2 Joyn 1 - The New Testament in the Babanki language

¹ A nyòʼò mò ə chəʼ ngə̀ŋ ə̀ Nyìngòŋ nyòʼò ŋwàʼlə̀ ghèn à wùwì yì a Nyìngòŋ ə ntsuʼ li wenə vunə wen a mà kòŋə̀ no nəmwèʼè. A ko kòŋə̀ tò mò, viʼi vətsèm a və kɨ nəmwèʼè ə bè kòŋə̀ vəwenə,

² byìʼàndo nəmwèʼè a ghə̀ diʼì à vəghəŋ ə ntìntìn lu faŋ tò ghayn ə̀ mùʼ.

³ Tìʼ wenə Wàyn wen ə Yesò Klistò, a diʼ boŋə tyɨm, nə̀ kusə nshinsə bènə̀ mbwaʼmə à vəghəŋ, a vəghəŋ tsi a tyì nəmwèʼè benə̀ ə̀kòŋ.

Nəmwèʼè nə̀ ə kòŋə̀

⁴ Mà tə nsaŋlə̀ no nànto ando mà yenə vunə vyə vətsenvə və dzɨ̀mtə̀ nəmwèʼè tò ando Tìʼ ə̀ ngàʼà à vəghəŋ.

⁵ Mà mu sə sensə wù luwèn a wùwì la mà ko nyòʼò əsoʼ fighə à wù alì mà ku tò yi a vəghəŋ ə nzhʉ li fa kənzìtə: la vəghəŋ ə nkòŋmə̀ təwen tə vəghəŋ.

⁶ Nkàyntə̀ ə̀kòŋ diʼ la vəghəŋ ə nzhʉ təsoʼ tə wen. Əsoʼ aghenə diʼ la, ghə̀ŋ ə ntsi a ə̀kòŋ ando ghə̀ŋ ə nzhʉ li fa kənzìtə.

⁷ Viʼi ndzɨ̀ŋsə no vəghoʼo ə fʉ li sə jèʼè tò mbi tsèm à diʼ viʼi a və ko byɨmə la Yesò ə mvi li a nse a wèn ə wìʼ. Nki wìʼ ayi diʼ wù ndzɨ̀ŋsə be diʼ wù kəbàyn ə̀ Klistò.

⁸ Ghə̀ŋ tuʼmə la kə ghə̀ŋ nè lè kəfo kì a ghə̀ŋ shwèʼè, kəŋə kiʼi. Ghə̀ŋ ə bòŋsə̀ kəŋə jì əkiʼi ə zhùʼtə̀ ayi no tsèm.

⁹ A ndyʉ̀ tè ndò nə̀ mbì, ə faŋ ke ntsi ando əziʼi Klistò ə gàʼà, mu ghə̀ ko diʼ wenə Nyìngòŋ. A ntsi tè ndò ando əziʼi ayi gàʼà dìʼ wenə Nyìngòŋ be diʼ wenə wàyn.

¹⁰ A sətsèn wìʼ vi à ghə̀ŋ ke ə mvì nə̀ əziʼi aghenə kə ghə̀ŋ à shìsə wen ko toŋtə tè wen.

¹¹ A tòŋtə tè ndò tòŋtə wen mu ghə̀ tsèntə̀ nè nyʉ̀ byɨvə wenə̀ wen a muʼu.

Kəmwètə̀ kə gàʼ

¹² Mà kiʼi nyʉ̀ no ghoʼo ə gàʼ à ghə̀ŋ, alì mà ko a nyòʼ nyoʼo. Mà bòŋsə̀ kwòʼtə̀ əvi ghayntə ghə̀ŋ ə gàʼ à ghə̀ŋ tò nə̀ chʉ̀, ndi vəghəŋ ndìʼ nə̀ saŋlə ghoʼo ghə̀.

¹³ Vunə lèmə̀ ghə̀ŋ ə wùwì yì a Nyìngòŋ ə ntsuʼ li ə tɨmə toŋtə à ghə̀ŋ.