2 Timotì 4 - The New Testament in the Babanki language

Bol ə sensə la Timotì kwiʼi ətyɨm

¹ Yesò Klistò lu vi to nə̀ fòyn ə soʼ viʼi vyi a və bu tsi nə̀ vi a və pfʉkə li. Byìʼì wokenkə, mà sə gàʼa à wù no nə̀ kədyòʼ kə, ashɨ nə̀ Nyìngòŋ nə̀ Yesò Klistò la,

² wù ə nshə̀ʼtə̀ ntɨm ə jùŋ à viʼi no mənzhʉ̀ ntsèm. Wù nshə̀ʼtə̀ tò shə̀ʼtə̀ kò viʼi ə kòŋ ə zhʉtə, kò və faŋ ke kòŋ. Wù diʼi laynsə kənyʉ̀ ki a viʼi ə nè byɨsə, ə gàʼ la kə vəwenə bè nè, ə sensə la vəwenə ə nzhʉ ənyʉ̀ a venə. Wù sə ə ziʼì vəwenə, wù ə shɨtə ziʼi nə̀ ətyɨm ə zhʉtə ghə̀.

³ Mà gàʼà alə byìʼì ando ə zhʉ ne vì, a viʼi kə be ne kòŋ ə nzhʉtə əziʼi yi a ghə̀ diʼì ziʼi nəmwèʼè, alì ə bòŋsə kəŋ ə zhʉ ənyʉ̀ vyi a vəwenə kòŋ. Vəwenə ne jèʼè gubtə̀ ndìʼsə̀sə sə vi ə ziʼi ənyʉ̀ a venə à vəwenə.

⁴ Vəwenə nə̀ ghʉsə kənyʉ̀ ki a kə diʼì nəmwèʼè ə nə̀ bòŋsə zhʉtə mətitì mə zɨmə.

⁵ Fà wù, wù dìʼ ə ghaʼa wenə wu, ə kwiʼi ətyɨm ə bwəʼ ngəʼ wù ə nshə̀ʼtə̀ dyʉ̀ nə̀ ntɨm ə jùŋ, bè nè ə shwèʼ ə wu no tsèm a nə̀ wù ə shyèʼ ə Nyìngòŋ.

⁶ Mà kòŋ la wù ə nè tò alə̀ byìʼì ando ma diʼ mu à faŋ tò fə shitə fə ə zhʉ alə ə Nyìngòŋ lyɨ̀ mò a nə̀ kəku kə. Əzhʉ ə pfʉ ə mò boʼsə li.

⁷ Ma shwèʼè li nkwʉʼ tò no a nkàyn. Ma shwèʼ li ə zaʼa a kəlyɨŋ yi a və kəŋ, bè shɨtə ghaʼ əbyɨmə ə ghomə.

⁸ Mà sə kə̀ʼtə̀ tò əmòʼtə ntsìnə̀ ə tɨmə ə̀ mò luwèn, Bobo vəghəŋ yi a ghə̀ soʼo viʼi a ji tɨmə ə lu ku əmòʼtə a ghenə à mò a kətsi kə nsoʼ. Ghə̀ ko lə ku tò à mò, ghə̀ lu be ku te be à viʼi vyi a və tə ə nkə̀ʼtə̀ məvi ə wen nə̀ ə koŋə.

Bol ə sensə Timotì la ghə̀ ne ənyʉ̀ tsenəvə à wen

⁹ Mwòmsə no nə̀ kədyòʼ kə ə zàŋsə ə vi ə yen mò,

¹⁰ byìʼì ando Demàs kòŋ li əfo mbyi luwèn, ə nyɨŋ moʼtə mo ə dyʉ̀ a Tèsàlonikà. Klesèns mbe lu ə ndyʉ̀ a Gàlesìyà, Taytùs ə dyʉ̀ a Dalmatiyà.

¹¹ A faŋ tò Luk a shə̀ yo wen. Wù sə ə nvì wu vi ve Mak ndi ghə̀ ə ngyàmtə̀ mò a mò a shyèʼ.

¹² Ma tɨm li Tychicùs a Efesùs.

¹³ Wù sə ə nvi, wu vi nə̀ kəgwʉnə ə kom kì a mà tə mòʼtə̀ à Kalbus a Tuwas lì. Vi nə̀ və ŋwàʼlə̀ vwomə vi a və lemtə lemtə̀ lì, no te nə̀ yi a və shìtə nə̀ gwʉ̀ nyàm lì.

¹⁴ Alèksandà a ghə̀ tì kəlàm tə mwòm kənyʉ̀ à mò wen kə fànsə̀ no nànto. A ne loʼ to Bobo loʼ wen byìʼì kənyʉ̀ a kì.

¹⁵ Nkàyntə̀ wù be diʼ tùʼmə̀ byìʼì wen byìʼì ando ghə̀ tə ə ngàʼà ənyʉ̀ no a kədyòʼ, ko və boŋ byìʼì ntɨm ə jùŋ yì a vəghəŋ ə ziʼi.

¹⁶ A ə ndiʼ ando mà tɨmə akəshi kə nsoʼ ə gàʼ ə shi kətʉ komkə ambì kətsi, viʼi nyɨŋkə tò nyɨŋkə, no wìʼ nko faŋ ə tomsə ə mò. Mà jɨ̀mə̀ la Nyìngòŋ lyèsə ku vəwenə ando vəwenə tə nyɨŋ mòʼtə̀ mò.

¹⁷ Bobo ə nlu li tɨmə ə tomsə mò la ə mà kiʼi kədyòʼ ə shə̀ʼtə̀ mwetə ntɨm ə jùŋ à viʼi ətɨm vətsèm. Ghə̀ mbè ə bwòŋsə̀ mò fa kəvu ə pfʉ.

¹⁸ Mà kɨ la Bobo a mbwòŋsə̀ mò no fa nyʉ̀ byɨvə no tsèm ə bè lyɨ̀ mò ə mà shɨ̀tə̀ jèʼ kwen akəshi kə fòyn ə̀ wen a kaŋ. Viʼi ə nkuʼsə wen no məzhʉ ntsèm. Amèyn.

Bol ə ku toŋtə ə kəmwetə à viʼi və byɨməvə

¹⁹ Toŋtə Blisilyà wenə lɨmə wen Akwilà nə̀ viʼi ngwaʼ ngə̀ŋ nə̀ Onèsìpholùs à mò.

²⁰ Elastùs tə ə faŋ a ntə̀ʼ Kolìn. Mà tə sə ə lu ə moʼtə Tlophimùs a ntə̀ʼ Miletùs, ghə̀ kwaʼa kwaʼa.

²¹ Mwòmsə̀ no nə̀ kədyòʼ kə vi mibu ə byɨ̀ŋ chʉ. Ebulùs nə̀ Budèns nə̀ Laynùs nə̀ Klodyà no nə̀ viʼi və byɨməvə no və tsèm gàʼ la mà toŋtə ə wù.

²² Bobo a gyàmtə̀ wù. Nyìngòŋ ə diʼ ətyɨm ə jùŋ ghə̀ no a ghə̀ŋ və tsèm.

« Roimhe

Air adhart »

Lean sinn:

Ceanglaichean taic

Sanasan