼ ali, ko ghə̀ be a ndiʼ ə ku kəku la və lyesə ku mbyɨsə wen.

Viʼi diʼ ə ghaʼa əbyɨmə ə vəwenə la ghə̀ to

¹⁹ Luwen a vəlemə vwomə, ando vəghəŋ kɨ nəmwèʼè la vəghəŋ lu kwen akəshi yi a kə Laynə kwʉ̀ʼʉ̀ byìʼì mənlyuŋ mə Yesò,

²⁰ ghə̀ mbasə li kəbàs kə ndisə kì a kə ə nkɨŋtə vəghəŋ ə diʼ ji ə fi a vəghəŋ. Ji a ghèn ə diʼ ji yì a ghə̀ ne la vəghəŋ ə ntsi, kəbàs kə ə ndisə a kì diʼ ə wèn ə wen a və mbayntə a kəntò.

²¹ Ando vəghəŋ ə kiʼi pfèm ngə̀ŋ Nyìngòŋ ə to, ghə̀ lyè no gho a ngə̀ŋ Nyìngòŋ,

²² vəghəŋ choʼsə li to a Yesò ə kwentə dyʉ̀ boʼsə a Nyìngòŋ to nə̀ ətyɨm vəghəŋ no tsèm. Kə vəghəŋ a sə vi ə nvi nə̀ fwaynə la və a gham vəghəŋ a kənyʉ̀ byìʼì ando mənlyuŋ mə Yesò Klistò shʉ li làynsə tətyɨm tə vəghəŋ, və be shʉ̀ vəghəŋ, vəghəŋ ə làynsə to sə və shʉ̀ vəghəŋ nə̀ mu mə laynə mə.

²³ Vəghəŋ ghaʼ kənyʉ̀ ki a vəghəŋ ə kɨ la kə diʼ nəmwèʼè ə to tsu kə vəghəŋ be a nə̀ʼkə̀, byìʼì ando Nyìngòŋ ə ghʉ̀ no ghò, ghə̀ ne to ali.

²⁴ Vəghəŋ ə diʼ nkɨ kənyʉ̀ kə vəlemə və vəghəŋ, mwomsə ə ne la vəwenə ə nè jùŋ a vəlemə vətsenəvə be kòŋ vəwenə.

²⁵ Kə vəghəŋ ne kwen a kənyʉ̀ yi a vəlemə vətsenəvə ə ne ə lyesə ntsìnə̀ yì a vəghəŋ ə diʼ ə nvi tsèntə to kənyʉ̀ kə mùʼ. Vəghəŋ ə boŋsə ghòmtə̀ təwen tə vəghəŋ byìʼì ando vəghəŋ ə yen li la kətsi kì a Bobo a bwenə vi sə boʼsə.

²⁶ Vəghəŋ sətsen ə kɨ kənyʉ̀ ki a kə diʼi nəmwèʼè ali be faŋ ə ne to mbyɨ, kɨ to no la à diʼi mbyɨ, mu kəku kə tsen kə be andiʼ a kə zi kə shʉ̀ mbyɨsə vəghəŋ.

²⁷ Wìʼ ə ntsi ali, ghə̀ nə̀ fwaynə, bvɨtə kətsi kə ə nsòʼ Nyìngòŋ nə̀ ə zhiʼ ə fwàynsə ghə̀ wen yi a ghə̀ lù nyʉʼ viʼi kəbàyn ə wen tsu.

²⁸ No ndo a ghə̀ tyenə la ghə̀ ko a zhʉ Əsoʼ ə Mosìs, və diʼ sə soʼo wen nchwò nsòʼ fʉ, a diʼ viʼi və bò kò və tàʼ ə diʼ la ghə̀ nè li byɨbsə kənyʉ̀, no zhʉ̀ko, və zhwi wen ko andiʼ la və be kusə shinsə.

²⁹ Kə sətsen ndiʼ mu kə ndiʼ alə̀ achʉʼ ə Mosìs, kə lu ndiʼ no ale a viʼi vyi a və chasə Wàyn Nyìngòŋ a? Kə lu ndiʼ no ale a wìʼ a ghèn a ghə̀ faŋ ke lyɨ̀ mənlyuŋ mì a Nyìngòŋ ə zhɨ̀ məkàyn ə shʉ̀ ə laynsə mbyɨsə wen a kənyʉ̀ a? Kə lu ndiʼ no ale a wìʼ a ghèn a ghə̀ telə kəzhwì kə Nyìngòŋ, a diʼ kəwenkə a kə diʼi ətyɨm ə jùŋə ghə̀ Nyìngòŋ a?

³⁰ Vəghəŋ ə kɨ wen yi a ghə̀ ə ngàʼa la, “A diʼ kəshi ə kòmkə ə bwensə ənyʉ̀ vyi a viʼi ə ne. Mà lu bwènsə̀ loʼ nyʉ̀ ə byɨvə ə viʼi.” Ghə̀ ngaʼa li la, “Mò, Bobo ə lu soʼ viʼi vwomə.”

³¹ Kə fwàynsə no nànto a wìʼ azhʉ̀ a Nyìngòŋ yi a ghə̀ tsi diʼ əsoʼ ə byɨbsə wen.

³² Ghə̀ŋ bwensə li kwòʼtə ando əbayn ə nvi a ghə̀ŋ, ghə̀ŋ kɨ Nyìngòŋ. A ghə̀ŋ ə nyenə ngəʼ avù ə viʼi achʉʼ a yi no nànto ali wensə to wensə.

³³ A ndiʼ achʉʼ a yi, əzhʉ̀ ə tseghə nvi zàʼa, və sə telə ghə̀ŋ, ku ngəʼ a ghə̀ŋ to no ashi ə viʼi, əzhʉ̀ ə tseghə vì, a sə kòŋ to no ghə̀ŋ ə tsentə wenə viʼi vyi a və kù ngəʼ a vəwenə.

³⁴ Ghə̀ŋ ə kusə shinsə a viʼi vyi a və ghaʼtə shwin. Və nghaʼtə shi əfo ə vəŋə, ghə̀ŋ ə boŋsə saŋlə byìʼì ando ghə̀ŋ ə kɨ la ghə̀ŋ bo kiʼi əfo vyi a Nyìngòŋ ə ghʉ̀ a ghə̀ŋ, və kuʼmə chò vyi a və ghaʼ shi be diʼ mu və faŋ li to nəmwèʼè.

³⁵ Kə ghə̀ŋ ə kwitə tə tyɨmə ətəŋtə fa a ghə̀ŋ a əbyɨmə yi a ghə̀ŋ kiʼi a Nyìngòŋ. Ghə̀ŋ a kiʼi əmoʼtə azhʉ̀ a ghə̀ŋ zhəʼtə to a wen ə Nyìngòŋ.

³⁶ Ghə̀ŋ diʼ ə nto a ghə̀ŋ əbyɨmə ndiʼ ghə̀ŋ nè kənyʉ̀ kì a Nyìngòŋ ə kəŋ la ghə̀ŋ nè, ghə̀ lu ku kəfo kì a ghə̀ ghʉ̀ la ghə̀ lu ə ku a ghə̀ŋ.

³⁷ Kə diʼ to ando və nyoʼ li a ŋwàʼlə̀ Nyìngòŋ la: “A faŋ to fəshinə fə zhʉ̀ alə ndiʼ wìʼ yi a ghə̀ diʼ ə vì, vi. Ghə̀ ko be laʼtə.

³⁸ Wù ə ghom yi a diʼ wù kənyʉ̀ kətɨməkə faŋ ə ntsi byìʼì əbyɨmə ə wen a mò. Alì mu ghə̀ sətsen bwenə fa mo əbam ko ma nà saŋlə kumə wen.”

³⁹ A diʼ fa vəghəŋ, vəghəŋ ko diʼ to nə̀ viʼi vì a və nyɨŋ li bwenə fa bàm Nyìngòŋ. Vəghəŋ boŋsə diʼ viʼi vyi a və kiʼi əbyɨmə a wen, ghə̀ diʼ lù bwoŋsə vəghəŋ.