1 Tèsàlonyà 4 - The New Testament in the Babanki language

Ntsìnə̀ yì a ghə̀ nè la Nyìngòŋ ə nə̀ saŋlə

¹ Vəlemə, à le faŋ nyʉ̀ venə ndi mà gàʼ mwetə a ghə̀ŋ. Yes əziʼi li ghə̀ŋ, ghə̀ŋ sə ə kɨ ji yì a ghə̀ŋ diʼ ə nə̀ tsi fa tsu ə nè Nyìngòŋ ə saŋlə, a diʼ nyʉ̀ mu ghə̀ŋ sə nè. Yes ə sensə ghə̀ŋ luwen no nànto, a kədyòʼ Bobo Yesò la ghə̀ŋ be nè chò no fa li.

² Yes ə sensə alə̀ byìʼì ando ghə̀ŋ sə kɨ nyʉ̀ vyi a yes ə ziʼi a ghə̀ŋ. Ənyʉ̀ na venə diʼ mu və lù fa Bobo vəghəŋ Yesò.

³ Nyìngòŋ ə kəŋ la ghə̀ŋ ntsi ntsìnə̀ yì a ghə̀ kəŋ, ghə̀ le kəŋ la, kə wìʼ fa ghə̀ŋ nə̀ tsi nə̀ wì wìʼ kò wenə lɨmə wìʼ no faphen,

⁴ be kòŋ la no tèbe ə wùlɨm ə kò nə̀ kɨ ə shɨtə ə ghaʼ wenə wen a ji yi a Nyìngòŋ ə na koŋə, viʼi be boŋ koŋə.

⁵ Kə Wìʼ a ku wenə wen a nyʉ̀ njòsə wèn to nə̀ viʼi vyi a və ko kɨ kənyʉ̀ ki a Nyìngòŋ əkəŋ la kə və lu nè.

⁶ Ma gaʼa la kə wìʼ na nè kənyʉ̀ kəbyɨkə a lèmə̀ wen no faphen. Yes sə diʼ mù yesə ngaʼa li nyʉ̀ venə a ghə̀ŋ ə sə be gàʼa luwen no nə̀ kədyòʼ kə la, Bobo lu ku ngəʼ a viʼi vyi a və tsi ntsìnə̀ ə byɨ na ghèn,

⁷ byìʼì ando Nyìngòŋ ə ko tə dzàŋ vəghəŋ la vəghəŋ fʉ vi ə kumə tsi to tsì nə̀ ki ko nə̀ lʉmə to mphen. Ghə̀ boŋsə dzàŋ la vəghəŋ fʉ vi ntsi to nə̀ viʼi Nyìngòŋ.

⁸ A sətsen a tensə no ndo tensə kənyʉ̀ ki a yes ə ziʼi, ghə̀ tensə Nyìngòŋ a ghə̀ ku kəzhwì kə Ŋwoʼkə a ghə̀ŋ.

⁹ Ma yenə la yes kodiʼ ə be nyoʼtə kənyʉ̀ a ghə̀ŋ kumə ə kòŋ a viʼi və byɨməvə vətsenvə diʼ ə nkiʼ. Nò Nyìngòŋ ə ziʼi li ji yì a ghə̀ŋ diʼ ə nə̀ kòŋ təwen ə tyəŋtə fa tsu.

¹⁰ Ghə̀ŋ sə diʼ mù ghə̀ŋ diʼi li kòŋ na yənə a vəlemə vəŋə və tsèm alòʼ ə Màsìdonìyà, yes sə sensə ghə̀ŋ a vəlemə la, ghə̀ŋ ə koŋə chò no fa li.

¹¹ Ghə̀ŋ mwomsə no nə̀ kədyòʼ kə ə wʉ̀ la wìʼ fa ghə̀ŋ ko lu se tebè a ntaŋ akəshi. Kə ghə̀ŋ ne nkwensə əchʉ a nyʉ̀ viʼi. Ghə̀ŋ shyèʼ nə̀ avu ghəŋə ə kiʼi fo vi a ghə̀ŋ kəŋ. Ghə̀ŋ nè to ando yes ə ngàʼa la ghə̀ŋ ə nè.

¹² Ghə̀ŋ sətsen ə nè alə viʼi vi à ko diʼ viʼi və byɨməvə nə̀ gumlə ghə̀ŋ, ghə̀ŋ nə̀ zhɨ̀ to byìʼì kəzhʉʼsə ə kəŋkə̀, ko wu a nki tebè wìʼ.

Əvi ə Bobo

¹³ Vəlemə, yes ə kəŋ la ghə̀ŋ kɨ kənyʉ̀ ki a kə diʼi nəmwèʼè kumə viʼi vyi a və pfʉkə li. Yes ə kəŋ la ghə̀ŋ kɨ kənyʉ̀ na kènkə ndi kə ghə̀ŋ na di to nə̀ viʼi vətsenvə vyi a və ko kiʼ kwoʼtə la viʼi lu lù fa pfʉ.

¹⁴ Vəghəŋ ə byɨmə la Yesò ə mpfʉ ə bwensə lù fa pfʉ, be byɨmə la Nyìngòŋ ə lu nè Yesò lyɨ̀ viʼi vyi a və ə tə pfʉ byɨmə ə vəwenə bwenə kuʼ a akàŋ, wenə vəwenə tsèntə diʼ to muʼ.

¹⁵ Kənyʉ̀ ki a yes ə ziʼi a ghə̀ŋ diʼ to kənyʉ̀ ki a Bobo ə ziʼi. Vəghəŋ vi a və bo tsì a mbi ko lə yen Yesò ambì ə viʼi vyi a və pfʉkə li a kətsi yi a ghə̀ bwenə vi.

¹⁶ A lu ndiʼ a kətsi na yi, Bobo no fa wen ngeŋ shiʼi vi fa kàŋ, ə ku əsoʼ, ntsɨŋ Nyìngòŋ ə ghoʼo gàʼ, viʼi be zhʉ̀ ando və toŋ soŋ ə Nyìngòŋ, viʼi vyi a və mpfʉ choʼsə Yesò bwènsə̀ lù fa pfʉ a ambì.

¹⁷ Nyìngòŋ ə lu lyɨ vəwenə nə̀ vəghəŋ və tsèm vi a və bò tsì, və dyʉ̀ bumtə nə̀ Bobo a boʼsə akàŋ, vəghəŋ nə̀ wen faŋ to amuʼ to məzhʉ̀ ə tsèm.

¹⁸ Ghə̀ŋ shə̀ʼtə̀ nyʉ̀ na venə a yès ə nyoʼo lə ə nè la tətyɨm tə vəlemə vəŋə ə saŋlə.

« Roimhe

Air adhart »

Lean sinn:

Ceanglaichean taic

Sanasan