1 Kolìntyàns 15 - The New Testament in the Babanki languageMə lù ə Yesò fa pfʉ 1 Ma kəŋ luwen a vəlemə vwomə ə dzɨŋtə ghə̀ŋ nə̀ ntɨm ə jùŋ yì a ma ə nshə̀ʼtə̀ a ghə̀ŋ, ghə̀ŋ zhʉ ə byɨmə ə sə ti to tsu. 2 A diʼ ntɨm ə jùŋ na ghèn a ghə̀ zizi ghə̀ bwoŋsə ghə̀ŋ, azhʉ̀ a ghə̀ŋ shətə ghaʼa kənyʉ̀ ki a mà tə shə̀ʼtə̀ a ghə̀ŋ, bwen ali, əbyɨmə ə ghəŋə a lè to kədyàŋ. 3 Nò kənyʉ̀ kə tokə ki a ma tə nziʼi ghə̀ŋ diʼ to kəwenkə kə a və nziʼi a mò la, Yesò mpfʉ byìʼì nyʉ̀ əbyɨvə ə vəghəŋ to ando və nə̀ nyoʼo a Ŋwàʼlə̀ Nyìngòŋ, 4 və bvɨmə wen, a sədiʼ a mətsi ə ntàʼ, ghə̀ lu fa pfʉ to ando və nyoʼo li a Ŋwàʼlə̀ Nyìngòŋ 5 la, ghə̀ ndiʼi li wèn ə wen a Sefàs ə be diʼ a viʼi ntɨm vyi njʉ̀sə̀ bò. 6 Ghə̀ ndiʼi li wèn ə wen a ndzɨ̀mtə̀sə wensə sə chò əghɨ ə tayn to ghayn ə mùʼ, viʼi fa vəwenə a ntìntìn bo diʼ ə zàʼa fa layn, və tsenəvə diʼ mù və pfʉkə li. 7 Ghə̀ ndiʼi li wèn ə wen a Jems ə be diʼ a viʼi ntɨm, no və tsèm. 8 A kə mwetə ghə̀ mu diʼi ə mwetə wèn ə wen a mò no tèbe ando ma diʼ to nə̀ wìʼ a və mbwi a zhʉ̀ kədyàŋ. 9 Byìʼàndo ma ko diʼi no tebe wìʼ a ntìntìn ə̀ viʼi ntɨm, ko ma kʉʼʉ li və ntoŋtə mò la wù ə ntɨm byìʼì ando ma ə nfaŋ li ə sə ku ngəʼ to ku a tsèntə̀sə viʼi Nyìngòŋ. 10 Alì byìʼì ətyɨm ə jùŋə Nyìngòŋ, ma sə diʼ kəfo kì a ma diʼi kəwenkə luwen. Ətyɨm ə jùŋə na ghenə ko lè kədyàŋ. Ma boŋsə li shwèʼ no nə̀ kədyoʼkə, shwèʼ chò no ndò a ntìntìn ə̀ viʼi ntɨm no tèbe ando à ko tə nlaynsə shwèʼè mò, à tə nshwèʼè ətyɨm ə jùŋə Nyìngòŋ na yi a mò a wèn. 11 Kə diʼ la, kò a nshə̀ʼtə̀ mò shə̀ʼtə̀ ntɨm ə jùŋ a ghə̀ŋ, kò à ə̀ shə̀ʼtə̀ viʼi vətsenvə na vyi, kənyʉ̀ kətokə diʼ to la, və nshə̀ʼtə̀ li, ghə̀ŋ byɨmə. Mə lu fa pfʉ ə vəghəŋ 12 Ghə̀ŋ le ziʼi la Yesò nlù li fa pfʉ, viʼi vətsenvə fa ghə̀ŋ a ntìntìn njèʼ ale ə gàʼa la viʼi ko lu lù tebè fa pfʉ a? 13 Nò tèbè ali, kə sətsen ndi nəmwèʼè la viʼi ko lu lù tebè fa pfʉ, a kə a ndiʼi la Yesò nko nlù fa pfʉ. 14 Kə sətsen ə ndiʼ la və kò ə nlùsə Yesò fa pfʉ, a kə ne diʼi la əziʼi ə yesə le li to kədyàŋ, tèbe əbyɨmə ə ghəŋə be andiʼ to byɨmə zɨm ghə̀. 15 Kə sətsen ə ndiʼ ali, a kə ne be diʼi la yès ə zhò to ndzɨŋ kumə Nyìngòŋ byìʼì ando yès ə gàʼ la Nyìngòŋ ə nlùsə Yesò fa pfʉ. Kə sətsen ndiʼ nəmwèʼè la viʼi ko lu lù fa pfʉ, a kə a ndiʼi la ghə̀ nko lùsə wen fa pfʉ. 16 Kə sətsèn ə ndiʼ nəmwèʼè la və ko lu lusə viʼi fa pfʉ, a kə a ndiʼi la və ko nlùsə Yesò. 17 Kə sətsen ə ndiʼ la və kò ə lùsə Yesò fa pfʉ, a əbyɨmə ə ghəŋə a diʼ to byɨmə zɨm ghə̀, mbyɨ shəŋsə bo a diʼ to a ghə̀ŋ a kətʉ. 18 Kə yi ndiʼ alə, kə a diʼi la viʼi vyi a və tə sə pfʉ, mu və byɨmə li a Yesò, ə lè li to kədyàŋ. 19 Vəghəŋ sətsen ə ndiʼ mu və kù li təwen tə vəghəŋ a Yesò la ghə̀ gyamtə vəghəŋ, ghə̀ diʼ ə gyàmtə̀ kumə to ntsìnə̀ yì a vəghəŋ ntsì a mbyi luwèn, a kə ne bòŋ la ghə̀ kusə shinsə a vəghəŋ chò ando və kusə no tèbè ando ə tsen a mbyi ashen. 20 Alì kə ko diʼ ali. Kə diʼ to no nəmwèʼè la və lusə li Yesò fa pfʉ, a diʼi wen yi a ghə̀ nlù fa pfʉ a ambì ə viʼi vətsèm ə diʼ la viʼi ə lu lù fa pfʉ. 21 Byìʼàndo pfʉ ə nvi a nse mu à nè wìʼ, a be ne to wìʼ ə tsen la viʼi lu lù fa pfʉ. 22 Kə le diʼ ndə̀ŋndəŋ ando viʼi və tsèm ə pfʉ byìʼì ando Adàm diʼ tìʼ vəwenə, viʼi vətsèm vyi a və byɨmə li a Yesò diʼ lu lù ə ntsi, to ndə̀ŋndəŋ ando ghə̀ nlù ə sə tsi. 23 Nò ndò lu lù fa pfʉ to a wen azhʉ. Yesò ə ndiʼ mbì ə lù, diʼ lu be vì ə lùsə viʼi vyi à diʼ viʼi wen. 24 Yesò lu to ə chò no əzhwi byɨvə no tsèm a və soʼo mbyi boʼsə nə̀ adyòʼ no tsèm. Sə chò fa yi abàm, ə mbyi mè, ghə̀ bwensə ku əfòynə ə wen a Nyìngòŋ ə Tìʼ. 25 Kə diʼ alə̀ byìʼì ando Yesò zizi ko ghə̀ lu faŋ ke nsoʼo to soʼo ə zaʼa ando ghə̀ a mòʼ viʼi kəbayn wen no vətsèm a nse, ə tomtə aghʉ a vəwenə a kətʉ. 26 Wù kəbàyn wen ə yi a ghə̀ lu byɨsə a kəmwetə a diʼ əpfʉ̀. 27 Ŋwàʼlə̀ Nyìngòŋ gàʼ la, “Nyìngòŋ ə ghʉ̀ li əfo ə tsèm a wen a tì la ghə̀ nsoʼo.” Ghə̀ sətsèn gàʼ la, “Və ghʉ̀ li no əfò ə tsèm a wen ati” kə ko ə gàʼ ali boʼsə nə̀ Nyìngòŋ ə tsu, kə kə̀ʼə̀ to no a ndayn la à ghʉ̀ Nyìngòŋ ə nghʉ əfo na venə ati ə Yesò. 28 Nyìngòŋ ə lu ghʉ̀ mwetə no əfo ə tsèm ati əsoʼ ə Yesò, ə Yesò fa wen a ngəŋ mu ghʉ̀ wèn ə wen ati əsoʼ wìʼ yi a ghə̀ ə nghʉ̀ fò ə tsèm a wen ati, ndiʼ Nyìngòŋ ə soʼo əfòyn ə wen to akwi əfò ə tsèm. 29 Viʼi sətsen ndiʼ lu faŋ kə lù fa pfʉ nəmwèʼè, viʼi və to və ne sə shi mu akəshi ə wìʼ mu və pfʉkə li, ətof na yi ə diʼ la ghò? Kə sətsen ə ndiʼ la və ko lu lùsə tebè viʼi fa pfʉ, viʼi sə shi mu akəshi ə̀ viʼi və pfʉkəvə na vyi byìʼì gho? 30 Kə sətsen ndiʼ la və ko lu lusə viʼi fa pfʉ nəmwèʼè, a ne no ghò la yès ku təwen ə tyestə to mənzhʉ̀ ntsèm ko yès ə be fwaynə pfʉ a? 31 Ma ti to kəʼ pfʉ no mətsi ə ntsèm a vəlemə vwomə! Ma gàʼà alə̀, naynə kumə ghə̀ŋ byìʼì ando vye Yesò, ə Bobo vəghəŋ diʼ to kənyʉ̀ kə mùʼ. 32 Əse ghomə le ndiʼ no ghò? Ando mà tə nsoynə yo və viʼi a Efesùs a və ndiʼi to nə̀ nyamsə ətòʼ, azhʉ̀ a ghə̀ŋ sətsen nghʉ no nəmwèʼè la viʼi ko lu lù fa pfʉ a? Kə sətsen ə ndiʼ alə, a kə a ndiʼi la viʼi vətsevə ngàʼa to no nəmwèʼè la, “vəghəŋ nzhɨ̀ to zhɨ̀ be nyʉ byìʼì ando à lu ndiʼ a boʼòngə̀ŋ ə vəghəŋ phɨkə ə lè.” 33 Kə wìʼ na ə lobtə ghə̀ŋ. Ghə̀ŋ kɨ la, “Ndoŋsə byɨsə ə byɨbsə ntsìnə̀ ə jùŋ.” 34 Ghə̀ŋ bwensə vi a ghə̀ŋ a tətof, əghʉ̀sə mbyɨ shi a ghə̀ŋ ə ne. Ma gàʼà alə la ndi diʼsə kətʉ kəŋ kə byìʼì ando ghə̀ŋ vətsevə ko kɨ Nyìngòŋ. Əwen yi a ghə̀ lu lù fa pfʉ 35 Wìʼ ə tsen zizi ghə̀ bèm la, “Və lə lu lùsə viʼi fa pfʉ a le? Vəwenə lə lu ə̀ kiʼi nki ə wèn ə kò?” 36 Wù bèmə kənyʉ̀, a kə ko kiʼi ətof! Wù sətsen ə wè ashɨ kəfo, ghə̀ faŋ ke pfʉ, ko kə lu fʉ̀. 37 Ngwaʼ yì a wù wè ko diʼ əwen kəfo yi a ghə̀ ne ghə̀ kwi kuʼu. Zhʉ tsenghə a sədiʼ to əshɨ kəfo to nə̀ ashɨ ə ngwaʼ kò ashɨ ə ngwaʼ ə tsen. 38 A li Nyìngòŋ ku to əwèn yi a ghə̀ kòŋ no tèbè a nki ngwaʼ ə kò, a diʼ to əwèn yi a ghə̀ kwʉ̀ʼ a nki ngwaʼ na yi. 39 Tə wèn təfo no tsèm ko diʼ ndə̀ŋndəŋ. Viʼi ə kiʼi to nki wèn ə vəwenə, nyamsə kiʼi ghə̀ vəwenə. Mənyinə kiʼi ghə̀ vəwenə wèn, shʉsə kiʼ ghə̀ vəwenə ə wèn. 40-41 Əfo diʼ akàŋ, kiʼ əwenə nəkwoŋ, fo diʼ a nse, kiʼ əwen nə̀ nəkwoŋ. Əfo vyi a və diʼ akàŋ ə kiʼ to nki boŋ ə vəwenə, vyi a və diʼi a nse ə kiʼ to nki ə boŋ ə vəwenə. Əchʉ̀ əzhʉ ə kiʼ boŋ ə wen, sàŋ ə kiʼ ghə̀ wen, mədzɨ̀ŋ ə be kiʼ ə bòŋ ə vəwenə. Nò tèbe fədzɨ̀ŋ fə kò fə kiʼ to bòŋ ə nəkwoŋ. 42 A le ando kə lu ndiʼ azhʉ̀ a viʼi lu lù fa pfʉ. Əwen yi a və bvɨmə lu fùwè, ə yi a lù kò lə be ə fwè. 43 A vi azhʉ̀ a və bvɨmə əwèn, ko ghə̀ lu ə boŋ, ko ghə̀ be ə kʉʼʉ tèbè a kə fo. Və nà lùsə fa pfʉ, ghə̀ sə boŋ, be kiʼ kədyòʼ. 44 Və zhʉ sə mbvɨ̀mə̀, a sə diʼ kətsoʼ kəwen, və lu sə lùsə fa pfʉ, a ndiʼ əwen kəzhwì. To ando wen ə kətsoʼ diʼ, kə diʼi la əwen kəzhwì be diʼ. 45 Və nyòʼò li a Ŋwàʼlə̀ Nyìngòŋ la, “Adàm ə wù mbì ndiʼ wìʼ a Nyìngòŋ ə ne, ghə̀ sə tsi” ali Adàm ə bàm, a diʼ Yesò tə vi sə diʼ kəzhwì kì a kə ne la viʼi nkiʼ ntsìnə̀. 46 A ko vi əwen kəzhwì yi a Nyìngòŋ ə nku ambì, à vi əwen kətsoʼ, əwen kəzhwì ə dzɨ̀mtə̀. 47 Wù mbì ndiʼ mu və shɨtə nə̀ kətsoʼ kə, wù bàm ə sə diʼ mu ghə̀ lu fa kaŋ. 48 Viʼi vyi a və diʼi a nse diʼ to nə̀ viʼi vyi a və shɨtə nə̀ Kətsoʼ kə, viʼi vyi a və diʼ akàŋ diʼ lù ndiʼ to nə̀ wìʼ yi a ghə̀ ə lu fa kaŋ. 49 Vəghəŋ ə fɨsə wìʼ yi a və nshɨtə nə̀ kətsoʼ kə luwen, a diʼ to li a vəghəŋ be lù fɨsə wìʼ yi a ghə̀ nlu fa akàŋ. 50 Kənyʉ̀ ki a ma gàʼà a vəlemə vwomə diʼ la, wìʼ ko lu yenə əfòynə Nyìngòŋ nə̀ kətsoʼ kə wèn kenkə, kəfo kì a kə fwè zizi ko kə lu kiʼi kəfo ki a kə ko lu fwè. 51 Ghə̀ŋ zhʉtə, mà shə̀ʼtə̀ kənyʉ̀, kəlyomtəkə wìʼ ə temə kɨ. Vəghəŋ ko lu pfʉ me tebè və tsèm, ali diʼ lù bvɨtə ə kwitə to vətsèm to zhʉ̀ ə mùʼ. 52 Və lu toŋ əsoŋ ə mwetəghə, ə kənyʉ̀ na kènkə bvɨtə fʉ̀. Və lu toŋ əsoŋ na yi, ə viʼi və pfʉkəvə lù fa pfʉ to ghayn ə mùʼ. Ghə̀ŋ diʼ alə̀, diʼ lù kwitə, ə nkiʼ əwen ə fighə. 53 Kə diʼ alə̀ byìʼì ando əwèn vəghəŋ ghenə a lu pfʉ lə, be fùwè ndiʼ ə kaʼkə a wen, a ghə̀ ko lu be lu fwè ko ghə̀ be lu pfʉ. 54 A lu ndiʼ ando əwen ə vəghəŋ kwitə ə ko ghə̀ be ndiʼ ə fwè, ə kənyʉ̀ ki a və nyoʼo a Ŋwàʼlə̀ Nyìngòŋ kwʉ̀ʼ. Və nyòʼo la, “Və tem li zhɨ̀ pfʉ.” 55 “Əpfʉ kədyòʼ ə kyəkə kì ye? Ə ncho ə wù ə ye?” 56 Əncho pfʉ ə nə̀ fʉ̀ fa mbyɨ, kədyòʼ kə mbyɨ kə lu fa Əsoʼ. 57 Alì kəzòŋ kə dyʉ̀ a Nyìngòŋ yi a ghə̀ ne la vəghəŋ tem ə zhɨ̀ pfʉ chò fa a Bobo vəghəŋ Yesò Klistò. 58 Ma sə gàʼà a ghə̀ŋ a vəlemə vwomə və juŋəvə la, ghə̀ŋ shɨtə ghaʼ əbyɨmə ə ghəŋə, kə ghə̀ a nə̀ʼkə̀. Ghə̀ŋ ə nghablə, shyèʼ a Bobo to məzhʉ̀ ə tsèm byìʼì ando ghə̀ŋ kɨli la shwèʼè ghəŋə a wen zizi ko ghə̀ lu ə lè to kədyàŋ. |
© 2017 CABTAL