Filìbàyns 4 - The New Testament in the Babanki language

Bol shə̀ʼtə̀ kənyʉ̀ a viʼi və byɨməvə diʼ ə nè

¹ Vəlèmə vwomə mà gàʼà à ghə̀ŋ a la, mà kòŋə̀ ghə̀ŋ no nkàyn be kòŋə̀ əyen ghə̀ŋ. Ghə̀ŋ ə nè mà saŋlə̀ no nkàyn. Ghə̀ŋ dìʼ əmoʼtə shyèʼ ə̀ mò. Mà kuʼsə̀ əwen ə ghomə byìʼì ghə̀ŋ. Vəlèmə vwomə ma kòŋ Luwen ghə̀ŋ diʼi tɨmə tò a ghə̀ŋ əbyɨmə a Bobo.

² Ma sensə la Euodiyà wenə̀ Syntychè ə ndiʼ a kənyʉ̀ kə mùʼ byìʼàndo ghə̀ŋ dìʼ vəlèmə̀ a byɨmə.

³ Mà gaʼa à wù a ma ghʉ ə tyɨmə ghomə a wù a yowù tsentə̀ ə̀ shyèʼ a muʼu, Mà kəŋ la wù gyamtə ki venə byìʼe yo vəwenə nshə̀ʼtə̀ ntɨm ə jùŋ amuʼ əboʼsə nə̀ Clemèn bènə̀ viʼi vətsenvə a təzhiʼ tə vəwenə sə̀ diʼ a ŋwàʼlə̀ əbwòŋ.

⁴ Ghə̀ŋ ə saŋlə̀ a Bobo no mənzhʉ̀ tsèm. Mà gàʼà be kùmtə̀ la ghə̀ŋ ə nsaŋlə̀.

⁵ Ghə̀ŋ ə ntsi ntsìnə̀ bwaʼmə à viʼi vətsèm. Əzhʉ boʼsə ə Bobo bwenə vì.

⁶ Kə tətyɨm ə təŋtə a lɨmə kənyʉ̀ kətsenkə, alì ghə̀ŋ ə njɨ̀mə̀ tò jɨ̀mə̀ loynə no tè ghò a ghə̀ŋ ə kəŋə fà Nyìngòŋ. Ghə̀ŋ sə nloynə ghə̀ŋ ə nku kəzòŋ à Nyìngòŋ.

⁷ Ghə̀ŋ sətsen ənè alə̀, Nyìngòŋ a ku əbwaʼmə a ghə̀ŋ a diʼ mbwaʼmə a ghə̀ cho no ghò, ko no wìʼ zi ghə̀ kwoʼtə. Əbwaʼmə ghèn a nè tətyɨm təŋtə nə̀ təkwòʼtə̀ təŋtə əzhʉtə byiʼə ghə̀ŋ diʼ wenə və Yesò Klistò.

⁸ Vəlèmə̀ vwomə ə kəmwetə, ghə̀ŋ ghʉ təkwòʼtə̀ təŋtə no tè a ghò yì a ghə̀ bòŋə̀ be diʼ və nghoʼsə̀,nyʉ venə diʼ ənyʉ̀ vyi a diʼì ənyʉ̀ nəmwèʼè, ənyʉ̀ vyi a və diʼì ə və jùŋvə, ənyʉ̀ vyi a diʼ ənyʉ̀ ə̀ tɨməvə, ənyʉ̀ vyi a diʼ ənyʉ̀ ŋwoʼvə, ənyʉ̀ a viʼi diʼ ə nkòŋə̀ bènə̀ ənyʉ̀ a və diʼì ə və ntemə təpfem tsu.

⁹ Ghə̀ŋ ə nè ənyʉ̀ vyi a ghə̀ŋ ziʼì fà mò, vyi a ghə̀ŋ shi fà mò, vi a ghə̀ŋ zhʉ ando mà gàʼà bènə̀ vi a ghə̀ŋ yenə ando mà nè. Sətsen ghə̀ŋ ə nè alə Nyìngòŋ a ku mbwaʼmə̀ a ghə̀ŋ mbe ndi və̀ vəwenə.

Bol ku kəzòŋ à viʼi Fìlìbày

¹⁰ Ando mà diʼi yo Bobo, ma saŋlə̀ no nkàyn byìʼàndo ghə̀ŋ ə be dìʼ à mò luwèn la ghə̀ŋ tuʼmə nè mò no tèbe ando kəghaf kə dyʉ̀ li. Mà kɨ li la ghə̀ŋ tə nkiʼ ə tyɨmə tuʼmə nè mò alì jì ə ko tə ndiʼ.

¹¹ Mà ko gàʼà nakènkə luwèn byìʼàndo ma gho kəfo. Mà ziʼi li ə ntsi tò nə̀ kikə a mà kiʼì

¹² Mà nkɨ li ji a wìʼ ətsi tè a zhʉ a ghə̀ gho kəfo ə be ə nkɨ ji a wìʼ ətsi tè a zhʉ a ghə̀ kiʼì ə̀fo no ghoʼo. Mà ziʼi li ə ntsi tò nə̀ kikə a mà kiʼì. Ma myəʼsə li ndiʼ to a kayn a zhʉ ma kiʼi no əghoʼ mbe myəʼsə əndiʼ nè jɨŋ. Ma myəʼsə li ndiʼ to a kayn a zhʉ a ma kiʼi cho to ando ma kəŋ mbe myəʼsə ndiʼ to kayn te azhʉ ma ko kiʼi tè kəfo a ma kəŋ.

¹³ No kənyʉ̀ kə ko a kə fʉ̀ a mò, ma tɨmə ə tò byìʼì kədyòʼ ki kə a Yesò Klistò ə ku à mò.

¹⁴ Alì, ghə̀ŋ ə tə nè a nkàyn ando ghə̀ŋ tə gyàmtə̀ mò à mo tì ngəʼsə.

¹⁵ No nkàyntə̀ ghə̀ŋ ə viʼi Fìlìbày ə kɨ la ando mà nzìtə̀ shə̀ʼtə ntɨm ə jùŋ ando ma əlù fa Macedonia, no ntsèntə̀ viʼi və byɨməvə tsen nko gyamtə mo ə chò tò ghə̀ŋ,

¹⁶ Tə̀ ando mà ə̀ ndìʼ a Tèsàlonikà, ghə̀ŋ bè tɨ̀m ə gyamtə à mò to aghayn aghayn.

¹⁷ Mà ko gàʼà a lə̀ la mà be kəŋə la ghə̀ŋ ku kəfo à mò, mà bòŋsə̀ kəŋə la Nyìngòŋ kwʉʼsə̀ mòʼtə̀ ə ghəŋə.

¹⁸ Mà gàʼà à ghə̀ŋ la mà kiʼi li əfo a ghə̀ŋ tɨmə a mo no tsèm ə mbe nkiʼi ə ncho. Èbàfàlòditùs tə vì ə̀ kù no ə̀fo tsèm a ghə̀ŋ tə̀ tɨm la ghə̀ vi ə̀ kù à mò, mà ko bè gho kəfo. Ə̀fo avenə lèmtə̀ fwomə no nkàyn, à diʼ nə̀ kəku à Nyìngòŋ shi li ə sə saŋlə̀ no nkàyn.

¹⁹ Nyìngòŋ ghom kìʼ no ə̀fo tsèm. Ghə̀ ne ku no tè ghò yì a ghə̀ŋ ə kəŋə chò fa Yesò Klistò.

²⁰ Əghoʼsə ndiʼ à Nyìngòŋ ə Tìʼ vəghəŋ ə zaʼa no tè fa ze. Amèyn.

Ətoŋtə kəmwetə

²¹ Ghə̀ŋ toŋtə viʼi və byɨməvə à Yesò Klistò a və diʼì afì no vətsèm. Vəlèmə̀ və vəghəŋ a və diʼì yo vəwenə toŋtə̀ ghə̀ŋ.

²² Viʼi və byɨməvə no vətsèm a shə əbè toŋtə̀ ghə̀ŋ. Ali no vi a və shwèʼè a ntuʼ ə̀ fòyn əghoʼo ə be tɨmə toŋtə à ghə̀ŋ.

²³ Əboŋə tyɨm ə̀ Bobo Yesò Klistò ə ndiʼ à ghə̀ŋ vətsèm.

« Roimhe

Air adhart »

Lean sinn:

Ceanglaichean taic

Sanasan