1 Kolìntyàns 7 - The New Testament in the Babanki language

Ənyʉ̀ kumə làm

¹ Ma gàʼà kənyʉ̀ luwen kumə nyʉ̀ vyi a ghə̀ŋ tə nyoʼ ə bèmtə̀ a mò. Kə bòŋ to no la kə wìʼ lam.

² Alì byìʼì ando mwòmsə ə zizi ghə̀ vi, a wìʼ ghə̀ kwen a ntsìnə̀ kəfwaʼlə, ma sə gàʼa la no tèbe wulɨm ə kò diʼ ə lam wi wen, no tèbe wùwì ə kò be diʼ lam lɨmə wen.

³ Wulɨm diʼ ku wenə əwen a wi wen to ando əsoʼ ə̀ gàʼà, wùwì ə diʼ be ku ghə̀ wenə wèn a lɨmə ə wen.

⁴ Kə diʼ alə̀ byìʼì ando wùwì ə ko kiʼi kədyòʼ a wen a kətʉ kə wèn, ali a kiʼi lɨmə ə wen, to ndə̀ŋndəŋ ando wulɨm ə ko kiʼi kədyòʼ a kətʉ kə wèn ə wen, ali a kiʼi wi wen.

⁵ Kə wìʼ na tyenə ə tsen kəshi wenə wi wen ko lɨmə wen, a bwen to la à byɨmə ghə̀ŋ vətsèm byìʼì ando ghə̀ŋ kəŋ ə lyɨ̀ əzhʉ a yi ə ne əjɨ̀m. Alì əzhʉ a yi me, ghə̀ŋ bwensə ə ntsi ntsìnə̀ lam, a bwen ali, ə mwòmsə ə Satan a nè, ghə̀ŋ fəŋ byìʼì ando ghə̀ŋ zizi ko ghə̀ŋ lu kɨ ə ghaʼ təwen ə təŋtə.

⁶ Ma gàʼà kənyʉ̀ a kèn to gàʼà a ghə̀ŋ, ma ko chòsə̀ a nə̀ əsoʼ.

⁷ Ma zizi mà kòŋ la no viʼi vətsèm ə diʼ to nə̀ mò. Alì Nyìngòŋ ə sə diʼ mu ghə̀ ku li kəku, no tèbe ndò sə kiʼi kəwen kə, to nə̀ nəkwoŋ.

⁸ Ma gàʼà a viʼi vyi a və ko tɨmə lamkə, benə ki mpfʉ la, kə bòŋ la vəwenə faŋ kə vəwenə a lam to nə̀ mò.

⁹ Alì vəwenə mu sətsen ə̀ diʼ mu vəwenə zizi ko və lu ghaʼa təwen tə vəwenə, vəwenə əlam, byìʼì ando kə bòŋ ə lam chò ə̀ ŋwʉ̀ʼ no zhʉ̀ko, kwoʼtə to kənyʉ̀ kə wùwì kò kənyʉ̀ kə wulɨm.

¹⁰ A viʼi vyi a və lam li, ma kù a əsoʼ, a ko diʼ əsoʼ ə ghomə, a diʼ əsoʼ ə Bobo la, wùwì ə ko diʼ ə fʉ̀ lɨmə wen.

¹¹ Alì ghə̀ sətsen ə fʉ̀, ghə̀ faŋ to wen nyɨŋ, a bwen ali ghə̀ bwenə dyʉ̀ shətə nyʉ̀ wenə lɨmə wen. Kə wulɨm ə wen be a dzɨ̀m əwen.

¹² A viʼi vətsenvə, à sə diʼi gàʼa ghomə a ko diʼ gàʼ Bobo la, wù ə byɨmə sətsen ə nkiʼ wùwì, a ko diʼ wù ə byɨmə, wùwì ayi byɨmə ə ntsi wenə wen, kə ghə̀ a dzɨ̀m ə wen.

¹³ Wùwì ə byɨmə sətsen ə̀ nkiʼ lɨm, a ko diʼ wù ə byɨmə, ghə̀ byɨmə ə ntsi wenə wen, kə wùwì ayì a tyen əwen.

¹⁴ Kə diʼ alə̀ byìʼì ando Nyìngòŋ ə na ne wulɨm yi a ghə̀ ko byɨmə la ghə̀ laynə byìʼì wi wen, ə be nè wùwì yi a ghə̀ ko byɨmə la ghə̀ ə̀ laynə byìʼì lɨmə wen. A bwen a li ko vu vəwenə a ndiʼ nə̀ laynə, ali kə sə diʼ nəmwèʼè la vəwenə ne laynə.

¹⁵ Wìʼ yi a ghə̀ ko byɨmə sətsen ə kòŋ ə moʼtə lɨmə wen kò wi wen, ghə̀ moʼtə to moʼtə. Kə yi fʉ̀ alə̀, ko əsoʼ ə lam ə ghaʼ wu ə byɨmə wùwì, kò wulɨm a yi. Nyìngòŋ ə ndzàŋ vəghəŋ la vəghəŋ vi ə tsi nə̀ mbwaʼmə.

¹⁶ Wu ə wùwì ə byɨmə wù kɨ fa gho la wù zizi ko wù lu bwòŋsə̀ lɨmə wù a? Wu wulɨm ə byɨmə kɨ fa gho la wù zizi ko wù lu bwòŋsə̀ wi wù a?

Ghə̀ŋ ə̀ ntsi to a ji yì a Nyìngòŋ sə dzàŋ ghə̀ŋ, ghə̀ŋ diʼ fa tsu

¹⁷ Kə lə diʼ la no ndò ə̀ diʼ ə ə̀ tsi to a ji yi a Bobo ghʉ̀ la ghə̀ ə ntsi, be tsi to ando ghə̀ ntsì a tʉʼ a Nyìngòŋ ə dzàŋ wen. A lə kənyʉ̀ ki a ma ziʼi a loʼ Nyìngòŋ no a tsèm.

¹⁸ No ndò a ghə̀ sətsen ndi mu və nshɨtə li ndyə̀ wen mibu ghə̀ byɨmə, kə ghə̀ a lyòmtə̀. Wìʼ sətsen ə diʼ mu ghə̀ sə byɨmə a Nyìngòŋ, ko andiʼ la və shɨtə li ndyə̀ wen, kə ghə̀ ba gàʼ la və shɨtə.

¹⁹ Ə shɨtə ndyə̀ wìʼ ko ə faŋ ke shɨtə, kə ko kiʼi kənyʉ̀ ə nè. Kənyʉ̀ kə tokə diʼ to ə ghʉ̀ təsoʼ tə Nyìngòŋ.

²⁰ Nò ndò diʼ ə ndiʼ to a ji yi a və ə̀ sə dzàŋ wen, ghə̀ diʼ fa tsù.

²¹ Wìʼ ndiʼ mù ghə̀ ndiʼ kəkòs a tʉʼ a Nyìngòŋ ə dzàŋ wen, kə ghə̀ a kwè kənyʉ̀, ali mu ghə̀ nkiʼ ji ə ndiʼ fa ngeŋ, ghə̀ nè ali.

²² Wìʼ ndiʼ la ghə̀ ndiʼ kəkòs mibu Bobo dzàŋə wen mu ghə̀ sə diʼ fa ngeŋ, ndə̀ŋndəŋ ando ghə̀ sə dzàŋ wìʼ, ghə̀ diʼ fa ngeŋ, ghə̀ sə diʼ kəkòs a Yesò.

²³ Nyìngòŋ sə diʼ mù ghə̀ zen li ghə̀ŋ ə lòʼ. Kə ghə̀ŋ bè a kaʼkə ndiʼ əkòs a viʼi.

²⁴ Ma sə gàʼa a vəlemə vwomə la, ji a Nyìngòŋ ə sə dzàŋ wìʼ, ghə̀ diʼ no tèbe ale, ghə̀ faŋ to ali ə ndiʼ to wenə Nyìngòŋ.

Kənyʉ̀ kumə viʼi vyi a və ko tɨmə ə lamkə benə ki mpfʉ

²⁵ Ma gàʼ kənyʉ̀ luwen kumə viʼi vyi a və ko tɨmə ə lamkə. Ma ko kiʼi əsoʼ mu ghə̀ lù fa Bobo, ma gàʼà to kənyʉ̀ kì a ma kwòʼtə to nə̀ wìʼ a Bobo kusə shinsə ə ne ghə̀ kʉʼʉ la və nchoʼsə̀ wen.

²⁶ Ma kwòʼtə̀ la, kə bòŋ la wìʼ faŋ to ali byìʼì ando mbyi diʼ luwen mu ghə̀ byif li.

²⁷ Wù sətsen ə nkiʼ wùwì, kə wu a dzɨ̀mə̀ wen. Wu faŋ ke tɨmə lam, kə wu a lam.

²⁸ Alì mu wù sətsen ə lam, ko kə andiʼ la wù nè li mbyɨ, mu wàyn ə wùwì sətsen ə lam, ko kə a ndiʼ la ghə̀ nè li mbyɨ. Ali viʼi a və lamkə li lu kiʼi ngəʼsə a mbyi ashə̀, a diʼ ngəʼ a sensə a ma mwomsə ə bʉʼsə ghə̀ŋ fa tsu.

²⁹ Nò kənyʉ̀ kì a ma gàʼà a vəlemə vwomə, diʼ la, zhʉ̀ yi a və ghʉ̀ sə diʼ mù ghə̀ boʼsə li. Ə zìtə̀ fa luwèn ə dyʉ̀ nə̀ mbì, viʼi vyi a və kiʼi ki diʼ ə̀ ntsi to sə vəwenə ko kiʼ,

³⁰ viʼi a və dì ndiʼ to sə və ko dì tebè dì, viʼi vyi a və saŋlə ndiʼ to sə vəwenə ko saŋlə tebè saŋlə. Viʼi vyi a vəwenə ə̀ zen fo diʼ ə ndiʼ to sə vəwenə ə ko kiʼi ə əfo.

³¹ Viʼi vyi a və shyèʼ nə̀ əfo nse diʼ ə ndiʼ to sə və ko kiʼ kənyʉ̀ kumə əfo a vyi. Ma gàʼà alə̀ byìʼì ando əfo vyi a və diʼi a mbyi luwen chò chò.

³² Ma kəŋ la kə kənyʉ̀ kə fɨŋsə ghə̀ŋ. Wìʼ yi a ghə̀ ko lam ə ghʉ̀ kətʉ̀ ə nè nyʉ̀ a Bobo, mwomsə ə ne la Bobo ə saŋlə.

³³ Alì wù ə lamə ghʉ kətʉ̀ kəwen to nyʉ̀ ə mbyi, a və a ne la wi wen ə nsaŋlə.

³⁴ Ghə̀ ne ko ghə̀ be ə kiʼ əkwoʼtə ə mùʼ. Wùwì yi a ghə̀ ko lam kò wàyn ə wùwì a ghə̀ ko lam ə lɨ̀mtə̀ a nyʉ̀ ə Bobo diʼ nə̀ laynə a wen a wèn be diʼ nə̀ laynə a kəzhwì, ali wùwì lamə ghʉ̀ kətʉ to nyʉ̀ ə mbyi a və a nè la lɨm ə wen ə nsaŋlə.

³⁵ Ma gàʼà kənyʉ̀ na kènkə byìʼì ando ma kəŋ ə gyamtə ghə̀ŋ, a ko diʼ la ma kəŋ ə ku kəbyèʼè a ghə̀ŋ. Ma kəŋ ə nè la nyʉ̀ ə njèʼè to ji yi a və diʼ njèʼè fa tsù, ə be ə nè la ghə̀ŋ ku təwen ə təŋtə no tətsèm ə nshyèʼ to a Bobo.

³⁶ Wìʼ sətsen ə yen la ghə̀ ŋwʉ̀ʼ no zhʉ̀ko, kwoʼtə to wàyn wùwì a wenə wen ghʉ̀ la və ko be a làm, ghə̀ bwensə yen la ghə̀ ə ko ne akayn, ə be koŋə ghə bwensə dyʉ̀ wenə wen lam. Wù sətsen nè alə, ko kə a ndiʼ la ghə̀ ne li mbyɨ.

³⁷ Alì mu wìʼ ə sətsen ghʉ̀ a wen a tyɨm la ghə̀ a ndiʼ to ali, ghaʼa wèn ə wen ko ghə̀ a lam, ko adiʼ la və tenlə wen tenlə, mu à ghʉ̀ to no wen a wen a tyɨm la ghə̀ ko lam wàyn wùwì ayì, a ndiʼ mù ghə̀ nè to kənyʉ̀ kə jùŋkə.

³⁸ Kə le diʼ la wìʼ yi a ghə̀ lam wàyn wùwì wen a ghèn diʼ mu ghə̀ ne to no kənyʉ̀ kə jùŋkə, yi a ghə̀ faŋ ke lam mu ghə ə nè li kənyʉ̀, kə bòŋ chò na kì kə.

³⁹ Wùwì ə lamə ko be diʼ ə lam ə zàʼa to ando lɨmə wen bo tsi, mu lɨmə wen sətsen pfʉ, ghə̀ lam no ndò yi a ghə̀ kòŋ, ali a diʼ ə̀ ndi wìʼ a ghə dzɨ̀mtə̀ Bobo.

⁴⁰ A diʼ a mo kwòʼtə, mu wùwì ayi zizi ghə̀ a saŋlə chò azhʉ̀ a ghə̀ faŋə to ali. Ma kwòʼtə̀ la kəzhwì kə Nyìngòŋ kə tisə gàʼà ə ghomə.