2 Kolìntyàns 4 - The New Testament in the Babanki language

Ghoʼ kəzhwì a tyi vəntòyn və kətsoʼ

¹ Ando Nyìngòŋ ə kusə li shinsə a yès nku shyèʼ ghənə la yès ə nè, yès zizi ko və lu be bwaʼ ə nè.

² Yès ə tensə li no nyʉ̀ ə kətʉ kədiʼkə nò tsèm vyi a və nyoʼtə nè. Yès ko lobtə wìʼ, ko yès kaʼsə kənyʉ̀ kə Nyìngòŋ. Yès ə boŋsə gaʼa to kənyʉ̀ kì a kə diʼ nəmwèʼè ashɨ Nyìngòŋ, ə diʼi nəmwèʼè a viʼi la yès diʼ tò nò viʼi və juŋəvə.

³ Kə le yi ndiʼ tèbe la kəfo kə sətsèn be chiʼtə no tèbe ətof wìʼ la kə ghə̀ zhʉ̀ kɨ ntɨm ə jùŋ yì a yès ə shə̀ʼtə̀, à ne diʼ tò wìʼ a ghə̀ le le.

⁴ Viʼi a və ko byɨmə ko zhʉ̀ kɨ kənyʉ̀ byìʼì ando Satan a ghə̀ soʼo mbyi ghèn kəŋtə li tətof tə vəwenə la kə vəwenə byɨmə. Ghə̀ nè alə̀ la kə vəwenə yen əbayn yì a ntɨm ə jùŋ Klistò a ghə̀ diʼ kənfɨsə kə Nyìngòŋ ə vi nə̀ wenə ghə̀.

⁵ Ghə̀ŋ ə kɨ la, yès zhʉsə nshə̀ʼtə̀ ntɨm ə jùŋ a ghèn, ko yès nə nshə̀ʼtə̀ kumə təwen tyetə. Yès ə shə̀ʼtə̀ to la Yesò Klistò diʼ Bobo, yès ə be ku wenə yèsə a viʼi shyèʼ a ghə̀ŋ byìʼì wen.

⁶ Nyìngòŋ ə nshɨtə mbyi ə gàʼ la, “Əbayn ə vi a ntìntìn kəbəŋ kə fenəkə.” Nyìngòŋ a ghèn ə nè li la əbayn ə vi a vəghəŋ a tətyɨm, ə diʼi əbayn ə wen a vəghəŋ, a diʼ yi a vəghəŋ ə yenə a kə̀ʼ ə̀ Yesò.

⁷ Alì yès vyi a və kiʼi əghoʼ kəzhwì a ghənə a yès a təwèn a tə diʼ to nə̀ vəntòyn və kətsoʼ a və zizi və pfʉkə, ə diʼ la kədyòʼ kə ghoʼokə kiʼi Nyìngòŋ, a ko kiʼi yès.

⁸ Ngəʼ sə vi a yès to a jisə a jisə ali, ko sə zizi sə lu to chò yès, a vì zhʉ tsenə ghə yès sə fɨŋmə̀ no nànto ali ko yès zizi yès maʼa shwèʼè ə yèsə.

⁹ Viʼi nə̀ ntsuʼ kəghʉ ə kyeskə ali ko Nyìngòŋ ə lu maʼa yès. Vəwenə nə̀ nyàblə̀ nə̀ yès ali ko vəwenə zizi və zhwi yès.

¹⁰ Yès zi yès ə pfʉ̀ no zhʉ̀ko, to ndə̀ŋndəŋ ando Yesò mpfʉ̀, ndi viʼi ə yenə la yès ə kiʼi ntsìnə̀ Yesò.

¹¹ Yès ə tsi tèbe tsì, diʼ to chʉ̀ əpfʉ̀ byìʼì Yesò. Yès ə diʼ a ji na ghèn ndi viʼi ə yenə ntsìnə̀ Yesò a yès kətsoʼ kə wen a kə lu pfʉ̀ lə.

¹² A lə ando yès diʼ no zhʉ̀ko, nyʉ̀ʼ to chʉ̀ əpfʉ̀ ndi ghə̀ŋ nkiʼi ntsìnə̀ Yesò.

¹³ Və nyòʼò li a Ŋwàʼlə̀ Nyìngòŋ la, “Ando mà byɨmə, ma diʼ ə shə̀ʼtə.” Yès be byɨmə a Nyìngòŋ ə be sə shə̀ʼtə̀ kənyʉ̀ kə wen.

¹⁴ Yès diʼ ə nshə̀ʼtə̀ alə byìʼì ando yès ə kɨ la, Nyìngòŋ yi a ghə̀ nlùsə Bobo Yesò fa pfʉ̀ ə be lu lùsə vəghəŋ vi a və diʼi viʼi Yesò ə lyɨ̀ tsèntə ghʉ vəghəŋ a wen ashɨ.

¹⁵ Yès ə yenə ngəʼ a ghèn a ghə̀ŋ a jùŋ ndi Nyìngòŋ ə diʼi ətɨm ə jùŋə ghə̀ a viʼi kə ne viʼi to kədə̀ŋ nku kəzòŋ kuʼsə Nyìngòŋ.

Yès ə tsi to byìʼì əbyɨmə

¹⁶ A le kənyʉ̀ ki a yès ə ko bwaʼ ə nè shwèʼè a ghenə. Nò tèbe ando njòsə əwen ə yès sə bwaʼa dyʉ̀, Nyìngòŋ ə ku kədyòʼ a yès a tətyɨm to məzhʉ̀ ə tsèm.

¹⁷ Ngəʼ shisə a yès ə yənə luwen diʼ to nfam, diʼ to fəshyinə fə zhʉ̀. Ngəʼ a sensə baʼtə̀ yès a jùŋ ə ghoʼo yi a ghə̀ vi, ko ndiʼ la ghə̀ lu mè, mu və zizi ko və lu ə shəʼmə ngəʼ a sensə nə̀ jùŋ ayi.

¹⁸ A lə kənyʉ̀ a vəghəŋ ko ki tebè nyʉ̀ a və yenə. Vəghəŋ boŋsə ki dyʉ̀sə̀ nə̀ əfo, a və ko yenə. Ghə̀ŋ kɨli la ə nyʉ̀ vyi a vəghəŋ yenə lu me, ali əfo vyi a vəghəŋ ko yenə ko diʼ lù mè.

« Roimhe

Air adhart »

Lean sinn:

Ceanglaichean taic

Sanasan