1 Kolìntyàns 9 - The New Testament in the Babanki language

Kədyòʼ kì a wù ə ntɨm ə kiʼi

¹ Ma diʼ no wù ə ntɨm, diʼ fa mo a ngəŋ. Kə lə diʼ la ma nkò ə yen Yesò ə Bobo vəghəŋ mu? Ghə̀ŋ bwin kəvu kəshyèʼ mò ashɨ Bobo?

² Mà sətsèn ke ndiʼ tebè wù ə ntɨm a viʼi vətsenvə, a mà ndiʼ wù ə ntɨm a ghə̀ŋ, byìʼì ando ji yi a ghə̀ŋ diʼi fa tsù a Bobo diʼ byìʼì shwèʼ ə ghomə to nə̀ wù ə ntɨm.

³ A lə ji yì a ma nè ma sə gàʼà fa tsù ə gyamtə wenə ghomə azhʉ̀ a viʼi ə ghàmə̀ mò.

⁴ A lə diʼ la və ko diʼ ə nku əfo ə zhɨvə ko kəfo kənyʉkə a yès a əshyèʼ yi a yès nè mu?

⁵ A lə diʼ la yès ko kiʼ kədyòʼ ə lyɨ̀ wùwì ə byɨmə a wùwì, ə njèʼè nə̀ wen to ando vəlemə və Bobo nə̀ Sefàs nə̀ viʼi ntɨm vətsenvə mu?

⁶ Mu à diʼ to yo Bànabàs a yes diʼ ə nshyèʼ to shyèʼ mibu ə nzhɨ̀ lo?

⁷ A diʼ sugyèʼ ə kò a ghə̀ shyèʼ be bwènsə̀ loʼ wen ə wen a? A zizi a nshyèʼ ndò shyèʼ əsɨm, ko diʼ ə lo ashɨ fo vyi a və fʉ̀ fa sɨm na ghèn a? A diʼi ntsɨ̀ŋ nyamsə ə kò a ghə̀ ko kamə ə zhwin ə nyàm ə nyʉ a?

⁸ Ma ko gàʼà tebè nyʉ̀ a venə to nə̀ wìʼ, no tebe Əsoʼ ə gàʼa to alì.

⁹ Və nyòʼò li a ŋwàʼlə̀ Əsoʼ ə Mosìs la, “kə wù be lù kwiʼ əchʉ̀ ə nyàm a zhʉ a ghə̀ shyèʼè sɨm la kə ghə̀ pfiʼ asaŋ.” A Nyìngòŋ ə lə gàʼa kənyʉ̀ ken akəshi na ghèn kumə nyamsə mu?

¹⁰ Kə diʼ nəmwèʼè la ghə̀ gàʼa kumə vəghəŋ byìʼì ando wù ə shwèʼè nə̀ we ghə̀ tsen pfì, vəwenə kɨ nəmwèʼè la vəwenə na kiʼi əfo ə zhɨvə ə zhɨ̀ a vəwenə a ntìntìn.

¹¹ Yès sətsen ə̀ ndiʼ mù və wè li ntɨm ə jùŋ a ghə̀ tətyɨm, ko a ndiʼ kənyʉ̀ kə kəbyɨkə ghə̀ŋ nku əfo ə zhɨvə a yès.

¹² Viʼi vətsenvə sətsen ə̀ kiʼ kədyòʼ ə nkiʼi əfo ə zhɨvə fa ghə̀ŋ, a ko yès andiʼ nkiʼ chò tèbè fa lì. Alì yès sə diʼ ko andiʼ la yès ne kənyʉ̀ byìʼì kədyòʼ a kènkə a yès kiʼi ndiʼ nshi fo fa ghə̀ŋ. Yès ə boŋsə wensə to wensə byìʼì ando yès ə ko kòŋ ə ne kənyʉ̀ kə taʼsə ntɨm ə jùŋ ə Yesò la kə ghə̀ kwi.

¹³ A ghə̀ŋ kɨli la viʼi vyi a və shyèʼè a ngə̀ŋ Nyìngòŋ nə̀ kiʼi əfo ə zhɨvə ə vəwenə, və fʉ̀ to fa tsu? Nò tèbe viʼi a və shyèʼè akwi kəbaŋ kə kəku nə̀ zhɨ̀ to no fa əfo yi a və kù tsu.

¹⁴ Kə lə diʼ to ndə̀ŋndəŋ ando Bobo ə̀ kù li a soʼ la, viʼi vyi a və shə̀ʼtə̀ ntɨm ə jùŋ diʼ nzhɨ̀ byìʼì wen.

¹⁵ Ma sə diʼ ko andiʼ la ma nè kənyʉ̀ nə̀ kədyòʼ na kènkə, ko ma nyoʼtə tebè luwen la ghə̀ŋ ku kəfo kə tsenkə a mò. Kə bòŋ la mà boŋsə pfʉ pfʉ, azhʉ la wìʼ taʼsə la kə mà ə̀ saŋlə kumə ji yì a ma shə̀ʼtə̀ ntɨm ə jùŋ fa tsù.

¹⁶ Ma ko diʼ ə nghaŋsə əwen kumə ando ma shə̀ʼtə̀ ntɨm ə jùŋ. A sə diʼ shwèʼ mu və ghʉ̀ li la mà nè, mu mà faŋ ke nè, a ngəʼ ə byɨ ne ndiʼ a mo kətʉ!

¹⁷ Mà tə ndiʼ la ma ne shwèʼ a ghenə fa mò a kòŋ, a və ne diʼ ə lòʼò mò. Alì ma sə ne to byìʼì ando à diʼ kənyʉ̀, a ma diʼ ə ne, mu à gàʼ Nyìngòŋ la ma ə ne.

¹⁸ Əmoʼtə ə ghomə lə diʼ no ghò? Əmoʼtə ə ghomə diʼ to la mà nshə̀ʼtə̀ ntɨm ə jùŋ, ko ma bèmə tebè kəfo, ko ma tuʼu ne tebè nə̀ adyòʼ yi a ma kiʼi to nə̀ wìʼ a ghə̀ shə̀ʼtə̀ ntɨm ə jùŋ.

¹⁹ Ma diʼ alə̀ ko ma lu ndiʼ kəkòs a wìʼ, alì ma ghʉ wenə ghomə a nə̀ kə kəkos kə a viʼi və tsèm ndiʼ mà nè, la viʼi və ghoʼo və be byɨmə.

²⁰ Ma dyʉ̀ a viʼi Jus, ma sədiʼ to nə̀ wù ə Jus, ə ne la vəwenə be byɨmə, ma sə dyʉ̀ a viʼi vyi a vəwenə ə̀ ghʉ̀ Əsoʼ, ma sədiʼ to nə̀ wìʼ a ghə̀ ghʉ̀ Əsoʼ no tèbe ando ma ko diʼ a tyi Əsoʼ. Ma ne ma sə ne alə̀ ndiʼ vəwenə be tuʼu byɨmə, to kədə̀ŋ.

²¹ Ma dyʉ̀ a viʼi a və ko ghʉ̀ tebè əsoʼ, ma sədiʼ to nə̀ wìʼ a ghə̀ ko ghʉ̀ ə əsoʼ. Nakènkə ko diʼi la ma diʼ alə ko ma, ghʉ̀ əsoʼ ə Nyìngòŋ. Ma ghʉ̀ to no əsoʼ ə Yesò, ali ə dyʉ̀ a viʼi vyi a və ko ghʉ̀ tebè əsoʼ, ma sə ne to alə ndiʼ ə ne la vəwenə tuʼu byɨmə, to kədə̀ŋ.

²² Ma dyʉ̀ a viʼi vyi a vəwenə ə̀ bwaʼa, ma sədiʼ to nə̀ wìʼ a ghə̀ bwaʼa, to ə nè la vəwenə be byɨmə. Ma kaʼkə li sədiʼ to ji sə tsèm to a viʼi vətsèm, ndiʼ mà ne, viʼi vətsenvə bwòŋ no tèbe a ji ə kò.

²³ Ma ne nyʉ̀ a venə no ətsèm ndiʼ ə ne la ntɨm ə jùŋ kwi dyʉ̀ ambì mà boŋ ə kiʼi mbwaʼsə yì a ghə̀ diʼi tsu.

²⁴ A ghə̀ŋ kɨli la və shəmə kənyɨŋ, viʼi sə nyɨŋə, to kədə̀ŋ, ali a na nyɨŋə zhɨ̀ to wìʼ ə mùʼ ə kiʼi əmoʼtə yi. Kə le diʼi la ghə̀ŋ diʼ ə nshɨtə ə nyɨ̀ŋ a ji ə zhɨ̀ ə kiʼi əmòʼtə na yi.

²⁵ Nò ndò nə̀ zhʉsə shəmə kənyʉ̀, ghə̀ sə ziʼi ə nè kənyʉ̀ na kì, shɨtə ghaʼa wèn ə wen to ji sətsèm. Vəwenə nə̀ ne və sə ne ali ndiʼ kiʼi əmòʼtə, ko ghə̀ ndiʼ ə lu faŋ, ali vəghəŋ diʼ lù kiʼi əmòʼtə, a ghə̀ diʼ ə tsì ə faŋ.

²⁶ A lə kənyʉ̀ kyi a ma ko kumə nyɨŋə to nyɨŋə; ma ko pfènə̀ tebè fɨ̀nkàm to nə̀ wìʼ a ghə̀ ghomə to kəshi kə zɨmkə.

²⁷ Ma ghaʼa a wèn ə ghomə ndi ghə̀ kaʼkə ə zhʉ fa mò, bwen alì a mà shə̀ʼtə̀ ntɨm ə jùŋ, a lù ndiʼ a kəmwètə, Nyìngòŋ ə ghʉ̀ la ma ko kwʉ̀ʼ ə kiʼi əmòʼtə na yi.

« Roimhe

Air adhart »

Lean sinn:

Ceanglaichean taic

Sanasan