1 Timotì 2 - The New Testament in the Babanki language

Bol ə shə̀ʼtə̀ jì yi a viʼi ə diʼ nkuʼsə Nyìngòŋ fa tsu

¹ Kənyʉ̀ kə to kə a ntìntìn ənyʉ̀ venə a ma gàʼà lə diʼ la, ghə̀ŋ ə njɨ̀mə̀ no à viʼi və tsèm, jɨ̀mə̀ la Nyìngòŋ gyàmtə̀ ə ku əfo vyì a vəwenə ə kəŋ. Ghə̀ŋ ə ku kəzòŋ à wen kùmə̀ ənyʉ̀ ə jùŋvə vi a ghə̀ nè à viʼi.

² Ghə̀ŋ ə njɨ̀mə̀ à təfòyn tə, nə̀ viʼi vyi a və tisə viʼi ndi vəghəŋ ə ntsi to no nə̀ mbwaʼmə bè jèʼè tò a jisə jùŋsə sə tsèm shisə a Nyìngòŋ ə kəŋ la və ə njèʼè fa tsu, tsi ntsìnə̀ ə jùŋ ashɨ ə̀ viʼi.

³ Ghə̀ŋ sətsen ə jɨ̀mə̀ à viʼi a jisə a ghèn, kənyʉ̀ a ki ka boŋ be ne la Nyìngòŋ, ə Mbwòŋsə̀ vəghəŋ ə saŋlə.

⁴ Nyìngòŋ ə kəŋ la viʼi və tsèm bwoŋ, bè kəŋ la viʼi və tsèm kɨ kənyʉ̀ ki a kə diʼ nəmwèʼè.

⁵ Kə diʼ a jì a ghèn byìʼì ando Nyìngòŋ ə diʼ tò mùʼ, wìʼ ə bè dìʼ tò muʼ a viʼi ə cho fa wen, dyʉ̀ a Nyìngòŋ. Wìʼ a ghèn ə diʼ Yesò Klistò.

⁶ Ghə̀ nku li wen ə wen ə pfʉ ə zen kətʉ kə viʼi və tsèm. Nyìngòŋ ə ne kənyʉ̀ a kenkə tò a yi zhʉ a ghə̀ ə kəŋ ə diʼ a nə̀ kəchwitəkə la ghə̀ kòŋ ə bwòŋsə viʼi və tsèm.

⁷ Və ntsuʼ mò byìʼì kənyʉ̀ a kenkə a nə̀ wù ə ntɨm la mà shə̀ʼtə̀ kənyʉ̀ kə Nyìngòŋ bè ziʼi viʼi ətɨm nə̀ kənyʉ̀ ki a kə diʼi nəmwèʼè. Kənyʉ̀ kənkə a ma gàʼà lə ə diʼ tò no nəmwèʼè. Mà ko wamə wamə.

⁸ Mà kəŋ la lyʉmə a vəwenə ku li təwen tə vəwenə a Nyìngòŋ no te fe ə jɨ̀m, nə̀ tətyɨm tə laynə tə, kə vəwenə a nkiʼ tin əfwi ko kəngùmə̀ wenə viʼi.

⁹ Mà be kəŋ la ki ə ndzènsə̀ ə lafə, kə a ndiʼ əlaf ə yi a ghə̀ zì ghə̀ nkù ngəʼ ashɨ ə viʼi. Kə vəwenə ə nyùʼù chòsə̀ ətʉ, we chòsə̀ mpfɨŋsə ko təfo tə ŋwòʼətə. Kə vəwenə ə lafsə təwen tə vəwenə nə̀ ndisə shi a əko yi ə to chòsə̀.

¹⁰ Vəwenə ə bòŋsə ne a diʼ ənyʉ̀ ə jùŋvə ndi diʼ la vəwenə diʼ ki və byɨməvə.

¹¹ Ki diʼ zhʉtə ənyʉ̀ vyi a və ziʼi à vəwenə tò achi achi, nə̀ shiʼsə wen.

¹² Ma tensə li la kə ki ə tɨmə akəshi, ziʼi lyʉmə kò nkiʼ kədyòʼ ə nsoʼo vəwenə. Vəwenə diʼ ə nchiʼ tò la kuʼ.

¹³ Kə diʼ alə byìʼàndo Nyìngòŋ ə nlu bwòm Adàm ambì mibu mu bwòmə Ivè.

¹⁴ Və nko lobtə Adàm. Və ə lobtə wùwì, ghə̀ kwàʼ əsoʼ ə Nyìngòŋ.

¹⁵ Alì Nyìngòŋ lu bwòŋsə no te wùwì ko a ghə̀ bwi vunə, a zhʉ a ghə̀ nkwiʼ ətyɨm ə faŋ ə nto tò to a wen a byɨmə bè kòŋ viʼi vətsenvə bè tsi ntsìnə̀ yi a ghə̀ ko kiʼ məghàm. Ghə̀ diʼ ə ne ənyʉ̀ a venə nə̀ ətof.

« Roimhe

Air adhart »

Lean sinn:

Ceanglaichean taic

Sanasan