Filìbàyns 3 - The New Testament in the Babanki language

Nyìngòŋ ə nè la vəghəŋ ə ndiʼ viʼi kənyʉ̀ kə tɨməkə nəmwèʼè

¹ Ə myètə̀ a vəlèmə̀ vwomə, ghə̀ŋ ə nsaŋlə̀ la ghə̀ŋ dìʼ a kənyʉ̀ kə mùʼ wenə və Bobo. Kə ko ku ngəʼ à mò ə mà be ə̀ zòmtə nyòʼ ənyʉ̀ à ghə̀ŋ a mà sə̀ diʼ mu mà nyòʼò li. Ə nyʉ̀ avenə be a ntsɨ̀ŋə̀ ghə̀ŋ.

² Ghə̀ŋ tuʼmə wen və viʼi nè ənyʉ̀ byɨvə venə a vəwenə diʼ to nə̀ bʉsə lə̀. Vəwenə ghʉ tò la və diʼ shɨtə ndyə̀ ə̀ wìʼ.

³ A dìʼ nə yes a yes ə kuʼsə to a ji kəzhwì kə Nyìngòŋ kə tisə yes fa tsu, à diʼ yes a və shətə li ndyə̀ yes nəmwèʼè. Yes ə tsi to kənyʉ̀ a Yesò Klistò ə ne li a yes. Kèn la yes ə choʼsə la wìʼ zi ghə̀ gyamtə yes.

⁴ No tè ando mà zì mà choʼsə ə viʼi, ma kiʼi kənyʉ̀ a kə nè, no a ndò a kwòʼtə̀ la ghə̀ kiʼi kənyʉ̀ a kə nè la ghə̀ choʼsə viʼi, mu mà zì mà kiʼi ə̀ chò wen.

⁵ Və mbwì mo, à sə ndiʼ mətsi fwomə və shɨ̀tə̀ ə̀ ndyə̀ ghom. Mà diʼ wù Islel mu mà fʉ fa ngwàʼa ngə̀ŋ ə̀ Benjamìn. Tìʼ ghom nè lì ghom ndìʼ no kayntə viʼi Hibùlù. Mà ndìʼ wù nòyn ə̀ Və Falàsi, ghʉ ə̀soʼ ə Mosìs no nkàyn.

⁶ Na ki kə nè tyɨmə ghomə sə lɨmə, ma sə tsuʼu kəghʉ kə ntsèntə̀sə viʼi vəbyɨməvə Yesò Klistò. A kənyʉ̀ kə tɨməkə, ma nghʉ təsoʼ no tə tsèm to nkayn.

⁷ Ənyʉ̀ avenə no tsèm ndiʼ sə a ndiʼ sè, mà lyɨ̀ luwèn la a dìʼ kənlè byìʼì əshwèʼ Klistò.

⁸ A ko diʼ to Wokèn. Mà yenə luwèn la ənyʉ̀ avenə tə nsù diʼ kənlè byìʼàndo kənyʉ̀ kə tokə à mò dìʼ la mà diʼi kɨ Yesò Klistò ə Bobo ə̀ ghom. Mà maʼà li no tè ghò a mà tə nè. Ma yen li luwen la a diʼ kəmɨ̀ŋ ndi ə ndiʼ wù Klistò

⁹ Mà kəŋə la yo wen ə ntsèntə̀ diʼ a kənyʉ̀ kə mùʼ, ko ndiʼ la a dìʼ byìʼì kənyʉ̀ kə tɨməkə ə ngəŋ mo byìʼàndo ma ghʉ ə̀soʼ. Ali, mà sə̀ diʼ wù kənyʉ̀ kə tɨməkə byìʼì byɨmə ghomə à Klistò. Ali kənyʉ̀ kətɨməkə a kenkə vi fa Nyìngòŋ a diʼ byìʼì choʼsə a Klistò.

¹⁰ Mème kənyʉ̀ a mà kəŋə dìʼ la mà kəŋə kɨ Klistò ə be kiʼ kədyòʼ kì a Nyìngòŋ ə̀ nku à wen ghə̀ lù fa pfʉ, mà kəŋə yen ə ngəʼ to nè wen ə be pfʉ to nè wen.

¹¹ Ndi Nyìngòŋ lə lusə mo fa pfʉ.

Bol gaʼa la ghə̀ kəŋə lə lù fa pfʉ

¹² Mà ko gàʼà la mà kwʉʼʉ̀ li a kənyʉ̀ akènkə, ko la ma tɨmə ə nkwʉʼ alì la mà mwòmsə̀ no nə̀ kədyòʼ kə əkɨ Yesò Klistò ə be ə ndiʼ to nə̀ wen byìʼàndo à dìʼ kənyʉ̀ a ghə̀ ntsuʼ mo la ə ma ndiʼ wù wen.

¹³ Vəlèmə̀ vwomə, mà ko lyɨ̀ la mà mwetə li kənyʉ̀ akènkə, alì kənyʉ̀ kə diʼ tò kə mùʼ a ma nè à diʼ la mà ko be ghʉ kətʉ a ənyʉ̀ chovə, mà shyèʼè dyʉ̀ tò nə̀ mbì.

¹⁴ Mà shwèʼè dyʉ̀ tò nə̀ mbì ndi ə kiʼi zhùʼtə̀ yi a Nyìngòŋ ə dzàŋə̀ mò fa kaŋ ə chò fà Yesò Klistò.

¹⁵ Mà sə kəŋə la vəghəŋ vətsèm a vəghəŋ ə to li ə nkwʉʼ à vəghəŋ ə byɨmə a nyʉ̀ venə nkiʼ tò kwòʼtə̀ aghenə. A sətsèn ghə̀ŋ vətsenvə nkiʼ əkwoʼtə kədyàŋ a nyʉ̀ venə mu Nyìngòŋ a nè ə ghə̀ŋ ə nzhʉ kɨ ənyʉ̀ avenə no nkàyn.

¹⁶ No tè be ali, vəghəŋ diʼ ə nè tò a ənyʉ̀ vyi a Nyìngòŋ ə ndiʼì li à vəghəŋ, vəghəŋ sə̀ nè fa ambì.

¹⁷ Vəlèmə vwomə ghə̀ŋ nè tò ə ndzɨ̀mtə̀ ənyʉ̀ a ma nè. Ghə̀ŋ ə ntùʼtə̀ lyè viʼi vyi a və jèʼè a jisə jùŋə sə shì a yès tə̀ dìʼ la ghə̀ŋ ə njèʼè fa tsu.

¹⁸ Ando ma ngaʼa li a ghə̀ŋ to ghaynə ghayn ə be sə gyisə gàʼà luwèn nə̀ məshɨ à mo ashɨ la viʼi no vəghoʼ a ma tə ngaʼa ghə̀ŋ byìʼì ji a vəwenə ətsi ədiʼ la vəwenə diʼ viʼi ə kəbàyn ziʼi yi a ghə̀ gaʼa byìʼì əpfʉ Klistò a kəntò.

¹⁹ Nyìngòŋ ə ne byɨsə vəwenə byìʼàndo Nyìngòŋ ə̀ vəwenə dìʼ njòsə wèn ə̀ vəwenə kəŋ. Vəwenə bòŋsə̀ kuʼsə̀ wen byìʼì ənyʉ̀ ə kətʉ kə diʼikə be kwòʼtə̀ tò byìʼì ə̀fo mbyi venə.

²⁰ Alì fà vəghəŋ, vəghəŋ ə kɨ la ə̀ loʼ ə vəghəŋ ə diʼ akàŋ. Adìʼ fa tsu a vəghəŋ ə kə̀ʼtə̀ mbwòŋsə̀ vəghəŋ ə Bobo Yesò Klistò.

²¹ Ghə̀ nè ə lyɨ kədyòʼ kì a kə nè la ə̀fo ə̀ tsèm ə ndiʼ à wen ə tyi əsoʼ ə kwitə wèn ə vəghəŋ ghenə a ghə̀ diʼ ə lu pfʉ lə̀, ghə̀ kaʼkə ndiʼ tò nə̀ əwèn ə̀ ŋwoʼghə wen.

« Roimhe

Air adhart »

Lean sinn:

Ceanglaichean taic

Sanasan