2 Kolìntyàns 5 - The New Testament in the Babanki language

Əwenə fighə

¹ Vəghəŋ kɨ la və sətsen ə byɨbsə fəngə̀ŋ fə kətsoʼ kə wèn fenfə a kəzhwì kə vəghəŋ kə tsì tsu a nse ashə lə̀, Nyìngòŋ a ku ngə̀ŋ kəzhwì a vəghəŋ akàŋ ko ndiʼ la və bwom nə̀ avu, ghə̀ diʼ ə tsì ə faŋ.

² Vəghəŋ tsi a nse ashə̀, nyʉ̀ ə ku ngəʼ a vəghəŋ, vəghəŋ ə kòŋ la Nyìngòŋ ə zaŋsə ku ngə̀ŋ ə fi vəghəŋ akàŋ.

³ Vəghəŋ ə kòŋ ə zàŋsə ə kiʼi əwèn ə fighə na ghenə ndi vəghəŋ lù faŋ kò və lə be ə gho əwèn no kətsi kə tsenkə.

⁴ Vəghəŋ tsi a wen ashə̀, dì to dì byìʼì ngəʼ yì a vəghəŋ yenə. A ko diʼ la vəghəŋ kəŋ la Nyìngòŋ ə lyisə əwèn ghenə a vəghəŋ tsì tsu, vəghəŋ boŋsə kòŋ to la ghə̀ ku əwèn ə fighə a vəghəŋ a ghə̀ zizi ko ghə̀ lu pfʉ, ndi ghə̀ lyɨ̀ kəshi kə wèn ghenə.

⁵ A bàʼtə Nyìngòŋ la kə ndiʼ a ji a ghèn, ə ku kəzhwì kə wen a vəghəŋ ə diʼ nəmwèʼè la vəghəŋ lu kiʼi əwèn ə fighə a ghenə.

⁶ A le kənyʉ̀ ki a vəghəŋ to tò to. Vəghəŋ kɨ la vəghəŋ sətsèn ə nkiʼ əwèn ghenə a nse a shèn, mu vəghəŋ ko tɨmə diʼ a ben ə Bobo.

⁷ Kə diʼ alə̀ byìʼì ando vəghəŋ ə tsì byìʼì ə byɨmə yì a vəghəŋ ə kiʼi, a ko diʼ byìʼì nyʉ̀ a vəghəŋ ə yenə.

⁸ Nəmwèʼè, vəghəŋ to tò to a vəghəŋ a byɨmə, boŋsə kòŋ ə moʼtə əwen ghenə ə dyʉ̀ ə ntsi a ben ə Bobo.

⁹ A le kənyʉ̀ ki a vəghəŋ ə mwomsə no nànto ə nè nyʉ̀ vyi a və bòŋ a Bobo, kò vəghəŋ diʼ a wèn ashə̀, kò vəghəŋ kə be kiʼ ə wèn a ghenə.

¹⁰ Kə diʼ alə̀ byìʼì ando no vəghəŋ vətsèm lu tɨmə ashɨ ə Yesò ə ghə̀ soʼ vəghəŋ. Ghə̀ lu loʼ no ndò to nyʉ̀ yi a ghə̀ tə nè a nse, kò à tə ndiʼ nyʉ̀ ə byɨvə, kò à tə ndiʼ ə jùŋə və.

Yesò mpfʉ̀ ə nè viʼi bwensə vì a Nyìngòŋ

¹¹ Yès ə fwaynə Bobo byìʼì ando və kɨli la kə bòŋ la və nfwaynə wen. A le kənyʉ̀ ki a yès ə sensə viʼi la və vi a wen. Nyìngòŋ kɨ no tèbe ghò kumə yès, ma be kwoʼtə la ghə̀ŋ be shətə kɨ yès a ghə̀ŋ a tətyɨm.

¹² Kə ghə̀ŋ a nkwoʼtə la yès be kəŋ ə diʼi a mfi la yès ə kwʉ̀ʼʉ̀ li ə ndiʼ viʼi ntɨm. Yès ə kòŋ la ghə̀ŋ nkɨ kənyʉ̀ ki a ghə̀ŋ diʼi ə nsaŋlə̀ kumə yès byìʼì kəwenkə ndiʼ ghə̀ŋ kɨ ji ə bwensə viʼi vyi a və kumə kədyʉ̀ʼ to byìʼì ji yì a və yenə wìʼ fa tsù, ko və kɨ ətyɨm ə wen.

¹³ Ətof ə yèsə nlè tebe lè to ando viʼi vətsenvə ə gàʼa, ko ghə̀ nti to nkàyn a ndiʼ fambwo yèsə kù li təwen ə tyestə a Nyìngòŋ ə mwetə to mwetə. Alì yès diʼ to no a yès a ətof, yès diʼ alə a ghə̀ŋ a jùŋ.

¹⁴ Yès nè shwèʼè ghenə mu yès zizi ko yès sə lu faŋ ke nè byìʼì ando Yesò ə kòŋ yès. Yès ə kɨ la ghə̀ mpfʉ̀ tò a viʼi vətsèm, kə diʼi la viʼi vətsèm ə lu ə pfʉ̀ boʼsə a wen.

¹⁵ Yesò ə mpfʉ̀ to a viʼi və tsèm ndiʼ viʼi sə ntsi ko və be ntsi a ji yi a vəwenə kòŋ, ali ntsi to byìʼì Yesò. Kə diʼ alə̀ byìʼì ando Yesò mpfʉ̀ byìʼì vəwenə və bwensə lùsə̀ wen fa pfʉ̀.

¹⁶ Ə zìtə̀ fa luwen, yès ko be a nlyè wìʼ fa ji yi a viʼi mbyi lyè fa tsu. Kə diʼ to no nəmwèʼè la, yès ə nlyè Yesò a ji a ghèn, ali sə diʼ ko yès mbe nlye ali.

¹⁷ Wìʼ sətsèn ndiʼ wenə Yesò a kənyʉ̀ kə muʼ, mu ghə̀ sə diʼ wu fi, mu ntsìnə̀ mu wen ə mè li, ghə̀ sə kiʼi ghə̀ fi.

¹⁸ Ənyʉ̀ a venə no tsèm diʼ mu à nè Nyìngòŋ a vəghəŋ, ə bwensə bàtə ntsìnə̀ vəghəŋ, vəghəŋ və wen. Ghə̀ ne alə̀ chò fa Yesò. Ghə̀ ku li shwèʼè a ghenə ə mbaʼtə ntsìnə̀sə viʼi a yès.

¹⁹ Kənyʉ̀ ki a yès gàʼa diʼ la Nyìngòŋ ə mbaʼtə ntsìnə̀sə viʼi mbyi wenə vəwenə byìʼì kənyʉ̀ ki a Yesò ə nè. Ghə̀ lyesə li nku mbyɨsə viʼi ə be ku ntɨm a ghèn a yès viʼi ntɨm la yès ə nshə̀ʼtə̀ la ghə̀ kəŋ la viʼi vətsèm baʼtə̀ ntsìnə̀sə vəwenə, wenə və Nyìngòŋ.

²⁰ A lə ji yì, a yès lyɨ kəshi kə Yesò, Nyìngòŋ sə gàʼà chò fa yès. Yès sensə ghə̀ŋ a əzhiʼ ə Yesò la ghə̀ŋ baʼtə̀ ntsìnə̀ shəŋsə wyè və Nyìngòŋ.

²¹ Nò tèbe Yesò fa wen a ngeŋ ə ko ne mbyɨ ali Nyìngòŋ ə lyɨ̀ wen a wu mbyɨ ndiʼ vəghəŋ chò fa wen ə nti a nkàyn ashɨ Nyìngòŋ.

« Roimhe

Air adhart »

Lean sinn:

Ceanglaichean taic

Sanasan