Efisyàns 3 - The New Testament in the Babanki language

Bol ə nshə̀ʼtə̀ ə viʼi ətɨm

¹ A diʼ to byìʼì ntsèntə̀ ə vəghəŋ a ghèn a ma jɨ̀mə̀ a Nyìngòŋ ə kùmə̀ ghə̀ŋ. Ma diʼ wù ə nfɨŋ byìʼì shwèʼ yì a Yesò Klistò kù a mò la mà ə shə̀ʼtə̀ ntɨm ə jùŋ a ghə̀ŋ viʼi ətɨm.

² Ma kɨli la ghə̀ŋ zhʉ̀ li ando Nyìngòŋ ə ndiʼ ətyɨm ə jùŋə a mò ə ku shwèʼ a ghenə la mà ne a ghə̀ŋ, a ghə̀ŋ njùŋ.

³ Ənyʉ̀ a venə diʼ ə nyʉ̀ lyomtəvə vyi a Nyìngòŋ ə mbaʼtə li ə ghʉ̀, a sə kɨ to wen, ə diʼi làynsə a mò, mà sə nyòʼ a ghə̀ŋ to kətemə.

⁴ Ghə̀ŋ a dzàŋ nyʉ̀ a venə no zhʉ̀ko ə yenə kɨ la ma kɨli nyʉ̀ ə lyomtəvə a vyi a Nyìngòŋ ə baʼtə̀ kumə Klistò a wìʼ kò kɨ.

⁵ A diʼ nyʉ̀ ko andiʼ la Nyìngòŋ ndiʼi li a viʼi ambì. Nyìngòŋ ə lyɨ kəzhwì kə Ŋwoʼkə ə wen ə nè la kə diʼ laynsə nyʉ̀ venə a viʼi ə ntɨm ə wen nə̀ nshə̀ʼtə̀sə.

⁶ Kənyʉ̀ kə kaynəkə a kì a və ə mo fa ambì ə diʼ la, viʼi ə ətɨm vyi a və byɨmə ntɨm ə jùŋ lu tsèntə zhɨ̀ fòyn ə Nyìngòŋ wenə viʼi Islel ə be tsèntə diʼ əbàs to a ntìntìn əwèn ə mùʼ, be diʼ lù tsèntə ə kiʼi mbwaʼsə yì a Nyìngòŋ ə ghʉ li chò fa a Yesò Klistò.

⁷ Ma ə nzìtə̀ shə̀ʼtə̀ ə ntɨm ə jùŋ a ghèn mu à ku Nyìngòŋ əku kədyòʼ kə wen la mà nè. Nyìngòŋ ne alə̀ byìʼì ətyɨm ə jùŋə ghə̀ ə wen.

⁸ No tebe ando ma nko kwʉ̀ʼ ə nzaʼ a diʼ nə̀ viʼi vətsevə a ntìntìn viʼi Nyìngòŋ, Nyìngòŋ mbe kù ji a mò ə ne la mà ngàʼà a viʼi ətɨm, shə̀ʼtə̀ ə mbwaʼsə yì a Yesò Klistò ə ku a viʼi,

⁹ be shə̀ʼtə̀ diʼ laynsə ji yì a shwèʼ ə kaynə ghə̀ Nyìngòŋ a ghenə nə̀ jèʼe fa tsù a no ndò. Nyìngòŋ yi a ghə̀ shɨtə əfo ə tsèm ə nko ndiʼi a no wìʼ fa viʼi ambì.

¹⁰ Nyìngòŋ ə ne alə ndi kəzhwì nə̀ adyòʼ vyi a və tàynkə̀ chò fa kaŋ ə yenə ətof ə Nyìngòŋ yì a ghə̀ diʼi to a jisə a jisə.

¹¹ Nyìngòŋ ə nè ali to ndə̀ŋndəŋ ando ghə̀ mbaʼtə li əghʉ la kə fʉ̀ ali ə chò fa Bobo vəghəŋ Yesò Klistò mibu ghə̀ shɨtə mbyi.

¹² Əbyɨmə ə vəghəŋ ə̀ tsentə yì a vəghəŋ ə kiʼi vəghəŋ və Klistò ne li la vəghəŋ ə diʼ mù və zizi və sə dyʉ̀ a Nyìngòŋ ko və lu fwàynə̀ tebè kəfo, kɨ nəmwèʼè la ghə̀ a shisə vəghəŋ.

¹³ A lə kənyʉ̀ kì a ma gaʼa a ghə̀ŋ la kə ghə̀ŋ a bwaʼ byìʼì ngəʼ yì a ghə̀ŋ zhʉ̀ la ma yenə byìʼì ghə̀ŋ. Ghə̀ŋ diʼ ə kɨ la nyʉ̀ a vyi ə diʼ to ghə̀ŋ a njùŋ.

Bol ə jɨ̀m a viʼi Efesùs

¹⁴ A le kənyʉ̀ kì a kə tə ne ma gwuʼtə̀ alwi ə ghomə ashɨ ə Tìʼ ə sə jɨ̀mə̀ to jɨmə a ghə̀ŋ,

¹⁵ a diʼ wen yi diʼ Tìʼ ə ngwaʼa ngəŋsə yi a sə diʼ akàŋ be diʼ a nse no sətsèm.

¹⁶ Nyìngòŋ kiʼi mbwaʼməsə no nànto. A le kənyʉ̀ kì a ma jɨ̀mə̀ la ghə̀ ku kədyòʼ a ghə̀ŋ ə tətyɨm chò fa wen a kəzhwì,

¹⁷ ndi əbyɨmə ə ghəŋə nè Klistò ə nshɨtə tsi a ghə̀ŋ tətyɨm. Ma jɨ̀mə̀ la əkòŋ ghəŋə a Nyìngòŋ ne ghə̀ŋ kòŋ təwen ə təŋtə kwi ə to tò nə̀ fəkoʼ a ghaŋ yi dyʉ̀ li a nse be diʼ to nə̀ ngə̀ŋ a kəchɨ ki ə to a nse.

¹⁸ Ma jɨ̀mə̀ ndi ghə̀ŋ ə̀ tsèntə tofə kwʉ̀ʼʉ̀ vye viʼi Nyìngòŋ vətsenəvə kɨ la əkòŋ ə Klistò ə ghoʼo to jisə tsèm a ghə̀ ko lu mè.

¹⁹ Ghə̀ŋ kɨ la əkòŋ wen ghenə cho li ətof, ndi ghə̀ŋ lywin ə kwʉ̀ʼ ə ntsi ntsìnə̀ Nyìngòŋ to ətsèm.

²⁰ Luwen əkuʼsə ə dyʉ̀ a Nyìngòŋ yi a ghə̀ kiʼi kədyòʼ ə ku fo, və ghoʼo no nànto, chò vyi a vəghəŋ loyn li a jɨ̀m, nə̀ vi a vəghəŋ zizi ko və lu kwòʼtə̀ ə loyn. A diʼ shwèʼ, nə̀ kədyoʼkə wen kì a kə diʼi a vəghəŋ a tyi wen.

²¹ Əbayn ə ghoʼo ghə̀ Nyìngòŋ sə vi faŋ to faŋ a viʼi və byɨməvə vyi a və diʼ wenə və Yesò Klistò to məzhʉ̀ ə tsèm! Amèyn.