2 Kolìntyàns 6 - The New Testament in the Babanki language

¹ A nə̀ viʼi a və shwèʼè wenə və Nyìngòŋ amuʼ, yès ə sensə ghə̀ŋ la ando Nyìngòŋ ə diʼ li ə boŋ tyɨm ə wen a ghə̀ŋ lə, kə ghə̀ŋ a nè ə boŋ tyɨm ə wen a ghenə lè to kədyàŋ.

² A Nyìngòŋ ə gaʼa li la: “A na ndiʼ ando əzhʉ̀ kwʉʼʉ li mà zhʉtə kənyʉ̀ ki a wù gaʼa ə gyàmtə̀ wù, Kətsi kə kwʉ̀ʼ la mà bwoŋsə wù, ma bwoŋsə”. Ghə̀ŋ zhʉtə! Luwen diʼ tò nò əzhʉ̀ yi a Nyìngòŋ ə ghʉ̀. Layn diʼ kətsi kì a zizi ghə̀ bwoŋsə ghə̀ŋ.

³ Yès ə ko kòŋ ə nè no kənyʉ̀ kə mùʼ ə kə byɨbsə shyèʼ ə yèsə. Ndì kə wìʼ a yen no kənyʉ̀ kəbyɨkə a yès a tyi shwèʼè.

⁴ Yès ə boŋsə diʼi to la yès diʼ viʼi shyèʼ ə Nyìngòŋ no a gho a yès ə nè. Yès ə wensə a tyi ngəʼ shisə a yès ə yenə, nə̀ a nyʉ̀ a və to, nə̀ a tənki tə nyʉ̀ a tovə ə tsenəvə və fʉ yès.

⁵ Və ghòmə li yès ə nshwin yès a nfɨŋ, ə tɨm ənòyn ə viʼi la və tsɨblə nə yès. Və nè li yès shyèʼ chò kədyòʼ ə kyeskə; yès tsì li mətsi mətsenə nə̀ jɨ̀ŋ, ko mbʉ̀nə ə ku əshɨ yesə.

⁶ Yès diʼi li la yès diʼ viʼi Nyìngòŋ byìʼì ando yès ə tsì ətsìnə̀sə laynəsə, kɨ kənyʉ̀ ki a kə diʼi nəmwèʼè, wensə, tuʼmə, kiʼ Kəzhwì kə Ŋwoʼkə be kòŋ viʼi vətsenvə nə̀ tyɨm ə yèsə no tsèm.

⁷ Nyìngòŋ ə ku li kədyòʼ a yès, yès sə shə̀ʼtə̀ to kənyʉ̀ ki a kə diʼi nəmwèʼè a viʼi. Əfo ghòŋ vi a yès ə soynə nə̀ wenəvə be kɨŋtə təwen ə tyestə tsu diʼ ando yès ə tsi a jisə tɨməsə.

⁸ Viʼi vətsenvə gumlə yès, vətsevə gàʼà nyʉ̀ ə byɨvə kumə yès. Viʼi vətsenvə ə bwomsə yès, vətsevə telə telə. Yès gàʼà to nəmwèʼè no tèbe ando və lyɨ yès a viʼi kəbaŋ.

⁹ Və ki yès sə və ko kɨ, ali shɨtə kɨ yès. Viʼi yenə yès a viʼi və pfʉkəvə ali yès tsi dyʉ̀ to dyʉ̀. Və nyàblə̀ nə̀ yès, ali ko wìʼ zizi ghə̀ zhwi yès.

¹⁰ Yès ə saŋlə to saŋlə no tèbe a tyi ngəʼsə. Və lyɨ yès a viʼi kəfem ali yès ne viʼi əghoʼ a vəwenə əbyɨmə. Yès diʼ tò sə yès əko kiʼi kəfo, ali kiʼi to əfò ə tsèm.

¹¹ Yès ə gàʼà li a ghə̀ŋ a viʼi Kolìn to a ndayn, be kòŋ ghə̀ŋ no nànto.

¹² Yès ə kòŋ ghə̀ŋ no nànto. A diʼ ghə̀ŋ a ghə̀ŋ ko kòŋ tebè yès.

¹³ Mà sə boŋsə gàʼà a ghə̀ŋ luwen a nə̀ vù vwomə a byɨmə la ghə̀ŋ ə boŋsə kòŋ yès tò ndə̀ŋndəŋ ando yès ə kòŋ ghə̀ŋ.

Kə ghə̀ŋ nè ntsèntə̀ viʼi a və ko byɨmə

¹⁴ Kə ghə̀ŋ ne nyʉ̀ʼ, tsèntə̀ ghə̀ŋ və viʼi vyi a və ko byɨmə Nyìngòŋ, diʼ la wye vəwenə diʼ ndə̀ŋndəŋ. Ghə̀ŋ kɨli la njùŋ ə ko kiʼ tò kənyʉ̀ ə ne wenə mbyɨ, ko əbayn kiʼi kənyʉ̀ ə nè wenə kəbəŋ kəfenəkə.

¹⁵ A lə diʼ gho a ghə̀ zizi ghə̀ ne Yesò wenə Deblə̀ ə diʼ a kənyʉ̀ kə mùʼ a? Wu byɨmə kiʼi gho a kənyʉ̀ kə mùʼ wenə viʼi a və ko byɨmə a Nyìngòŋ a?

¹⁶ Ngə̀ŋ Nyìngòŋ ə ko kiʼi kənyʉ̀ ə nè wenə nshəʼsə. Ghə̀ŋ kɨli la vəghəŋ diʼ tò nə̀ ngə̀ŋ Nyìngòŋ yi a ghə̀ tsi, to ndə̀ŋndəŋ ando ghə̀ ngàʼa li la: “Mà ne ntsi a vəwenə a ntìntìn, diʼ yo vəwenə; Mà na diʼ Nyìngòŋ ə vəwenə, vəwenə diʼ viʼi vwomə.”

¹⁷ A le kənyʉ̀ ki a Bobo ə gàʼa la: “Ghə̀ŋ fʉ̀ vi fa a ntìntìn ə viʼi və byɨvə ə nti nəkwoŋ. Kə ghə̀ŋ kumə kəfo kì a kə ko diʼ kəfo kə ŋwoʼkə, ndi mà shisə ghə̀ŋ,

¹⁸ ə ndiʼ Tìʼ a ghə̀ŋ, ghə̀ŋ diʼ vunə vwomə. A gàʼà Bobo, ə Tìʼ adyòʼ no tsèm.”

« Roimhe

Air adhart »

Lean sinn:

Ceanglaichean taic

Sanasan