2 Bità 1 - The New Testament in the Babanki language

¹ A nyoʼo mò Saymun Bità nyoʼo ŋwàʼlə̀ ghèn. Ma diʼ wù ə shwèʼè ə Yesò Klistò be diʼ wù ə ntɨm ə wen. Ma nyoʼo ŋwàʼlə̀ na ghèn a ghə̀ŋ vi a ghə̀ŋ byɨmə li a Yesò Klistò to nə̀ yes. Əbyɨmə na ghenə ə boŋə a ghə̀ŋ to ndə̀ŋndəŋ ando ghə̀ bòŋə a yès. Yesò Klistò ə ne vəghəŋ kiʼi əbyɨmə na ghenə byìʼì ando ghə̀ diʼi wu kənyʉ̀ kətɨməkə. Ghə̀ diʼ Nyìngòŋ ə vəghəŋ mu ghə̀ mbwòŋsə̀ li vəghəŋ fa mbyɨsə.

² Nyìngòŋ ə ndiʼi ətyɨm ə jùŋə ghə̀ a ghə̀ŋ no nànto ə be kù mbwaʼmə a ghə̀ŋ byìʼì ando ghə̀ŋ kɨli wen be kɨ Bobo vəghəŋ Yesò Klistò.

Ji a viʼi və byɨməvə ə diʼ ə ntsi fa tsu

³ Nyìngòŋ ə ku li no tèbe ghò a vəghəŋ ə kəŋ ndiʼ vəghəŋ ə ntsi ntsìnə̀ ə laynə yì a ghə̀ kwʉ̀ʼ. Ghə̀ ku fo a venə chò fa kədyòʼ ə Nyìngòŋ a ji la ghə̀ nè li vəghəŋ sə kɨ Nyìngòŋ. Ghə̀ dzàŋə li vəghəŋ la və ntsi a ntìntìn əbayn ə ghoʼo ghə̀ ə Nyìngòŋ, jèʼè a jisə jùŋsə ə Nyìngòŋ.

⁴ A diʼ a ji na ghèn a Nyìngòŋ ə lwinsə li kənyʉ̀ kə ghʉkə kikə a ghə̀ ə nghʉ̀ la ghə̀ lu ku kəku kə jùŋ kə kə kaynəkə, la kə gyamtə vəghəŋ la vəghəŋ nyɨŋ fʉ̀ fa nyʉ̀ ə byɨvə yi a njòsə wensə ə vi nə̀ wenəvə a mbi ashə və byɨbsə viʼi, ə boŋsə tsi ntsìnə̀ Nyìngòŋ.

⁵ Ando ghə̀ŋ sə diʼ viʼi və byɨməvə lə̀, ghə̀ŋ mwomsə no nə̀ kədyòʼ kə ə nè nyʉ̀ ə jùŋə və ə kwʉ̀ʼsə əkwi a ghə̀ŋ a byɨmə. Ghə̀ŋ ə ntsi ntsìnə̀ ə jùŋ na ghèn, be tsi to nə̀ viʼi və tofəvə.

⁶ Ghə̀ŋ sə tsì to nə̀ viʼi və tofəvə, ghə̀ŋ be ə nghaʼa təwen ə təŋtə, kɨ ə nwensə̀, kə ghə̀ŋ a wensə to wensə ghə̀ŋ be tsi ntsìnə̀ yì a ghə̀ nè Nyìngòŋ ə saŋlə.

⁷ Ghə̀ŋ sə tsì ntsìnə̀ na yì, ghə̀ŋ ə kòŋ vəlemə, kə ghə̀ŋ kòŋ to vəlemə ali ghə̀ŋ be kiʼi kòŋ to a viʼi vətsèm.

⁸ Ghə̀ŋ ə sətsen ə kwi to kwi a ghə̀ŋ a ntsìnə̀sə a ji na ghèn, ghə̀ŋ a ne nyʉ̀ to ndə̀ŋndəŋ, be kuʼmə, ghə̀ŋ a diʼ la mə kɨ yì a ghə̀ŋ kɨli Bobo vəghəŋ Yesò Klistò ə ko le to kədyàŋ.

⁹ Alì viʼi vyi a və ko tsi a ji na ghèn diʼ to nə̀ viʼi a və fɨfə li, ko və yenə kəfo. Vəwenə diʼ mu və lyesə li la Nyìngòŋ ə nshʉ laynsə vəwenə fa vəwenə a mbyɨsə.

¹⁰ A le kənyʉ̀ ki a ma sensə ghə̀ŋ, a vəlemə, la ghə̀ŋ tuʼtə ə ghaʼ nyʉ̀ a venə və to ə diʼ la Nyìngòŋ ə tsùʼtə li ghə̀ŋ ə dzàŋ shisə la ghə̀ŋ ə diʼ viʼi Nyìngòŋ. Ghə̀ŋ yi nè alə̀, ko ghə̀ŋ be lu fəŋ fa ghə̀ŋ a byɨmə,

¹¹ a li Nyìngòŋ ə nè la ji bayn mwetə ndi ghə̀ŋ kwen akəshi kə əfòyn ə Bobo, ə Mbwòŋsə̀ vəghəŋ Yesò Klistò, a diʼ əfòyn mu ghə̀ faŋ li to ghayn əmùʼ.

Kənyʉ̀ ki a və nyòʼ ŋwàʼlə̀ ghèn byìʼì kəwenkə

¹² Ali, mà ndzə̀ŋtə̀ nyʉ̀ a venə to dzəŋtə a ghə̀ŋ no tèbe ando ghə̀ŋ ə kɨ li be diʼ mu ghə̀ŋ ghaʼ li nyʉ̀ a venə a və diʼi nəmwèʼè lə, və əto.

¹³ Kə diʼ no nkayn la mà ə ndzə̀ŋtə̀ ə nyʉ̀ a vyi a ghə̀ŋ zaʼa fa kətsi a mà lù pfʉ ndi ghə̀ŋ ə kwoʼtə.

¹⁴ Ma gaʼa alə̀ byìʼì ando Bobo vəghəŋ Yesò Klistò sə diʼ mù ghə̀ diʼi li nlaynsə a mò la, kəghaf ə komkə ko be dyə̀fə a nse ashen.

¹⁵ Kə le diʼi la ma mwomsə no nə̀ kədyoʼkə ə nè ndiʼ mà na pfʉ ghə̀ŋ bo nkwoʼtə nyʉ̀ avenə to kwoʼtə.

Bità ə shə̀ʼtə̀ la vəwenə yen li kədyòʼ kə Yesò to no fa vəwenə ngeŋsə

¹⁶ Ənyʉ̀ vyi a yès ə shə̀ʼtə̀ a ghə̀ŋ kumə məvi ə Bobo vəghəŋ Yesò Klistò nə̀ kədyoʼkə wenkə diʼ nyʉ̀ mu yès yen li to no fa yès a ngəŋsə. A ko diʼ mətitì mə zɨmə a wù ə tofə ə tsen shə̀ʼtə̀.

¹⁷ A ndiʼ ando tiʼi wen, ə Bobo Nyìngòŋ kùʼsə wen ə ne la ghə̀ kiʼi əbayn ə ghoʼo ghə̀, yès yen. Yès ə zhʉ li ando Nyìngòŋ ghə̀ŋ a ghə̀ kiʼi kədyòʼ no kə tsèm ə gaʼa ə gàʼa la, “Ghèn diʼ wàyn əkòŋ ə mò, ma saŋlə kumə wen no nəkwoŋ.”

¹⁸ Yès ə nzhʉ gɨ na ghèn to no fa yès a ngəŋsə ando yo vəwenə ndiʼ a kwi pfen ə laynə.

¹⁹ A lə kənyʉ̀ ki a kə nè vəghəŋ sə shətə kɨ to no kɨ la ntɨm yì a nshə̀ʼtə̀ sə ghoʼkəsə ə shə̀ʼtə̀ kumə wen ə ndiʼ to no nəmwèʼè. Ntɨm ayi ə diʼ to nə̀ kənkàʼtə̀ kə. Ghə̀ baynə a kəbəŋ kə fenəkə. Ghə̀ŋ ə zhʉ ntɨm ayi ndi kətsi kə ə lù kwʉʼ a Yesò yi a ghə̀ baynə to nə̀ chʉzhʉ ə saʼaghə ku əbayn ə wen a ghə̀ŋ tətyɨm.

²⁰ Ghə̀ŋ diʼ ə shɨtə kɨ no ji nə̀ nəkwoŋ la kənyʉ̀ kə tsen kə ko diʼ tebè a Ŋwàʼlə̀ Nyìngòŋ a nshə̀ʼtə̀ ə ghoʼo ə tsen ə nyòʼò to fa wen a ngeŋ.

²¹ Kə diʼ alə̀ byìʼì ando no tèbe kənyʉ̀ kə kò a və ə nyoʼo li a ŋwàʼlə̀ diʼ mu à ə̀ nshə̀ʼtə̀ kəzhwì kə Ŋwoʼkə Nyìngòŋ. Wìʼ ə ko ə nyoʼo kənyʉ̀ kə tsen kə byìʼì ətof ə ngeŋ ə wen.