Efisyàns 6 - The New Testament in the Babanki language

Ntsìnə̀ voyndyə nə̀ ghə̀ vətiʼ və vəwenə

¹ Voyndyə, ghə̀ŋ ə̀ nzhʉ to fa vətiʼi vəŋə nə̀ vəlì vəŋə byìʼì ando à diʼ kənyʉ̀ ki a kə diʼ kənyʉ̀ kətɨməkə.

² Kə diʼ ali byìʼàndo a diʼ əmbì Əsoʼ a Nyìngòŋ ə nku nə̀ kənyʉ̀ kə ghʉ kə a yi bàm ə gàʼa la, “Gumlə tiʼi wù nə̀ lì wù,

³ ndiʼ nyʉ̀ ə tsèm ə̀ jèʼè to akayn a wù, wù be tsitə a nse ashə.”

⁴ Vətiʼi və vunə, kə ghə̀ŋ ə̀ ne vù vəŋə fwisə tin. Ghə̀ŋ ə̀ mboŋsə pfàntə̀ vəwenə be tisə vəwenə a ji yi a Bobo ə kəŋ fa tsù.

Əkòs nè vətìʼ və shwèʼ ə vəwenə

⁵ Əkòs, ghə̀ŋ ə̀ zhʉ to fa vətiʼ və əshwèʼ ə ghə̀ŋ, shɨtə gumlə vəwenə to nə̀ tətyɨm təŋtə tə tsèm. Ghə̀ŋ ə̀ shwèʼè to sə ghə̀ŋ shwèʼè a Klistò.

⁶ Kə ghə̀ŋ a zhʉ fa vəwenə to azhʉ̀ a və yenə ghə̀ŋ byìʼì ando ghə̀ŋ kəŋ la və ə kɨ la ghə̀ŋ shwèʼè akàyn. Ghə̀ŋ ə̀ zhʉ to fa vəwenə to nə̀ viʼi shwèʼ ə Klistò, to ndə̀ŋndəŋ ando Nyìngòŋ ə kəŋ.

⁷ Ghə̀ŋ ə̀ shwèʼè a vəwenə nə̀ tyɨmə ghə̀ŋ no tsèm to sə ghə̀ŋ shwèʼè a Bobo, a ko diʼ a viʼi.

⁸ Ghə̀ŋ kɨli la wìʼ ə sətsen nè no tèbe jùŋ ə kò, kò ghə̀ diʼ kəkòs kò ghə̀ ko diʼ, Nyìngòŋ ə lù ku əmòʼtə wen.

⁹ Vətiʼ və əshwèʼ, ghə̀ŋ mbe boŋ shɨtə ghaʼa əkòs ə vəghəŋ akàyn. Kə ghə̀ŋ ə̀ nkàyntə̀ nyʉ̀ a vəwenə. Ghə̀ŋ ə kɨ la wìʼ yi a ghə̀ diʼi tìʼ shwèʼ a ghə̀ŋ nò və tsèm diʼ akàŋ, lyɨ no ndò to ndə̀ŋndəŋ.

Bol ə shə̀ʼtə̀ əfo əghoŋ Nyìngòŋ

¹⁰ Ə mwetə, ma sə gàʼa la ghə̀ŋ ə zhəʼtə to əwen Nyìngòŋ, ghə̀ ku kədyòʼ a ghə̀ŋ byìʼì ando ghə̀ kiʼi kədyòʼ kə kaynə kə.

¹¹ Ghə̀ŋ lyɨ̀ əfo ghòŋ vyi a Nyìngòŋ ə ku a ghə̀ŋ no ə tsèm ndi kɨ ə sòyn mənàŋ myimə a Deblə̀ ə baʼtə̀.

¹² Ghə̀ŋ ne alə byìʼì ando vəghəŋ ko ə soynə tebè viʼi. Vəghəŋ ə boŋsə soynə əzhwì byɨvə vi a və diʼ a akàŋ nə̀ adyòʼ vi a və soʼo mbyi ghèn no ə tsèm nə̀ Vənyìngòŋ və mbyi a vəghəŋ diʼ tsu le, a və diʼ to nə̀ kəbəŋ kə fənəkə lə.

¹³ Ghə̀ŋ lyɨ̀ əfo əghòŋ Nyìngòŋ ə no tsèm ndiʼ mətsi mə mbyɨ sə vi kwʉʼ ghə̀ŋ temə zhɨ̀ Deblə̀, ndi əghoŋ ne sə mè, ghə̀ŋ mbo nti tò to tò.

¹⁴ Ghə̀ŋ kwiʼ li kənyʉ̀ kì a kə diʼi nəmwèʼè a ghə̀ŋ kənaʼ to nə̀ kətəŋkə, ə̀ ntsi ntsìnə̀ ətɨmə yi a ne kəkəŋtə kəŋkə̀ a ghə̀ŋ kədyʉ̀ʼ ə mbvʉtə.

¹⁵ Ghə̀ŋ lyɨ̀ ntɨm ə jùŋ yì a ghə̀ kù mbwaʼmə ə wèsə a ghə̀ŋ aghʉ to nə̀ gʉsə aghʉ̀ ə mbvʉtə.

¹⁶ Ghə̀ŋ lyɨ̀ əbyɨmə ə ghəŋə ə ghaʼa to nə̀ nkɨ̀ ghòŋ a ghə̀ nə̀ nkəŋtə aghoŋ yi a Deblə̀ ə̀ tèmlə ghə̀ bole to nə̀ zhiʼ.

¹⁷ Ghə̀ŋ lyɨ̀ əbwoŋə yì a Nyìngòŋ ə bwoŋsə ghə̀ŋ a nə̀ əsòʼ ghòŋ ə lyɨ̀ fənyì fifə a kəzhwì kə əku. Fənyì a fifə diʼ to ə̀ əgaʼa Nyìngòŋ.

¹⁸ Ghə̀ŋ sə ne nyʉ̀ a venə, ghə̀ŋ ə njɨ̀mə̀ a Nyìngòŋ to məzhʉ̀ ə tsèm, ando kəzhwì kə wen kə ə tisə ghə̀ŋ. Jɨ̀mə̀ la Nyìngòŋ gyamtə ghə̀ŋ no gho a ghə̀ŋ kəŋ. Ghə̀ŋ ə̀ tùʼmə̀, kə wìʼ ne ə lyesə ə jɨ̀m. Ghə̀ŋ mbe ə njɨ̀mə̀ a viʼi Nyìngòŋ no və tsèm.

¹⁹ Ghə̀ŋ ə njɨ̀mə̀ a mò la Nyìngòŋ əku kənyʉ̀ ə ma shə̀ʼtə̀ a zhʉ a ma kəŋ ə gaʼa, ma kɨ kənyʉ̀ ki a ma zi mà gàʼ, la ma sə shə̀ʼtə̀ ntɨm ə jùŋ yi a viʼi ko kɨ ma nshə̀ʼtə̀ ko ma fwàynə̀ kəfo.

²⁰ Ma diʼ mu və tɨm la mà vi ə shə̀ʼtə̀ ntɨm ə jùŋ a ghèn no tèbe ando, ma diʼi luwen a nfɨŋ. Ghə̀ŋ njɨ̀mə̀ la mà ə̀ shə̀ʼtə̀ to ando ma diʼi ə̀ nshə̀ʼtə̀, ko ma fwàynə̀ tebè kəfo.

Ətoŋtə ə mwetəghə

²¹ Ma tɨmə Tikikùs, ghə̀ a shə̀ʼtə̀ no tèbe ghò a ghə̀ŋ ando ghə̀ŋ kiʼi soʼgho kumə mò nə̀ kənyʉ̀ ki a ma ne. Yès ə kòŋ wen no akàyn. Ghə̀ diʼ to no lèmə̀ vəghəŋ a byɨmə, shwèʼè a Bobo to no nə̀ ətyɨm ə wen ə tsèm.

²² A diʼ kənyʉ̀ kikə a ma tɨmə wen a ghə̀ŋ alə ndi ghə̀ vi ə shə̀ʼtə̀ soʼgho a ghə̀ŋ kumə yès, be lɨ̀msə̀ ghə̀ŋ a ghə̀ŋ əbyɨmə.

²³ Nyìngòŋ ə, Tìʼ wenə Bobo Yesò Klistò ə ku mbwaʼmə a ghə̀ŋ ə ne la ghə̀ŋ əkòŋmə̀ təwen ə tyəŋtə be mbyɨmə to Klistò.

²⁴ Nyìngòŋ ə diʼi ətyɨm ə jùŋə ghə̀ a ghə̀ŋ vyi a ghə̀ŋ sə kòŋ Bobo vəghəŋ Yesò Klistò to kòŋ.