Gàlesìyà 3 - The New Testament in the Babanki language

Wù zhəʼtə a soʼ mu a byɨmə lo

¹ Ghə̀ŋ nkoyn ə viʼi Gàlesìyà venə! Və lùʼ ghə̀ŋ lùʼu mu? A və tə diʼ mwetə to no ando və ə bayntə Yesò Klistò a kəntò a ghə̀ŋ!

² Ghə̀ŋ shə̀ʼtə̀ kənyʉ̀ kəmùʼ ken a mò. Ghə̀ŋ shə̀ʼtə̀ a mò la, Nyìngòŋ nku kəzhwì kə wen a ghə̀ŋ byìʼì ando ghə̀ŋ ghʉ Əsoʼ mu ghə̀ nku byìʼì ando ghə̀ŋ zhʉ̀ ntɨm ə jùŋ ə byɨmə lo?

³ Ghə̀ŋ dzɨŋtə ghò alə a? Ghə̀ŋ tə zìtə̀ ə sə tsi byìʼì Kəzhwì kə Nyìngòŋ, ə sə kəŋ ə tsì ə mwetə nə̀ kədyoʼkə ngeŋsə ə ghə̀ŋ byìʼì ghò?

⁴ Kə lə diʼ la ghə̀ŋ tə yenə ngəʼ no nànto alə to kədyàŋ mu? Ghə̀ŋ ə zizi ko ghə̀ŋ lu yen ngəʼ alì to kədyàŋ.

⁵ Nyìngòŋ ə nku kəzhwì kə wen a ghə̀ŋ ə be nè nyʉ̀ ə kaynəvə a ghə̀ŋ a ntìntìn byìʼì ando ghə̀ŋ ghʉ Əsoʼ mu, mu byìʼì ando ghə̀ŋ nzhʉ̀ ntɨm ə jùŋ ə byɨmə lo?

⁶ Ghə̀ŋ yen li Ablaham a! Ŋwàʼlə̀ Nyìngòŋ gaʼa la “Ablaham mbyɨmə li a Nyìngòŋ, ghə̀ lyɨ̀ wen a wù kənyʉ̀ kətɨməkə.”

⁷ A ghə̀ŋ yen li luwèn la no nkàyntə̀ vunə Ablaham ə diʼ viʼi vyi a və byɨmə li a Nyìngòŋ.

⁸ Ŋwàʼlə̀ Nyìngòŋ sə diʼ mù ghə̀ nshə̀ʼtə̀ li la, Nyìngòŋ ə lu nè ə viʼi kətɨm ə vəwenə ndiʼ viʼi kənyʉ̀ kətɨməkə byìʼì əbyɨmə ə vəwenə. Byìʼì kənyʉ̀ a kenkə, Nyìngòŋ ə be mu shə̀ʼtə̀ ntɨm ə jùŋ a mbì a Ablaham la, “Ma lu bwaʼsə viʼi təloʼ tə tsèm chò fa wù”.

⁹ Kə le diʼi la, no ndò yi a ghə̀ byɨmə ə kiʼi mbwàʼsə̀ to ndə̀ŋndəŋ to ando Nyìngòŋ mbwàʼsə Ablaham byìʼì əbyɨmə ə wen.

¹⁰ Viʼi vyi a və kəŋ ə ghʉ tə Əsoʼ ndi nti a nkayn wenə və Nyìngòŋ, ngəʼ Nyìngòŋ diʼ a vəwenə a kətʉ, byìʼì ando və nyoʼo li a Ŋwàʼlə̀ Nyìngòŋ la, “Nyìngòŋ ne nè ngəʼ ndiʼ a kətʉ no ndò yi a ghə̀ ko ghʉ təsoʼ no tətsèm a tə diʼi a ŋwàʼlə̀ Əsoʼ.”

¹¹ Kə lə kə̀ʼə̀ lì a ndayn luwen la, wìʼ zizi ko ghə̀ lu ndiʼ wu kənyʉ̀ kətɨməkə ashɨ Nyìngòŋ byìʼì ando ghə̀ ghʉ Əsoʼ, byìʼì ando və nyòʼò li a Ŋwàʼlə̀ Nyìngòŋ la, “Viʼi vyi a və diʼ viʼi kənyʉ̀ kətɨməkə byìʼì əbyɨmə ə vəwenə lu ə ntsi byìʼì ə byɨmə vəwenə”

¹² Əsoʼ ə ko kiʼi to kənyʉ̀ kùmə̀ ə byɨmə. Və boŋsə li nyòʼ a ŋwàʼlə̀ Nyìngòŋ la, “no ndò yi a ghə̀ ne ando Əsoʼ ə kəŋ, lu ə ntsi to byìʼì wen ghə̀”.

¹³ Klistò mbwensə li zen kətʉ kə vəghəŋ fa ngəʼ yi a Əsoʼ ə nshiʼsə a vəghəŋ kətʉ. Ghə̀ ne alə a ji la ghə̀ shi li ngəʼ na yi a vəghəŋ a kəshi, byìʼì ando və nyoʼo li a ŋwàʼlə̀ la, “Ngəʼ Nyìngòŋ ne diʼ no tèbe a ndò yi a və sɨŋsə wen a fəkoʼ.”

¹⁴ Klistò ə nè alə ndiʼ mbwàʼsə̀ yì a Nyìngòŋ ə ghʉ li a Ablaham, boŋ ə dyʉ̀ a viʼi a ko diʼ viʼi Jus. Ghə̀ ə nè alə ndiʼ əbyɨmə ə vəghəŋ nè vəghəŋ boŋ kiʼi Kəzhwì kə Ŋwoʼkə na kì a Nyìngòŋ ə nghʉ li.

Əsoʼ ə Mosìs ko kiʼ tebè kədyòʼ ə kwitə kənyʉ̀ a Nyìngòŋ nghʉ li

¹⁵ Vəlemə vwomə a byɨmə, ma kù nchwi kənyʉ̀ a ghə̀ŋ, a və fʉ̀ to mətsi ə ntsèm. Viʼi və bò nə̀ byɨmə kənyʉ̀ ə zhɨ̀ məkàyn, ko wìʼ be ə diʼ ə tsuʼ kò ə kwʉ̀ʼsə kənyʉ̀ tsu.

¹⁶ Nyìngòŋ ə nghʉ li kənyʉ̀ ken a Ablaham wenə ngwaʼ wen. Ŋwàʼlə̀ Nyìngòŋ ko gàʼ la və ku a wenə vunə və ghoʼo və. Ŋwàʼlə̀ Nyìngòŋ tòŋtə to wàyn ə mùʼ, wàyn na ghèn diʼ Klistò.

¹⁷ Mà lə gàʼà ə diʼ la, Nyìngòŋ ə zhɨ̀ məkàyn mù ghʉ kənyʉ̀ fa ambì wenə Ablaham, ko ghə̀ zizi ghə̀ lu ə faŋ ke nè. Mibu və sə shɨtə Əsoʼ na ghenə, mu ngʉ̀ʼsə cho li əghɨ kàʼ nə̀ ngʉʼsə məwumə ə ntàʼ a və zhɨ məkàyn, Əsoʼ na yì ə zizi ko ghə̀ lu be tensə məkàyn na mèyn be tensə kənyʉ̀ ken a Nyìngòŋ ə nghʉ lə̀.

¹⁸ Nyìngòŋ ə sətsèn ə nku fo wen a viʼi byìʼì ando və ghʉ Əsoʼ, mu a li ko be diʼ kənyʉ̀ a ghə̀ nghʉ̀. Nyìngòŋ nku li ə fo a Ablaham ando ghə̀ nghʉ̀.

¹⁹ Əshyèʼ əsoʼ lə̀ diʼ no ghò? Nyìngòŋ ə nkù Əsoʼ ə kwʉ̀ʼsə a məkàyn mèyn ndiʼ wìʼ ne fəŋə, ghə̀ kɨ la ghə̀ nè li mbyɨ. Əsoʼ ndiʼ ə ndiʼ to diʼi ə zaʼa ando wàyn a Nyìngòŋ ə ghʉ kənyʉ̀ ken byìʼì wen vi. Nyìngòŋ ntɨm ə ntsɨŋsə wen la vəwenə ku əsoʼ a Mosìs la ghə̀ chòsə̀ a viʼi. Mosìs ndiʼ wìʼ a ghə̀ nti a ntìntìn Nyìngòŋ wenə viʼi.

²⁰ Wìʼ zizi ko ghə̀ lu ə tɨmə a ntìntìn, nchwosə nyʉ̀, a bwen la viʼi na vyi diʼ və bò. Nyìngòŋ diʼ fa wen a ngə̀ŋ. Ghə̀ nko chò fa a wìʼ mibu ghʉ kənyʉ̀ ken a Ablaham.

Kənyʉ̀ ki a Əsoʼ ə shyèʼ

²¹ Kə le diʼi la Əsoʼ ə tensə kənyʉ̀ kə ghʉ kə kikə a Nyìngòŋ ə nghʉ li mu? Kə ko diʼ alì no fa mphen. Kə diʼ la Nyìngòŋ a sətsen ə ndiʼ mu ghə̀ nkuli əsoʼ mibu ghə̀ nè la viʼi ntsi, a na ndiʼ mù ghə̀ zizi nè la viʼi nti akayn ashɨ ə Nyìngòŋ.

²² Alì Ŋwàʼlə̀ Nyìngòŋ gàʼa la kədyòʼ kə mbyɨ kə diʼ a kətʉ viʼi vətsèm a mbyi. Kə diʼi alə̀ ndiʼ Nyìngòŋ ə ghʉ kənyʉ̀ kə ghʉkə ki a ghə̀ nghʉ, a viʼi vyi a və byɨmə a Yesò Klistò.

²³ A ndiʼ mibu ə zhʉ əbyɨmə a Klistò vì, Əsoʼ ne li və ghə̀ŋ sə tsi to ne viʼi mfɨŋ. Əsoʼ nghaʼa li a vəghəŋ zaʼa ando Nyìngòŋ ə ndiʼi làynsə əbyɨmə na ghenə a Klistò.

²⁴ Əsoʼ ə ntùʼmə̀ to tuʼmə nə̀ vəghəŋ ə zaʼa ando Klistò ə nvi ə nè la vəghəŋ diʼi viʼi kənyʉ̀ kətɨməkə byìʼì əbyɨmə.

²⁵ Luwen ando vəghəŋ sə kiʼ əbyɨmə lə̀, Əsoʼ ə kə be tùʼmə̀ nə̀ vəghəŋ.

²⁶ Ghə̀ŋ vətsèm diʼ vunə a Nyìngòŋ byìʼì ando ghə̀ŋ byɨmə li a Yesò Klistò.

²⁷ Nò ghə̀ŋ və tsèm a ghə̀ŋ nshi mu, ə tsèntə vye və Yesò ə sə diʼ mù ghə̀ŋ lyɨ li ntsìnə̀ wen.

²⁸ Nəkwoŋ ko be diʼ fa wù ə Jus wenə wìʼ yi a ko diʼ wù Jus. Nəkwoŋ ko be diʼ fa wìʼ yi a ghə̀ diʼi fa ngeŋ wenə wìʼ yi a ghə̀ diʼi kəkòs, ko ghə̀ diʼ a wùlɨm nə̀ wùwì, byìʼì ando ghə̀ŋ və tsèm sə tsèntə diʼ to kənyʉ̀ kə mùʼ vye və Yesò Klistò.

²⁹ Ghə̀ŋ sətsen ndiʼ viʼi Yesò alə̀, a ghə̀ŋ ne diʼ vunə a Ablaham, diʼi la ghə̀ŋ be lu kiʼi əfo vì a Nyìngòŋ ə ghʉ a wen.

« Roimhe

Air adhart »

Lean sinn:

Ceanglaichean taic

Sanasan