1 Kolìntyàns 14 - The New Testament in the Babanki language

Ənyʉ̀ ə tsenəvə kumə kəku kə kəzhwì kə Kəŋwoʼkə

¹ Ghə̀ŋ nkəŋ ji to məzhʉ̀ ə tsèm ə ndiʼi əkòŋ a viʼi. Ghə̀ŋ ə soynə ə kiʼi kəku kikə a kəzhwì kə Ŋwoʼkə ə ku, soynə no nəkwoŋ la kə ne, ghə̀ŋ nkɨ ə shə̀ʼtə̀ ntɨm ə Nyìngòŋ.

² Wìʼ yi a ghə̀ gàʼà təgaʼ tə tsentə ko ndiʼ la à ziʼi wìʼ a wen ko gàʼà a viʼi, ghə̀ boŋsə gàʼà a Nyìngòŋ byìʼì ando ghə̀ gàʼà nyʉ̀ ə lyomtəvə a kədyòʼ kə Kəzhwì, ko wìʼ lu zhʉ kɨ kənyʉ̀ kì a ghə̀ gàʼà.

³ Alì a wìʼ yi a ghə̀ shə̀ʼtə̀ nyʉ̀ mu və lù fa Nyìngòŋ, ghə̀ gàʼà a viʼi ə gyàmtə̀ la vəwenə nə̀ kiʼi ətyɨm ə to ghə̀, be kiʼi tyɨm əzhʉtəghə.

⁴ Wìʼ yi a ghə̀ gàʼà təgaʼ tə tsentə ə gyàmtə̀ to wenə wen, ali wìʼ yi a ghə̀ shə̀ʼtə̀ ntɨm mu ghə̀ lù fa Nyìngòŋ, no ndo ə zhʉ kɨ kənyʉ̀ kì a ghə̀ gàʼà kə gyàmtə̀ viʼi və byɨməvə.

⁵ Ma kòŋ la ghə̀ŋ ngàʼà təgaʼ tə kədyàŋ ali tuʼtə kòŋ la ghə̀ŋ ə mbòŋsə̀ shə̀ʼtə̀ nyʉ̀ mu və lù fa Nyìngòŋ, a no ndò a zhʉ̀. Wìʼ yi a ghə̀ shə̀ʼtə̀ nyʉ̀ mu və lù fa Nyìngòŋ ə chò wìʼ yi a ghə̀ gàʼà to təgaʼ tə kədyàŋ, a bwen la ghə̀ sə ngàʼà, wìʼ sədiʼ ə nshə̀ʼtə̀ làynsə kənyʉ̀ kì a ghə̀ gàʼà, ndi viʼi və byɨməvə vyi a və diʼi a ntsentə nkwi, no vətsèm.

⁶ Mà sətsèn vi a ghə̀ŋ luwen, a vəlemə vwomə ə ngàʼà a ghə̀ŋ a təgàʼ tə kədyàŋ, ko ghə̀ŋ zhʉ kɨ, se na ndiʼ no ghò? A bwen la mà vì nə̀ kənyʉ̀ kə a Nyìngòŋ diʼi laynsə a mò, kò mà vi ə ne la ghə̀ŋ nkiʼ ətof, kò mà vi ə shə̀ʼtə̀ ntɨmə Nyìngòŋ, kò ə ziʼi ghə̀ŋ.

⁷ Kə diʼ to ndə̀ŋndəŋ ando wù sətsèn ə lyɨ̀ fəndoŋ ndemə toŋ to toŋ, kò wù lyɨ̀ əluŋ ə ndemə buʼtə to buʼtə, ko wìʼ a zhʉ kɨ kəfo a wù buʼ.

⁸ Wìʼ yi a ghə̀ ntu ə soŋ ə shə̀ʼtə la əghoŋ ə vì sətsen faŋ ke toŋ akayn, və a kɨ fa ghò ə baʼtə̀ əghoŋ a?

⁹ A be diʼ to ndə̀ŋndəŋ kənyʉ̀ a ghə̀ŋ. Ghə̀ŋ sətsen nə̀ ngàʼà təgaʼ tə kədyàŋ, a və ko zhʉ kɨ, ko wìʼ a nkɨ la ghə̀ŋ gàʼà la ghò lo. Kə sətsen ə ndiʼ alə̀, a nyʉ̀ vyi a ghə̀ŋ gàʼà a nchò to nə̀ fwofə

¹⁰ Tə gàʼà tə diʼ to kədə̀ŋ a mbyi, viʼi diʼ a və zhʉ̀ no ghə̀ ko.

¹¹ Mà sətsèn ə nzhʉ ko ma kɨ tebè kənyʉ̀ a wìʼ gàʼà, a mà ndiʼ wù kətɨm a wìʼ na yì, ghə̀ be diʼ wù kətɨm a mò.

¹² Ma gàʼà la, ando ghə̀ŋ lɨ̀mtə̀ ə kiʼi kəku kə kəzhwì kə Ŋwoʼkə, ghə̀ mwomsə no nə̀ kədyòʼ kə ə ne tə shwèʼ a tə gyàmtə̀ ə kwisə ngə̀ŋ ə Nyìngòŋ.

¹³ Kə lə diʼi la wìʼ yi a ghə̀ kɨ ə gàʼà təgàʼ tə kədyàŋ ndiʼ ə jɨ̀mə̀ la kəzhwì kə ku kwʉ̀ʼsə kədyòʼ, ghə̀ kɨ ə shə̀ʼtə ə làynsə nyʉ̀ vyi a ghə̀ gàʼà.

¹⁴ Mà sətsèn ə̀ jɨ̀mə̀ a gàʼà ə kədyàŋ, kə a ndiʼi la ma jɨ̀mə̀ a mò kəzhwì, ali ko kwòʼtə̀ ə ghomə kɨ kənyʉ̀ a ma gàʼà

¹⁵ Kə sətsèn ndiʼ alə̀, ma ne a le? Kəzhwì ə kòmkə diʼ ə njɨ̀mə̀, kwoʼtə ə ghomə be jɨ̀mə̀, kəzhwì ə kòmkə ə zhɨmə ndzàŋ, kwoʼtə ə ghomə zhɨmə.

¹⁶ Ghə̀ŋ sətsèn ə njɨ̀mə̀, ku kəzòŋ, a jɨ̀mə̀ to kəzhwì, wìʼ yi a ghə̀ bo ziʼi ziʼi ne nè ale ə tomsə kənyʉ̀ a kì ə gàʼ la, “Amèyn a” ko andiʼ la ghə̀ zhʉ kɨ nyʉ̀ vyi a ghə̀ŋ ə jɨ̀mə̀ a?

¹⁷ Wù zi wù njɨ̀mə̀ ə ku kəzòŋ a Nyìngòŋ ə no nkayn, ali kò kə lə gyàmtə̀ viʼi vətsen və no fa mphen.

¹⁸ Ma kù kəzòŋ a Nyìngòŋ ando ma kɨli ə gàʼ təgàʼ tə kədyàŋ chò ghə̀ŋ no və tsèm.

¹⁹ Alì mu mà yi ngàʼà a ngə̀ŋ ə Nyìngòŋ, mà ne kòŋ ə gàʼ to nyʉ̀ à tayn la viʼi zhʉ kɨ ə ziʼi kənyʉ̀ fa kənyʉ̀ a ma gàʼà chò ando mà yi gàʼà nyʉ̀ nkamsə əwùm a təgaʼ tə kədyàŋ, ko viʼi lu ə nzhʉ.

²⁰ Kə ghə̀ŋ a nkwoʼtə to nə̀ voyndyə, a vəlemə vwomə, ghə̀ŋ ne boŋsə diʼ to voyndyə kumə mbyɨ ali kwoʼtə nyʉ̀ to nə̀ ə viʼi vətokəvə.

²¹ Və nyòʼò li a ŋwàʼlə̀ Əsoʼ la: “A gàʼà mò Nyìngòŋ la, Mà lu ne, ə viʼi tɨm ə̀ nshə̀ʼtə̀ ntɨmə ghom a viʼi venə. Mà lu ne, ə və gàʼ a vəwenə a gàʼà kətɨm. Və lu ne tèbe alə̀, vəwenə tyen la və ko zhʉtə kənyʉ̀ kì a ma gàʼà.”

²² Kə diʼi la, təgaʼ tə kədyàŋ ə diʼ nchwi a viʼi vyi a və ko tɨmə ə byɨmə, a ko diʼ a viʼi vyi a və byɨmə li. Kəku ki a kə diʼi kəku ə nshə̀ʼtə̀ nyʉ̀ mu və lù fa Nyìngòŋ ə diʼ nchwi a viʼi və byɨməvə, a ko diʼ a viʼi vyi a və ko tɨmə ə byɨmə.

²³ No tebe ali, ghə̀ŋ sətsen zhùŋtə̀ a ngə̀ŋ Nyìngòŋ, ə gàʼà to a tə gàʼà tə kədyàŋ, viʼi vyi a və ko tɨmə ə byɨmə kwen vi kò à kwen viʼi ghayn, a vəwenə a gàʼ la ghə̀ŋ bomə bomə.

²⁴ Alì mu ghə̀ŋ və tsèm sətsen ə shə̀ʼtə̀ ntɨm mu ghə̀ lù fa Nyìngòŋ, viʼi vyi a və ko tɨmə ə byɨmə kwen vi ə zhʉ, kò à kwen viʼi ə ghayn, a ntɨm ayi a nè, la vəwenə byɨmə no fa vəwenə ngeŋsə la vəwenə ə ne mbyɨ, a nyʉ̀ vyi a vəwenə zhʉ və ghaʼ vəwenə

²⁵ ə boʼtə nyʉ̀ ə lyomtəvə vi a və diʼ a vəwenə a tətyɨm, a vəwenə a shiʼ a vəwenə a nchiʼ sə lwi ə kuʼsə Nyìngòŋ gàʼa la, “Nyìngòŋ ə diʼ a ghə̀ŋ a ntìntìn no nəmwèʼè.”

Jì yi a ghə̀ŋ diʼ ə nshɨtə ne nyʉ̀ fa tsu a ngə̀ŋ Nyìngòŋ

²⁶ Vəghəŋ zizi və gàʼà no la gho a vəlemə vwomə? Ghə̀ŋ zizi a ghə̀ŋ gàʼà la, ghə̀ŋ zhùŋtə̀ no zhʉ̀ko, wìʼ ə sə kiʼ dzàŋ ə zhɨm, ghə tsen ə kiʼi kənyʉ̀ a ziʼi, ghətsen kiʼi kənyʉ̀ a Nyìngòŋ ə diʼ làynsə a wen, ghətsen ə kiʼ kənyʉ̀ ə gàʼ a gàʼà ə kədyàŋ, ghətsen diʼ ə shə̀ʼtə̀ nyʉ̀ vyi a və gàʼa. Ghə̀ŋ ə ne nyʉ a venə ə no tsèm to gyamtə viʼi və byɨməvə.

²⁷ Viʼi sətsen ndiʼ ə gàʼ a gàʼà kə kədyàŋ, və gàʼ ə zàʼa və bò kò və tàʼ. Və sə ngaʼa, və moʼtə wìʼ ə mùʼ ə gàʼà mwetə, wìʼ ə tsen ə shə̀ʼtə kənyʉ̀ ki a ghə̀ gàʼa mibu ghətsen be gàʼ ndiʼ və zhʉ ə kɨ nyʉ̀ vyi a vəwenə ə gàʼa.

²⁸ Wìʼ sətsen faŋke ndiʼ ə shə̀ʼtə̀ kənyʉ̀ ki a və gàʼà, vəwenə chiʼ to kuʼ, no ndo ə ngàʼà to a wen a wèn, be gàʼà to a Nyìngòŋ.

²⁹ Nshə̀ʼtə̀ sə ngàʼa, sə ngàʼà to sə bò kò sə tàʼ. Vəwenə ngàʼà, viʼi vətsenvə nkìtə̀ kənyʉ̀ ki a vəwenə gàʼà.

³⁰ Nshə̀ʼtə̀ zìtə̀ ə gàʼ kənyʉ̀, Nyìngòŋ ə ku ntɨm ə fi a wìʼ ə tsen, nshə̀ʼtə̀ ə mbì ə chiʼ ndiʼ wìʼ ayi gàʼ.

³¹ Nò ghə̀ŋ vətsèm zizi ghə̀ŋ a shə̀ʼtə̀ ntɨm mu ghə̀ lù fa Nyìngòŋ azhʉ̀ wìʼ ə mùʼ ə gàʼà chiʼ mibu ghətsen be gàʼ ndiʼ viʼi ziʼi nyʉ̀ fa yi tin be kɨ və gyamtə vəwenə.

³² Viʼi vi a və kiʼi kəku nshə̀ʼtə̀ ntɨm mu ghə̀ lù fa Nyìngòŋ diʼ nshɨtə kɨ ə ghaʼ ntɨm ayi.

³³ Byìʼàndo Nyìngòŋ ə ko kòŋ la viʼi ənè nyʉ̀ to mpfen. Ghə̀ kəŋ la viʼi nə̀ tsi nə̀ mbwaʼmə. A diʼ to lə a ntsèntə̀sə viʼi Nyìngòŋ diʼi ndiʼ no tèbe fe.

³⁴ Ki na ndyʉ̀ a ntsèntə̀sə, kə və a gàʼa byìʼì ando və ko ku adyòʼ la vəwenə ngàʼa. Vəwenə ə diʼ ə ndi to a ti əsoʼ ə lʉ̀mə ando Əsoʼ ə gàʼa.

³⁵ Wìʼ fa tsu sətsen ə kòŋ ə kɨ kənyʉ̀, ghə̀ bèmə a lɨmə wen a ngə̀ŋ, byìʼì ando à diʼ kənyʉ̀ kə kətʉ kədiʼkə ə wùwì ngàʼà a ngə̀ŋ Nyìngòŋ.

³⁶ Kənyʉ̀ kə Nyìngòŋ ə diʼ alə̀ ko andiʼ la kə zìtə̀ fa ghə̀ŋ! Kə ko vi to a ghə̀ŋ.

³⁷ Wìʼ sətsen ə kwoʼtə la ghə̀ diʼ nshə̀ʼtə̀ kò ghə̀ kiʼi Kəzhwì kə Ŋwoʼkə, ghə̀ kɨ la kənyʉ̀ ki a ma gàʼà a ghə̀ŋ diʼ mu à gàʼ Bobo.

³⁸ Wìʼ sətsen faŋke lyɨ̀ kənyʉ̀ na kènkə a kənyʉ̀, Nyìngòŋ ə mò ə wen.

³⁹ Ghə̀ŋ ə nsoynə li no nə̀ kədyoʼkə, a vəlemə vwomə, ə nshə̀ʼtə̀ ntɨm yì a ghə̀ lù fa Nyìngòŋ. Kə ghə̀ŋ a ntensə la kə viʼi gàʼà təgaʼ tə kədyàŋ a ngə̀ŋ Nyìngòŋ.

⁴⁰ Alì, ghə̀ŋ sə ne no tèbe ghò, ghə̀ŋ ə ne to a ji ə tɨmə, be ne to akayn.